1, 2. Morwasinke mouzuni ou ngamu twikilira kukara mo vantu woruhepo?

NAINA monongesefa kuna kara mo ufuki. Vadinkantu kuvadigopera kugwana yirugana. Wovanzi kutura eparu lyawo mosiponga pokuza koyirongo youngawo. Ruhepo kuna lihanene nampili moyirongo youngawo. Vanangawo kuna kungawopa unene ano woruhepo kuna kuhepa unene. Kuliza nomakonakono, mwaza nomvhura vanangawo ngava vhura kungawopa unene kupitakana pwanaina. Nampili ngomu vantu vamwe va kara noyimaliwa yoyinzi, nye mabiliyona govantu kuna kara moruhepo. Jesus nage ga yi kwatesere ko pokutanta asi: “Vahepwe nawo ngomu kara nkenye apa.” (Mar. 14:7) Morwasinke ya karera ngoso?

² Jesus ga yi divire asi ukaro womouzuni ou kapi ngau runduruka dogoro ngau wize Uhompa waKarunga. Nongesefa edi va tumbura mEhororo 18:3 asi “varandesi” ntani maupolitika nomaukarelikarunga kwa hamena kouzuni waSatana. Vantu vaKarunga awo va ligusa ko komaupolitika nomaukarelikarunga goyimpempa, nye wovanzi kapi ava vhuru kuligusa ko konongesefa domouzuni ou.

3. Mapuro musinke natu ka zogera?

³ NgoVakriste, twa hepa kukonakona mutaro gwetu konongesefa pokulipura asi: ‘Ngapi omu nani ruganesa yiweka yange mokulikida ulimburukwi kwaKarunga? Ngapi omu nani dira kulihameka mo unene monongesefa douzuni ou? Yihorokwa musinke yina kulikida asi vakareli vaKarunga kwa mu huguvara momaukaro goudigu?’

4, 5. (a) Moukaro musinke lya pitire erenga lyomosifanekeso saJesus? (b) Epukururo musinke ga geve Jesus kovasikuli vendi?

⁴ Resa Rukasa 16:1-9. Sifanekeso saJesus serenga lyoyimpempa kutuvatera tu gazadare ko momunene. Apa erenga va li hetere asi kuhanagura emona lyahekurwalyo, alyo yipo lya ruganesere ‘nondunge’ ‘pokulipaparera vakaume’ mokugwana evatero apa lya zumbanesere situmbukira salyo. * Jesus kapi ga korangedere varongwa vendi va ruganese yimpempa mokugwana yininke va paruke mouzuni ou. Age kwa tere nkareso ozo asi ‘zovantu womouzuni’ nye kwa ruganesere sifanekeso sina mokuronga varongwa vendi sitwa somulyo.

⁵ Jesus ga yi divire asi ngwendi erenga lina lya kere moukaro woudigu, vasikuli vendi nawo ngayi va digopera kuparuka mouzuni ou una kara ufuki. Yipo ga va korangedere asi: “Omu lipaparere vakweneni nemona lyoyimpempa lyouzuni ou, makura apa ngali pwa, awo [Jehova naJesus] ngava ka mu tambure momambo ganarunye.” Yisinke natu lirongera ko kepukururo lyaJesus?

6. Ngapi omu tuna yi diva asi unangesefa kapi wa kere ruha rositambo saKarunga?

⁶ Nampili ngomu Jesus ga dilire kufaturura eyi ga tumbwilire emona asi ‘yimpempa,’ Bibeli za yi zeresa asi unangesefa kapi wa kere ruha rositambo saKarunga. Jehova kwa pere Adamu naEva yihepwa yawo nayinye mosikunino saEdeni. (Gen. 2:15, 16) Konyima apa Karunga ga powomwenene vagwavekwa mpepo zokupongoka ‘nagumwe si ga tente asi eyi emona lyange nye nayinye kwa yi pakererere.’ (Yirug. 4:32) Muporofete Jesaya kwa pumbire siruwo apa vantu navenye ngava ka hafera yininke yokulisiga-siga pevhu. (Jes. 25:6-9; 65:21, 22) Posiruwo esi, vasikuli vaJesus va hepa “nondunge” mokuparuka pokuruganesa ‘emona lyoyimpempa lyomouzuni ou.’ Nye simpe va hepa kuhafesa Karunga.

