Ame kwa hampuruka nge momvhura 1954 mositata saSt. Paul moMinnesota, Amerika. Vakondi vange kapi va kere nongawo ntani ose ngatu zi kongereka zaKatolika. Ose kwa tu reta tu vatano, ano ame sikwamambeli. Apa nakere munona, ame ngani dimbire kosure zoVakatolika ntani ngani vatere muruti mongereka. Nampili ngoso, ame kapi na divire yoyinzi kuhamena Bibeli. Nampili ngomu na pulire asi pwa kara Karunga ogu ga sita yininke nayinye, konyima ame kapi na ya pulire mongereka zaKatolika.

Nombangi daJehova kwa wizire pembo lyetu, momvhura zange zokuhova apa na kere kosure zouhahende. Valikwali owo kwa ya gwene nge ame kuna kukuhwa yidwara ntani awo kwa tumbwidilire nge asi tava ka tengwira ko. Apa va ka tengwire, ame kwa va pulire mapuro gavali: “Morwasinke vantu wovadona ayi va tompokere yininke meparu kupitakana vantu wovawa?” ntani “Yisinke nava rugana vantu yipo va kare noruhafo?” Awo kwa pere nge Buke The Truth That Leads to Eternal Life ntani noBibeli zoNew World Translation zosinamahako. Ame kwa tambwire kulironga  Bibeli kumwe nawo. Elirongo olyo kwa vaterere nge ni kwate egano yininke yoyinzi. Na hefe pokudiva asi Uhompa waKarunga kuna kara epangero eli ngali pangera pevhu komeho. Ame na yi dimbwilire nare asi mapangero govantu kwato eyi aga vhuru kusikisa mo. Ago kwa retera tupu vantu kukora, ruhepo ntani kapi aga tekura vantu nawa.

Ame kwa ligeve kwaJehova momvhura 1982 ntani kwa gwene ekuho momvhura zoozo posigongi sosiparatjangwa “Kingdom Truth,” esi sa kere metungo lyedinaCivic Center mositata saSt. Paul. Sivike sokukwama ko, ame kwa ka tengwire metungo lyokulifana, yipo ni ya tjange ekonakono lyokukara hahende. Mokwedi kwaSikukutu momvhura zoozo, ame kwa gwene mbudi asi na piti ekonakono olyo ntani kuvhura ni kare hahende.

Apa nakere posigongi sosiparatjangwa “Kingdom Truth,” ame kwa ligwene namunazinyetu gokoBeteli zomoBrooklyn gedina Mike Richardson, ogu ga tanterere nge asi vana tulisa po departemende zovahahende moBeteli. Makura tani diworoka nonkango derenga lyomoEtiyopiya edi da kara moYirugana 8:36. Yipo na lipulire nyamwange asi: ‘Yisinke yina kukondera nge mokudira kukarugana kodepartmende ozo?’ Yipo na tulire mo ehundiro lyokukarugana koBeteli.

Vakurona vange kapi va hefe apa va zuvhire asi ame ngesi Mbangi. Mokumona asi ame kwa kere hahende, otate kwa pulire nge asi uwa musinke ngani gwanena mo pokurugana koBeteli. Ame kwa va tanterere asi ngani ka rugana sirugana sokulizambera ntani nkenye kwedi ngani gwana nsonso zonunu ezi ava gwana vaBeteli vakwetu.

Mokumona asi ame kwa tumbwidilire kurugana kohofa, ame kwa ka tamekere tupu kurugana moBeteli zomoBrooklyn, New York momvhura 1984. MoBeteli, ame ngani rugana momberewa zovahahende. Ediwo eli na gwene apa ngani rugana mohofa, kwa ya vaterere nge konyima.

Sala zedina Stanley ezi za kara mositata saJersey, moNew Jersey kwa zi rende mwaMangundu 1983. Vanavazinyetu kwa pulire ehundiro kondango zodoropa yipo va wapukurure marutjeno nonomulihu domema metungo olyo. Vanavazinyetu kwa tente asi awo kwa here kuruganesa etungo olyo yipo va karere mo noyigongi yoNombangi daJehova. Eyi kwa ninkisire wondango zodoropa va dire kutambura ehundiro lyetu. Mositata oso mwa kara veta ezi azi dili kupulisira matungo goukarelikarunga ga kare mokatji kodoropa. Awo kwa hara matungo ogo ga kare oku va tunga vantu.  Sala zedina Stanley kwa kere mokatji kodoropa. Yipo nye, awo kapi va tu pulisilire tu zi wapukurure. Vanavazinyetu kwa pulire vapanguli va tarurure udigu owo, nye kapi ya va tompokere.

