1. Yisinke sitambo saJehova neina?

 SITAMBO saKarunga neina kuna kara asi Mbudi zongwa zoUhompa va zi zuvhise mouzuni mudima. (Mar. 13:10; 1 Tim. 2:3, 4) Esi kuna kara sirugana saJehova ntani aso mulyo unene kwendi. Yipo nye, age kwa horowora Munendi ogu ga hara yipo a si pitisire. Mokumona asi Jesus yige a tu pitisire, ose kuvhura tu yipure nawa-nawa asi sirugana esi sokuzuvhisa nga si pwa kuliza nompango zaJehova komeho u wize uhura.​—Mat. 24:14.

2. Yisinke natu ka zogera mosirongwa esi?

² Mosirongwa esi, natu ka dimburura omu Jesus ana kuruganesa “mukareli gokulimburukwa gonondunge”yipo a gave mavyukiso gokutundilira moBibeli ntani noku pitisira vasikuli vaJesus yipo va sikise mo sirugana sokuzuvhisa esi vana ku rugana po unene mouzuni. (Mat. 24:45) Ntani natu ka dimburura hena eyi ga hepa kurugana nkenye gumwe gwetu mokukwatesa ko Jesus ntani mukareli gokulimburukwa gonondunge.

3. Nonkondo musinke va mu pa Jesus?

³ Jesus kupitisira sirugana sokuzuvhisa. Ngapi omu tuna yidiva oyo? Komeho tupu Jesus a tengure meguru, age kwa gwanekerere novarongwa vendi vamwe wovalimburukwi pondundu zomoGalireya. Age kwa va tanterere asi: “Nonkondo nadinye demeguru, nedi depevhu nyame va di pa.” Konekeni nonkango edi ga kwamesere ko: “Yipo nye nomu zira konomuhoko nadinye, mu ka tulise po varongwa.” (Mat. 28:18, 19) Nampili ngomu Jesus ga kara noyitumbukira yapeke, age  hena kwa mu pa nonkondo dokupitisira sirugana sokuzuvhisa.

4. Morwasinke natu yi pulira asi Jesus simpe kuna kupitisira sirugana sokuzuvhisa?

⁴ Jesus kwa uyungire asi sirugana sokuronga nokutulisa po varongwa ngava si sikisa mo “konomuhoko nadinye” ntani age nga kara kumwe novarongwa vendi “dogoro pouhura wouzuni.” (Mat. 28:20) Nonkango odo kulikida nawa-nawa asi sirugana sokuzuvhisa nga si twikira kukara mepitisiro lyaJesus dogoro momazuva getu.

5. Monkedi musinke atu sikisa mo etjangwa lyomoEpisarome 110:3?

⁵ Jesus kapi ga kere nosinka asi nampo kapi ngapa kara varugani wokugwanena po kehagero lyouhura woyininke youzuni ou. Age ga yi divire asi nonkango douporofete domuepisarome edi adi uyunga asi: “Ezuva eli ngo rwisa nonkore doge, vantu woge ngava ligava,” nga di sika mo. (Epis. 110:3) Nsene asi ove kuna kulihameka mo mo sirugana esi sokuzuvhisa mbudi zongwa, ove kuna kukwatesa ko Jesus nomukareli gokulimburukwa ntani kuna kuvatera mokusikisa mo uporofete ou. Yimo, sirugana esi ntaantani tupu sipwe, nye nampili ngoso simpe pana kara maudigu.

