1. Monkedi musinke omu Vakriste va hepa kukara ngwendi sitji? (Tara hena efano.)

 “MPEPO kapi azi teza sitji esi asi nyongoka.” Sisewe esi kulikida asi sitji sa hepa kukara soureru ndi sa hepa kunyongoka nsene mpepo kuna kupepa unene yipo si kare sina nkondopara. Nose twa hepa kukara vantu woureru ndi wougomoki nsene yininke kuna ku tu digopera meparu lyetu yipo tu karere Jehova noruhafo. Ngapi natu yi rugana oyo? Twa hepa kukara nougomoki apa yininke yemeparu lyetu ayi litjindji ntani pokufumadeka magano gava wopeke nopokufumadeka matokoro govantu wopeke.

2. Yikara musinke nayi tu vatera tu tambure ukaro apa yininke yemeparu lyetu ayi litjindji, ntani yisinke natu ka zogera mosirongwa esi?

² Ngovakareli vaJehova, ose tuna hara kukara nougomoki. Ose tuna hara hena kulinunupika ntani noku kara nonkenda. Mosirongwa esi, natu ka mona omu yikara eyi ya vaterere Vakriste vamwe yipo yi va tompoke kulididimikira apa yininke yemeparu lyawo ya litjindjire. Na tu ka mona hena omu yikara eyi nayi tu vatera. Nye pomuhowo, tu zeni tu ka lirongere ko kwaJehova naJesus ava va tu tulira po sihonena sosiwa sougomoki.

3. Umbangi musinke twa kara nawo ou au likida asi Jehova kwa kara nougomoki?

³ Jehova ku mu tumbura asi “Mupopeli” morwa age kwa likorerera ntani kapi a li nyunganga. (Deut. 32:4) Nye nampili ngoso, age hena kwa kara nougomoki. Ngomu yininke yomouzuni ou yina kulitjindja, Karunga kutwikira kutambura maukaro ntani age kudivilisa asi nayinye eyi ga tumbwidira ngayi ka sika mo. Jehova kwa sita vantu yipo va mu fane nevhuliko lyokutambura maukaro apa yininke ayi litjindji meparu lyetu. MoBibeli ose kugwana mo nompango edi na di tu vatera yipo tu ture po matokoro gomawa yikare asi maudigu musinke aga natu vhura kuligwanekera nago.  Sihonena saJehova ntani nonompango edi ga tu pa, kwa tu pa umbangi ou au likida asi nampili ngomu ga kara “Mupopepi,” Jehova age hena kwa kara nougomoki.

4. Gava sihonena esi sina kulikida ugomoki waJehova. (Levitikus 5:7, 11)

⁴ Jehova kurugana yininke mononkedi donongwa ntani monkedi zougomoki. Age kapi a ndindire ko yoyinzi kovantu. Pasihonena, konekeni omu Jehova ga likidire ugomoki koVaisraeli. Age kapi ga ndindilire ko kwankenye gumwe asi a gave nzambo zokulifana, yikare asi ngawo ndi hepwere. Momaukaro gamwe, age kwa pulisilire nkenye muntu yipo a gave nonzambo kuliza noukaro wendi.—Resa Levitikus 5:7, 11.

5. Gava sihonena esi sina kulikida elinunupiko nonkenda zaJehova.

⁵ Elinunupiko nonkenda zaJehova ku mu tumangeda a kare nougomoki. Pasihonena, Jehova kwa likidire elinunupiko komeho a zonagure po vantu wovadona womoSodoma. Kupitira momuengeli, Jehova kwa tanterere Roto, ogu ga kere muhungami yipo a tjwayukire kosirongo sokonondundu. Roto kwa kere nosinka sokuza kosirongo oso. Makura yipo ga likwamberere Jehova asi nage nepata lyendi va va pulisire va ze koSowara, kadoropa gona aka Jehova ga tokwere kuzonagura po. Jehova ngano ga tanterere Roto asi a rugane nawa-nawa yeeyi ga mu tanterere. Nye mevango lyoyo, Jehova kwa pulisilire Roto a ze koSowara ntani age kapi ga zonagwire po doropa ozo. (Gen. 19:18-22) Konyima zapa pwa pwitire nomvhura, Jehova kwa likidire nkenda kovantu ava va tungire moNinivhe. Age kwa tumine muporofete Jona yipo a ka divise ezonauko lyositata oso ntani nezonauko lyovantu wovadona ava va tungire mo. Nye konyima za pa Vaninivhe va litezwilire, Jehova yipo ga va fililire nkenda ntani yipo ga tokwere kudira kuzonagura sitata.—Jona 3:1, 10; 4:10, 11.

