1. Ngapi omu natu tara makanderero?

 JEHOVA musiti geguru nevhu kwa tupa situmbukira somulyo unene, sokukanderera kwendi. Gazadara ko tupu: Ose kuvhura kukanderera kwaJehova nkenye apa ntani mwankenye eraka twa hana kuhepa kupura epulisiro kwendi. Ose kuvhura tu kanderere kwendi nampili mosipangero tuna kara ndi modorongo ntani nokukara nehuguvaro asi Guhyetu geharo natu purakena. Ose kupandura Jehova kweyi ga tu pa situmbukira sokukanderera.

2. Ngapi omu hompa Ndafita gayi likidire asi ekanderero kwa kere sininke somulyo po unene kwendi?

² Hompa Ndafita kwa tere uhwi wokukanderera asi situmbukira somulyo unene. Age kwa dimbilire Jehova asi: “Tambura ekanderero lyange ngwendi nzambo zedumba lyewa.” (Epis. 141:1, 2) Mosiruwo saNdafita, yitutumikidiso yedumba lyewa eyi ngava ruganesa vapristeli moukareli wousili, ngava yi wapaike nawa. (Ex. 30:34, 35) Mokumona asi Ndafita kwa uyungire kuhamena nzambo zedumba lyewa, eyi kulikida asi age kwa here kugazadara ko nawa kuhamena eyi naka uyunga mekanderero koGuhwe vemeguru. Eyi yiyo tuna hara kurugana nose. Tuna hara makanderero getu ga hafese Jehova.

3. Monkedi musinke twa hepa kukanderera kwaJehova ntani morwasinke?

³ Nsene kuna kukanderera kwaJehova, twa hepa kukanderera nefumadeko. Gazadara ko kuhamena mamoneko gokutetukisa aga ga mwene Jesaya naHesekiyeli naNdaniyera ntani naJohanesa. Mamoneko ogo ga lisiga, nye ga lifana moyuma  yongandi. Mamoneko ogo nagenye kwa likidire asi Jehova Hompa gomuwa. Jesaya kwa mwene Jehova kuna hingire “kosipundi sendi souhompa.” (Jes. 6:1-3) Hesekiyeli kwa mwene Jehova kuna hingire mokarukara kendi, “mouzera wounene” omu mwa kara ngwendi maruvara gekongoro. (Hes. 1:26-28) Ndaniyera kwa mwene “ogu ga kererera po” kuna dwara sikoverero sosizera, ano mundiro kwa tundire kosipundi sendi souhompa. (Ndan. 7:9, 10) Ano Johanesa kwa mwene Jehova kuna hingire posipundi sendi souhompa, aso kwa si kundurukidire maruvara gokulisiga-siga ngwendi ekongoro. (Ehor. 4:2-4) Apa atu gazadara ko kuhamena omu Jehova ga zeruka, ayo kutudiworokesa situmbukira somulyo esi ga tu pa ntani nomu ya kara nomulyo tu kanderere nefumadeko. Nye yisinke natu tumbura mekanderero?

4. Yisinke tuna kulirongera ko kononkango dokuhova dekanderero lyosihonena edi da kara mwaMateusa 6:9, 10?

⁴ Resa Mateusa 6:9, 10. pEudiso lyopoNdundu, Jesus kwa rongere varongwa vendi omu nava kanderera yipo va hafese Karunga. Koyima zokuuyunga asi “nsene tomu kanderere, omu kanderere ngesi asi,” pomuhowo Jesus kwa tumbwire yininke yomulyo eyi ya likwatakana nositambo saJehova. Ayo kuna kara: Kupongora edina lyaKarunga noUhompa wendi ou una kuwiza, ou ngau yazonagura po nonkore dendi ntani noyininke eyi ngaka rugana kevhu nokovantu. Nsene tu tumbura yininke oyo momakanderero getu, ose ngatu yi likida asi mpango zaKarunga kuna kara sininke somulyo kwetu.

