1-2. (a) Kuliza nononkango daJesus domwaMateusa 28:18-20, situmbukira musinke sosinene po va gava kombungakriste? (b) Mapuro musinke natu ka zogera mosirongwa esi?

VAPOSITOLI nampo kwa hefe apa va ka pongere kondundu. Apa Jesus ga vhumbukire, age kwa va tanterere va ka mu gwane kevega olyo. (Mat. 28:16) Nampo esi yiso sikando Jesus ga monekerere varongwa “wokupitakana mafere gatano.” (1 Kol. 15:6) Morwasinke Jesus ga tanterere varongwa vendi va ka mu gwane kondundu ozo? Age kwa va pere situmbukira esi somulyo asi: “Yipo nye nomu zira konomuhoko nadinye, mu ka di ninke di kare varongwa vange.”—Resa Mateusa 28:18-20.

² Varongwa ava va zuvhire nonkango odo daJesus kwa ya kere vamwe womombungakriste zokuhova mosiruwo sovapositoli. Situmbukira sawo sosinene kwa kere sokutulisa po varongwa wovape vaKristusa. * Naina pana kara nombungakriste dononzi mouzuni mudima ntani nawo kwa kara nositumbukira sokulifana. Mosirongwa esi, tatu ka zogera mapuro gane: Morwasinke situmbukira sokutulisa po varongwa sa karera nomulyo? Yisinke ya hamena mo? Nkenye Mukriste kuvhura a vatere mokutulisa po varongwa ndi? Morwasinke twa hepera elididimiko mokusikisa mo sirugana esi?

3. Kuliza naJohanesa 14:6 ntani 17:3, morwasinke situmbukira sokutulisa po varongwa sa karera nomulyo unene?

³ Morwasinke situmbukira sokutulisa po varongwa sa karera nomulyo? Morwa varongwa vaKristusa tupu wokuvhura kukara vakaume vaKarunga. Ntani vantu ava ava kwama Kristusa eparu lyawo kuwapa, ano komeho ngava ka gwana mwenyo gwanarunye. (Resa Johanesa 14:6; 17:3.) Yipo nye, sirugana esi twa gwana kwaJesus kuna kara somulyo nye kapi atu si rugana nyoselike. Mupositoli Paurusa kwa tjangerere vakwawo asi: “Yeeyi ose varugani kumwe naKarunga.” (1 Kol. 3:9) Ee, situmbukira musi kounene ga tu pa Jehova naJesus!

4. Yisinke natu lirongera ko kosihorokwa saIvan naMatilde?

⁴ Sirugana sokutulisa po varongwa kutuhafesa sili unene. Koneka sihonena saIvan namukadendi Matilde ava va tunga moColombia. Awo kwa zuvhisilire mugara gedina Davier, ogu ga va tanterere asi: “Na hara kurundurura nkareso zange, nye kapi a yi tompoka nge.” Davier kwa kere mutooni nyongo ntani nga ruganesa yikwepangwe nokunwa unene marovhu. Age kwa tungire kumwe namukadona gwendi gedina Erika. Ivan kwa tanta asi: “Ose kwa tamekere kulironga Bibeli naDavier ntani mukunda gwawo kwa kere ure. Ose ngatu singi nombasikora novili dononzi moyitaura yetata yipo tu ka lironge nage. Apa mukadona gwendi Erika ga dimbwilire elitjindjo monkareso zamugara ngwendi makura nage yipo ga tamekere kulironga Bibeli.” Mwaza siruwo, Davier kwa hagekere kuruganesa yikwepangwe nokunwa ntani ga hagekere kukara mutooni nyongo. Ntani age kwa li kwere paveta namukadendi Erika. Matilde kwa tanta asi: “Apa Davier naErika va gwene ekuho mo-2016, ose kwa diworokere nonkango edi nga uyunga nkenye apa Davier asi: ‘Na hara kurundurura nkareso zange, nye kapi ayi tompoka nge.’ Eyi kwa tu hafesere sili dogoro tatu lilire mo.” Yosili, ayo kutuhafesa apa atu vatere vantu va ya kare varongwa vaKristusa.