7. Epukururo musinke atu gwana mwaRukasa 16:10-13?

⁷ Resa Rukasa 16:10-13. Erenga lyomosifanekeso saJesus kwa tulisire po vakaume yipo li gwanene mo uwa. Nampili ngoso, Jesus kwa korangedere vasikuli vendi va tulise po ukaume naJehova kapisi nositambo sokugwanena mo tupu uwa. Konyima zokutumbura sifanekeso sina, monovelise dokukwama ko Jesus kwa kwatakanesere ‘emona lyoyimpempa’ kumwe noulimburukwi wetu kwaKarunga. Jesus kwa pwagesere sitwa asi ose kuvhura kuyilikida asi ‘vantu wokuhuguvara’ ndi wovalimburukwi monkedi atu ruganesa emona olyo nsene tuna li gwana. Monkedi musinke?

8, 9. Gava yihonena omu vamwe va likida ulimburukwi wawo pokuruganesa emona lyoyimpempa lyouzuni ou.

⁸ Nkedi zimwe omu natu likida ulimburukwi wetu kuna kara pokuruganesa emona lyetu pokukwatesa ko sirugana sokuzuvhisa esi  ga pumbire Jesus. (Mat. 24:14) Mukadonagona gomoIndia kwa kere nosipako omu nga pungura yimaliwa, age kapi nga randa yidaneso. Apa sa zulire yimaliwa ta yi gava va ka yi ruganesa kosirugana sokuzuvhisa. Munazinyetugara gomoIndia kwa kara nosikunino senyango. Mokumona asi mberewa zeraka lyoRumalayalam kwa hepa kuranda enyango olyo, munazinyetu ogo yipo ga tokora kugava komberewa ozo enyango olyo mawoko-woko ngoyigava yendi. Yosili age kuruganesa nondunge. Mokulifana, vanavazinyetu womoGereka nawo kugava nkenye apa magadi oliva nokasi nonondya dapeke kepata lyoVabeteli.

⁹ Munazinyetugara gomoSri Lanka ogu ga dirukira kosirongo nasopeke, kwa gava evango lyendi va pongere mo nokukarera mo yigongi ntani va tunge mo vanavazinyetu wosirugana sosiruwo nasinye. Age kapi a gwanene mo nsonso nye elizambero lyendi kuvatera vazuvhisi womomukunda woruhepo. Ano moyirongo omu va silika sirugana sokuzuvhisa, vanavazinyetu kugava mambo gawo va ruganene mo mapongo, eyi kuvatera vazuvhisi wokukarerera navamwe ava va kara noyimaliwa yoyisesu va kare nevango lyokupongera.

10. Mauwa musinke natu vhura kugwana nsene tu kara nougavi?

¹⁰ Yihonena oyo kulikida asi vantu vaKarunga kuvhura ‘kuvahuguvara mweyi yoyinunu’ morwa awo kuruganesa emona lyawo mokuvatera wopeke. (Ruk. 16:10) Ngapi omu vakaume ava vaJehova ava lizuvhu kuhamena malizambero gawo? Awo va yi kwata egano asi ugavi kuna kara nkedi zokugwana ‘emonazuni.’ (Ruk. 16:11) Munazinyetukadi ogu a gava nkenye apa mokukwatesa ko yirugana yoUhompa kwa tumbura mauwa aga ga gwana pokutanta asi: “Kugava kwa vatera nge ni mone yininke yokutetukisa monomvhura nadinye. Ntani hena ya vatera nge ni hare kuvatera wopeke. Ame na lironga kugusira po vakwetetu nokutambura mapukururo gawo nokulididimikira nsene vana tura mapuko.” Wovanzi va yi dimburura asi kukara nougavi ya va pameka pampepo.—Epis. 112:5; Yis. 22:9.

11. (a) Ngapi omu eharo lyetu lyokugava ali likida ‘nondunge’? (b) Monkedi musinke mbunga zaJehova zina kuruganesa yimaliwa pauhunga? (Tara efano pepenuno 7.)

