1. Yisinke twa hara natuvenye?

NGAPI omu no lizuvha nsene gumwe ogu wa diva a divara edina lyoge ndi a dira kukudimburura? Ayo kuvhura yi ku guvise. Morwasinke? Morwa natuvenye kwa hara asi vantu va tu dive. Nye unene po, ose hena kwa hara asi vantu va dive yininke eyi twa tompora.—Num. 11:16; Joba 31:6.

2, 3. Morwa kudira kusikilira mo, nkareso musinke nazi tu kundama? (Tara efano.)

² Nye nsene kapi tuna kutakamesa kuvhura tu kare nonkareso zokulipaparera mfumwa. Nkareso ozo kuvhura kutuninkisa tu hare ngano asi vantu va tu uyunge momuwa ndi va tu kangange. Mouzuni ou waSatana vantu kwa hara kukondjera efumano mevango lyokupa Jehova mfumwa nokumukarera.—Ehor. 4:11.

³ Momazuva gaJesus, vampitisili womaukarelikarunga kwa kere nomutaro gwepuko kuhamena kudivikwa. Jesus yipo ga rondwere varongwa vendi asi: “Omu takamese valirongi  womatjangwa, ava va hara kudwara yikoverero yoyire nomalikunda-kundo gopomarandero nomavega gomawa po monosinagoge nomavega govanekuto moyipito.” Age kwa tente hena asi: “Vangesi ngava va pangwira momudigu.” (Ruk. 20:46, 47) Mokulisiga, Jesus kwa pandadekere mufisayendi gomuhepwe ogu ga dilire kukondjera kudivikwa apa ga geve yigava. (Ruk. 21:1-4) Monkedi omu Jesus ga tere yininke kwa lisigire nomu ngava yi tara wovanzi. Mosirongwa esi tatu ka lironga omu natu kondjera po kudivikwa kwaJehova mevango lyokulipaparera mfumwa mouzuni.

4. Kudivikwa musinke komulyo twa hepa kukondjera ntani morwasinke?

⁴ Kudivikwa musinke komulyo twa hepa kukondjera? Kapi tuna hara kudivikwira koyininke yoyinene eyi ava kondjere vantu mouzuni ou ngwendi elirongo lyokuzeruka ndi unangesefa. Paurusa kwa uyungire kudivikwa komulyo po apa ga tente asi: ‘Ntaantani ngomu muna diva Karunga ndi ni tante asi, Karunga ana mu diva yinke hena nomu tengwira konompepo da hana nonkondo ado da hana mutompo, edi ngomu ruganene nare, mu kare vapika vado?’ (Gar. 4:9) Aso sininke sosiwa sili nsene atu ‘diva Karunga,’ Musiti gwanayinye. Jehova ga tu hara ntani ana hara tu ture po elikwatakano lyewa kumwe nendi. Jehova kwa tu sita yipo tu kare vakaume vendi.—Muud. 12:13, 14.

5. Yisinke natu rugana yipo Jehova a tu dive nawa-nawa?

⁵ Mosesa kwa kere kaume kaJehova. Apa ga likwamberere kwaJehova a dive nompango dendi momunene makura Jehova ta mu tantere asi: “Ngani yi rugana, moomu ono tanta, yeeyi ame kwa ku hafera, ame hena na ku diva nawa-nawa.” (Ex. 33:12-17) Nose ngatu gwana matungiko nsene Jehova a tu diva nawa-nawa. Yisinke natu rugana yipo Jehova a tu dive nawa-nawa? Twa hepa kumuhara nokuligava kwendi.—Resa 1 Vakolinte 8:3.

6, 7. Yisinke nayi tu ninkisa tu teze po elikwatakano lyetu naJehova?

⁶ Nampili ngoso, twa hepa kutwikira kunkondopeka elikwatakano lyetu naGuhyetu gemeguru. Ngwendi Vakriste ava ga tjangerere Paurusa, nose twa hepa kunyokera po kutengwira “konompepo da hana nonkondo ado da hana mutompo” domouzuni ou kukwatera mo kuhara kudivikwa. (Gar. 4:9) Vakriste ava ga tjangerere kwa tulire po ezokomeho, ntani Karunga ga ya va divire. Nye Paurusa kwa tente hena asi, Vakriste owo kwa ya “tengwilire” koyininke ya hana mutompo. Monkango zimwe Paurusa kwa uyungire asi: “One kwa tura po ezokomeho, nye yiyo hena muna kutengwira koyininke ya hana mulyo.”