6. Udigu musinke umwe ava ligwanekere nawo vazuvhisi woUhompa neina?

⁶ Udigu umwe ou ava ligwanekere nawo vazuvhisi woUhompa kuna kara marwaneso. Varwanesi usili, vampitisili womaukarelikarunga ntani novanapolitika, kwa tantera vantu wovanzi yimpempa kuhamena yirugana yetu. Nsene asi vekoro lyetu novantu ava twa diva ntani varugani vakwetu vapura yimpempa oyo, awo kuvhura ngava tu sininike tu hageke kukarera Jehova ntani asi tu hageke kuzuvhisa. Moyirongo yimwe, marwaneso ogo kuvhura kupitira momahomokero ndi pokukwata vanavazinyetu noku va tura modorongo. Ose kapi ayi tu tetukisa apa vantu ava tu tekura monkedi ezi. Jesus kwa pumbire asi: “Nomuhoko nadinye ngadi mu nyenga morwa edina lyange.” (Mat. 24:9) Mokumona asi vantu va tu nyenga, ou kuna kara umbangi una kulikida asi Jehova ga tu hafera. (Mat. 5:11, 12) Muzonaguli yige ana kuretesa po mahomokero aga. Nye nampili ngoso, Jesus nonkondo unene kupitakana Satana! Nevatero lyaJesus, mbudi zongwa kuna ku zi zuvhisira vantu wokonomuhoko nadinye. Tu zeni tu ka tare umbangi ou una kukwama ko.

7. Umbangi musinke ono kumona, ou una kulikida asi Ehororo 14:6, 7 kuna kusikilira mo?

⁷ Udigu umwe hena ou ava ligwanekere nawo vazuvhisi woUhompa kuna kara asi vantu kuuyunga maraka gokulisiga-siga. Memoneko eli ga geve Jesus kwaJohanesa, Jesus kwa pumbire asi momazuva getu, kwato eyi ngayi kondera mbudi zongwa zi dire kusika kovantu. (Resa Ehororo 14:6, 7.) Morwasinke tuna kuuyungira ngoso? Ose kuna kuvatera vantu wovanzi, yipo nawo va zuvhe mbudi zoUhompa. Neina, vantu mouzuni mudima kuvhura kuresa yimbapiratjangwa eyi ya zogera magano gomoBibeli kointaneta zetu jw.org, morwa ako kugwana ko yimbapiratjangwa yokupitakana pomaraka 1 000. Mbungagendesi kwa gava epulisiro yipo va toroke buke Hafera eparu narunye! momaraka gokupitakana po-700, ezi tuna kuruganesa po unene mokutulisa po varongwa. Nondya dopampepo kwa di gava hena koyipurupuru kupitira monovidiyo dokukwateka, ano kovatwiku kupitira moyimbapiratjangwa yorutwiku. Ose kuna kumona mauporofete gomoBibeli omu gana kusikilira mo. ‘Vantu wokonomuhoko nadinye’ kuna kulironga eraka lyokukuhuka lyousili womoBibeli. (Sak. 8:23; Sef. 3:9) Nayinye  eyi kuna kusika mo morwa epitisiro lyaJesus Kristusa.

8. Yisinke twa sikisa mo mosirugana setu sokuzuvhisa dogoro papa?

⁸ Neina, vantu wokupitakana po-8 000 000 moyirongo yokusika po-240, kwa hamena kombunga zaJehova ntani nkenye mvhura mayovi govantu kugwana ekuho. Nye unene po, vazuvhisi ava wovape kutunga po yikara yoSikriste ndi asi kudwara “muntu gomupe.” (Koros. 3:8-10) Wovanzi kwa nyokera po nyanya, elitondororo ntani kwa nyokera po kuhama komuhoko gongandi. Uporofete ou wa kara mwaJesaya 2:4 kuna kusikilira mo, morwa awo kapi ava lihameke moyita. Apa atu litura mo unene tu dware muntu gomupe, ayo kuvatera vantu va wize kombunga zaJehova ntani ose kuyilikida asi ose kuna kukwama mupitisili gwetu Jesus Kristusa. (Joh. 13:35; 1 Pet. 2:12) Nayinye eyi kuna kusika mo morwa Jesus kuna kutupa eyi twa hepa.

9. Kuliza naMateusa 24:45-47, yisinke ga pumbire Jesus eyi ngayi horoka pomazuva gopouhura?

⁹ Resa Mateusa 24:45-47. Jesus kwa pumbire asi pomazuva gopouhura, age nga horowora “mukareli gokulimburukwa gonondunge” yipo a gave nondya dopampepo. Yipo nye, twa hepa kuyindindira asi mukareli ogo ga hepa kulitura mo unene yipo a sikise mo sirugana oso momazuva getu. Yosili, mukareli ogo kuna kulitura mo unene mosirugana sendi. Jesus kwa ruganesa kambungagona kovagara wovagwavekwa yipo va gave ‘nondya dopampepo posiruwo souhunga’ kovantu vaKarunga ntani nava ava likida elituromo. Vagara ava kapi ava pangere vakwawo kuhamena epuro lyawo. (2 Kol. 1:24) Mevango lyokuyirugana oyo, awo kudimburura asi Jesus Kristusa yige “mupangeli nomugendesi” govantu vendi.​—Jes. 55:4.

