1. Ehuguvaro musinke twa hepa kukara nalyo ntani morwasinke?

 NSENE TU tara koyihorokwa eyi yina kuhoroka mouzuni, ayo kuvhura kutuninkisa tu gazare asi yininke kapi ngayi li tjindja. Vantu womomapata kapi vana kulilikida eharo ngwendi moomu ngava yi rugana nare. Vantu vana kara nonyanya unene ntani kuna kulikida nkareso zokulihara vene. Wovanzi kuvadigopera kuhuguvara ava ava pitisire. Nye yihorokwa yangesi kuvhura yi tu ninkise tu kare nehuguvaro asi yininke ngayi ka wapa komeho. Morwasinke? Morwa sinzi sovantu kuna kara nonkareso ngwendi zezi va pumba kuhamena “mazuva gopouhura.” (2 Tim. 3:1-5) Kwato muntu ogu na vhura kupatana asi mauporofete aga kapi gana kusikilira mo ntani mauporofete aga gana kusikilira mo kulikida asi Jesus ga tameka kupangera ngaHompa moUhompa waKarunga. Ou kuna kara umwe womauporofete ou wa zogera kuhamena Uhompa waKarunga. Ayo nayi ka nkondopeka epuro lyetu pokukakona-kona mauporofete gamwe aga ga sikilira mo monomvhura dantaantani.

2. Yisinke natu ka zogera mosirongwa esi ntani morwasinke?

² Mosirongwa esi tatu ka zogera (1) uporofete ou nau tu vatera tu kwate egano siruwo apa Uhompa waKarunga wa tamekere kupangera, (2) mauporofete aga naga tu vatere tu kwate egano asi Jesus kuna kupangera moUhompa waKarunga meguru ntani (3) ntani kuhamena mauporofete aga aga likida kuhamena omu nonkore daKarunga ngava ka di zonagura po. Natu ka dimburura asi mauporofete aga kwa li za kumwe ngwendi moomu tupu muhonzi a honzo kumwe yikehe yokulisiga-siga yipo yikare sikoverero. Mauporofete aga naga ka tu vatera tu kwate egano siruwo esi tuna kuparuka kuliza noyihorokwa eyi ga pumba Jehova.

3. Ehuguvaro musinke atu gwana mouporofete ou wa kara mwaNdaniyera 7:13, 14 kuhamena Hompa goUhompa waKarunga?

³ Uporofete ou wa kara mwaNdaniyera 7:13, 14 kutupa ehuguvaro asi Kristusa nga kara mupangeli gomuwa po gomoUhompa waKarunga. Vantu wokonomuhoko nadinye ngava ‘mu ruganena’ ntani kapi ngaku kara hena Hompa konyima zendi. Uporofete hena umwe womobuke zaNdaniyera kwa pumbire asi Jesus nga tameka kupangera moUhompa kouhura wonomvhura ntambali dopasifanekeso. Kuvhura tu dive siruwo esi Jesus ga tamekere kukara Hompa ndi?

4. Faturura omu Ndaniyera 4:10-17 azi tu vatere tu dive mvhura ezi ga tamekere kupangera Jesus. (Tara hena nonkango dokonhi.)

⁴ Resa Ndaniyera 4:10-17. “Nomvhura ntambali” dopasifanekeso kwa fanekesa nomvhura 2 520. Siruwo oso kwa tamekere momvhura 607 komeho Jesus a wize pevhu, apa Vababironi va gusire ko hompa gokuhulilira govantu vaKarunga moJerusarema. Siruwo oso kwa ya hege mo-1914 apa Jehova ga tumbire Jesus ogu ga “horowora” a kare Hompa goUhompa wendi. *​—Hes. 21:25-27.

5. Ngapi au tu vatere uporofete ‘wonomvhura ntambali’ dopasifanekeso?

⁵ Ngapi omu natu gwanena mo uwa mouporofete ou? Nsene tu kwata nawa egano uporofete ou wonomvhura ntambali dopasifanekeso, ayo ngayi tu pa ehuguvaro asi Jehova kusikisa mo matumbwidiro gendi posiruwo souhunga. Ngwendi moomu tupu Jehova ga tulisire po siruwo apa Uhompa wendi wa tamekere kupangera, eyi kulikida asi age nga sikisa mo hena mauporofete gamwe kuliza nosiruwo esi ga tura po. Yosili, ezuva lyaJehova kapi ‘ngali liranga.’​—Hab. 2:3.