5. Jehova kutupurakena apa atu kanderere kwendi kuhamena yihepwa yetu ndi?

⁵ Moruha rwauvali rwekanderero lyosihonena, Jesus kwa yi likidire asi ayo ya wapa tu kanderere yininke yokuhamena ukaro wanyamwetu. Kuvhura tu pure Jehova a tu pe nondya detu dankenye ezuva, a tu gusire po kononzo detu, a tu kunge komaheteko ntani a tu popere komudona. (Mat. 6:11-13) Apa atu kanderere yininke eyi kwaJehova, ose kuyilikida asi tuna hara evatero lyokutunda kwendi ntani ose kuyilikida asi tuna hara kumuhafesa.

6. Ngoso kuvhura tu kanderere tupu kuhamena yininke eyi ya kara mekanderero lyosihonena ndi? Faturura.

 ⁶ Jesus kapi ana hara vasikuli vendi va kanderere pokutemwinina ekanderero lyosihonena. Momakanderero gamwe aga ga kanderere Jesus, age kwa tumbwire mo yininke yokulisiga-siga eyi ya kere nomulyo kwendi. (Mat. 26:39, 42; Joh. 17:1-26) Mokulifana, nose kuvhura tu kanderere kwa nkenye eyi yina kuturetera sinka. Nsene kuna kutura po etokoro, kuvhura tu kanderere kwaJehova yipo a tu pe ko unongo nonondunge. (Epis. 119:33, 34) Nsene kwa kuza tu ka tameke sirugana sosidigu, ose kuvhura tu kanderere kwaJehova yipo a tu vatere tu dive omu natu si rugana. (Yis. 2:6) Vakurona kuvhura va kanderere po vana vawo, ano vanona kuvhura vakanderere po vakurona vawo ntani natuvenye twa hepa kukanderera po varongwa vetu woBibeli ntani nava atu zuvhisire. Nye nampili ngoso, nsene kuna kukanderera kapisi tu hundire tupu nkenye apa yininke kwaJehova.

7. Morwasinke natu yererepekera Jehova momakanderero getu?

⁷ Twa hepa kuyererepeka Jehova momakanderero getu. Jehova yige twa hepa kuyererepeka po unene kupitakana nkenye ogu. Age “muwa, hena kudongonona po nonzo.” Age hena ‘nkenda neharo, kapi a handuka usimbu, nkenye apa kuzuvha nkenda, age muwa ntani mulimburukwi.’ (Epis. 86:5, 15) Ose twa kara nokonda zongwa zeyi natu yererepekera Jehova morwa twa diva asi age Karunga musinke ntani neyi a rugana.

8. Yininke musinke yimwe eyi twa hepa kupandwira Jehova? (Episarome 104:12-15, 24)

⁸ Apa atu yererepeke Jehova momakanderero getu, ayo kututumangeda tu mu pandure koyininke yoyiwa. Pasihonena, ose kuvhura tu mu pandure komaruvara goufuuli gonombya, konondya dokulisiga-siga doutovara ntani kovakaume ava twa kara nawo. Guhyetu geharo kutupa yininke eyi ntani nayimwe yoyinzi yipo atu hafese. (Resa Episarome 104:12-15, 24.) Nye somulyo po unene, ose kupandura Jehova konondya dononzi dopampepo edi a tu pe ntani nekehuguvaro lyewa lyokomeho eli twa kara nalyo.

9. Yisinke nayi tu vatera tu diworoke kupandura Jehova? (1 Vatesaronika 5:17, 18)

⁹ Ayo ureru kudivara kupandura Jehova  kwanayinye eyi a tu ruganene. Yisinke nayi kuvatera yipo o diworoke kupandura Jehova? Ove kuvhura o tjange muzaro goyininke yimwe eyi wa hundira kwaJehova ntani noku tara asi ngapi omu ga yi limburura. Makura kanderera o mu pandure kweyi ga ku vatera. (Resa 1 Vatesaronika 5:17, 18.) Gazadara ko kweyi: Ose kuhafa apa wopeke ava tu pandura. Mokulifana, Jehova nage kuhafa apa atu diworoka kumupandura kweyi a limburura makanderero getu. (Koros. 3:15) Konda musinke hena zomulyo zeyi natu pandwira Karunga gwetu?