10. Kuliza nefano, simbapiratjangwa musinke sa ku vaterere yipo o tameke kukarera Jehova?

 ¹⁰ Kutundilira mo-1919, mukareli gokulimburukwa gonondunge kwa wapaika yimbapiratjangwa yokulisiga-siga eyi va gava kovarongwa wovape yipo va lironge usili womoBibeli. Mo-1921, mukareli gokulimburukwa gonondunge kwa pwagesere buke The Harp of God, yipo zi vatere vantu ava va here kulironga Bibeli yipo va lironge mausili gokuhova gomoBibeli. Mwaza nomvhura, yimbapiratjangwa yimwe kwa ya yi pwagesere. Simbapiratjangwa musinke sa kuvatera yipo o ya dive Guhyetu gemeguru ntani noku mu hara? Aso kuna kara “Let God Be True,” The Truth That Leads to Eternal Life, You Can Live Forever in Paradise on Earth, Ediwo eli ali twara komwenyo gwanarunye, Yisinke azi rongo Bibeli sili?, Yisinke azi rongo Bibeli?, ndi buke zompe Hafera eparu narunye! Yimbapiratjangwa nayinye eyi yiyo twa hepere apa va yi pwagesere, yipo tu tulise po varongwa.

11. Morwasinke ya karera nomulyo kwanatuvenye tu twikire kulironga yoyinzi kuhamena Jehova ntani Bibeli?

¹¹ Varongwa wovape kapisi yiwo velike va hepa ediwo lyokuhamena kwaKarunga ntani ediwo lyomoBibeli. Natuvenye twa li hepa. Mupositoli Paurusa kwa tjenge asi: ‘Nondyaandya dovakurona.’ Paurusa kwa gwederere ko hena asi kutura pasirugana eyi atu lirongo moBibeli ngayi tuvatera tu ‘hangure uwa koudona.’ (Heb. 5:14) Ayo kuvhura ku tu digopera kulimburukwa nompango daJehova ngesi, morwa sinzi sovantu kuna kurugana yininke yoyidona. Nye Jesus kudivilisa asi ose kuna kulironga yininke eyi twa hepa yipo tu nkondopeke epuro lyetu. Ose kugwana mavyukiso ogo kupitira moNonkango daKarunga, Bibeli. Mukareli gokulimburukwa kuwapaika ntani kugava nondya dopampepo kupitira mepitisiro lyaJesus.

12. Ngapi omu twa fumadeka edina lyaKarunga ngwendi moomu ga yi rugene Jesus?

 ¹² Ngwendi Jesus, ose kwa fumadeka edina lyaKarunga. (Joh. 17:6, 26) Pasihonena, mo-1931 yipo twa tamekere kulitumbura asi ose Nombangi daJehova, ano pokuyirugana oyo ose kwa yi likidire asi edina lyaKarunga mulyo kwetu ntani kwa here vantu va tu dive kedina lyaGughyetu gemeguru. (Jes. 43:10-12) Ano kutundilira mwaSikukutu momvhura ozo, edina lyaKarunga Jehova, kwa moneka kontunda zankenye sifo soRuhungu. Ntani hena Bibeli New World Translation of the Holy Scriptures kwa tengwidira mo edina lyaKarunga pomavango apa lya moneka. Eyi ya lisiga nomaukarelikarunga goyimpempa. Awo kwa gusa mo edina Jehova monoBibeli dononzi edi va toroka.