6. (a) Yihorokwa musinke tuna kumona pevhu eyi yina kulikida asi Jesus ga tameka kupangera meguru? (b) Ngapi omu umbangi ou wa liza nouporofete ou wa kara mEhororo 6:2-8?

⁶ Komeho Jesus a ka fe, age kwa pumbire yihorokwa eyi ya vhulire kuvatera varongwa vendi yipo va dive asi age ana tameke kupangera meguru. Age kwa pumbire yihorokwa yimwe ngwendi yita, erumbu ntani makankamo gevhu. Age hena kwa pumbire asi ngapa kara mauvera ndi mahamba gomukagu gokulisiga-siga, pasihonena uvera woKorona ou wa tameka monomvhura dantaantani. Yihorokwa eyi kuna kara yimwe ‘yoyidiviso’ yekaropo lyaKristusa. (Mat. 24:3, 7; Ruk. 21:7, 10, 11) Nomvhura dokupitakana po 60 konyima zevhumbuko lyaJesus nokutengura meguru, Jesus kwa pere mupositoli Johanesa emoneko eli lya likidire asi yihorokwa oyo ngayi horoka. (Resa Ehororo 6:2-8.) Yihorokwa nayinye oyo kwa sikamo kutundilira apa Jesus ga tamekere kupangera mo-1914.

7. Morwasinke yininke yoyinzi yoyidona yina kuhorokera pevhu kutunda tupu apa Jesus ga tamekere kukara Hompa?

⁷ Morwasinke yihorokwa yomouzuni ou ya tamekere kudonapa unene kutunda apa Jesus ga tamekere kupangera ngaHompa? MEhororo 6:2 kwa gava mo mauzera. Sininke sokuhova esi ga rugene Jesus konyima zapa ga tamekere kupangera moUhompa waKarunga kuna kara sokurwa yita. Yilye ogu ga rwanesere moyita oyo? Age kwa rwanesere Muzonaguli kumwe nonompepo dendi donondona. Kuliza nEhororo egaununo 12, Satana kapi ga fundire yita oyo ntani nage nonompepo dendi  donondona kwava zuguminine pevhu. Ano ngoyitundwamo, Satana kwa handuka unene ntani kuna kuhomokera vantu ava va “kara pevhu.”​—Ehor. 12:7-12.

8. Mauwa musinke atu gwanene mo pokumona omu gana kusikilira mo mauporofete gokuhamena Uhompa waKarunga?

⁸ Mauwa musinke natu gwanena mo momauporofete aga? Yihorokwa yomouzuni ntani nelitjindjo lyonkareso zovantu kuvhura kutuvatera tu yi pure asi Jesus ga tameka kupangera ngaHompa. Yipo nye, mevango lyokuguva apa atu mono vantu vana kara nonkareso zokuligazara tupu vene ntani kuna kurugana yininke yoyidona, ose twa hepa kudiworoka asi yirugana eyi ava rugana kuna kusikisa mo uporofete womoBibeli. Uhompa waKarunga kuna kupangera! (Epis. 37:1) Ntani twa hepa kuyindindira asi yininke yoyidona ngayi li gwederera unene ngomu Harumagedoni zina kuhedera pepi. (Mar. 13:8; 2 Tim. 3:13) Tatu pandura Karunga gwetu gemeguru geharo kweyi ga tu vatera tu kwate egano eyi pevhu pana vhukire yininke yoyinzi yoyidona.

9. Ngapi omu uporofete ou wa kara mwaNdaniyera 2:28, 31-35, wa faturura epangero lyononkondo lyokuhulilira ntani siruwoke lya tameka kupangera?

⁹ Resa Ndaniyera 2:28, 31-35. Ose kuna kumona omu uporofete ou una kusika mo. Nzodi zaNebukadenesara kulikida eyi ngayi horoka pomazuva gokuhulilira konyima zapa Jesus ga tameka kupangera. Nonkore daJesus kwa kwatera mo epangero lyononkondo lyokuhulilira lyouzuni mudima eli va pumba moBibeli, eli lyafanekesa “nompadi dosivera nerova.” Epangero eli lyononkondo lyouzuni mudima nare lya tameka kupangera. Alyo kwa tamekere kupangera poyita yokuhova  youzuni mudima apa Britaniya naAmerika va tamekere kurugana kumwe. Efano eli ga mwene Nebukadenesara monzodi zendi kwa pumbire yininke yivali kuhamena epangero eli lyononkondo eyi ngayi li ninkisa lilisige nomapangero gononkondo aga ga hovere kukara ko.