5. Sininke musinke sokuhova twa hepa kurugana yipo tu tulise po varongwa?

⁵ Sininke sokuhova natu rugana, kuna kara pokupapara vantu ava vana kara neharo lyokulironga. (Mat. 10:11) Apa atu tantere ko vantu kuhamena Jehova, ayo kulikida asi ose Nombangi daJehova. Ose kuyilikida nawa-nawa asi ose Vakriste wousili apa atu sikisa mo mpangera zaJesus zokuzuvhisa.

6. Yisinke natu rugana yipo yi tu tompoke mokuzuvhisa?

⁶ Vantu vamwe kwa hara kulironga Bibeli, nye wovanzi ava atu ligwana nawo kapi ava kara neharo lyangoso petameko. Yipo nye, twa hepa kuvakorangeda yipo va kare neharo lyokulironga Bibeli. Nsene tuna hara yi tu tompoke mokuzuvhisa, twa hepa kuliwapaikira nawa. Horowora yirongwa eyi nava ka hafera vantu ava no ka gwana. Makura gazadara ko omu no ka tameka kuzogera nawo yirongwa oyo.

7. Ngapi omu no tameka nzogera nomuntu, ntani morwasinke ya karera nomulyo o likide efumadeko nokuvapurakena?

⁷ Pasihonena, kuvhura o pure ogu ono kuzuvhisira asi: “Nina hara kumupura ko egano kuhamena yuma yongandi. Naina, valikwali kuna kulizumba mouzuni mudima.  Ngapi omu muna kugazara, yisinke natu rugana yipo tu nkondopeke nonkwara detu?” Makura kuvhura mu zogere nage Vakorosi 3:18, 19. Ndi kuvhura o pure ogu ono kuzuvhisira asi: “Ngapi omu natu rera vanona yipo va kare nononkedi donongwa? Ngapi omu muna kugazara?” Makura zogera Deuteronomium 6:6, 7. Yi kare asi sirongwa musinke no horowora, gazadara ko vantu ava no ka zuvhisira. Gazadara mauwa aga nava ka gwanena mo pokuzuvha eyi azi rongo Bibeli. Ya kara nomulyo kulikida efumadeko nokuvapurakena apa no uyunga nawo. Nsene o yi rugana, ove ngo diva ukaro wawo ntani ngayi va ninkisa va ku purakene.

8. Morwasinke ya karera nomulyo tu tengwire kovantu ava atu zogere nawo Bibeli?

⁸ Komeho muntu a tokore kulironga Bibeli, wa hepa kuruganesa siruwo soge pokutengwira ko yikando yoyinzi. Morwasinke ya karera ngoso? Morwa vantu poyiruwo yimwe kapi ava kara pembo. Ntani wa hepa kuzogera nomuntu ogo yikando yongandi komeho a kare neharo lyokutameka kulironga Bibeli. Diworoka asi, simeno kukura nsene va si tekera nkenye apa. Mokulifana, muntu kutameka kuhara Jehova naJesus nsene tu zogera nage nkenye apa Nonkango daKarunga.

9-10. Morwasinke natu uyungira asi Vakriste navenye kuvatera mokutulisa po varongwa?

⁹ Vakriste navenye kuvatera mokutulisa po varongwa. Sirugana esi kuvhura kusifanekesa kovantu ava vana kupapara munona gokuzumbana. Ngapi omu ya lifana? Koneka eyi ya horokerere munona gomumati gonomvhura ntatu ogu ga zumbanene. Vantu wokusika 500 kwa mu paparere.  Ano konyima zonovili 20, gumwe govantu owo ta ya gwana munona ogo mepya. Nye age kapi ga here vantu va mu pandadeke kweyi ga mu gwene. Age kwa tente asi: “Ayo kuna tu tompoka mokugwana munona ogu morwa vantu wovanzi ka va ruganene kumwe yipo va mu papare.”