¹¹ Ose hena kulikida ‘nondunge’ apa atu ruganesa yiweka yetu mokukwatesa ko Uhompa. Nondunge kutupa mpito tu vatere wopeke. Vanavazinyetu ava va kara noyiweka nye kapi ava lihameke mosirugana sosiruwo nasinye ndi va dirukire oku kuna hepa vazuvhisi, kuvahafesa pokudiva asi yigava yawo kukwatesa ko wopeke mosirugana sokuzuvhisa. (Yis. 19:17) Yigava oyo kuvatera mokunduruka yimbapiratjangwa nokukwatesa ko yirugana yokuzuvhisa monomukunda doruhepo omu mwa kara vantu wokupurakena mbudi zongwa. Moyirongo ngwendi Kongo naMadagascar ntani Rwanda, Nobibeli  kukosa ndiro unene. Rorunzi vanavazinyetu kuhepa kuhorowora pokatji kokuranda Bibeli ndi nondya. Nye morwa yigava ntani monkedi omu mbunga zaJehova azi ruganesa “pauhunga” yimaliwa awo va vhura kutoroka Nobibeli yipo vanavazinyetu ntani nava vana hara sili kulironga Bibeli va zi gwane mawoko-woko. (Resa 2 Vakolinte 8:13-15.) Yipo nye navenye ava ava gava nava ava gwanene mo uwa kuvhura kukara vakaume vaJehova.

12. Ngapi Abirahamu ga likidire asi ga huguvarere mwaKarunga?

¹² Nkedi zimwe omu natu tulisa po ukaume naJehova kuna kara pokudira kulihameka mo unene monongesefa domouzuni ou nokukondjera ‘emonazuni.’ Abirahamu mugara gepuro, kwa sigire sitata sawo soungawo Uru nokukatunga monotenta morwa kwa here kukara kaume kaJehova. (Heb. 11:8-10) Age kwa huguvarere mwaKarunga mevango lyokuhuguvara memona. (Gen. 14:22, 23) Jesus kwa korangedere mumati gongawo a kare nepuro lyangoso asi: “Ano nye nsenesi wa hara kusikilira mo, zende nye o ka randese emona lyoge mudima, o ka yi gavere vahepwe, ngo ka gwanene po emonazuni meguru. Makura ntani nye no ka wiza, o ya kwame nge.” (Mat. 19:21) Mumati gwina gongawo kapi ga kere nepuro ngwendi Abirahamu, nye wovanzi kwa kara nepuro lyenene.

13. (a) Epukururo musinke Paurusa ga geve kwaTimoteusa? (b) Ngapi natu tura pasirugana epukururo lyaPaurusa?

¹³ Timoteusa kwa kere mugara gepuro. Paurusa kwa tumbwire Timoteusa asi “mukwayita gomuwa gwaJesus Kristusa” nokumutantera asi: “Mukwayita moyirugana yendi kwa hara a hafese mupitisili gwendi, kapisi a liture hena mweyi yokuparura rutu.” (2 Tim. 2:3, 4) Vasikuli vaJesus kukwatera mo wokupitakana pemiliyona ava va kara mosirugana sosiruwo nasinye kutura pasirugana epukururo olyo lyaPaurusa kuliza noukaro wawo. Awo kunyokera po matjingiso gounangesefa pokudiworoka mpango ezi asi: “Kulya makongo goyimaliva, to kara mupika gogu ga yi ku pa.” (Yis. 22:7) Satana kuna hara tu ruganese siruwo setu nasinye nononkondo detu yipo tu kare vapika wouzuni ou. Matokoro gamwe kuvhura ngaga tu ninkise tu kare nomakongo nomvhura dononzi. Vamwe kukorota yimaliwa yoyinzi yipo va futire mambo konosure dokuzeruka ndi va rugane makwareko gomanene, eyi kuvaninkisa va kare nomakongo gomanzi. Ose kuruganesa nondunge mokurerupika eparu lyetu nokusesupika makongo noyifutwa yimwe, eyi kutuninkisa tu manguruke mo moupika womouzuni yipo tu karere Karunga.—1 Tim. 6:10.

14. Yisinke natu tokomena kurugana? Gava yihonena.

¹⁴ Mokurerupika eparu lyetu twa hepa kutura pomuhowo yomulyo po. Valikwali vamwe kwa kere nongesefa zonene. Nye morwa va here kutengura mosirugana sosiruwo nasinye yipo va randesere ngesefa zawo nosiniva ntani yiweka yawo yimwe. Makura yipo va lizamberere va ka vatere mokutunga mberewa zonene moWarwick, moAmerika. Awo va ka haferere kukarugana yivike yongandi kumwe namunwawo natamweyi zawo koBeteli ntani novakondi womugaraava va ka rugene nawo ketungo. Munazinyetukadi a rugana uzuvhisi wokukarerera moColorado, moAmerika, kwa gwene yirugana kombanga eyi nga rugana mazuva gongandi mosivike.  Muhona kwa haferere yirugana yendi, makura yipo va here kumukutilira nokuzerura mfuto zendi pwarutatu. Nye age ga nyokere morwa ga yi dimbwilire asi ta yi donganesa siruwo sendi sokuzuvhisa. Eyi kuna kara yihonena yimwe yovakareli vaJehova ava va tura po malizambero. Etokomeno lyangoso lyokutura muhowo Uhompa kulikida asi ukaume wetu naJehova mulyo kwetu kupitakana emona lyouzuni ou.