10. (a) Yisinke lina kurugana epangero lyononkondo lyaBritaniya naAmerika kuhamena eyi va pumba mwaNdaniyera? (b) Yisinke twa hepa kunyokera po kurugana? (Tara kakende “ Takamesa erova!”)

¹⁰ Mokulisiga nomapangero gononkondo aga va tumbura memoneko, epangero lyaAmerika naBritaniya kwa fanekesa kosivera esi va vhonga nerova, nye kapi lya fanekesa sivera sene-sene ngwendi ngorodo ntani sisiliveli. Erova kwa fanekesa vantu. (Ndan. 2:43) Ose kuyimonenena eyi neina mweyi ava rugana vantu kupitira momahoroworo, monombunga dokukondjera untu womuntu ntani pokumasha. Ano eyi kuninkisa vampitisili wononkondo yi va karere udigu kusikisa mo eyi vana hara kurugana.

11. Ngapi omu epangero lyononkondo lyaBritaniya naAmerika ali tu pe ehuguvaro asi ose kuna kuparuka pomazuva gopouhura?

¹¹ Sauvali, epangero lyaBritaniya naAmerika eli va fanekesa konompadi defano lyenene kuna kara epangero lyokuhulilira lyononkondo lyouzuni mudima eli za pumba Bibeli. Kwato hena epangero lyepevhu eli ngali kwama ko konyima zalyo. Nye alyo ngava li zonagura po poHarumagedoni apa epangero lyaKarunga ngali ya zonagura po mapangero nagenye govantu. *​—Ehor. 16:13, 14, 16; 19:19, 20.

12. Umbangi musinke umwe hena ga pumbire Ndaniyera ntani ngapi omu au tu hengagwida nokutupa ehuguvaro?

¹² Mauwa musinke natu gwanena mo mouporofere ou? Uporofete waNdaniyera kugava mauzera gamwe hena aga gana kulikida asi ose kuna kuparuka pomazuva gopouhura. Nomvhura dokupitakana po 2 500 dina ka pita, Ndaniyera kwa pumbire asi konyima zepangero lyaBabironi, mapangero gononkondo gane ngaga hepeka vantu vaKarunga. Age kwa pumbire hena asi epangero lyononkondo lyaBritaniya naAmerika, yilyo ngali kara epangero lyokuhulilira komakwawo. Eyi kutuhengagwida nokutupa ehuguvaro asi Uhompa waKarunga ntaantani ngau ya zonagure po mapangero nagenye govantu ntani nokuyapangera evhu nalinye.​—Ndan. 2:44.

13. Yisinke ga fanekesa “hompa gwauntantatu” ntani “vahompa murongo” ava va tumbura mEhororo 17:9-12 ntani ngapi omu wa sikilira mo uporofete ou?

¹³ Resa Ehororo 17:9-12. Ezonaguro eli ya retesere po yita yokuhova youzuni mudima, kwa twaredesere kesikiliro mo lyouporofete umwe kuhamena mazuva gopouhura. Vampitisili womouzuni kwa here kuretesa po mbili mouzuni. MwaMurongagona mo-1920, awo kwa tulisire po mbunga zelipakerero lyoyirongo, ano mwaSikukutu 1945 yipo va ya zi pinganesere po nombunga zelipakerero lyonomuhoko. Mbunga ezi kuzitumbura asi “hompa gwauntantatu.” Nye azo kapisi epangero lyononkondo lyouzuni mudima. Azo kwa kara tupu nononkondo morwa ekwateso ko eli azi gwana kupitira momapangero. Bibeli kutumbura mapangero ogo asi “vahompa murongo.”

14-15. (a) Yisinke ali likida etjangwa lyemEhororo 17:3-5 kuhamena “Babironi zonene?” (b) Yisinke yina kuhorokera vantu ava ava kwatesa ko maukarelikarunga goyimpempa?

