1. Yisinke ga rugene Jehova, konyima zapa tupu va zonene oAdamu naEva? (Genesis 3:15)

 KONYIMA zapa tupu Adamu naEva va zonene, Jehova kwa geve ehuguvaro koruvharo rwawo kupitira mouporofete womulyo. Eyi ga uyungire kwa yi tjanga mwaGenesis 3:15.​—Resa.

2. Morwasinke uporofete ou wa karera nomulyo?

² Uporofete ou kwa kara mobuke zokuhova zomoBibeli. Nye nobuke nadinye domoBibeli kwa likwatakana nouporofete ou. Ngwendi moomu tupu tuvera otu twa kara pokatji kobuke a tu kwatakanesa mapepa gobuke, nonkango edi va tjanga mwaGenesis 3:15 kwa likwatakana nombudi zomonobuke nadinye domoBibeli ezi asi Karunga nga tuma muzowoli ogu ngaya zonagura po Muzonaguli, kumwe novantu vendi navenye wovadona ava ava mu kwatesa ko. * Olyo kuna kara etungiko eli ngava ka gwana vantu ava va hara Jehova!

3. Yisinke natu ka zogera mosirongwa esi?

³ Mosirongwa esi, tatu ka limburura mapuro aga gana ku kwama ko kuhamena uporofete ou va tjanga mwaGenesis 3:15: Wolye ava va tumbura mouporofete owo? Ngapi omu uporofete ou una kusikilira mo? Ntani ngapi omu tuna ku gwanena mo mauwa?

4. Yilye ogu lya tamba “ezoka” ntani ngapi omu twa yi diva?

⁴ MwaGenesis 3:14, 15 kwa tumbura mo “ezoka,” ‘ruvharo’ rwezoka, “mukadi” ntani ‘ruvharo’ romukadi. Bibeli kutuvatera  tu dimburure asi wolye wa tamba uporofete ou. * Tu zeni tu ka tameke ‘nezoka.’ Ezoka lyene lyene kapi ngano lya vhulire kukwata egano eyi ga uyungire Jehova mosikunino saEdeni. Yipo nye, ezoka eli va tamba movelise ozo, ntudi lya hepa kukara sisitwa sonondunge. Nye yilye nawa-nawa ogu lya tamba ezoka? MEhororo 12:9, kwa uyunga mo nawa-nawa ogu va tamba kezoka. Amo kwa likida mo nawa-nawa asi “ezoka lyanare” kwa tamba koMuzonaguli Satana. Nye wolye ruvharo rwezoka?

5. Wolye ava va hamena moruvharo rwezoka?

⁵ Poyiruwo yimwe, apa Bibeli azi ruganesa nkango ruvharo, azo kutamba kwava ava honene yirugana ya gumwe, ano awo kuvhura ku va tumbura asi vana vendi. Yipo nye, ruvharo rwezoka kwa kwatera mo vaengeli wokudira kulimburukwa ntani novantu ava ava rugana ngwendi Satana yipo va rwanese Jehova novantu vendi. Awo kwa kwatera mo vaengeli ava va sigire yitumbukira yawo meguru posiruwo saNowa, ava va kara nonkareso zondona ngwendi zaguhyawo Muzonaguli.​—Gen. 6:1, 2; Joh. 8:44; 1 Joh. 5:19; Juda 6.

6. Morwasinke “mukadi” ogu va tumbura mouporofete ou ga dilira kutamba kwaEva?

⁶ Ngesi tu zeni tu ka dimburure asi yilye ogu va tamba ‘komukadi.’ Mukadi ogo kapisi Eva. Morwasinke tuna kuuyungira ngoso? Tu tareni ko konda zimwe. Uporofete owo kwa uyunga asi ruvharo romukadi ngaru “myona” mutwe gwezoka. Ngomu tupu tuna yi zogere, ezoka kwa tamba sisitwa sopampepo ndi Satana ntani kwato muntu gokudira kusikilira mo gomoruvharo rwaEva ogu ga kara nononkondo dokuvhura kumyona Satana. Makura  ngapi omu Satana ngava vhura ku mu zonagura po?

