Popera magazaro goge
NKORE zoge zonene Satana kuna kukuhomokera, age kuna kuruganesa sininke sosiponga unene. Sininke musinke oso? Aso kuna kara nombudi doyimpempa edi nadi vhura kupukisa magazaro goge.
Mupositoli Paurusa ga divire siponga sonombudi doyimpempa daSatana, nye kapisi Vakriste navenye va divire siponga oso. Vamwe womoKolinte, kwa lihuguvarere vene nokugazara asi kwato yokuvhura kuvaganda mousili. (1 Kol. 10:12) Yiyo nye, Paurusa ga geve erondoro eli asi: ‘Ame na tjira asi moomu lya kumbagerere ezoka Eva merunguruko lyalyo, mpamwe nomagazaro geni nago taga zonauka, mu zumbe uhungami noukuhuki waKristusa.’—2 Kol. 11:3.
Nonkango odo daPaurusa kulikida eyi ya karera nomulyo kudira kulihuguvara nyamwetu. Mokuninka asi tu nyokere po nombudi doyimpempa daSatana, twa hepa kudimburura siponga esi adi retesa po nokulipopera kwado.
SIPONGA MUSINKE ADI RETA NOMBUDI DOYIMPEMPA?
Nombudi doyimpempa kudiruganesa mokupukisa magazaro govantu ntani kukundama eyi ava rugana. Buke zimwe kwa uyunga asi nombudi odo siponga unene. Ntani ado hena kupangera magazaro govantu.—Propaganda and Persuasion.
Morwasinke nombudi doyimpempa da karera siponga? Ado kuvhura kukundama magazaro getu twa hana kuyidivira morwa ado kwa fana ngwendi mpepo zouhungu ezi atu dili kufumbwira. Vance Packard mulirongi gonkareso zovantu kwa tanta asi: “Nombudi doyimpempa kukundama vantu va hana kuyidivira.” Mulirongi gumwe kwa tanta hena asi: “Nombudi
doyimpempa kwa ninkisa vamwe va lihameke moyininke yosiponga unene ngwendi yita elitondororo lyonomuhoko nomaukarelikarunga ntani nayimwe hena.”—Easily Led—A History of Propaganda.Nsene asi vantu kuvatompoka kupukisa vakwawo, ngapi kuhamena Satana? Age ga diva omu va kara vantu kutundilira kesito. Ntani “uzuni mudima” kwa kara mepangero lyendi. Age kuvhura kuruganesa yininke yomouzuni mokuhanesa yimpempa yendi. (1 Joh. 5:19; Joh. 8:44) Yipo nye, Satana ya mu tompoka ‘mokuzonagura nondunge’ dovantu ‘nokupukisa uzuni naunye.’ (2 Kol. 4:4; Ehor. 12:9) Ngapi no nyokera po nombudi doyimpempa?
NKONDOPEKA EPURO LYOGE
Jesus kwa tu ronga eyi nayi tu vatera tu nyokere po nombudi doyimpempa, age kwa tente asi: “Ngomu kwata egano usili, awo ngau mu zowora.” (Joh. 8:31, 32) Moyita, mukwayita ga hepa kudiva oku na gwana mauzera gousili morwa nkore zendi kuvhura zi mu pukise. Ove kupi no gwana mauzera gousili? Jehova ga tu pa mauzera kupitira moNonkango dendi, Bibeli. Amo kugwana mo mauzera aga twa hepa tu nyokere po nombudi doyimpempa daSatana.—2 Tim. 3:16, 17.
Satana nage ga yi diva oyo. Yipo nye, age kuruganesa uzuni ou a tu dompese yipo tu dire kuresa Bibeli nokuzilironga. Wa ha pulisira makoto gendi ga kupukise. (Efe. 6:11) Gwana nonkondo ‘dokudiva’ nawa-nawa usili. (Efe. 3:18) Nye pwa hepa elituromo lyenene mokuyirugana oyo. Ngomu ga yi tanta mutjangi gedina Noam Chomsky asi: “Kwato ogu gokuvhura kukupaparera usili. Aso sininke esi wa hepa kurugana nyaamoge.” Yipo nye, litura mo unene ‘mokukonakona nkenye ezuva matjangwa.’—Yirug. 17:11.