¹⁴ Resa Ehororo 17:3-5. Memoneko lyokutunda kwaKarunga, Johanesa kwa mwene “Babironi zonene,” ezi za fanekesa maukarelikarunga nagenye goyimpempa. Ngapi omu lyasikilire mo emoneko eli? Maukarelikarunga  goyimpempa kwa ruganena kumwe nomapangero gononkondo nomvhura dononzi ntani kwa ga kwatesa ko. Ntaantani tupu Jehova nga ruganese mapangero yipo ngaga ‘sikisemo eyi ana hara kurugana.’ Yitundwamo musinke ngayi kara? Mapangero ndi asi “vahompa murongo,” ngava homokera maukelikarunga nagenye goyimpempa ntani noku ka ga zonagura po.​—Ehor. 17:1, 2, 16, 17.

¹⁵ Ngapi omu twa yi diva asi Babironi zonene ntaantani va ka zi zonagure po? Mokukagwana elimbururo, ayo ya kara nomulyo tu diworoke asi sitata sanare saBabironi kwa kere mepopero morwa mema gomomukuro gomunene gwaEufurata ogu gwa si kundurukidire. Buke zEhororo kwa hetakenesa mamiliyona govantu ava ava kwatesa ko Babironi zonene ‘komema’ gepopero. (Ehor. 17:15) Azo kulikida hena asi mema ngaga ‘pwira,’ ano eyi kulikida asi Babironi zonene ngazi zumbanesa vantu wovanzi ava ava zi kwatesa ko. (Ehor. 16:12) Uporofete ou kuna kusikilira mo neina morwa sinzi sovantu va siga maukarelikarunga goyimpempa ntani va tameka kupapara malimbururo moyininke yapeke.

16. Uwa musinke atu gwanene mo pokudiva siruwo apa mbunga zelipakerero lyonomuhoko va zi tulisire po ntani pokudiva siruwo apa Babironi zonene ngava zi zonagura po?

 ¹⁶ Mauwa musinke natu gwanena mo momauporofete aga? Mokumona asi mbunga zelipakerero lyonomuhoko va zi tulisa po ntani mokumona asi sinzi sovantu kapi vana kukwatesa ko hena maukarelikarunga goyimpempa, eyi kutupa umbangi asi ose kuna kuparuka pomazuva gopouhura. Nampili ngomu sinzi sovantu vana kudira kukwatesa ko Babironi zonene, oyo kapisi yiyo ngayi zonagura po maukarelikarunga goyimpempa. Ngomu tupu katuyitumbura ketameko, Jehova nga ruganesa “vahompa murongo” ava va fanekesa komapangero ntani ngaga ninkisa ga ‘sikise mo eyi ga hara kurugana.’ Mapangero ogo ngaga zonagura po Babironi zonene, ano eyi ngayi tetukisa vantu. * (Ehor. 18:8-10) Ezonauko lyoBabironi zonene ngali tukukisa uzuni mudima ntani ayo kuvhura ngayi retese po udigu, nye vantu vaKarunga ngava hafa morwa nokonda mbali. Maukarelikarunga goyimpempa aga ga kara nonkore daKarunga siruwo sosire ngava ga zonagura po narunye ntani ezoworo lyetu ngali kara pepi-pepi.​—Ruk. 21:28.

17-18. (a) Ngapi omu natu twikira kunkondopeka epuro lyetu? (b) Yisinke ngatu ka zogera mosirongwa sokukwama ko?

¹⁷ Ndaniyera kwa pumbire asi ediwo lyousili ngali vhuka. Yosili ediwo lyousili lina vhuka! Ose ngesi tuna kwata egano mauporofete aga gana kusikilira mo mosiruwo setu. (Ndan. 12:4, 9, 10) Mauporofete aga usili ntani kutuvatera tu fumadeke Jehova noNonkango dendi Bibeli. (Jes. 46:10; 55:11) Yipo nye, twikira kunkondopeka epuro lyoge pokulironga Nonkango daKarunga ntani nokukuvatera wopeke yipo va tulise po elikwatakano lyewa naJehova. Age nga popera ava va huguvara mwendi nawa-nawa ntani ngava pa mbili.​—Jes. 26:3.

¹⁸ Mosirongwa sokukwama ko, ngatu ka zogera mauporofete aga ga zogera kuhamena mbungakriste zopomazuva gopouhura. Ngomu ngatu ka yi lironga, mauporofete ogo nago kwa likida asi ose kuna kuparuka pomazuva gopouhura. Ngatu ka lironga hena asi Hompa gwetu Jesus, kuna kupitisira vasikuli vendi wovalimburukwi.