7. Ngomu tupu va yi likida mEhororo 12:1, 2, 5, 10, yilye mukadi ogu va tumbura mwaGenesis 3:15?

⁷ Buke zEhororo kututantera asi yilye mukadi ogu va tumbura mwaGenesis 3:15. (Resa Ehororo 12:1, 2, 5, 10.) Mukadi ogu, kapi ga tamba kovakadi ava va kara pevhu. Konhi zonompadi dendi kwa kara ko kwedi ntani komutwe gwendi kwa kara ko nkata ezi va rugana nonombungururu 12. Mukadi ogu kwa hampuruka munona ndi Uhompa waKarunga. Uhompa meguru wa kara, yipo nye mukadi nage ga hepa kukara meguru. Age kwa tamba koruha rwemeguru rombunga zaJehova, omu mwa hamena vaengeli wovalimburukwi.​—Gar. 4:26.

8. Yilye muntu gomulyo po unene gomoruvharo romukadi ntani siruwo musinke ga ya kere gomoruvharo romukadi? (Genesis 22:15-18)

⁸ Nonkango daKarunga kutuvatera hena tu dimburure nawa-nawa ogu rwa tamba ruvharo romukadi. Ruvharo oru kwa tundilira moruvharo rwaAbirahamu. (Resa Genesis 22:15-18.) Ngwendi moomu tupu wa yi pumbire uporofete, Jesus kwa ya tundilire moruvharo romugara ogo gomulimburukwi. (Ruk. 3:23, 34) Nye ruvharo oro rwa hepere kukara nononkondo unene kupitakana muntu morwa nga hepa ku ka zonagura po Satana. Yipo nye, apa Jesus ga kere nonomvhura dokoyiha yo-30, age kwa mu gwavekere nompepo zokupongoka. Apa Jesus va mu gwavekere, age kwa kere muntu gomulyo unene, ogu ga hamena koruvharo romukadi. (Gar. 3:16) Konyima zonomfa daJesus nevhumbuko lyendi, Karunga kwa mu ‘dwarekere nkata zouyerere nefumano’ nokumupa “nonkondo nadinye demeguru, nedi depevhu,” kukwatera mo nonkondo do ku ya ‘zonagura po yirugana yoMuzonaguli.’​—Heb. 2:7; Mat. 28:18; 1 Joh. 3:8.

9-10. (a) Wolye hena ava va hamena moruvharo romukadi ntani siruwo musinke ava ya hama koruvharo romukadi? (b) Yisinke natu ka zogera ngesi?

⁹ Nye koveli vamwe hena ava ngava hamena moruvharo romukadi. Mupositoli Paurusa kwa uyungire kuhamena ruha rumwe roruvharo oro, apa ga tanterere Vakriste wovagwavekwa ava va kere asi Vajuda novapagani pokuvatantera asi: “Nsene asi one kwa hamena kwaKristusa, one vemezimo lyaAbirahamu ntani ngomu gwana upingwa ou va tumbwidilire Abirahamu.” (Gar. 3:28, 29) Apa Jehova a gwaveke Mukriste nompepo zokupongoka, muntu gwangoso kuyahama koruvharo romukadi. Yipo nye, moruvharo romukadi kwa hamena mo Jesus Kristusa ntani nava va hamena kosivaro so-144 000, ava ngava ka pangera kumwe nendi. (Ehor. 14:1) Navenye ava kuhetekera ko kugazara nokurugana ngwendi Guhyawo Jehova.

¹⁰ Mokumona asi tuna kwata egano asi wolye ava va tumbura mwaGenesis 3:15, ngesi tu zeni tu ka zogere kuhamena omu Jehova ga sikisa mo ruha rumwe rouporofete ou ntani nomu tuna kugwanena mo uwa ngesi.