6. Gava yihonena eyi yina kulikida omu Jesus ga honenene ugomoki waJehova.

⁶ Jesus kwa honenene ugomoki waJehova. Age kwa mu tumine pevhu yipo a ya zuvhisire ‘Vaisraeli ava va kere ngwendi nonzwi dokuzumbana.’ Nye age kwa likidire ugomoki ngomu ga sikisire mo situmbukira oso. Sikando simwe, mukadi ogu ga dilire kukara asi Muisraeli, kwa mu likwamberere yipo a verure munendi gomukadona ogu nga “hepa unene kompepo zondona.” Jesus kwa likidire nkenda pokurugana eyi ga mu pulire mukadi ogo ntani noku verura munendi gomukadona. (Mat. 15:21-28) Tu tareni ko sihonena sa peke. Jesus kwa uyungire ketamekero lyosirugana sendi asi: “Nkenye ogu a patana nge . . .  name ngani ka mu patana. (Mat. 10:33) Nye age ngoso ga patanene Peturusa ogu ga mu patanene yikando yitatu ndi? Hawe. Jesus ga yi divire asi Peturusa kwa guvire kweyi ga rugene ntani asi age kwa kere mugara gomulimburukwi. Konyima zokumuvhumbura, Jesus kwa monekerere Peturusa ntani kwa mu huguvaresere asi ga mu gusira po ntani asi ha ga mu harera simpe.—Ruk. 24:33, 34.

7. Ngwendi moomu tupu va yi likida moVafilipi 4:5, ngapi omu tuna hara va tu tare vantu wopeke?

⁷ Ose tuna dimburura asi Jehova naJesus Kristusa kwa kara nougomoki. Ngapi kutuhamena ose? Jehova kuna kundindira ko kwetu tu kare nougomoki. (Resa Vafilipi 4:5.) Etoroko limwe  kwa toroka velise ezi asi: “Kara nonkareso ezi nazi ninkisa vantu va ku mone asi ove muntu gougomoki.” Ose kuvhura tu li pure nyamwetu asi: ‘Vantu kutara nge asi ame muntu gougomoki, goureru ntani ogu a tambura yininke ndi? Ndi vantu kutara nge asi ame muntu ogu ga hara kutulisa po noveta, goukenya ndi muntu gondino? Ame kutantera vantu wopeke va rugane yininke monkedi omu nina yi harere va yi rugane ndi? Ndi ame kupurakena wopeke noku rugana yininke eyi vana hara apa ayi wapere ku yi rugana? Moomu tuna kukara nougomoki, yimo hena ngatu honena Jehova naJesus. Tu zeni tu ka zogere maukaro gavali aga na ga ka likida eyi ya karera nomulyo kukara nougomoki. Apa yininke ayi litjindji meparu lyetu ntani apa magano govantu vapeke nomatokoro gawo aga lisigi naga getu.

8. Yisinke nayi vhura kutuvatera tu kare nougomoki apa ukaro au litjindji? (Tara hena nonkango dokonhi.)

⁸ Ose twa hepa kukara nougomoki apa yininke ayi litjindji meparu lyetu. Malitjindjo gangoso kuvhura kuturetera maudigu aga atu dili kundindira. Pasihonena, ose kuvhura tu li gwanekere nouvera wohararasi. Ndi ekonomi kuvhura li li tjindje hara-rasi ndi epangero eli ali pangere oku twa tunga kuvhura kudigopeka eparu lyetu. (Muud. 9:11; 1 Kol. 7:31) Kuvhura hena yi tu karere udigu apa mbunga zaJehova azi tu pura tu karere Jehova monkedi zapeke ndi kevango lyapeke. Yikare asi udigu musinke ngatu vhura kuligwanekera nawo, ose kuvhura ngayi tu tompoke kutambura ukaro woupe, nsene tu rugana yininke yine eyi yina kukwama ko: (1) yi tambura asi ukaro woge una litjindji, (2) nwika kweyi yokomeho, (3) demenena koyininke yoyiwa ntani (4) ruganena wopeke yininke yoyiwa. b Tu zeni tu ka tare omu vanavazinyetu vamwe va gwanena mo uwa pokurugana yininke eyi.

