1-3. (a) Siruwo musinke nampo va tjenge Episarome 147? (b) Yisinke natu lirongera ko pokukonakona Episarome 147?

OSE kupandadeka muntu nsene yina tu hafesa yininke eyi ana rugana. Nsene asi ose kupandadeka vantu, tuna kara nokonda zeyi natu hamberera Jehova Karunga. Ose kuvhura kumuhamberera morwa nonkondo dendi dononene edi atu mono mounsitwe wendi ntani keharo lyendi eli ga likida vantu kupitira monzambo zaMunwendi zosizoweseso.

² Mutjangi gEpisarome 147 ya mu tumangedere a hamberere Jehova. Ntani age kwa korangedere wopeke va hamberere kumwe nendi Karunga.—Resa Episarome 147:1, 7, 12.

³ Kapi tuna diva ogu ga tjenge episarome olyo, nye muntu ogo nampo kwa parukire posiruwo apa Jehova ga ka tengwidire Vaisraeli koJerusarema va tunde kounkwate waBabironi. (Epis. 147:2) Mutjangi ogo kwa hambererere Jehova morwa vantu vendi va ka tengwire va ya mu karere mosirongo sawo. Nye ga geve nokonda dimwe deyi ga hambererere Jehova. Nokonda musinke odo? Ove nokonda musinke adi kutumangeda o ‘hamberere’ Jehova?—Epis. 147:1.

4. Ngapi omu va lizuvhire Vaisraeli apa Koresi ga va zowere mounkwate, ntani morwasinke?

⁴ Gazara tupu omu Vaisraeli va lizuvhire apa va kere mounkwate waBabironi. Awo ngava va sininike asi: “Tu dimbireni po rusumo rokuhamena Siyoni!” Posiruwo sina sitata saJerusarema esi ngano sa va pere konda mokuhamberera Jehova kwa si zonagwire po. (Epis. 137:1-3, 6) Yipo nye, Vajuda kapi va here kudimba. Nomutjima dawo kwa guvire makura va hepere ehengagwido. Ngamoomu ga yi pumbire Karunga age ga zowere vantu vendi kupitira mwaKoresi hompa goVaperesiya. Age kwa fundire Vababironi nokuuyunga asi: ‘Karunga ana pe nge sinka sokumutungira ntembeli moJerusarema. Ano namuvenye one vantu vaKarunga zendeni ko, ano HOMPA Karunga gweni, ngano ta kara neni.’ (2 Hist. 36:23) Sihorokwa oso kwa hengagwidire Vaisraeli ava va kere moBabironi.

5. Yisinke ga uyungire mutjangi gepisarome kuhamena nonkondo daJehova dokuverura?

⁵ Jehova kapi tupu ga hengagwidire Vaisraeli ngombunga nye ga vhulire kuhengagwida nkenye muntu pamundinda. Ayo yina lifana nanaina. Mutjangi gepisarome kwa tjenge kuhamena Karunga asi: “Age kuverura ava va gwa nomutjima, ta dingi yironda yawo.” (Epis. 147:3) Jehova kupakera mbili owo vana kara nomaudigu yi kare asi panyama ndi pamalizuvho. Naina Jehova kutuhengagwida nokuverura nomutjima detu dokuguva. (Epis. 34:18; Jes. 57:15) Age kutupa nondunge nononkondo yipo tu lididimikire maudigu.—Jak. 1:5.

6. Ngapi natu gwanena mo uwa mononkango demEpisarome 147:4? (Tara efano pepenuno 17.)

⁶ Mutjangi gepisarome kwa tere keguru nokuuyunga asi Jehova “yige ga panga sivaro sonombungururu” ntani “kuditumbura nadinye madina gado.” (Epis. 147:4) Morwasinke mutjangi ogu ga uyungilire kuhamena nombungururu? Age nga mono nombungururu nye kapi ga divire asi dingapi da kara. Mwaza nomvhura vantu kwa ya tameka kumona nombungururu dononzi kupitakana pwanare. Vamwe kuuyunga asi monomuraravili kwa kara mo mabiliyona gonombungururu. Ntani asi pwa kara mabiliyona nomabiliyona gonomuraravili. Ose kapi tatu vhuru kuvarura nombungururu. Nye Musiti gwetu age kuditumbura nadinye komadina gado. Ayo kulikida asi nkenye mbungururu mulyo kwaJehova. (1 Kol. 15:41) Ngapi kuhamena vantu ava ga sita? Karunga ogu ga diva nkenye mbungururu nove ga kudiva oku wa kara nomu o lizuvhu ntani neyi wa hepa.

7, 8. (a) Yisinke a kwata egano Jehova apa atu piti momaudigu? (b) Gava sihonena omu Jehova a likida nkenda mokuvatera vantu vendi.