10. Kuliza na-1 Peturusa 2:21, konda musinke zeyi natu pandwira Jehova kweyi ga tumine Munendi Jesus pevhu?

¹⁰ Resa 1 Peturusa 2:21. Twa hepa kupandura Jehova kweyi ga tuma Munendi yipo a ya tu ronge. Apa atu lirongo kuhamena Jesus, ose kulironga yininke yoyinzi kuhamena Jehova ntani nomu natu mu hafesa. Nsene tu tura epuro monzambo zaKristusa, ose ngatu kara nelikwatakano lyewa naJehova ntani ngatu kara nombili nage.​—Rom. 5:1.

11. Morwasinke atu kanderere kupitira medina lyaJesus?

¹¹ Ose kupandura Jehova kweyi atu kanderere kwendi kupitira mwaMunendi. Jehova kuruganesa Jesus mokulimburura makanderero getu. Jehova kupurakena ntani kulimburura makanderero aga ava kanderere kwendi kupitira mwaJesus. Jesus kwa fatwilire asi: “Nkenye eyi ngomu hundira medina lyange, ngani yi mu pa, yipo Guhya ngava mu yererepekere po kupitira moMuna.”​—Joh. 14:13, 14.

12. Konda musinke zimwe zeyi natu pandwira Jehova morwa Munendi?

¹² Jehova kutugusira po nonzo detu morwa nzambo zaJesus Kristusa. Matjangwa kwa faturura Jesus asi “mupristeli gomunene ogu ga hingira korulyo rosipundi saKarunga soUhompa meguru.” (Heb. 8:1) Jesus kuna kara ‘mukwafi gwetu ogu ga kara naGuhya.’ (1 Joh. 2:1) Ose kupandura unene Jehova kweyi ga tu pa Mupristeli gomunene gonkenda ogu a kwata egano maupirankondo getu ntani ogu a tu ‘hundilire po.’ (Rom. 8:34; Heb. 4:15) Ose vantu wokudira kusikilira mo, yipo nye pwa hana nzambo zaJesus Kristusa ose ngano nokuvhurasi kuhedera Jehova mekanderero. Nove kuvhura o yi kwatese ko asi kapi tatu vhuru kulikida rupandu rwetu kouhwi womulyo ou ga tupa Jehova, waMunendi ogu ga hara.

13. Ngapi gayi likidire Jesus asi ga here varongwa vendi momasiku gendi gokuhulilira komeho va ka mu dipage?

¹³ Masiku gokuhulilira komeho Jesus va ka mu dipage, age kwa kanderere po varongwa vendi siruwo sosire, pokupura oGuhwe va “va kunge komuzonaguli.” (Joh. 17:15) Eyi kwa likidire asi Jesus kwa here varongwa vendi. Jesus ga divire asi ntaantani va ka mu hepeke; nye nampili ngoso, age simpe kwa kere nosinka kovapositoli vendi.

14. Ngapi natu yi likida asi twa hara vanavazinyetu?

¹⁴ Nose twa hepa kuhonena Jesus pokudira kuligazara tupu nyamwetu. Twa hepa kukanderera po vanavazinyetu nkenya apa, mevango lyokuligazara tupu nyamwetu. Apa atu yi rugana oyo, ose kutura pasirugana epukururo lyaJesus lyokulihara-hara ntani ose kuyilikida kwaJehova asi twa hara vanavazinyetu. (Joh. 13:34) Kukanderera po vanavazinyetu kapisi sininke somawoko-woko tupu. Nonkango daKarunga kututantera asi “ekanderero lyomuhungami kwa kara nononkondo ntani kuvhura kuvatera vantu.”—Jak. 5:16.

15. Morwasinke natu kanderera po vanavazinyetu?

¹⁵ Twa hepa kukanderera po vapuli vakwetetu morwa awo kuna kuligwanekera  nomaudigu gomanzi. Kuvhura tu pure Jehova yipo a va vatere va lididimikire mauvera, yimpagwa, yita, mahepeko, ndi maudigu gamwe hena. Ntani twa hepa kukanderera po vanavazinyetu ava ava lizambere yipo va vatere ava vana hepa evatero. Ove nampo wa diva ko vamwe ava vana kuligwanekera nomaudigu gangoso. Yipo nye, kuvhura o va tumbure komadina momakanderero goge. Ose kulikida eharo lyosiumbya pokupura Jehova a va vatere va lididimikire maudigu.