¹⁰ Sinzi sovantu naina kuna zumbana ngwendi munona ogo. Awo kwato ehuguvaro ntani vana hepa ekwafo. (Efe. 2:12) Vantu wokupitakana pomamiliyona ntantatu kuna kuruganena kumwe yipo va gwane vantu owo. Kuvhura yi dire kukutompoka kugwana muntu ogu no lironga nage Bibeli. Nye wopeke ava ono kurugana nawo momukunda gumwe, kuvhura yi va tompoke kugwana muntu ogu ana hara kulironga Nonkango daKarunga. Nsene munazinyetu ana gwana ko gumwe ogu na ya kara murongwa gwaKristusa, ayo kutuhafesa natuvenye ose twa lihamekere mo mokupapara muntu ogo.

11. Mononkedi musinke hena no vhura kutulisa po varongwa nampili kapi o lirongo Bibeli nagumwe?

¹¹ Nampili kapi o lirongo Bibeli nagumwe ngesi, simpe kuvhura o vatere mokutulisa po varongwa mononkedi dapeke. Pasihonena, kuvhura o tambure vantu wovape koSinyanga soUhompa nokutulisa po ukaume kumwe nawo. Monkedi ozo, ove kuna kuvavatera va dimburure asi eharo kutudimbwilisa asi ose Vakriste wousili. (Joh. 13:34, 35) Malimbururo aga o gava momapongo nampili gomasupi, kuvhura kuronga wovape nawo va rugane yokulifana. Kuvhura o pwage mokuzuvhisa novazuvhisi wovape nokuvavatera va ronge vantu pokuruganesa Matjangwa. Nsene o yi rugana, ove kuna kuvavatera va honene Kristusa.—Ruk. 10:25-28.

12. Twa hepa kukara noudivi wounzi yipo yi tu tompoke kutulisa po varongwa ndi? Faturura.

¹² Kapisi tu gazare asi twa hepa kukara noudivi wounzi yipo yi tu tompoke kuronga wopeke va ya kare varongwa vaJesus. Koneka sihonena saFaustina ogu ga tunga moBolivia. Apa ga ligwene noNombangi, age kapi ga divire kuresa. Konyima, age ga ya divire kuresa nakauke. Ngesi ga gwana ekuho ntani age kwa hara kuronga wopeke. Age kulironga Bibeli novantu vatano mosivike. Nampili ngomu varongwa vaFaustina va diva kuresa nawa kumupitakana, age kwa vatera vantu ntazimwe va gwane ekuho.—Ruk. 10:21.

13. Mauwa musinke natu gwanena mo nsene tu tulisa po varongwa nampili ngomu twa kara noyirugana yoyinzi?

¹³ Sinzi soVakrisre kwa kara noyirugana yoyinzi. Nye awo kulitulira po siruwo yipo va ka ronge vantu Bibeli, ntani ayo kuvahafesa sili unene. Koneka sihonena saMelanie. Age zinya gomudike ogu ga kere moAlaska, ogu nga rere munwendi gomukadona gonomvhura ntantatu. Age  nga rugana sivike nasinye ntani nga pakere mbili oguhwe ava ngava vere kankera. Melanie yige gelike ga kere Mbangi modoropa zawo. Age nga kanderere nkenye apa yipo a gwane nonkondo dokuza mokuzuvhisa nampili ngomu nga ku kara utenda, morwa ga here kugwana muntu ogu na ronga Bibeli. Ano konyima ta ya gwana Sara ogu ga hefe apa ga lirongere asi Karunga ga kara nedina. Melanie kwa tamekere kulironga Bibeli naSara konyima zosiruwo. Age kwa tanta asi: “Ame ngani lizuvhu eroroko nkenye Utano kongurova, nye name namunange ngatu zi tu ka lironge Bibeli naSara ntani ngatu gwanene mo mauwa. Ose ngatu yi hafere kurugana mapaparo komapuro gendi ntani kwa hefe unene apa Sara ga ya kere kaume kaJehova.” Sara ga lididimikilire marwaneso, ta ya sigi ngereka zawo nokugwana ekuho.