⁷ Jehova kapi tupu ga kudiva nye hena ga kara nononkondo neharo lyokukuvatera momaudigu goge. (Resa Episarome 147:5.) Pamwe kuvhura o lizuvhe asi maudigu goge manzi kapi to vhuru kugalididimikira. Karunga ga diva apa da hulira nonkondo doge age ‘kudiworoka asi ove mbundu zevhu.’ (Epis. 103:14) Morwa kudira kusikilira mo, ose kutura mapuko gokulifana. Ose kulizuvha udona morwa nonkango edi tuna uyunga ndi morwa kukara nomadowo gomadona ndi kunyenena yininke yovakwetu. Jehova kapi ga kara nomaupirankondo  gangoso, nye age kukwata nawa-nawa egano omu atu lizuvhu.—Jes. 40:28.

⁸ Nampo wa limonena omu Jehova ga ku vatera o pite momaudigu. (Jes. 41:10, 13) Pasihonena, apa munazinyetukadi Kyoko muzuvhisi gokukarerera ga dirukilire komukunda gwapeke age kwa ka dompere mutjima. Ngapi omu Jehova ga mu vaterere? Mombungakriste ezi ga ka kere mwa kere vanavazinyetu ava va kwete egano malizuvho gendi. Age kwa lizuvhire ngwendi Jehova ana kumutantera asi: “Ame na kuhara, kapisi morwa o muzuvhisi gokukarerera nye morwa ove munwange ntani wa ligava kwange. Ame nina hara o hafe mokukara gumwe goNombangi dange.” Ngapi Karunga Munankondo nadinye ga ku likida meparu lyoge asi “ediwo lyendi nokuvhura si kuliyereka”?

9, 10. Sininke musinke somuhowo a tu pe Jehova apa a tu vatere? Gava sihonena.

⁹ Natuvenye twa hepa nondya noyidwara ntani mararo. Pasihonena, kuvhura o li pakere sinka sonondya. Nye Jehova kwa sita evhu yipo li vhure kugava nondya kovantu navenye kukwatera mo noyikorama yeeyi. (Resa Episarome 147:8, 9.) Nsene asi Jehova kupa nondya yikorama, kuvhura tu kare nehuguvaro asi age nga tu pa yihepwa yetu.—Epis. 37:25.

¹⁰ Yomulyo po, Jehova kutupa evatero lyopampepo pokutupa ‘mbili zendi, ezi za pitakana unene nondunge nadinye.’ (Fil. 4:6, 7) Pasihonena, Mutsuo namukadendi va mwene omu Jehova ga va vaterere apa lya horokere ekankamo lyevhu kumwe nomankupi gomanene moYapani mo-2011. Awo kwa dukilire keguru lyonzugo mokuhenduka mankupi gomanene. Nampili ngoso, awo va zumbanesere yiweka yawo nayinye. Masiku nagenye awo kwa hingilire momundema monzugo zawo ezi zambandukire. Lyokusa ko, awo kwa paparere eyi nayi vhura kuvakorangeda. Awo kwa gwene tupu buke 2006 Yearbook of Jehovah’s Witnesses. Apa Mutsuo ga penwine buke ozo ta ka litwa posiparatjangwa asi: “Simpagwa sekankamo lyevhu kumwe nomankupi gomanene esi sa dira kukara ko rumwe.” Ruha oro kwa simwitilire kuhamena ekankamo lyevhu eli lya horokere moSumatra mo-2004 eli lya pindwire mankupi gononkondo. Mutsuo namukadendi kwa lilire apa va resere sihorokwa oso. Awo kwa lizuvhire asi Karunga kwa va pere ekorangedo eli va hepere. Jehova kwava vaterere mononkedi dapeke. Kupitira movapuli vakwawo awo kwa gwene nondya noyidwara. Nye eyi ya va korangedere unene kuna kara vanavazinyetugara ava za tumine mbunga zaKarunga mokuyakorangeda womombungakriste zawo. Mutsuo kwa tanta asi: “Ame kwa lizuvhire ngwendi Jehova kwa kere nose a tu pakere mbili. Ayo kwa tu hengagwidire sili.” Pomuhowo Jehova kutupa eyi twa hepa tu nkondopeke epuro lyetu makura konyima age kutupa yihepwa yopanyama.

11. Yisinke natu rugana yipo Karunga a tu vatere?

¹¹ Jehova age nkenye apa “kuzerura valisupipiki,” ndi valinunupiki. (Epis. 147:6a) Yisinke natu rugana yipo Jehova a tu vatere? Twa hepa kukara nelikwatakano lyewa nendi. Nye mokututompoka oyo, twa hepa kulinunupika. (Sef. 2:3) Vantu wokulinunupika awo kundindira Jehova a kohonone po  nkenye udigu una kara po. Jehova kuhafera vantu vangoso.

12, 13. (a) Yisinke twa hepa kunyokera po nsene tuna hara Jehova a tu vatere? (b) Wolye a hafere Jehova?

