1. Yisinke ya horoka moyirongo yimwe monomvhura edi dantani?

NOMVHURA dononzi da ka pita, sinzi sovantu mouzuni kwa heme koukarelikarunga. Nye monomvhura edi dantani, yininke yina litjindji unene. Sinzi sovantu kapi vana hama koukarelikarunga. Moyirongo yimwe, sinzi sovantu kutanta asi kapi va hamena koukarelikarunga wongandi. *—Mat. 24:12.

2. Yisinke ya ninkisa vantu wovanzi va dire kuhama koukarelikarunga?

² Yisinke ayi ninkisa vantu wovanzi va dire kuhamena koukarelikarunga wongandi? * Nampo vamwe kudemenena unene koyinka yemeparu ndi koyilihafeso. (Ruk. 8:14) Vamwe kwa ya pura asi Karunga kapi ga kara po. Ano vamwe va pura asi yipo ga kara nye awo kugazara asi ukarelikarunga sininke sanare kwato mulyo ntani eyi ava rongo kapi ya liza nounsitwe. Awo nampo kuzuvha kovakwawo ndi kovarongi ndi konombudi asi eparu kwa wiza po kupitira melisinto, nye kapi va kara nonokonda deyi nava pulira mwaKarunga. Ano vamwe kwa va dompesa vampitisili womaukarelikarunga ava va hara yimaliwa. Moyirongo yimwe, mapangero kwa silika ukarelikarunga.

3. Yisinke sitambo sosirongwa esi?

³ Jesus kwa tu pangera ‘tu ninke varongwa konomuhoko nadinye.’ (Mat. 28:19) Ngapi omu natu vatera vantu ava va dira kuhama koukarelikarunga va hare Karunga nokukara varongwa vaKristusa? Twa hepa kudimburura asi monkedi omu muntu a tambura eyi tuna kumuzuvhisira kwa korera oku ga kulira. Pasihonena, vantu ava va kulira koEuropa kwa lisiga  noVaasia monkedi omu ava vhuru kupurakena ko mbudi zetu. Morwasinke? MoEuropa sinzi sovantu va diva ko yoyisesu kuhamena Bibeli ntani va diva asi Karunga yige ga sita yininke nayinye. Nye moAsia sinzi sovantu kwato eyi va diva kuhamena Bibeli ntani awo kuvhura va dire kupura moMusiti. Sitambo sosirongwa esi kuna kara sokutuvatera yipo tu gume nomutjima danavenye ava atu gwana mokuzuvhisa, yi kare asi kupi va tundilira ndi yinke va pura.

4. Morwasinke natu karera nomutaro gomuwa kovantu?

⁴ Kara nomutaro gomuwa. Nkenye mvhura, vantu ava va dira kuhama komaukarelikarunga kuyakara Nombangi daJehova. Wovanzi kwa kara nare nonkareso zongwa nye vampitisili womaukareli yiwo va va dompesa morwa yirugana yawo. Ano vamwe kwa kere nonkareso zondona ezi va hepere kusiga. Nye nevatero lyaJehova, kuvhura tu kare nehuguvaro asi ngatu gwana vantu “ava gwa tumbukira mwenyo gwanarunye.”—Yirug. 13:48; 1 Tim. 2:3, 4.

5. Yisinke ayi ninkisa vantu va purakene kombudi zetu?

⁵ Uyunga monkedi zombili ntani kara nonondunge. Vantu kupurakena nawa kombudi zetu, kapisi morwa eyi atu uyunga nye monkedi ezi atu yi uyunga. Awo kuyihafera apa atu uyunga nombili nonondunge, ntani apa atu likida elituromo mwawo. Kapi atu va sininike va tambure eyi tuna kuvazuvhisira. Nye, ose kuhetekera ko kukwata egano eyi va pura kuhamena ukarelikarunga. Pasihonena, vamwe kapi va hara kuuyunga kuhamena youkarelikarunga novantu ava va dira kudiva. Ano vapeke kulizuvha asi kapi ya wapa kupura muntu eyi ga pura kuhamena Karunga. Ano vamwe hena kulizuvha nomuga nsene va va mona kuna kuresa Bibeli kumwe noNombangi daJehova. Yi kare asi nokonda dawo musinke, nye ose kuhetekera ko kukwata egano malizuvho gawo.—2 Tim. 2:24.