⁷ Kuvhura yi tu horokere oyo ndi? Nhi, kuvhura. Ngwendi Paurusa, apa twa ya divire Jehova ose kwa ya sigire yininke yomouzuni ngwendi kuhara kufumana. (Resa Vafilipi 3:7, 8.) Ose nampo kwa sigire elirongo lyokuzeruka ndi yirugana yokutambura yimaliwa yoyinzi ndi nampo nongesefa dononene. Ntani nampo ose kwa divire udano wongandi ndi kudimba nawa eyi ngano ya tu ninkisire tu ngawope nokufumana, nye twa yi nyokerere po.  (Heb. 11:24-27) Ayo kapi ya wapa kulivera koyininke eyi twa siga morwa kuvhura ngatu yi kondjere hena. *

8. Yisinke nayi tu vatera tu twikire kudivikwa kwaJehova?

⁸ Ngapi natu twikira kudivikwa kwaJehova mevango lyokudivikwira mouzuni ou? Twa hepa kudiworoka yitwa yivali yomulyo. Sokuhova, Jehova kapi a divara eyi ava mu ruganene vakareli vendi wovalimburukwi. (Resa Vahebeli 6:10; 11:6) Age kwa hara vakareli vendi ntani age kuyitara asi ‘uhahungami’ ndi yidona nsene a divara eyi ava mu ruganene. Jehova ga “diva ava vendi mo.” (2 Tim. 2:19) Age hena ‘kupakera mbili vantu wovahungami’ ntani ga diva omu ava yoworora mo momaheteko.—Epis. 1:6; 2 Pet. 2:9.

9. Gava ko sihonena simwe omu Jehova ga yi likidire asi ga hara vantu vendi.

⁹ Poyiruwo yimwe, Jehova kwa likidire vantu vendi mononkedi dokutetukisa asi ga va hara. (2 Hist. 20:20, 29) Sihonena simwe kuna kara apa Jehova ga poperere vantu vendi kwaFarawo pEfuta lyEgeha. (Ex. 14:21-30; Epis. 106:9-11) Esi kwa kere sihorokwa sosinene morwa vantu kwa ya si diworokere nampili konyima zonomvhura 40. (Jos. 2:9-11) Ayo mulyo kudiworoka yihorokwa oyo ngomu tuna kundindira apa Gogo zaMagogo nga ka tu homokera. (Hes. 38:8-12) Apa ngayi ka horoka oyo, ose ngatu ka hafa unene kweyi twa kondja kudivikwa kwaJehova, mevango lyokudivikwira mouzuni ou.

10. Sitwa musinke hena twa hepa kudiworoka?

¹⁰ Sitwa sauvali twa hepa kudiworoka kuna kara asi: Jehova kuvhura kutufuta mononkedi edi natu dira kundindira. Vantu ava ava rugana yoyiwa nositambo asi va va mone, kapi ngava gwana mfeto kwaJehova. Morwasinke? Morwa awo kugwana mfeto zawo, apa ava va kanganga wopeke. (Resa Mateusa 6:1-5.) Nye, Jesus kwa tente asi oGuhwe kunomena “mehoramo” vantu ava ava ruganene vakwawo yininke yoyiwa. Jehova kuvafuta kuliza noyirugana yawo. Nye poyiruwo yimwe, Jehova kutufuta mononkedi edi atu dili kundindira. Tu tarurureni ko yihonena yimwe.

11. Ngapi omu Jehova ga yi likidire asi ga diva Mariya?

¹¹ Jehova kwa horowere mukadona gedina Mariya a kare zinya Jesus. Mariya kwa tungire mositata saNasareta esi sa dilire kudivikwa ntani aso kwa likere ure naJerusarema nontembeli. (Resa Rukasa 1:26-33.) Morwasinke Jehova ga horowere Mariya? Muengeli Ngabiliyera kwa tanterere Mariya asi: “Karunga ana ku fire nkenda.” Nonkango edi Mariya ga tanterere Elisabeta kwa likidire asi age kwa kere nelikwatakano lyenene naJehova. (Ruk. 1:46-55) Jehova nga nomene Mariya, yiyo nye ga mu horowere morwa age kwa kere mulimburukwi.

12, 13. Kwalye va divisire mbudi zehampuruko lyaJesus ntani yisinke ya horokere konyima zomazuva 40 kontembeli?

¹² Apa Mariya ga hampurukire Jesus, Jehova kapi ga yi divisire kovantu womulyo  ndi kovapangeli womoJerusarema nava womoBeterehema. Vaengeli kwa divisire mbudi ozo kovasita wononzwi ava va kere mezana lyaBeterehema. (Ruk. 2:8-14) Makura vasita owo yipo va zire va ka dingure mukeke ogo. (Ruk. 2:15-17) Ayo nampo kwa tetukisire Mariya naJosefa pokumona vasita ava va wizire va ya tare Jesus. Koneka elisigo eli lya kara po monkedi omu Jehova a gendesa yininke ntani nomu ayi gendesa Satana. Apa Satana ga pitisilire vakonentu va ka dingure Jesus novakurona vendi, vantu womoJerusarema kwa tukukire apa va zuvhire ehampuruko lyaJesus. (Mat. 2:3) Ayo kwa retere udigu, ngoyitundwamo vanona wovanzi kwava dipagere.—Mat. 2:16.