13. Umbangi musinke una kulikida asi Jesus kuna kuruganesa mukareli gokulimburukwa gonondunge neina? (Johanesa 6:68)

¹³ Kupitira ‘momukareli gokulimburukwa gonondunge,’ Jesus kwa tulisa po mbunga pevhu, ezi zina kukwatesa ko ukareli wousili. Ngapi omu o lizuvhu kuhamena mbunga ezi? Ove nampo kulizuvha ngwendi mupositoli Peturusa ogu ga limbwilire Jesus asi: “Hompa, kwalye natu za? Ove nyove wa kara nononkango domwenyo gwanarunye.” (Joh. 6:68) Kupi ngano oku tuna kara neina nsene ngano kapi twa wiza kombunga zaJehova? Kupitira mombunga ezi, Kristusa kudivilisa asi ose kuna kugwana nondya dopampepo. Age hena kutudeura yipo tu sikise mo nawa sirugana sokuzuvhisa. Jesus kutuvatera hena tu dware “muntu gomupe,” yipo tu hafese Jehova.​—Efe. 4:24.

14. Mokumona asi ove kwa hamena kombunga zaJehova, mauwa musinke wa gwanena mo posiruwo souvera woKorona?

¹⁴ Jesus kugava mavyukiso gomawa poyiruwo  yomaudigu. Ose twa li monena mauwa gomavyukiso ogo apa wa tamekere uvera woKorona. Nampili ngomu sinzi sovantu uzuni mudima va dilire kudiva eyi nava rugana, Jesus kwa divilisire asi ose tuna gwana mavyukiso aga naga tu popera. Ose kwa tu korangedere tu dware simask nsene mokatji kovantu tuna kara ntani tu linape ure nawo. Vakuronambunga kwa va diworokesere va pulide nkenye apa navenye womombungakriste ntani noku divilisa omu vana karere ntani nomu vana kuruganena pampepo. (Jes. 32:1, 2) Ose hena kwa gwene mavyukiso gamwe nomakorangedo kupitira momarapoto goMbungagendesi.

15. Mavyukiso musinke va geve kuhamena omu natu vhura kuponga nomu natu zuvhisa posiruwo souvera woKorona ntani yitundwamo musinke yoyiwa ya horoka?

¹⁵ Posiruwo souvera woKorona, ose hena kwa gwene mavyukiso kuhamena omu natu kara nomapongo ntani nomu natu zuvhisa. Konyima tupu zosiruwo sosisupi, ose kwa tamekere kuponga noku kara noyigongi kupitira moyikwakonentu. Ose hena kwa tamekere kuzuvhisa, unene po pokutjanga nombilive ntani pokuruganesa noselefoni. Jehova kwa tungika elituromo lyetu. Sinzi sonoBeteli kwa rapota asi sivaro sovazuvhisi kwa ligwederera unene. Ntani sinzi sovazuvhisi kwa limonena yitundwamo yoyiwa posiruwo souvera woKorona. Tara kakende “ Jehova kwa tungika sirugana setu sokuzuvhisa.”

16. Ehuguvaro musinke twa hepa kukara nalyo?

¹⁶ Vamwe nampo kwa li zuvhire asi mbunga zaJehova kwa geve mavyukiso gomanzi unene posiruwo souvera woKorona. Nye mwaza siruwo, ose kwa ya dimbwilire asi mavyukiso aga twa gwene kwa kere gomawa. (Mat. 11:19) Ntani ngomu tuna kuteda ko monkedi zongwa omu Jesus ana kupitisira vantu vendi, ose tuna kara nehuguvaro asi yi kare asi yisinke ngayi horoka komeho, Jehova naMunendi ogu ga hara, kapi ngava tu siga ndi asi va tu zumbe.​—Resa Vahebeli 13:5, 6.

17. Ngapi atu lizuvhu kweyi Jesus ga kara mupitisili gwetu?

¹⁷ Ose tuna hafa morwa Jesus kuna kutupitisira! Ose kwa kara mombunga omu mwa dira kukara maligaunuko gopampo, goyirongo ntani gomaraka. Ose kugwana nondya dononzi dopampepo ntani nedeuro eli ali tu vatere tu dive omu natu sikisa mo sirugana sokuzuvhisa. Nkenye gumwe gwetu kumuvatera omu na dwara muntu gomupe ntani ose kulironga omu natu likida eharo kovakwetetu. Ose twa kara nonokonda dononzi deyi natu likangangera mupitisili gwetu Jesus.