9. Ngapi omu valikwali vamwe ava va kere mosirugana soutumwa va lididimikilire maudigu aga va dilire kundindira?

⁹ Yi tambura asi ukaro woge una litjindji. Emanuele naFrancesca kwa va pere situmbukira sokuka kara vatumwa mosirongo sapeke. Konyima tupu za pa va tamekere kulironga eraka lyomosirongo esi va va tumine ntani noku diva vanavazinyetu womombungakriste zawo zompe, uvera woKorona makura yipo wa tamekere ntani awo va hepere kukara membo. Makura ozina vaFrancesca yipo va dogorokere. Francesca kwa here kuka kara kumwe novanekoro vendi, nye age kapi ga vhulire ku za morwa uvera woKorona. Yisinke ya mu vaterere yipo a lididimikire maudigu aga? Sokuhova, Emanuele naFrancesca kwa kanderere kumwe ngovalikwali va gwane unongo yipo va lididimikire nkenye ezuva ntani yipo va dire kukara nosinka sosinene. Jehova kwa limbwilire makanderero gawo posiruwo souhunga kupitira moyininke eyi azi pwagesa mbunga zendi. Pasihonena, awo kwa gwene ekorangedo kwamunazinyetu gumwe gomugara ogu ga uyungire movidiyo zepuragero asi: “Nsene tu tambura usimbu ukaro woupe, yimo hena ngatu vhura kuhafa usimbu. Makura ose ngatu vhura kurugana paapa twa hulira moukaro wetu woupe.” c Sauvali, ayo kwa va tumangedere va wapukurure nkedi zawo zokuzuvhisira kupitira koterefona ntani awo kwa tamekere elirongo lyoBibeli. Sautatu, awo kwa tambwire ekorangedo nevatero eli va va pere vapuli vakwawo. Munazinyetu gumwe gomukadi ngava tumine nkenye apa mbudi zonsupi novelise zomoBibeli nkenye ezuva ure womvhura. Apa nose atu tambura ukaro wetu woupe, nose ngatu gwana ruhafo mweyi atu vhuru kurugana.

10. Ngapi omu munazinyetu gumwe gomukadi ga tambwire ukaro apa yininke yemeparu lyendi ya litjindjire?

¹⁰ Nwika kweyi yokomeho ntani demenena koyininke yoyiwa. Christina, munazinyetu gomukadi  gomuRomania ogu ga tunga moJapan, kwa mu guvisire apa mbungakriste zawo ezi nga pongere zeraka lyoRuhingilisa va zi hagekesere po. Nye nampili ngoso, age kapi nga gazadara yininke eyi ya horoka nare. Nye mevango lyoyo, age kwa zire kombungakriste zoruJapanese ntani age kwa litulire mo unene mokuzuvhisa. Age kwa pulire murugani mukwawo ogu nga rugana nage nare yipo a mu ronge kuuyunga nawa ruJapanese. Murugani mukwawo ogo gomukadi yipo ga yi tambwire kuruganesa Bibeli ntani mbapira Hafera eparu narunye! yipo a ronge Christina ruJapanese. Christina kapi tupu ga divire nawa kuuyunga ruJapanese, nye hena mukadi ogo kwa likidire elituromo mokudiva ko yoyinzi kuhamena Bibeli. Apa atu nwike kweyi yokomeho ntani noku demenena kweyi yoyiwa, malitjindjo aga tuna dili kundindira kuvhura kuretesa po mauwa aga tuna dili kundindira.

11. Yisinke ya vaterere valikwali vamwe ava va kere noudigu woyimaliwa apa ekonomi lyomosirongo sawo lya gwire?

¹¹ Ruganena vantu wopeke yininke yoyiwa. Valikwali ava va tunga mosirongo omu va hagekesa sirugana setu kwa kere noudigu woyimaliwa apa ekonomi lyomosirongo sawo lyagwire. Yisinke ya va vaterere va tambure ukaro owo? Sokuhova, awo kwa hetekerere ko kusesupika yininke eyi va hepere. Sokukwama ko, mevango lyokudemenena komaudigu ga vene awo kwa tokwere kudemenena ko kuvatera vantu wopeke pokulitura mo unene mosirugana sokuzuvhisa paapa va hulira. (Yirug. 20:35) Nturagumbo kwa uyunga asi: “Kulitura mo unene mokuzuvhisa kwa tu vaterere tu dire kugazara magazaro gomadona ntani ayo kwa tu pere siruwo sosinzi yipo tu demenene ko kurugana mpango zaKarunga.” Apa ukaro wetu au litjindji, twa hepa kudiworoka omu ya kara nomulyo kutwikira kuvatera vantu wopeke, unene po pokulihameka mo mokuzuvhisa.