6. Ngapi mupositoli Paurusa ga yi likidire asi age kwa zuvhisire kuliza noyikara yovantu, ntani ngapi natu mu honena?

⁶ Yisinke natu rugana nsene muntu ogu tuna kuzuvhisira kapi ayi mu hafesa apa atu ruganesa nonkango edi ngwendi “Bibeli,” “unsitwe,” “Karunga,” ndi “ukarelikarunga”? Kuvhura tu honene mupositoli Paurusa pokutjindja nkedi zetu zokuzuvhisa. Apa ga zuvhisilire Vajuda, Paurusa nga ruganesa Matjangwa. Nye apa ga uyungire novalirongi woVagereka wosigongi soAreyopagi, age kapi ga tumbwire Matjangwa. Ngapi natu honena Paurusa? Nsene tuna ligwana nomuntu ogu ga dira kupura moBibeli, nayi wapa kuzogera nage twa hana kumulikida moBibeli. Nsene o dimburura asi muntu ogo kapi ga hara vantu va mu mone kuna kuresa Bibeli, hetekera ko kuruganesa nkedi zapeke pokumulikida etjangwa moselefoni ndi moTablet.

7. Yisinke twa hepa kurugana mokuhonena Paurusa ngomu vana yi tumbura mo-1 Vakolinte 9:20-23?

⁷ Kara gokukwata egano ntani gokupurakena nawa. Twa hepa kuhetekera ko kukwata egano eyi ava lizuvhire ngoso vantu ava atu ligwana nawo. (Yis. 20:5) Tu konakoneni hena sihonena saPaurusa. Age kwa kulilire mokatji koVajuda. Nye age ga hepere kurundurura nkedi zendi zokuzuvhisa apa nga zuvhisire vapagani, morwa awo kwa divire tupu yoyinunu kuhamena Jehova noMatjangwa. Nampo nose twa hepa kurugana mapaparo ndi kupura womombungakriste ava va diva ko yoyinzi yipo tu kwate egano  omu ava lizuvhu vantu womomukunda gwetu ntani neyi ava gazara.—Resa 1 Vakolinte 9:20-23.

8. Nkedi musinke zimwe zongwa zokuzogera novantu kuhamena Bibeli?

⁸ Sitambo setu kuna kara sokugwana ‘vantu wovawa.’ (Mat. 10:11) Mokututompoka eyi, twa hepa kupura vantu va pwagese magano gawo, ntani twa hepa kupurakena nawa. Munazinyetu gomugara gomoIngiranda kupura vantu va pwagese magano gawo kuhamena eyi ayi reta ruhafo mononkwara, nomu nava rera vanona, ndi omu nava lididimikira maudigu. Konyima zokuvapurakena, age kuvapura asi: “Ngapi muna kugazara ko komagano aga va tjenge nomvhura 2 000 da ka pita?” Makura ta va likida etjangwa moselefoni zendi, nye kapisi moBibeli.

9. Ngapi natu vatera vantu ava va dira kuhara kuzogera kuhamena Karunga?

⁹ Kuvhura tu gume nomutjima dovantu ava va dira kuhara kuzogera kuhamena Karunga pokuzogera nawo yininke eyi yina va kundama meparu. Pasihonena, vantu wovanzi kutetuka unsitwe. Kuvhura tu uyunge ngesi asi: “Nove wa yi dimburura asi sinzi soyininke eyi ava toto po vadiviunsitwe kuyitemwinina kounsitwe ou wa kara po nare ndi? Pasihonena, ava ava pangere mambako kwa lironga kuhamena matwi, ano ava ava pangere mafano kwa lironga kuhamena meho. Yisinke ayi wiza momagano goge apa o mono unsitwe? Omu ono kugazara, awo kwa wiza po wene, ndi kweli ogu ga u tura po, ndi sininke tupu?” Konyima zokupurakena komagano gawo, kuvhura tu uyunge asi: “Ava ava lirongo omu ga kara matwi nomeho yipo va pangere yininke, yilye ava honene? Tara si egano limwe eli va tjenge nare eli ali tetukisa nge sili, alyo kuna kara asi: ‘Age Karunga yige ga sita matwi getu, makura a dire nye kuzuvha ndi? Yige ga sita meho getu, makura a dire nye kumona ndi? . . . Age yige murongi gwanarunye, makura yi mu puke nye ndi?’ Vadiviunsitwe vamwe va kwatesa ko nonkango edi ntani va pura mounsitwe.” (Epis. 94:9, 10) Konyima, kuvhura tu mu likide vidiyo ko-jw.org^® ezi za kara konhi zosiparatjangwa “Viewpoints on the Origin of Life” koruha “Interviews and Experiences” (Tara koruha YIMBAPIRATJANGWA > NOVIDIYO.) Ndi kuvhura tu va pe mbapira Was Life Created? Ndi mbapira The Origin of Life—Five Questions Worth Asking.