Mokupopera magazaro goge,wa hepa kudimburura sipongaesi adi retesa po nombudidoyimpempa
Satana kapi ana hara o kwate egano usili ou o lirongo. Morwasinke? Kuliza nomauzera gamwe, ago kwa tanta asi nombudi doyimpempa “kuvhura kupukisa vantu usimbu nsene vana va korangeda va dire kugazadara ko.” (Media and Society in the Twentieth Century) Yipo nye kapisi o pure tupu nkenye eyi o zuvhu ove wa hana kugazadara Yis. 14:15) Ruganesa nondunge mokulironga usili yipo o nkondopeke epuro lyoge.—Yis. 2:10-15; Rom. 12:1, 2.
ko. (NYOKERA PO EYI NAYI VHURA KUTUGAUNUNA NDI KUTUFUNDA
Vakwayita ava adi tjilisa nonkore dawo kukara nowoma wokuza va kwa rwe yita. Nonkore odo kuvhura kuninkisa vakwayita va livyuke vene navene ndi va ligaunuke. Mukondi govakwayita woVandovesi kwa tente asi konda zimwe zeyi va va fundire moyita youzuni yokuhova kuna kara asi vantu “kwa pulire yimpempa yononkore dawo.” Satana kuruganesa makoto gokulifana yipo a gaunune nokufunda Vakriste, age kuyirugana oyo pokuretesa po madiro kulizuvha mokatji kawo. Ano vamwe kuvaninkisa va ligore ko kombunga zaJehova morwa nampo asi mbunga zaJehova kwa va tekura momudona.
Ya ha kupukisa, nye pulisira Nonkango daKarunga di ku pitisire. Pasihonena, kombinga zokuretesa po uumwe novanavazinyetu, Bibeli kutukorangeda tu twikire ‘kuligusa-gusira po’ nokukohonona po usimbu madiro kulizuvha. (Koros. 3:13, 14; Mat. 5:23, 24) Bibeli kuturondora tu dire kuligusa ko kovanavazinyetu. (Yis. 18:1) Likonakona nyamoge nsene asi ove kuvhura o nyokere po nombudi daSatana doyimpempa pokulipura asi: ‘Apa munazinyetu ga zonenene nge, ame na rugene yininke yokuhafesa Jehova ndi Satana?’—Gar. 5:16-26; Efe. 2:2, 3.
WA HA ZUMBANESA EHUGUVARO LYOGE
Mukwayita ogu ga dira kuhuguvara mupitisili gwendi, kapi ta vhuru kurwa nawa moyita. Nonkore kukumbagera vakwayita va dire kuhuguvara mupitisili gwawo. Awo kuvhura va uyunge asi: “Kapi to mu vhuru kuhuguvara mupitisili gweni. Ntani mwa ha mu pulisira a mu tware momaudigu.” Nonkore hena kuruganesa mapuko govapitisili va pukise vakwayita. Eyi yiyo a rugana Satana. Age kukondja mokutupukisa yipo tu dire kuhuguvara ava ava pitisire mbunga zaJehova.
Ngapi omu no vhura kulipopera? Tokomena kukwaterera kombunga zaJehova nokukwatesa ko ava ga horowora va zi pitisire 1 Tes. 5:12, 13) Nsene o zuvha nombudi dovarwanesi edi adi moneka ngwendi usili, ‘nokulivinduka si kulimbilirwa’ ndi kuyipura. (2 Tes. 2:2; Tit. 1:10) Kwama epukururo eli va pere Timoteusa. Kwaterera ndi kara mousili ou wa lironga ntani diworoka oku wa u lironga. (2 Tim. 3:14, 15) Pwa kara maumbangi gomanzi aga naga ku vatera oyi pure asi ove kuvhura kuhuguvara mukareli gokulimburukwa ogu ga ruganesa Jehova konyara nomvhura efere mokuturonga usili.—Mat. 24:45-47; Heb. 13:7, 17.