12. Ngapi omu sihonena somupositoli Paurusa nasi tu vatera tu zuvhise kuliza noukaro?

¹² Twa hepa kukara vantu wovagomoki mosirugana sokuzuvhisa. Vantu ava atu zuvhisire kwa kara nomagano gokulisiga-siga kuhamena Karunga ntani awo kwa tundilira komavango gokulisiga-siga nokonompo dokusiga-siga. Mupositoli Paurusa nga zuvhisa kuliza noukaro ntani ose kuvhura kulirongera ko kosihonena sendi. Jesus kwa horowere Paurusa ngo “mupositoli ogu va tuma konomuhoko dapeke.” (Rom. 11:13) Mosirugana oso, Paurusa nga zuvhisire Vajuda, Vagereka, vantu ava va lironga, vanamukunda, vantu ava va kara mepangero ntani novahompa. Mokuninka asi a gume nomutjima dovantu navenye ava wokulisiga-siga, Paurusa kwa ‘lizire nawo mwanayinye.’ (1 Kol. 9:19-23) Age nga gazadara ko unene kuhamena nontundiliro dovantu ava nga zogere kumwe nawo ntani neyi va pulire. Eyi kwa mu vaterere yipo a zuvhise kuliza noukaro ntani yipo a zogere nankenye gumwe monkedi azi na zi mu koka yipo a hare kudiva ko yoyinzi kuhamena Karunga. Nose kuvhura kukara vazuvhisi wovawa nsene tu hetekera ko kugazara nonkedi donongwa omu natu vhura kuvatera nkenye muntu.

13. Siponga musinke va faturura mo 1 Vakolinte 8:9 esi natu vhura kunyokera po nsene tu fumadeka monkedi omu vantu ava tara yuma yongandi?

¹³ Ugomoki kutuvatera hena tu fumadeke monkedi omu vantu wopeke ava tara yuma yongandi. Pasihonena, vanavazinyetu vamwe wovakadi kwa hara kulitura yilitjuniso kosipara, nye vamwe kapi va hara ku yi litura. Vakriste vamwe kudeseka kunwa marovhu, nye vamwe kapi ava nu marovhu. Vakriste navenye kwa hara uhaku wouwa nye awo kuhorowora nonkedi dokulisiga-siga omu nava gwana uhaku. Nsene tu kugazara asi ose nkenye apa mouhunga atu kara ntani noku hetekera ko kusininika vanavazinyetu yipo va rugane eyi atu rugana, ose kuvhura ngatu pundukise vantu wopeke ntani kuvhura ngatu retese po maligaunuko mokatji ketu. Ose kapi tuna hara kurugana yininke yangoso! (Resa 1 Vakolinte  8:9; 10:23, 24.) Tu zeni tu ka zogere yihonena yivali eyi ayi likida omu kutura pasirugana nompango domoBibeli nayi vhura kutuvatera tu kare nehetakano ntani noku twikira kukara nombili.

14. Nompango musinke domoBibelil twa hepa kudiworoka nsene kuna kutura po matokoro kuhamena ndwareso ntani nomaliwapayiko getu gokomutwe?

¹⁴ Ndwareso ntani nomaliwapayiko gokomutwe. Mevango lyoku tu pa noveta kuhamena omu twa hepa kudwara, Jehova kwa tu pa nompango edi natu kwama. Ose twa hepa kudwara monkedi ezi na zi fumadekesa ko Karunga ntani nokulikida ugomoki ntani “nokudwara yidwara yokuwapera.” (1 Tim. 2:9, 10; 1 Pet. 3:3) Yipo nye, ose kapi tuna hara kudwara monkedi ezi na zi ninkisa vatu va gazare tupu monkedi omu atu dwara. Nompango domoBibeli kuvhura hena kuvatera vakuronambunga yipo va nyokere po kutura po noveta davene kuhamena ndwareso ntani nomaliwapayiko gokomutwe. Pasihonena, vakuronambunga womombungakriste zimwe kwa here kuvatera vadinkantu gona wovagara ava ngava honene nkareso zokulikurura ezi za divikwire poku di ninka di kare dononsupi nye dokulirunga-runga. Ngapi omu ngano vakuronambunga va vhulire ku va vatera va hana kutura po veta? Mutareli gonombunga kwa geve ko egano kovakuronambunga yipo va tantere vanavazinyetu wovagara wovadinkantu owo asi: “Nsene asi kositantara ono kara ntani vapurakeni kuna kudemenena unene monkedi omu ono kumoneka kupitakana omu vana kupurakena eyi ono kuuyunga, ayo ngoso kuna kulikida asi pana kara udigu mondwareso zoge ndi meliwapayiko lyoge lyokomutwe.” Efatururo eli lyoureru kwa vaterere vanavazinyetu wovagara wovadinkantu yipo va dive eyi va hepere kurugana ntani vakuronambunga kapi va hepere kutulisa po veta. d

