1. Yisinke va hepa kutokora vadinkantu kuhamena meho zawo, ntani morwasinke nava dilira kukara noutjirwe? (Tara efano.)

VADINKANTU nomu yi kwatesa ko asi komeho mu ze morugendo, ya wapa kutokora asi kupi no za. Eparu kwa fana ngwendi rugendo ano siruwo esi no liwapaikira eyi ngo rugana meparu kuna kara paapa ono kara simpe mudinkantu. Nye kuvhura yi kare udigu kuliwapaikira eyi ngo rugana. Mukadona gedina Heather kwa tanta asi: “Ayo kutjilisa kutura po matokoro kuhamena eyi ngo rugana meparu lyoge nalinye.” Nye wa ha tjira. Jehova kwa tumbwidira vantu vendi asi: “Ame nyame Karunga goge – patupu yokukutjilisa! Ngani ku nkondopeka tani ku kwafa; ngani ku popera tani ku parura.”—Jes. 41:10.

2. Ngapi ono yi diva asi Jehova kuna ku harere o liwapaikire meho zongwa?

² Jehova kuna kukukorangeda o liwapaikire meho zongwa. (Muud. 12:1; Mat. 6:20) Age kuna ku harere o hafe. Umbangi owo kuumona moyininke eyi ga sita. Jehova kutupakera hena mbili ntani kuturonga omu natu gwana ruhafo meparu. Jehova kutantera ava ava nyoka mapukururo gendi asi: ‘One kwa lihorowera kurugana udona. . . . Nye ava ava kerere nge ngava hafa, nye one ngomu swauka. Awo ngava dimba morwaehafo.’ (Jes. 65:12-14)  Apa vakareli vaJehova ava tura po yitambo yoyiwa, awo kumuhafesa.—Yis. 27:11.

3. Yitambo musinke ana ku harere Jehova?

³ Yitambo musinke ana ku harere Jehova? Age kwa sita vantu va gwane ruhafo pokumudiva nokumukarera noulimburukwi. (Epis. 128:1; Ruk. 11:28) Nye yikorama ayo kwa diva tupu kulya nokunwa ntani kulivhara. Karunga kuna ku harere o gwane ruhafo pokutura po yitambo yoyiwa. Jehova age “Karunga geharo” ntani goruhafo ogu ga ungire vantu ‘va mu fane.’ (2 Kol. 13:11; Gen. 1:27) Ngo gwana ruhafo nsene o honena Karunga. Nove wa li monena usili wononkango edi asi: “Kugava kwa kara nerago, kwa pitakana kutambura”? (Yirug. 20:35) Yosili nsene o gava ngo gwana ruhafo meparu. Yipo nye, Jehova kuna ku harere asi o ture po yitambo eyi ngayi likida asi wa mu hara ntani wa hara wopeke.—Resa Mateusa 22:36-39.

4, 5. Yisinke ya reterere Jesus ruhafo?

⁴ Jesus Kristusa ga tura po sihonena sosiwa kovadinkantu. Apa ga kere munona nage nga hafere kudana. Nonkango daKarunga kwa tanta asi: ‘Pwa kara siruwo soruhafo, . . . nosiruwo sokudana.’ (Muud. 3:4) Jesus ga kere nelikwatakano lyewa naJehova pokulironga Matjangwa. Apa ga kere nonomvhura 12, varongi ava ga ka gwene kontembeli “kwa va tetwire nondunge dendi nomalimbururo gendi” kuhamena yininke yopampepo.—Ruk. 2:42, 46, 47.

⁵ Apa Jesus ga ya kulire age ga kere noruhafo. Yisinke ya mu reterere ruhafo? Age ga yi divire asi Karunga kwa mu harerere a “udisire vahepwe Mbudi zoNgwa, . . . ano vatwiku emahuko.” (Ruk. 4:18) Pokurugana eyi ga mu harerere Karunga ya mu reterere ruhafo. Episarome 40:8 kwa faturura malizuvho gaJesus asi: “Ame kuna tokomene po yokurugana eharo lyoge Karunga gwange!” Jesus nga hafere kuronga vantu kuhamena oGuhwe vemeguru. (Resa Rukasa 10:21.) Sikando simwe konyima zapa ga rongere mukadi kuhamena ukarelikarunga wousili Jesus kwa tente asi: “Nondya dange dedi dokurugana mpango zogu ga tuma nge nedi dokusikisa mo sirugana sendi.” (Joh. 4:31-34) Kulikida eharo kwaKarunga nokovantu ya reterere Jesus ruhafo. Nove kuvhura yi ku retere ruhafo nsene o likida eharo kwaKarunga nokovantu.