nampili va ture mapuko. (WA HA KARA NOWOMA
Diworoka asi Satana kuvhura kukupukisa kupitira mononkedi dokuvyukilira. Poyiruwo yimwe, age kukuninkisa o lizuvhe woma. Ano kuliza nobuke zimwe kwa tanta asi, woma “kuna kara sininke simwe esi ava ruganesa vantu mokuhanesa nombudi doyimpempa.” (Easily Led—A History of Propaganda) Profesora Philip M. Taylor gomoBritania kwa tanta asi Vaasiliya ngava tjilisa nonkore dawo “pokuruganesa nombudi doyimpempa.” Satana kuruganesa woma wokutjira vantu, mahepeko, nomfa ntani nayimwe hena mokututjilisa tu hageke kukarera Jehova.—Jes. 8:12; Jer. 42:11; Heb. 2:15.
Wa ha pulisira Satana a ruganese woma mokuteza po ulimburukwi woge. Jesus kwa tente asi: “Walye omu tjira ava ava dipaga rutu rwelike, makura va hana kutompora hena yuma.” (Ruk. 12:4) Kara nehuguvaro mwaJehova asi nga ku takamesa nkenye apa nokukupa ‘nonkondo dononene’ ntani nokukuvatera o nyokera po nkenye eyi nayi vhura kuteza po ulimburukwi woge.—2 Kol. 4:7-9; 1 Pet. 3:14.
Kuvhura o ligwanekere nomaukaro gokutjilisa. Nye diworoka Nonkango daJehova edi ga tanterere Josuwa asi: “Kora, o kwate mutjima. Nokukupwaga si ndi asi o tukuke, yeeyi HOMPA Karunga goge pweli poge nkenye oku ngo za.” (Jos. 1:9) Nsene kuna kara noyinka, yigava nayinye kwaJehova kupitira mekanderero. Kara nehuguvaro asi “mbili zaKarunga . . . ngazi kungira mwenyo goge nomagazaro goge” yipo ngo vhure kunyokera po nombudi daSatana doyimpempa.—Fil. 4:6, 7, 13.
To diworoka nonkango edi lya ruganesere erenga lyoVaasiliya mokutjilisa vantu vaKarunga ndi? Alyo kwa tente asi: ‘Kwato eyi ngayi vhura kumupopera koVaasiliya. Ntani Jehova Karunga gweni kwato eyi nga rugana ko.’ Alyo tali gweda ko hena asi Jehova ‘mwene yige ga tu tantera asi tu ya si hanagure po sitata esi.’ Yisinke ga uyungire ko Jehova? Age kwa tente asi: “Neisi no tjilira nonkango edi ono zuvhu nedi vana swawisa nge vakareli vahompa gwaAsiliya.” (2 Vah. 18:22-25; 19:6) Makura Jehova yipo ga tumine muengeli ogu ga ya dipagere vakwayita Vaasiliya 185 000 mesiku limwe.—2 Vah. 19:35.
KARA MUNONGO O PURAKENE NKENYA APA KWAJEHOVA
Wa tarera rumwe sifelemu omu wa mwene muntu asi kuna kumukumbagera ndi? Nampo wa uyungire momutjima asi: ‘Wa ha yi pura, awo kuna kukukumbagera.’ Gazara asi vaengeli nawo kuna kukuzigira pokukutantera asi: “Ya ha kupukisa yimpempa yaSatana!”
Wa ha purakena nombudi daSatana doyimpempa. (Yis. 26:24, 25) Purakena kwaJehova nokumuhuguvara mwanayinye eyi o rugana. (Yis. 3:5-7) Tambura epukururo eli asi: “Munwange kara munongo, makura ame tani hafa. Ame ngani limburura nkenye ogu nga pa nge usima.” (Yis. 27:11) Makura ove ngo vhura kupopera magazaro goge.