10. Ngapi natu tameka nzogera nomuntu ogu ga dira kuhara kuzogera yokuhamena kwaKarunga?

¹⁰ Vantu wovanzi kwa hara meho zongwa. Nye awo kwa kara noutjirwe asi evhu ngava li zonagura po ndi kapi nga pa tunga vantu.  Mutareli gonombunga gomoNoroweyi, kwa tanta asi vantu ava va dira kuhara kuzogera kuhamena Karunga, awo narunye kuhafera kuzogera eyi yina kuhoroka mouzuni. Konyima zokulimorora nomuntu, mutareli ogo kupura asi: “Ngapi muna kugazara ko kuhamena meho zongwa ezi tuna kundindira? Meho ozo kwa korera kovanapolitika, ndi kovadiviunsitwe, ndi komuntu nagepeke?” Konyima zokupurakena kelimbururo, age kuresa etjangwa ndi kuvatantera ko etjangwa eli lya uyunga kuhamena meho zongwa. Vamwe kutetuka etumbwidiro lyomoBibeli eli asi evhu ngali karerera narunye ntani asi vantu wovawa ngava tunga po narunye nanarunye.—Epis. 37:29; Muud. 1:4.

11. Morwasinke natu ruganesera nonkedi dokulisiga-siga pokuzuvhisira vantu, ntani ngapi natu honena Paurusa ngomu va yi tumbura moVaroma 1:14-16?

¹¹ Twa hepa kuruganesa nonkedi dokulisiga-siga nsene kuna kuzuvhisira vantu. Morwasinke? Morwa vantu va lisiga. Eyi a hafere gumwe, gumwe kapi a yi hafere. Vamwe kuhafera kuzogera nawo kuhamena Karunga ndi Bibeli, ano vamwe kwa hara pomuhowo kuzogera nawo yininke yapeke. Yi kare asi ukaro musinke, twa hepa kuzuvhisira vantu navenye. (Resa Varoma 1:14-16.) Nampili ngoso, twa hepa kudiworoka asi Jehova yige a kulisa usili monomutjima dovantu ava va hara youhunga.—1 Kol. 3:6, 7.

12. Ngapi natu zuvhisira vantu ava va tunda koyirongo yomoAsia ava va dira kugazadara ko rumwe nsene asi pwa kara Musiti ndi hawe?

¹² Mouzuni mudima, vazuvhisi wovanzi kuligwana novantu ava va tundilira koAsia, kukwatera mo ava ava tundilire koyirongo omu mapangero ga silika maukarelikarunga. Sinzi soyirongo yomoAsia, vantu wovanzi kapi ava gazadara ko nsene asi pwa kara Musiti ndi hawe. Vamwe kwa hara kudiva ko yoyinzi, makura awo kutambura elirongo lyoBibeli, nye vamwe kapi va hara kulironga magano gomape. Ngapi natu vhura kuvavatera? Vazuvhisi vamwe kwa va tompoka kuzuvhisira vantu pokuzogera nawo ntani nokulikida elituromo mwawo, ano konyima awo kuvasimwitira ko omu nompango doBibeli dava vatera meparu nsene hepero.

13. Yisinke nayi vatera vantu va likide elituromo moBibeli? (Tara efano lyopontunda.)

¹³ Unongo womoBibeli kuninkisa vantu wovanzi va hare kudiva ko yoyinzi. (Muud. 7:12) Munazinyetu gomukadi gomoNew York, ogu a dingura vantu ava ava uyunga Rumandarin kwa tanta asi: “Ame kuhetekera ko kulikida elituromo movantu ntani nokuvapurakena. Nsene nina dimburura asi age mupe mosirongo, ame kumupura asi: ‘Ngapi lina kumugenda po eparu mosirongo esi? Mwa gwana ko yirugana ndi? Vantu womomukunda kuna kumutekura tupu nawa ndi?’” Nkedi ezi kuvatera munazinyetu ogo yipo a tameke kuzuvhisira vantu. Poyiruwo yimwe, age kupura hena vantu asi: “Omu muna kugazara, sininke musinke somulyo twa hepa kurugana yipo tu kare nelikwatakano lyewa novantu? Kuvhura ni mu likide ko sisewe somoBibeli ndi? Aso kutanta asi: ‘Etameko lyomutangu kwa fana mufa gomuhowo mondama; gu sitika ago gwa hana kulitwara.’ Omu muna kugazara, eli egano kuvhura li tu vatere tu kare nelikwatakano lyewa novakwetu ndi?” (Yis. 17:14) Nsene tu zogera novantu monkedi ezi, ngayi tu vatera tu dimburure muntu ogu ana hara kudiva ko yoyinzi.