14. (a) Ngapi sirugana sokutulisa po varongwa sa lifana nesi sovakwati wonomfi? (b) Yisinke ono lirongere ko kononkango daPaurusa domwa-2 Timoteusa 4:1, 2?

¹⁴ Nampili kapi simpe wa gwana muntu ogu ana hara kukara murongwa, twikira kupapara ngorooro. Diworoka asi Jesus kwa fanekesere sirugana sokutulisa po varongwa kokukwata nomfi. Vakwati wonomfi kurugana siruwo sosire komeho va kwate nomfi. Yikando yoyinzi awo kurugana masiku ndi kongurangura ntani poyiruwo yimwe awo kuza komavango gokoure. (Ruk. 5:5) Mokulifana, vazuvhisi vamwe kurugana mokuzuvhisa siruwo sosire ntani awo kuzuvhisira komavango gokulisiga-siga noyiruwo yokulisiga-siga. Morwasinke ava yi ruganene ngoso? Awo kuyirugana  yipo va gwane vantu wovanzi. Ava ava rugana unene narunye kugwana vantu ava ava purakene kombudi zetu. Nove kuvhura o heteke kuzuvhisa posiruwo esi no gwana vantu ndi kevango oku no vhura kugwana vantu ndi?—Resa 2 Timoteusa 4:1, 2.

15. Morwasinke twa hepera kulikida elididimiko nsene kuna kuronga muntu Bibeli?

¹⁵ Morwasinke twa hepera kulikida elididimiko nsene kuna kuronga muntu Bibeli? Konda zimwe kuna kara asi twa hepa kuvatera murongwa a dive nokuhara eyi azi rongo Bibeli. Twa hepa hena kumuvatera yipo a dive nokuhara Jehova ogu ga retesa po Bibeli. Ntani kugusa ko kumuronga eyi ga hepa ko Jesus kovarongwa vendi, twa hepa hena kumuvatera yipo a dive omu nayi tura pasirugana meparu lyendi. Twa hepa kutwikira kumuvatera nampili ngomu ana kukondja kutura nompango domoBibeli pasirugana. Vamwe kurundurura nkareso zawo usimbu, nye vamwe kugusa siruwo sosire.

16. Yisinke ono lirongere ko kweyi ya horokerere Raúl?

¹⁶ Munazinyetu gumwe gomutumwa ga limonena uwa wokulikida elididimiko. Age kwa tanta asi: “Ame kwa lirongere nobuke mbali naRaúl ogu na rongere Bibeli. Nye age simpe nga ligwanekere nomaudigu gomanene. Age kwa kere nomaudigu mononkwara dendi ntani age nga tuku nkenye apa, ano vana vendi kapi ngava mu fumadeke morwa nkareso zendi zondona. Age nga wiza nkenye apa komapongo, yipo nye, ame kwa twikilire kumudingura yipo ni mu vatere nepata lyendi. Age kwa ya gwene ekuho konyima zonomvhura ntatu kutunda apa twa tamekere kulironga.”

17. Yisinke ngatu ka zogera mosirongwa sokukwama ko?

¹⁷ Jesus kwa tu pangera ‘tu ze konomuhoko nadinye, tu ka di ninke di kare varongwa.’ Mokusikisa mo mpangera ozo, ose kuzogera novantu ava ava dili kugazara ngwendi nyose ntani nava va dira kuhamena koukarelikarunga wongandi ndi ava va dira kupura asi Karunga yipo ga kara. Sirongwa sokukwama ko ngatu ka zogera omu natu zuvhisira vantu owo.