16. Morwasinke natu kanderera po ava ava tu pitisire?

¹⁶ Ava ava pitisire mombungakriste kuyihafera apa wopeke ava va kanderere po ntani makanderero gawo kuvavatera. Mupositoli Paurusa ga li moneene mulyo gomakanderero govapuli vakwawo. Age kwa tjenge asi: “Name kanderereni nge po, yipo asi apa ani zahura kana kange, ngano ni uyunge nouradi ni divise sihoramo saKarunga sombudi zongwa.” (Efe. 6:19) Neina, nose twa kara novanavazinyetu wovagara ava ava rugana unene yipo va tu pitisire. Ose kuvalikida eharo pokupura Jehova yipo a tungike sirugana sawo.

17-18. Poyiruwo musinke nava vhura kutupura tu kanderere ntani yisinke twa hepa kudiworoka?

¹⁷ Poyiruwo yimwe, ose kutupura tu kanderere. Pasihonena, munazinyetu gomukadi ogu ana kurugana elirongo lyoBibeli kuvhura a pure munazinyetu gomukadi ogu ana zi nage pelirongo lyendi lyoBibeli yipo a kanderere. Munazinyetu gomukadi ogu ana zi nendi kelirongo lyendi lyoBibeli, kuvhura a dire kudiva nawa murongwa ogo. Yipo nye, age nampo kuvhura a hare kugava ekanderero lyokuhulilira. Monkedi zangoso, age kuvhura a dive eyi na tumbura mekanderero kuhamena murongwa ogo.

¹⁸ Munazinyetu gomugara kuvhura va mu pure a kanderere mepongo lyoyirugana yokuzuvhisa ndi mepongo lyomombungakriste. Vanavazinyetu wovagara ava va kara nositumbukira sokukanderera va hepa kudiworoka sitambo sepongo. Kapisi va ruganese ekanderero nositambo sokupukurura mbungakriste ndi sokugava madiviso. Sinzi sonombungakriste kuruganesa nominute 5 korusumo nekekanderero.  Yipo nye, munazinyetu ogu ana kukanderera kapisi a ruganese nonkango dononzi, unene po ekanderero lyokutamekesa epongo.​—Mat. 6:7.

19. Yisinke nayi tu vatera tu liwapaikire ezuva lyaJehova lyompanguro?

¹⁹ Twa hepa kuninka ekanderero li kare sininke somulyo unene meparu lyetu, ngomu tuna kuhedera pepi nezuva lyaJehova lyompanguro. Jesus kwa uyungire kuhamena ezuva olyo asi: “Vangarareni nye nkenye apa oku tomu kanderere yipo ngomu vhure kuyoworoka kwanayinye eyi ngayi wiza.” (Ruk. 21:36) Yosili, nsene tu twikira kukanderera, ayo ngayi tu vatera tu vangarare pampepo yipo ezuva lyaKarunga nga li dire ku ya tu gwana hararasi.

20. Yisinke twa hepa kurugana yipo makanderero getu ga fane ngwendi nzambo zedumba lyewa?

²⁰ Yisinke tuna zogere mosirongwa esi? Ose kutara situmbukira sokukanderera asi mulyo unene kwetu. Yininke yomulyo po unene eyi natu tumbura mekanderero kuna kara yininke eyi ya likwatakana nositambo saJehova. Ose hena kuvhura tu pandure Karunga morwa Munendi ntani noUhompa wendi ntani kuvhura tu kanderere po vanavazinyetu. Kuvhura hena tu kanderere kuhamena yihepwa yetu yankenye ezuva ntani nokupura Jehova a tu vatere tu kare nepuro lyokupama. Apa atu gazadara ko kuhamena eyi natu tumbura momakanderero getu, ose kuyilikida asi ose kuhafera situmbukira esi twa kara naso sokukanderera. Nsene tu yi rugana ngoso, nonkango detu nga di fana ngwendi nzambo zedumba lyewa, ezi tuna kugava kwaJehova ntani nga di ‘mu hafesa.’​—Yis. 15:8.