¹³ Konyima zomazuva norone kutunda apa va hampurukire Jesus, Mariya ga hepere kutunda moBeterehema a ze koJerusarema sinano sokusika ponokilometa 9 yipo a ka gave nzambo kwaJehova. (Ruk. 2:22-24) Ngomu ga gendere Mariya, nampo ga lipulire nsene pwa kere mupristeli ogu ngano ga ka divisire sirugana saJesus sokomeho. Koveli va ka divisire Jesus, nye kapisi moomu ga yi gazarere Mariya. Nye ava va divisire Jesus kwa kere Simiyoni ‘mugara gomuhungami, age hena mutjiliKarunga,’ naAna muporofete gomukadi, vantu ava yiwo va uyungire asi munona ogo nga kara Mesiyasa getumbwidiro.—Ruk. 2:25-38.

14. Matungiko musinke ga gwene Mariya?

¹⁴ Ngapi kuhamena Mariya? Ngoso Jehova ga diworokere Mariya kweyi nga rere Jesus nokumupakera mbili ndi? Nhi, ga mu diworokere pokutjanga moBibeli eyi ga rugene neyi nga uyunga. Ayo kumoneka asi Mariya kapi ga zire naJesus mosirugana sokuzuvhisa nomvhura nadinye ntatu noharufa. Ngomufisayendi age nampo ga hepere kukara moNasareta. Nye Mariya simpe ga ya gwene mpito zokukara namunwendi Jesus komeho a ka fe. (Joh. 19:26) Ano konyima, Mariya kwa kere moJerusarema kumwe novarongwa mazuva aga ga twaredesere koPentekoste apa va va poomwenene mpepo zokupongoka. (Yirug. 1:13, 14) Nampo nage kwa mu gwavekere kumwe novakwawo ava va kere po. Nsene yimo ngoso, kulikida asi nage ga gwene mpito zokukaparuka narunye naJesus meguru. Ee, mfeto musi kouwa ga gwene morwa ulimburukwi wendi!

15. Ngapi omu Jehova ga yi likidire asi ga diworokere Munwendi apa ga ya kere pevhu?

¹⁵ Jesus kapi ga here vampitisili womaukarelikarunga ntani vanapolitika va mu fumadeke. Nye ayo ya mu nkondopekere apa ga zuvhire ezwi lyoGuhwe poyikando yitatu yokulisiga. Tupu ga pwa Jesus kumukuhwa momukuro gwaJorodana, Jehova yipo ga uyungire asi: “Ogu yige Munwange ogu na hara, ga za nge komutjima.” (Mat. 3:17) Ayo kumoneka asi Johanesa Mukuhwi yige gelike ga zuvhire nonkango dina. Mvhura zimwe komeho a ka fe Jesus, varongwa vendi vatatu kwa zuvhire omu Jehova ga uyungire kuhamena Jesus asi: “Ogu yige Munwange ogu na hara, ga za nge komutjima, omu mu zuvhe.” (Mat. 17:5) Ano, mazuva gongandi komeho Jesus a ka fe, Jehova  kwa uyungire hena naMunwendi kutundilira meguru.—Joh. 12:28.

16, 17. Ngapi omu Jehova ga futire Munwendi monkedi ezi ga dilire kuyindindira?

¹⁶ Nampili ngomu Jesus ga divire asi nga ligwanekera nonomfa dokuswaukisa, age kwa kanderere asi mpango zaKarunga zi sike mo nye kapisi zamwene. (Mat. 26:39, 42) Age kwa ‘lididimikilire nomfa dokositji,’ morwa age kwa here kudivikwa kwaJehova mevango lyokudivikwira mouzuni ou. (Heb. 12:2) Ngapi omu Jehova ga diworokere Munwendi?

¹⁷ Apa Jesus ga kere pevhu, age kwa kanderere koGuhwe a gwane eyererepeko eli ga kere nalyo meguru. (Joh. 17:5) Bibeli kapi za likida asi Jesus ga here efumano lyokupitakana opo. Age kapi ga ndindilire mokukagwana sipundi sosinene meguru. Nye ngapi omu Jehova ga futire Munwendi monkedi ezi ga dilire kundindira? Age kwa mu vhumbwire koufe ‘nokumuzerura unene’ ntani ga mu pere hena mwenyo gwanarunye meguru ogu ga dilire kugwana nkenye ogu posiruwo sina. * (Fil. 2:9; Rom. 6:9) Yosili, Jehova kwa futire Munwendi monkedi zokutetukisa morwa ulimburukwi wendi.

18. Yisinke nayi tu vatera tu nyokere po kupapara efumano mouzuni ou?

¹⁸ Yisinke nayi tu vatera tu nyokere po kupapara efumano mouzuni ou? Tu diworokeni asi Jehova ga diva vakareli vendi ntani age poyiruwo yimwe kuvafuta mononkedi edi ava dili kundindira. Jehova nga ka tu futa komeho, nye kapi tuna diva asi yokuhura kupi nga ka tu ruganena. Nye ngesi, ngomu tuna kulididimikira maudigu mouzuni ou woudona, twa hepa kudiworoka asi uzuni ou nanayinye eyi ya kara mo ngayi ka zonauka po. (1 Joh. 2:17) Jehova ‘kapisi muhahungami, asi a divare yirugana yetu, neharo lyokufumadeka edina lyendi.’ (Heb. 6:10) Yosili, age nga ka tu futa, nampo mononkedi edi twa dira kugazara rumwe.