11. Monkedi musinke ruvharo romukadi va ru humine “kosinsinsina?”

¹¹ Kuliza nouporofete ou wa kara mwaGenesis 3:15, ezoka ngali huma ruvharo romukadi “kosinsinsina.” Uporofete ou kwa sika mo apa Satana ga ninkisire Vajuda noVaroma va dipage MunwaKarunga. (Ruk. 23:13, 20-24) Ngwendi moomu tupu sironda sokosinsinsina asi ninkisa muntu a dire kugenda, mokulifana tupu, apa Jesus ga kere montoko mazuva gatatu, age kapi ga vhulire kurugana yuma.​—Mat. 16:21.

12. Ngapi omu mutwe gwezoka ngava ka gu zonagura po ntani siruwo musinke?

¹² Uporofete waGenesis 3:15 kulikida asi Jesus kapi ga hepere kukara montoko siruwo  sosire. Morwasinke? Morwa kuliza nouporofete, ruvharo romukadi ngaru myona mutwe gezoka. Eyi kutanta asi Jesus va hepere kumuvhumbura. Yosili Jesus va mu vhumbwire. Mezuva lyautatu konyima zonomfa dendi, Jesus kwa mu vhumbwire norutu ropampepo. Jesus ngaka zonagura po Satana posiruwo esi ga tura po Karunga. (Heb. 2:14) Jesus ntani nava nga ka pangera nawo, ngava ka zonagura po nonkore daKarunga nadinye kukwatera mo Satana ntani nava ava mu kwatesa ko.​—Ehor. 17:14; 20:4, 10. *

13. Mauwa musinke tuna kugwanena mo mesikiliromo lyouporofete ou?

¹³ Nsene asi ove mukareli gwaKarunga, ove kuna kugwanena mo uwa mesikiliro mo lyouporofete ou. Jesus kwa ya parukire pevhu ngomuntu. Age kwa honenene nawa-nawa yikara yoGuhwe. (Joh. 14:9) Kupitira mwaJesus, ose twa ya diva Jehova ntani noku muhara. Ose twa gwanena mo hena mauwa mweyi nga rongo Jesus ntani monkedi omu a pitisire nombungakriste neina. Age kwa tu ronga monkedi omu natu paruka yipo tu hafese Jehova. Ntani natuvenye kuvhura kugwanena mo mauwa monomfa daJesus. Monkedi musinke? Apa Jesus va mu vhumbwire, age kwa geve honde zendi ngonzambo zokusikilira mo yipo ‘zikuhure nonzo detu nadinye.’​—1 Joh. 1:7.

14. Ngapi twa yi diva asi uporofete ou ga uyungire Jehova kapi wa sikilire mo konyima tupu zosiruwo sosisupi? Faturura.

¹⁴ Nonkango douporofete edi ga uyungire Jehova mosikunino saEdeni, kwa likidire asi ngapa pita siruwo sosire komeho uporofete ou u ka sike mo naunye. Apo pwa hepere kupita siruwo sosire, yipo mukadi a kare noruvharo rwendi oru va tumbwidilire ntani yipo Muzonaguli a pongaike ava ava mu kwatesa ko ntani yipo pa kare elinyengo pokatji kezoka nomukadi. Ose kugwanena mo uwa mouporofete ou morwa awo kuturondora asi Satana nava ava mu kwatesa ko, ngava nyenga vakareli vaJehova. Jesus nage kwa geve erondoro lyokulifana kovarongwa vendi. (Mar. 13:13; Joh. 17:14) Ose twa li monena esikiliromo lyoruha rumwe rouporofete ou, unene po monomvhura 100 da kapita. Monkedi musinke wa sika mo?

15. Morwasinke uzuni wa nyengera unene vantu vaKarunga ntani morwasinke natu dilira kutjira Satana?

¹⁵ Konyima tupu zapa Jesus va mu tulire a kare Hompa mo-1914, Satana yipo va mu zugumine mo meguru. Age ngesi pevhu ana kara ntani kwa kundindira ngava mu zonagure po. (Ehor. 12:9, 12) Nye nampili ngoso, koyili eyi a rugana. Satana ana handuka unene ntani kuna kuhomokera vantu vaKarunga. (Ehor. 12:13, 17) Eyi yiyo nye uzuni waSatana wa nyengera vakareli vaJehova. Nye nampili ngoso, kapisi tu tjire Satana nava ava mu kwatesa ko. Mevango lyokukara nowoma, kuvhura tu kare nehuguvaro ngwendi eli ga kere nalyo mupositoli Paurusa ogu ga tjenge asi: “Nsene asi Karunga kwa hama kwetu, yilye ogu natu funda?” (Rom. 8:31) Ose kuvhura tu huguvare unene mwaJehova morwa tuna dimburura asi sinzi seyi va tumbura mouporofete waGenesis 3:15, ya sikilira mo nare.