6. Morwasinke ya karera nomulyo kuzogera noVakriste ava va kura pampepo kuhamena yitambo yoge?

⁶ Sinzi soVakriste kwa tamekere uzuvhisi wokukarerera apa va kere vadinkantu ano oyo kwa va retera ruhafo. Kuvhura o zogere nawo kuhamena yitambo yoge. Bibeli kwa tanta asi: “Tambura mapukururo nagenye, moomu o vhulire, makura to ragopa. Nye nsene kapisi yimo, to hudipara.” (Yis. 15:22) Vanavazinyetu owo va kura pampepo ngava vhura kukufatwilira asi sirugana sosiruwo nasinye kugava erongo eli ngali ku vatera meparu lyoge. Jesus ga lirongere yininke yoyinzi koGuhwe apa ga kere meguru, nye simpe ga ya twikilire kulironga apa ga ya kere pevhu. Pasihonena, age ga limonenene ruhafo oru aru tundu mokuzuvhisa mbudi zongwa nokukara noulimburukwi momaudigu. (Resa Jesaya 50:4; Heb. 5:8; 12:2) Tu tarurureni eyi sirugana sosiruwo nasinye nasi ku retera ruhafo.

7. Morwasinke vadinkantu wovanzi ava haferere kutulisa po varongwa?

⁷ Jesus kwa tente asi: ‘Yipo nye nomu zira mu ka va ninke va kare varongwa vange, mu ka va ronge.’ (Mat. 28:19, 20) Nsene wa litulira po sitambo sokutulisa po varongwa, ove kwa horowora sirugana somulyo po sokuyererepeka  Karunga. Ngwendi moomu ya kara nankenye sirugana, wa hepa kukara noudivi. Munazinyetu gedina Timothy ogu ga tamekere uzuvhisi wokukarerera moudinkantu kwa tanta asi: “Ame kwa hara kukarera Jehova mosirugana sosiruwo nasinye morwa yizo nkedi zimwe ani likida asi na mu hara. Pomuhowo kapi na kere novarongwa woBibeli, nye konyima tani dirukire komukunda gwapeke, kapi pwa pitire kwedi tani gwana varongwa woBibeli. Murongwa gumwe kwa tamekere kuwiza komapongo. Apa na ka tundire koSikora zoBibeli zoVagara woVadike zomakwedi gavali, * yipo va tumine nge komukunda gwapeke, ame na ka tamekere kulironga Bibeli novantu vane. Ame kuhafera kuronga vantu, morwa kumona omu mpepo zokupongoka zina kuvavatera.”—1 Tes. 2:19.

8. Ngapi vadinkantu vamwe va lihameka mo unene mosirugana sokutulisa po varongwa?

⁸ Vakriste vamwe wovadinkantu kwa lironga eraka lyapeke. Pasihonena, Jacob gomoAmerika kwa tjanga asi: “Apa na kere nonomvhura ntambali sinzi sava ngani dimbi nawo sure kwa kere Vavietnam. Ame kwa here kuvatantera ko kuhamena Jehova, konyima zosiruwo yipo na tokwere kulironga eraka lyawo. Ame ngani ruganesa Ruhungu roRuingilisa nokuhetakanesa noRuhungu roVavietnam. Na tulisire po hena vakaume ava va kere mombungakriste zemeraka olyo. Apa na kere nonomvhura 18 yipo na tamekere uzuvhisi wokukarerera. Konyima tani ya zi koSikora zoBibeli zoVagara woVadike. Oyo kwa vatera nge mosirugana sange souzuvhisi wokukarerera mokambunga koVavietnam omu nina kara nyamelike mukuronambunga. Sinzi soVavietnam kwa va tetukisa mokumona asi na lironga eraka lyawo. Awo kutambura nge momambo gawo ntani ame kulironga nawo Bibeli nkenye apa. Ngesi vamwe va gwana ekuho.”—Hetakanesa Yirugana 2:7, 8.