15. Noveta nonompango musinke domoBibeli na di vhura kutuvatera apa atu tura po matokoro kuhamena uhaku wetu? (Varoma 14:5)

¹⁵ Uhaku. Nkenye Mukriste ga hepa kutokora asi ngapi omu na gwana uhaku wendi. (Gar. 6:5)  Apa Vakriste ava horowora uhaku ou nava gwana, awo va hepa kulimburukwa noveta domoBibeli yipo va nyokere po honde ntani noumpure. (Yirug. 15:20; Gar. 5:19, 20) Nye kugusa ko oyo, awo kuvhura kulitokwera po vene asi uhaku musinke ou nava gwana. Vamwe kugwana tupu uhaku wawo kovandokotora, ano vapeke kwa hara kugwana uhaku mononkedi dapeke. Ose nampo kuvhura tu yi pure pwanyamwetu asi uhaku wongandi kuvhura kuvatera ndi awo siponga, nye twa hepa kufumadeka evhuliko lyovanazinyetu lyokutulisa po matokoro kuhamena uhaku wawo. Yipo nye, twa hepa kudiworoka yitwa yine eyi yina kukwama ko: (1) Uhompa waKarunga yiwo welike tupu ngau vhura ku ya verura vantu. (Jes. 33:24) (2) Nkenye Mukriste ga hepa ku yi ‘pura nawa-nawa’ asi yinke yoyiwa po kwendi apa a tura po etokoro kuhamena uhaku wendi. (Resa Varoma 14:5.) (3) Ose kapi atu pangura vantu wopeke komatokoro gawo aga ava tura po ntani kapi atu rugana nkenye eyi nayi vhura ku va pukisa. (Rom. 14:13) (4) Vakriste va hepa kulilikida eharo ntani va hepa ku yi kwata egano asi uumwe womombungakriste mulyo unene kupitakana matokoro gawo. (Rom. 14:15, 19, 20) Nsene tu diworoka nkenye apa yitwa yine eyi, ose ngatu kara nelikwatakano lyewa kumwe novanavazinyetu ntani ayo ngayi gwederera kouumwe womombungakriste.

16. Ngapi omu mukuronambunga na likida ugomoki apa a kara kumwe novakuronambunga vakwawo? (Tara hena mafano.)

¹⁶ Vakuronambunga va hepa kutura po sihonena sosiwa mokukara nougomoki. (1 Tim. 3:2, 3) Pasihonena, mukuronambunga kapisi a ndindire asi magano gendi va ga tambure nkenye apa morwa yeeyi asi age mukondi kovakuronambunga vakwawo. Nye age kudiworoka asi mpepo zaJehova kuvhura kutumangeda nkenye ogu ga hamena mombunga zovakuronambunga yipo a uyunge yuma yongandi eyi nayi va vatera va ture po etokoro lyewa. Ntani nsene asi sinzi sovakurongambunga va kwatesa ko etokoro lyongandi eli lina kudira kulirwanesa nonompango domoBibeli, mukuronambunga ogu ga kara nougomoki nga kwatesa ko etokoro olyo, nampili yi kare asi age ana kara negano lyokulisiga.

17. Mauwa musinke ava gwanene mo Vakriste ava va kara nougomoki?

¹⁷ Apa atu kara nougomoki, ose kugwanena mo mauwa mononkedi dononzi. Ose ngatu kara nelikwatakano lyewa kumwe novanavazinyetu ntani mombungakriste ngamu kara mbili. Ose kuhafera yikara yokulisiga-siga ntani nonompo edi da kara mokatji kovantu vaJehova. Ntani ayo kutuhafesa pokudiva asi nampili ngomu twa lisiga-siga natuvenye, ose kukarera kumwe Jehova ngepata eli lyakara mouumwe. Somulyo po unene, ayo kutuhafesa pokudiva asi ose kuna kuhonena Karunga gwetu Jehova, ogu ga kara nougomoki.