Sivike sange sokuhova apa na ka sikire koBeteli, vanavazinyetu kwa twere udigu owo kohofa. Mokumona asi ame ngani rugana mohofa moSt. Paul, moMinnesota, ame na divire nawa nongendeseso domohofa. Munazinyetu gumwe gohahende kwa tente asi mokumona asi etungo olyo nare ngava liruganesa konomusika ntani nokulikida nomuvi, morwasinke nye na yi karera epuko kuruganena mo yigongi yetu? Vapanguli kwa tente asi wondango zodoropa kwa kere mepuko ntani awo kwa va pangerere va tu pe epulisiro. Apa ya horokere, ame kwa dimbwilire omu Jehova a ruganesa vahahende mombunga zendi yipo sirugana sendi si ze komeho. Ame kwa hefe kweyi na lihamekere mo mompanguro ozo.

Vanavazinyetu kwa tamekere kuwapukurura sala ozo ntani konyima zomvhura zimwe, wombunga zau-79 wokosikora zaGiliyata yimo va ya gwanenene nonzapo dawo momazuva 8 Sitarara 1985. Ame kwa hefe sili unene morwa name kwa kere gumwe govahahende ava va ruganene Jehova sirugana esi. Ame kwa hefe unene kupitakana apa ngani rugana kohofa. Nye ame kapi na divire asi Jehova simpe nga ruganesa nge monompanguro dononzi komeho.

Koyiha yomvhura 1980, yipangero novandokotora kapi ngava fumadeke vanavazinyetu ava va dilire kuhara kuvatura honde. Vapanguli kwa tente asi vakadi womazimo kapi va kara nononkondo dokunyoka kutambura honde. Awo kwa tente asi nsene va dira kuvatura honde, kuvhura va dogoroke nokusiga mukeke a kare nsigwe.

Momazuva 29 Sindimba 1988, munazinyetu Denise Nicoleau kwa zumbanesere honde zonzi apa ga hampurukire munendi gomumati. Mokumona asi eparu lyendi kwa kere mosiponga, ndokotora kwa here kumutura honde. Nye Nicoleau kwa nyokere. Ezuva lyokukwama ko, mupanguli kwa geve epulisiro kosipangero va ture honde munazinyetu ogo. Mupanguli ogo kapi ga geve mpito kwaNicoleau ndi mugara gwendi yipo va faturure eyi va pura. Age hena kapi ga va tanterere asi ana gava epulisiro kovandokotora.

MoUtano 30 Sindimba 1988, vandokotora kwa tulire munazinyetu Nicoleau honde nampili ngomu mugara gwendi novanekoro vamwe ava va kere kombete zendi va nyokere. Kongurova ozo, vamwe vekoro lyendi novakuronambunga kwa va tulire modorongo morwa kwa here kukondera vandokotora va dire kumutura honde. Ezuva eli lya kweme ko moMapeu 31 Sindimba 1988, koradio, kotivi ntani monosaitunga domoNew York kwa  pwagesere mo sihorokwa sovanavazinyetu ava va tulire modorongo.

MoMandaha ngurangura, ame kwa zire ni ka zogere nomupanguli gedina Milton Mollen. Ame kwa mu tanterere asi mupanguli gumwe kwa pere vandokotora epulisiro lyokutura muveli honde ga hana kumupura ko. Mollen kwa pulire nge nsene kuvhura ni ka tengwire ko kositenguko yipo tu ya zogere omu za sikama veta. Ame kwa ka wizire namunazinyetu Philip Brumley, ogu ga kere mupitisili godepartmende zetu. Mollen kwa zigidire mupanguli ogu ga geve epulisiro kosipangero yipo nage a ya kare po. Monzogera zetu, ose kwa lipatanene. Eyi kwa ninkisire munazinyetu Brumley a tjangere nge posipepa asi: “litura.” Mokumona asi ame kwa handukire, eli kwa kere epukururo lyewa morwa ame kwa here kulikida asi mupanguli ogu ga geve epulisiro kwa kere mepuko.

Konyima zovili zimwe, Mollen kwa tente asi udigu wetu yiwo ngava hova kupangura ezuva lyokukwama ko. Apa twa pwege momberewa zendi, age kwa tanterere mupanguli ogu ga geve epulisiro kosipangero asi: “Mungura ngo kara nosirugana soudigu.” Monkango zimwe, age kwa mu tanterere asi nga kondja mokulikida asi etokoro eli ga tulire po kwa kere mouhunga. Ame kwa lizuvhire ngwendi Jehova ana kutantera nge asi ngatu funda mpanguro ozo. Ayo ya tetukisire nge pokudiva asi Jehova kuna kuruganesa nge ni sikise mo sitambo sendi.