9. Yisinke asi tu rongo sirugana sokutulisa po varongwa?

⁹ Kutulisa po varongwa kuna kara sirugana omu no lironga kurugana nawa nokudiva kuuyunga novantu nokukara nouradi. (Yis. 21:5; 2 Tim. 2:24) Unene po aso kureta ruhafo morwa kukuvatera o dive nawa Matjangwa. Ntani hena kukuronga omu no ruganena kumwe naJehova.—1 Kol. 3:9.

10. Ngapi no gwana ruhafo nampili momukunda omu ava dili kutambura mbudi zongwa?

¹⁰ Nampili vantu wovasesu tupu ava tambura mbudi zongwa, simpe kuvhura o hafere sirugana sokutulisa po varongwa. Mokutulisa po varongwa, mbungakriste kuruganena kumwe mokupapara vantu wonomutjima donongwa. Nampili ngomu asi munazinyetu gumwe tupu na vhura kugwana muntu ogu na ya kara murongwa, nye natuvenye kuhafa morwa kulihameka mo mokupapara vantu vangoso. Pasihonena, Brandon kwa zuvhisire nomvhura ntane momukunda omu ngava dili kutambura mbudi zongwa. Age kwa tanta asi: “Ame kwa hara kuzuvhisa mbudi zongwa morwa azo kuna kara mpango zokutunda kwaJehova. Ame kwa tamekere uzuvhisi wokukarerera apa na mene sure. Ame kuhafera kukorangeda vadinkantu ntani nokumona omu vana kutura po ezokomeho mombungakriste zetu. Apa na ka tundire koSikora zoBibeli zoVagara woVadike, kwa tumine nge komukunda gwapeke. Ame kapi na gwana murongwa ogu ga tura po ezokomeho a gwane ekuho, nye wopeke ya va tompoka. Ame nina hafa kweyi na tulire po sitambo sokulihameka unene mosirugana sokutulisa po varongwa.”—Muud. 11:6.

11. Sirugana musinke hena simwe esi ava hafere vadinkantu vamwe?

¹¹ Pwa kara nompito dononzi mokukarera  Jehova. Pasihonena, vadinkantu wovanzi kulizambera mosirugana sokutunga. Pana hepa Yinyanga yoUhompa yoyinzi. Mavango ogo kufumadekesa ko Jehova, yipo nye mokuvatera kugatunga ngo gwana ruhafo. Ntani ngo gwana ruhafo pokurugana kumwe novapuli vakweni. Pokulihameka mosirugana sokutunga mavango goUhompa, ngo lironga kurugana unene nokukwama mavyukiso gava vana kupitisira etungo ntani ngo diva omu no rugana o nyokere po yiponga ketungo.

12. Ngapi omu uzuvhisi wokukarerera au twaredesa konompito dimwe?

¹² Munazinyetugara gedina Kevin kwa tanta asi: “Kutunda unona wange, ame kwa here kukarera Jehova mosirugana sosiruwo nasinye. Apa na kere nonomvhura 19, yipo na tamekere uzuvhisi wokukarerera. Ame ngani rugana mazuva gongadi kwamunazinyetu ogu ga kere mutungi yipo ni lirere nyamwaange. Ame na lirongere kutura yipereki nomakende ntani mavero. Konyima tani ya rugana nomvhura mbali kumwe nombunga ezi azi vatere poyimpagwa mokuwapukurura Yinyanga yoUhompa ntani nomambo govanavazinyetu. Apa na zuvhire asi moAfrika Mbindakano vana hepa wokutunga, yipo na tulire mo ehundiro makura tava tambura nge. MoAfrika, nkenye sivike ame kuza komavango gokulisiga-siga mokukatunga Yinyanga yoUhompa. Vanavazinyetu ava ani rugana nawo kuna kara ngwendi ekoro lyange. Ose kwa tunga kumwe nokulironga kumwe Bibeli ntani kurugana kumwe. Ame hena kuhafera kuzuvhisa nkenye sivike novanavazinyetu womosirongo oso. Yitambo eyi na litulilire po kutunda unona wange kwa retera nge ruhafo.”

