Jesus nga rongo vantu va kare nombili nava wopeke. Nye sikando simwe age kwa tanterere vapositoli vendi asi: “Mwa ha gazara asi ame kwa wizira ni rete mbili pevhu, nye ame kwa wizira ni rete rufuro. Ame kwa reta maligaunuko pokatji komuna gomugara noguhwe, nopokatji komuna gomukadi nozina, nopokatji komuntu nangumweyi zendi.” (Mat. 10:34, 35) Yisinke ga tembe Jesus?

Jesus kapi ga here kugaununa mapata, nye age ga yi divire asi marongo gendi kuvhura ngaga retese po maligaunuko momapata. Yipo nye, ava vana hara kukara varongwa vaKristusa nokugwana ekuho, va hepa kudiva yitundwamo yetokoro lyawo eli ngava tura po. Ayo kuvhura ngayi va karere udigu kulimburukwa marongo gaJesus nsene ngava ligwanekera nomarwaneso gokutundilira komulikwali gomuhapuli ndi kovanekoro vamwe.

Bibeli kukorangeda Vakriste va “tulise po mbili novantu navenye.” (Rom. 12:18) Nye marongo gaJesus kuvhura kukara ngwendi rufuro komapata gamwe. Eyi kuhoroka apa gumwe a tambura marongo gaJesus, ano vamwe kuganyokera po ndi kugarwanesa. Moukaro wangoso, vanekoro ava va hamena mepata olyo, ngava kara ngwendi “nonkore” dogu ana kulironga usili.​—Mat. 10:36.

Varongwa vaJesus ava va tunga momapata omu mwa kara vanekoro ava va hamena koukarelikarunga wapeke, poyiruwo yimwe kuligwanekera nomaukaro aga aga heteke eharo lyawo kwaJehova naJesus. Pasihonena, vanekoro wovahapuli kuvhura va va sininike va lihameke moyilika youkareli wawo. Moukaro wangoso, awo va hepa kutokora asi yilye ogu nava hafesa po. Jesus kwa tente asi: “Nkenye ogu ga hara po unene oguhwe ndi ozina kupitakana omu ga hara nge, kapi ga wapera kukara murongwa gwange.” (Mat. 10:37) Jesus kapi ga tembe asi ava vana hara kukara varongwa vendi kapisi va hare unene vakondi vawo. Nye age kwa va rongere omu nava tura po matokoro kuhamena yininke yomulyo po meparu lyawo. Nsene vekoro lyetu wovahapuli kuna kuturwanesa tu hageke kukarera Jehova, twa hepa kutwikira kuvahara. Nye nampili ngoso, twa hepa kudiworoka asi kuhara Jehova kuna kara sininke somulyo po unene meparu lyetu.

Marwaneso gokutundilira kovanekoro kuvhura kutukoresa unene. Nye nampili ngoso, varongwa vaJesus va hepa kudiworoka nonkango edi ga uyungire asi: “Ogu a dili kudamuna sitji sendi a kwame nge, kapi ga wapera kukara murongwa gwange.” (Mat. 10:38) Eyi kutanta asi Vakriste kutara marwaneso gokutunda kovanekoro ngoruha romahepeko aga va hepa kulididimikira varongwa vaJesus. Nye simpe awo kukara nehuguvaro asi nkareso zawo zongwa kuvhura ngazi ninkise vanekoro vawo wovahapuli va hare kulironga Bibeli.—1 Pet. 3:1, 2.