15. Yirugana musinke ayi reta ruhafo?

¹⁵ Kukara nemona lyenzi kapi yina kutanta asi Karunga kuna kukutungika. Jehova kutungika ava va ‘ngawopa moyirugana yoyiwa.’ (Resa 1 Timoteusa 6:17-19.) Pasihonena, apa Lucia * gomoItalia ga zuvhire asi moAlbania muna hepa vazuvhisi, yipo ga dirukilire kosirongo oso momvhura 1993, kapi ga kere noyirugana nye kwa huguvarere mwaJehova. Age kwa lirongere eraka lyomosirongo oso ntani ga vatera vantu wokupitakana 60 mokuligava kwaJehova. Nampili ngomu vanavazinyetu wovanzi ava dili kudirukira komavango oku vana hepa vazuvhisi, nkenye eyi atu rugana mokuvatera wopeke va gwane nzira zokutwara komwenyo gwanarunye nokutwikira kugenda monzira ozo, ose ngatu lipongaikira emona lyemeguru.—Mat. 6:20.

16. (a) Yisinke ngayi ka horokere nongesefa domouzuni ou? (b) Ngapi omu nayi kundama mutaro gwetu kemona eli twa kara nalyo?

¹⁶ Jesus kwa tente asi: ‘Apa ngali pwa emona’ nye kapisi ‘nsene ngali pwa.’ (Ruk. 16:9) Momazuva aga gopouhura moyirongo yimwe nombanga kwa pata ntani ekonomi kwa gwa nye komeho yininke ngayi ka donapa unene. Uzuni naunye waSatana kukwatera mo upolitika, maukarelikarunga ntani unangesefa ngayi ka haga po. Hesekiyeli naSefaniya kwa pumbire asi ngorodo nosisiliveli eyi ava ruganesa unene monongesefa ngayi ka kara ya hana mulyo. (Hes. 7:19; Sef. 1:18) Ngapi natu lizuvha nsene u wiza uhura nokuyadimburura asi ose kwa lipongaikira ‘emona lyoyimpempa lyomouzuni ou’ mevango lyokulipongaikira emonazuni? Ose ngatu fana ngwendi muntu ogu ga lipongaikira meparu lyendi nalinye yimaliwa yoyimpempa. (Yis. 18:11) Yosili emona olyo ngali ka pwa, yipo nye tu li ruganeseni mokutulisa po ‘ukaume’ naJehova. Nkenye eyi atu rugana mokukwatesa ko Uhompa waJehova kutungawopeka pampepo.

17, 18. Yisinke vana kundindira komeho ava ava tulisa po ukaume naKarunga?

¹⁷ Apa ngau wiza Uhompa waKarunga yipangero kapi ngayi kara ko ntani kapi ngatu futira mambo ndi nondya, ose ngatu kara nonondya dononzi. Epata lyaJehova lyepevhu ngali hafera eparu. Mevango lyokukapungura ngorodo nosisiliveli notumanya tondiro ose ngatu ka yi ruganesa mokukaliwapekesa ko. Yitji nomamanya noyivera yononkondo ngatu vhura kukayiruganesa mokukatungisa ko mambo gomawa. Vakaume vetu ngava vhura kukatuvatera mawoko-woko. Mouzuni woupe natuvenye ngatu ka ruganesa yininke eyi ga sita Jehova.

¹⁸ Oyo kuna kara yimwe eyi ngava vhura kukahafera ava ava tulisa po ukaume naJehova. Vakareli vaJehova pevhu ngava ka zigira noruhafo apa Jesus nga ka uyunga asi: “Wizeni oku, one ava ga swera Tate, mu ya ture moUntungi ou va mu wapaikira kutunda ketameko lyouzuni!”—Mat. 25:34.