14. Ngapi munazinyetu gomoAsia a vatere vantu ava ava tanta asi kapi va pura mwaKarunga?

¹⁴ Ngapi omu natu zogera novantu ava ava tanta asi kapi va pura mwaKarunga? Munazinyetu gomugara ogu ga zuvhisira siruwo sosire vantu ava va dira kuhama koukarelikarunga moAsia, kwa tanta asi: “Apa vantu owo ava uyunga asi: ‘Kapi na  pura mwaKarunga,’ awo kutamba asi kapi va pura moyikarunga eyi ava karere vantu womomukunda gwawo. Ame kuvakwatesa ko asi sinzi soyikarunga kwa yi rugana vantu ntani ayo yikarunga yoyimpempa. Ame nkenye apa kuvaresera Jeremiya 16:20 asi: ‘Muntu kuvhura nye a rugane vakarunga vamwene ndi? Ano nsene a yi rugana, owo vakarunga kapisi vakarunga wosili.’ Makura tani va pura asi: ‘Ngapi omu natu diva asi ogu karunga gosili, ano ogu karunga goyimpempa?’ Ame kupurakena nawa, makura tani resa Jesaya 41:23 ezi azi tanta asi: ‘Tu tantereni eyi yina tu kara komeho – makura ngatu dive asi one vakarunga!’ Konyima tani va likida ko sihonena omu Jehova ga pumba yokomeho.”

15. Yisinke natu lirongera ko kosihonena samunazinyetu gomoAsia?

¹⁵ Munazinyetu gumwe gokosirongo somoAsia kuruganesa nkedi ezi apa a rugana matengwiroko. Age kwa tanta asi: “Ame kuvalikida yihonena yomoBibeli, nomauporofete aga ga sika mo, ntani kuzogera nawo kuhamena unsitwe. Makura tani va likida omu nayinye ayi gava umbangi asi pwa kara Musiti gounongo. Apa muntu a yi kwatesa ko asi pwa kara Karunga, tani mu likida eyi za uyunga ko Bibeli kuhamena Jehova.”

16. Kuliza noVahebeli 11:6, morwasinke natu vaterera varongwa woBibeli va kare nepuro mwaKarunga nomoBibeli, ntani ngapi omu natu yi rugana?

¹⁶ Nsene tatu lirongo novantu ava va dira kuhama koukarelikarunga, twa hepa kuvavatera va nkondopeke epuro lyawo asi pwa kara Karunga. (Resa Vahebeli 11:6.) Ntani twa hepa kuvavatera va huguvare moBibeli. Eyi kutanta asi twa hepa kuruguruka kuvaronga mausili gamwe gomoBibeli yikando yoyinzi. Nkenye apa natu lironga nawo, twa hepa kuvalikida maumbangi asi Bibeli Nonkango daKarunga. Eyi kuvhura kukwatera mo, kuzogera nawo mauporofete gomoBibeli aga ga sika mo, nomu za liza nounsitwe ntani nomu azi tu vatere meparu.

17. Ngapi eharo lyetu ali kundama vantu?

¹⁷ Ose kuvatera vantu va kare varongwa vaKristusa pokuvalikida eharo, yi kare asi va hama koukarelikarunga ndi hawe. (1 Kol. 13:1) Ngomu tuna kuvaronga, twa hepa kuvalikida asi Karunga ga tu hara ntani ana hara nose tu mu hare. Nkenye mvhura, vantu wovanzi ava va dilire kuhama koukarelikarunga kugwana ekuho morwa va lironga kuhara Karunga. Yipo nye, kara nomutaro gomuwa ntani likida elituromo movantu navenye. Va purakena. Hetekera ko kuvakwata egano. Va ronga va kare varongwa vaKristusa kupitira mosihonena soge.