¹² Nye Karunga ‘kunyikida vadinikarunga.’ (Epis. 147:6b) Kapi tuna hara kukara vantu vangoso. Nsene tuna hara Jehova a twikire kutuhara, twa hepa kunyenga eyi ga nyenga. (Epis. 97:10) Pasihonena, twa hepa kunyenga yirugana yoruhonda. Eyi kutanta asi tu nyokera po nkenye eyi nayi tu twaredesa tu ka hondere ngwendi mafano goruhonda. (Epis. 119:37; Mat. 5:28) Kuvhura yi kare udigu kuyirugana, nye ayo mulyo unene nsene tu yi rugana morwa Jehova nga tu tungika.

¹³ Pwanyoselike kapi tayi tu tompoka, twa hepa kuhuguvara mwaJehova. Kuvhura Jehova yi mu hafese nsene tu huguvara mononkondo danyamwetu ndi dovantu? Hawe. Age kapi ‘ga hafera nonkondo dononkambe, ndi asi a hafere vakwayita wovaradi.’ (Epis. 147:10) Nye, twa hepa kulikwambera kwaJehova a tu vatere. Jehova kapi a roroka kupurakena komakanderero getu. “Age kwa hafera ava va mu tjira, ava va huguvara eharo lyendi lyenene.” (Epis. 147:11) Tu kareni nehuguvaro asi morwa eharo lyendi lyenene age kapi ngatu siga ntani ngatu vatera tu funde po madowo getu gomadona.

14. Yisinke ya hengagwidire mutjangi gepisarome?

¹⁴ Jehova ga tu pa konda zeyi natu pulira asi age ngatu vatera momaudigu getu. Mutjangi gepisarome apa ga gazadarere etungururo lyaJerusarema age kwa dimbire kuhamena Jehova asi: “Age kukoreka marungavero goge; ta tungike vantu woge. Age kugava mpora konomururani doge.” (Epis. 147:13, 14) Mutjangi gepisarome ga gwene ehengagwido pokudiva asi Jehova ga tumbwidilire kukoreka marungavero gositata mokupopera vakareli vendi.

15-17. (a) Ngapi omu atu lizuvhu pamwe kuhamena maudigu getu, nye ngapi Jehova a ruganesa Nonkango dendi mokutuvatera? (b) Gava sihonena esi asi likida asi ‘nonkango daKarunga kugenderera kuwiza.’

¹⁵ Kuvhura o kare nosinka sosinene morwa maudigu aga ono kuligwanekera nago. Nye, Jehova kuvhura a ku pe nondunge o vhure kugalididimikira. Mutjangi gepisarome kwa uyungire kuhamena Karunga asi “age kugava mpangera, makura tazi genderere kuwiza pevhu.” Apa ga uyungire kuhamena Jehova asi age ‘kutuma ndau, kumwaga eundu ntani kutuma kamanya’ age kwa tente hena asi ‘nagumwe si gokuvhura kuparuka komufu ogu a tumu.’ Ntani ga tente hena asi Jehova ‘kugava mpangera a hemune yiterengenze.’ (Epis. 147:15-18) Karunga ogu ga kara nononkondo dokuvhura kupangera ndau nokamanya, kuvhura a ku vatere o funde po nkenye udigu.

¹⁶ Naina, Jehova kutupitisira moNonkango dendi, Bibeli. Ntani ‘nonkango dendi kugenderera kuwiza’ yipo tu gwane evatero lyopampepo eli tuna hepa posiruwo oso. Gazadara ko tupu komauwa aga o gwanene mo moBibeli, moyimbapiratjangwa ‘yomukareli gokulimburukwa gonondunge’ nemelikwamo JW Broadcasting nokointaneta jw.org nomakorangedo govakuronambunga ntani pokukara novapuli vakweni. (Mat. 24:45) Nove wa limonena omu Jehova ga genderera kukupitisira ndi?

¹⁷ Simone ga limonena omu Nonkango daKarunga da mu vatera. Age kwa li zuvhire asi kwato mulyo ntani asi Jehova kapi ga  mu hara. Nye apa nga dompo mutjima nga twikire kukanderera a hundire evatero kwaJehova. Age ga litulire mo hena melirongo lyanyamwendi lyoBibeli. Age kwa tanta asi: “Kwato udigu ou na pita omu Jehova ga dira kuvatera nge.” Oyo ya mu vaterere a kare nonkareso zoruhafo.

18. Yisinke yina kukuninkisa o lizuvhe asi Jehova ga kuhara ntani nokonda musinke deyi no mu ‘hamberera’?

¹⁸ Mutjangi gepisarome ga divire asi Karunga ga here muhoko goVaisraeli. Yigo gwelike muhoko Karunga ga pere “mbudi zendi” ntani ‘nompangera nonoveta dendi.’ (Resa Episarome 147:19, 20.) Nose naina pevhu nyoselike ava zigidisa kedina lyaKarunga. Pokudiva Jehova nokugwana mavyukiso gomoNonkango dendi, ose kukara nelikwatakano lyenene nendi. Ngwendi mutjangi gEpisarome 147, wa kara nonokonda ‘dokuhamberera’ Jehova nokukorangeda wopeke va rugane yokulifana.