16-18. Ngapi omu Curtis naUrsula ntani Jessica, va gwanena mo uwa pokukwata egano etjangwa lyaGenesis 3:15?

¹⁶ Etumbwidiro lyaJehova eli va tumbura mwaGenesis 3:15, kuvhura kutuvatera tu lididimikire nkenye maudigu aga natu vhura kuligwanekera nago. Mutumwa gedina Curtis ogu ga kara moGuam kwa tanta asi: “Poyiruwo yimwe, ame kwa ligwanekerere nomaudigu  ntani nomadompeso aga ga ninkisire nge yi digopere nge kulimburukwa Jehova. Nye pokuteda ko kouporofete ou wa kara mwaGenesis 3:15, kwa vaterere nge ni twikire kuhuguvara mwaGuhyetu gemeguru.” Curtis kwa ku ndindira nononkondo siruwo apa Jehova ngaka gusa po maudigu getu nagenye.

¹⁷ Munazinyetu gomukadi Ursula gomoBavaria kwa tanta asi pokukwata egano etjangwa lyaGenesis 3:15, kwa mu vaterere ayi pure asi Bibeli kwa zi retesa po Karunga. Age ga dimbwilire omu mauporofete gamwe ga likwatakana nouporofete ou ntani ayo kwa mu tetukisire sili. Age kwa tanta hena asi: “Ayo kwa tetukisire nge apa na lirongere asi Jehova kwa rugene ko yuma usimbu-simbu yipo vantu va kare nehuguvaro lyokomeho.”

¹⁸ Jessica gomoMicronesia kwa tanta asi: “Ame simpe kudiworoka omu na lizuvhire apa na dimbwilire sikando sange sokuhova asi nina gwana usili. Ruha rumwe rouporofete ou wa kara mwaGenesis 3:15, kwa sikilire mo. Awo kwa vaterere nge ni diworoke asi yininke yoyidona eyi tuna kuligwanekera nayo ngesi, kapisi yiyo ga tu harere Jehova tu ligwanekere nayo. Uporofete ou kwa vatera nge hena ni yi pure nawa-nawa asi kukarera Jehova kutwaredesa komauwa ngesi ntani neparu lyewa lyokomeho.”

19. Morwasinke natu karera nehuguvaro asi ruha rokuhulilira rouporofete ngaru ka sika mo?

¹⁹ Ngomu tuna yi lirongo, uporofete ou wa kara mwaGenesis 3:15 kuna kusikilira mo. Ose tuna dimburura asi yilye ruvharo romukadi ntani noruvharo rwezoka. Jesus muntu gomulyo unene ogu ga hamena koruvharo romukadi. Age ga veruka kosironda sendi sopasifanekeso sokosinsinsina ntani age ngesi kuna kara Hompa gononkondo ogu nga dira kufa. Jehova ngesi kuna kumanesa kuhorowora ava ngava ka pangera kumwe naMunendi. Mokumona asi ruha rokuhova rouporofete womwaGenesis 3:15 wa sikilira mo, eyi kutupa ehuguvaro asi ruha rokuhulilira rouporofete rokukamyona mutwe gezoka, ngau ka sikilira mo nawo. Vakareli vaJehova ngava ka hafa unene apa Satana ngava ka mu zonagura po. Yipo nye, tu twikireni kudidimika. Karunga gwetu, kutanta usili. Kupitira moruvharo romukadi, age nga ka rugana yininke yoyiwa ‘konomuhoko nadinye depevhu.’​—Gen. 22:18.