Ose kapi twa rere usimbu masiku ogo morwa kwa liwapaikilire eyi ngatu ka uyunga mompanguro. Mokumona asi hofa ozo kapi za kere ure noBeteli zomoBrooklyn, sinzi sava ngatu rugana nawo kwa gendere va ze kompanguro ozo. Konyima zapa vapanguli vane va purakenene komasivano getu, awo kwa tokwere asi mupanguli ogu ga geve epulisiro kosipangero kwa kere mepuko. Awo kwa kwatesere ko etokoro lyamunazinyetu Nicoleau nokutanta asi ayo epuko kupilisira sipangero si ture muveli honde wa hana kupurakena komuveli tanko.

Konyima zosiruwo, mpanguro zonene po moAmerika kwa kwatesere ko etokoro lyamunazinyetu Nicoleau lyokunyoka kutambura honde. Ezi yizo mpanguro zokuhova na lihamekere mo, monompanguro detu ne dokuhamena honde edi twa twara kompanguro zonene. (Tara kakende “ Nompanguro dononene edi twa funda.”) Ame hena  kwa ruganena kumwe novahahende vakwetu moBeteli monompanguro dokuhamena, ogu na gusa munona pokatji kovalikwali ava vana kulizumba, elizumbo, mambo, ntani nonompanguro dokuhamena evhu.

Apa na ligwene namukadange Dawn, age kwa kere novana vatatu ntani age kwa mu zumbire mugara gwendi. Nye age nga rugana ntani kwa kere muzuvhisi gokukarerera. Age kwa ligwanekerere nomaudigu meparu lyendi ntani ayo kwa tetukisire nge kweyi ga tokomenene kukarera Jehova. Momvhura 1992 apa twa zire kosigongi sosiparatjangwa “Light Bearers” esi sa kere mositata saNew York, ose kwa tamekere kulivandekera. Konyima zomvhura zimwe, ose kwa likwere. Kugwana mukadi ogu ga tura Jehova muhowo ntani ogu a zoragana kuna kara etungiko lyokutunda kwaJehova. Mukadange Dawn kwa ruganena nge yininke yoyiwa moukaro wange naunye.—Yis. 31:12.

Apa twa likwere, vana vendi kwa kere nonomvhura 11, 13 ntani gumwe 16. Ame kwa here kukara guhya gomuwa. Yipo nye, ame ngani resa nokutura pasirugana magano gomoyimbapiratjangwa yetu gokuhamena kurera vana wositumbwena. Nampili ngomu ya kere udigu petameko, ngesi nina hafa kweyi vana vange ava tara nge asi ame kaume gwawo ntani nyame guhyawo. Ose ngatu pulisire vakaume vawo va wize pembo ntani ngatu yi hafere kukara kumwe nawo.

Momvhura 2013 ose kwa dirukilire komukunda gwaWisconsin tu ka vatere vakondi vetu wovakurupe. Ame kapi na gazarere asi kuvhura simpe ni vatere koBeteli. Awo kwa pulire nge ni vatere mazuva gamwe koBeteli modepartmende zokuhamena yoveta.

MwaSitarara 2018, ame kwa dimbwilire asi kuna kukohora unene komeho ni uyunge. Yipo twa zire kwandokotora, nye kapi ga divire udigu ou na kere nawo. Konyima zosiruwo, ose kwa zire kwandokotora gumwe ogu ga tu tanterere asi twa hepa kuza kwandokotora hena gumwe. Apa twa zire kwandokotora ogo mwaMurongagona 2019, age kwa konakonene nge unene nokutanta asi nina kara nouvera wounene ou ngau kundama rutu rwange mudima.

Konyima zomazuva gatatu apa na lihamekere moudano ou na here, ame kwa ligende nokuteka kuwoko. Udano owo ame kwa u dene siruwo sosire ntani kwa u divire. Yipo na dimbwilire asi komeho kapi ngani vhura kugendesa maruha gange gorutu. Kapi na yi dindilire asi uvera ou ngau genderera kudida nokuninkisa nge ni dire kuuyunga nawa, ndi ni gende ndi ni mine nondya.

Ayo kuhafesa nge pokudiva asi ame na vatera mbunga zaJehova mosirugana sange ngahahende. Ayo hena kuhafesa nge pokudiva asi ame kwa tjanga yirongwa yoyinzi moyifo eyi ava resa vandokotora novahahende ntani novapanguli. Ame hena kwa gwana mpito zokugava yiuyungwa mouzuni mudima yipo ni popere vantu vaJehova va horowore uhaku netauro lyokudira kuruganesa honde. Nampili ngoso, ame kuna kulizuvha ngwendi mutjangi goBibeli Rukasa ogu ga tente mwaRukasa 17:10, NW asi: ‘Ame ni mukareli tupu, eyi na rugana yiyo ngano na fira kurugana.’