13. Ngapi sirugana sokoBeteli asi retere vadinkantu ruhafo?

¹³ Vamwe ava va sikisa mo yitambo yawo yokukarera Jehova mosirugana sosiruwo nasinye  kuna kurugana koBeteli. Yirugana yokoBeteli kureta ruhafo morwa nayinye eyi ava rugana ko kuyiruganena Jehova. Epata lyokoBeteli kurugana mokugava nondya dopampepo. Dustin ogu a rugana koBeteli kwa tanta asi: “Apa na kere nonomvhura ntane, ame kwa litulire po sitambo sokukara mosirugana sosiruwo nasinye, ano apa na mene sure tani tameke uzuvhisi wokukarerera. Konyima zomvhura zimwe noharufa yipo va tambwire nge koBeteli oku na ka lirongere kuruganesa ehina lyokunduruka ano konyima tani lirongo yirugana yonokompyuta. KoBeteli, ame kuhafera kuzuvha ezokomeho lyosirugana sokutulisa po varongwa uzuni mudima. Ame kwa hara kurugana koBeteli morwa ose kuvatera vantu va hedere pepi naJehova.”

14. Ngapi no liwapaikira mokuyakara muzuvhisi gosiruwo nasinye?

¹⁴ Ngapi no liwapaikira mokuyakara muzuvhisi gosiruwo nasinye? Kutunga po yikara yoSikriste ngayi kuvatera yi ku tompoke kukarera Jehova. Yipo nye, litura mo unene mokulironga Nonkango daKarunga nokuteda ko ntani papara nonkedi omu no likida epuro lyoge komapongo. Nsene kuna kudimba sure, kuvhura simpe o gwane ediwo ngomu ono kuzuvhisa mbudi zongwa. Likida elituromo movantu pokupura mapuro gomawa nokupurakena nawa komalimbururo gawo. Ntani kuvhura o vatere mombungakriste zeni pokuzeresa nokuwapeka Sinyanga soUhompa. Jehova kumuhafesa kuruganesa vantu ava va linunupika ntani ava va kara neharo lyokuligava. (Resa Episarome 110:3; Yirug. 6:1-3) Mupositoli Paurusa kwa zire kumwe naTimoteusa mosirugana soutumwa morwa “ngava mu tangauka.”—Yirug. 16:1-5.

15. Yisinke no rugana mokugwana yirugana yokulireresa ko?

¹⁵ Sinzi sava ava rugana uzuvhisi wokukarerera va hepa yirugana. (Yirug. 18:2, 3) Kuvhura o lironge yirugana yokomawoko yipo o vhure kugwana yirugana yokurugana mazuva gongandi momukunda gweni. Pokutulisa po yitambo yoge, tantera ko mutareli gonombunga ntani vazuvhisi wokukarerera womomukunda gweni. Va pura kuhamena yirugana eyi ya wapera vazuvhisi wokukarerera. Ntani ngomu za uyunga Bibeli, ‘hundira HOMPA a tungike nompangera doge, ntani ngo ragopa mokudisikisa mo.’—Yis. 16:3; 20:18.

16. Ngapi kukarera Jehova moudinkantu woge ngayi wapaikira koyitumbukira yimwe komeho?

¹⁶ Kara nehuguvaro asi Jehova ana hara ngo “gwane” ruhafo meparu. (Resa 1 Timoteusa 6:18, 19.) Sirugana sosiruwo nasinye ngasi kureta kumwe novapuli vakweni vana kurugana yokulifana ntani ngasi kuvatera o kure pampepo. Vamwe va yi dimburura asi kukarera Jehova moudinkantu kwa va vatera va gwane ruhafo mononkwara. Rorunzi ava va rugene uzuvhisi wokukarerera komeho va ya kware, awo kwa ya twikira mosirugana oso novalikwali vawo.—Rom. 16:3, 4.

17, 18. Ngapi omu eharo ali tu vatere tu litulire po yitambo?

¹⁷ Mokulitulira po yitambo wa hepa kukara neharo. Episarome 20:4 kwa tanta kuhamena Jehova asi: “Ngano ta ku pe eyi ono gazara, a sikise mo nayinye eyi ono hara kurugana.” Yipo nye, gazadara ko omu ono hara kuruganesa eparu lyoge. Gazadara ko eyi ana kurugana Jehova naina ntani nomu no vhura kulihameka mo mosirugana sendi. Makura rugana eyi ayi mu hafesa.

¹⁸ Kukarera Jehova paapa wa hulira ngayi kuretera ruhafo morwa azo kuna kara nkedi ezi atu vhuru kumuyererepeka. Yipo nye, “hafa mwaHOMPA, age nga ku pe eyi gwa tokomena mutjima goge.”—Epis. 37:4.