Otate kwa kere mukuronambunga mongereka ezi ava tumbura asi local United Church of Canada. Yipo nye nkenye sivike ngava tu tumu name kumwe namumbyange gomukadona yipo tu ze kosure zovadinkantu ezi nga zi kara moSondaha, ano povili zoronazimwe kongurangura ose ngatu zi kumwe nawo kongereka. Kositenguko, ose ngatu zi kumwe noyina koSinyanga soUhompa. Ose twa vhulire kumona nawa-nawa malisigo aga ga kere pokatji komaukarelikarunga aga gavali.

Oyina ngava tantere ko vakaume vawo vanare oBob naMarion ntani naHutcheson, kuhamena eyi va pura ntani nawo kwa ya kere Nombangi daJehova. Mo-1958 epata lyoHutcheson kwa simbire nge kumwe novana vawo vatatu wovamati kosigongi somazuva ntantatu sosiparatjangwa Divine Will, esi sa karerere mositata saNew York. Ngesi nayi kwata egano asi ayo kapi ya va karerere ureru kusimba nge, nye sigongi oso kuna kara sininke simwe somulyo po unene meparu lyange.

Apa na kere mudinkantu, ose kwa tungire mofarama omu ngani hafere kupakera mbili yikorama. Ame kwa here kulirongera sirugana sounganga yimuna. Makura oyina yipo va yi tanterere mukuronambunga gomombungakriste zetu. Age kwa diworokesere nge mombili pokutantera nge asi ose kuna kuparuka “pomazuva gopouhura” ntani kwa pulire nge omu kuza kouniversity nomvhura dongadi nayi vhura kukundama elikwatakano lyange kumwe naJehova. (2 Tim. 3:1) Ngoyitundwamo, ame yipo na tokwere kudira kuza kouniversity.

Ame kwa lipulire simpe eyi ngani vhura kurugana apa ngani mana sure. Nampili ngomu ngani lihameke mokuzuvhisa nkenye sikondovike, ame kapi ngani hafere sirugana sokuzuvhisa ntani kapi na gazarere asi kuvhura ngani kare muzuvhisi gokukarerera. Posiruwo oso, otate ava va kere asi kapisi Mbangi natamwa zange kwa korangedere nge ni ka rugane yirugana yosiruwo nasinye yomokampani zoinsurance moToronto.  Tamwa zange kwa kere noposa zonene mokampani ozo, makura yipo na tambwire yirugana oyo.

Apa na kere moToronto, ame ngani ruganesa siruwo sange sosinzi mokurugana ntani ngani kara kara kumwe novahapuli. Ano eyi kwa konderere nge ni dire kuza komapongo nomokuzuvhisa nkenye apa. Pomuhowo ame kwa tungire kumwe nomama wovagara ava va dilire kukara Mbangi, nye konyima zapa va dogorokere, ame na hepere kugwana ko evango lyapeke oku na hepere kutunga.

Epata lyoHutcheson ava va pitwire nge kosigongi esi sa kere mo-1958, kwa kere ngwendi vakondi vange. Awo kwa zigidire nge ni ka tunge membo lyawo ntani kwa vaterere nge ni nkondopeke elikwatakano lyange kumwe naJehova. Mo-1960, yipo na gwene ekuho kumwe namunawo gomumati John. John yipo ga tamekere kukara muzuvhisi gokukarerera, eyi kwa korangedere nge yipo ni lihameke mo unene mokuzuvhisa. Vanavazinyetu womombungakriste ezi na kere kwa dimbwilire omu na tulire po ezokomeho ntani awo kwa horowere nge ni kare mutareli goSikora zoUkareli. a

Mo-1966, ame kwa kwere Randi Berge, muzuvhisi gokukarerera goupampi ogu ga here kukavatera oku kwa hepere evatero lyenene. Sirugana setu sokudingura nombungakriste nga si tu hafesa sili unene. Aso kwa tu korangedere tu ka vatere mombungakriste zomoOrillia, moOntario. Makura yipo twa rongerere nomurongero detu kumwe noku diruka.

Apa tupu twa ka sikire moOrillia, ame yipo na li pakerere kumwe naRandi ngomuzuvhisi gokukarerera. Ame kwa hefe ngwendi moomu ga hefe age. Konyima zapa na tamekere kurugana unene yipo ni kare muzuvhisi gokukarerera gomuwa, yipo na tamekere kukara noruhafo pokuruganesa Bibeli ntani pokumona omu vantu vana ku yi kwata egano. Alyo kwa kere etungiko mokuvatera valikwali wovawa womoOrillia, yipo va ture po malitjindjo meparu lyawo ntani noku kara vakareli vaJehova.

Ngomu twa ka dingwire moToronto, ame kwa ka li gwene kumwe naArnold MacNamara, gumwe  govanavazinyetu wovagara ogu nga pitisire yirugana yokoBeteli. Age kwa pulire nge nsene asi kuvhura tu kare vazuvhisi wosiruwo nasinye. Makura yipo na mu limbwilire poopo asi: “Nawa tupu! Nye sinene tupu asi kapisi moQuebec.” Ame kwa kere nomalizuvho asi vantu ava va kere koruha rumwe romoCanada ava ngava uyunga Ruhingilisa, kwa zuvhire yuma eyi ya dilire ku va hafesa kuhamena vantu womomukunda gwaQuebec oku ngava uyunga Rufrench. Posiruwo oso, vantu ngava masha ntani kwa here asi mukunda gwaQuebec va gu hangure ko koCanada.

Arnold yipo ga limbwilire nge asi: “Quebec yilyo lyelike tupu evango oku zina kutuma Beteli vazuvhisi wosiruwo nasinye posiruwo esi.” Makura yipo na tambwire ezigido olyo. Ame nayi divire nare asi Randi kwa here kuka vatera koQuebec. Konyima, ame kwa ya dimbwilire asi eli kwa kere etokoro limwe lyewa po unene eli twa tura po meparu lyetu!

Konyima zapa twa zire kosure zoRufrench ezi za gusire yivike yitano, name naRandi kumwe novalikwali vapeke yipo twa zire koRimouski, rugendo oru rwa gusire nokilometa dokusika po-540 koupumezuva waMontreal. Ose kwa kere noyininke yoyinzi eyi twa hepere kulironga. Eyi kwa yi monenene apa twa kere mepongo ngomu na resere madiviso mombungakriste. Ame kwa uyungire asi posigongi setu somazuva gatatu sokukwama ko, ose ngatu kara “novagenda wovanzi womoostrich,” mevango lyokutumbura asi “vagenda womoAustria.”

MoRimouski, ose kwa kere mo tu vane. Makura vanavazinyetu vane wovakadi wovadike ava va kere noupampi yipo va wizire va ya lipakerere nose kumwe nepata lyoHuberdeaus ntani novana vawo vavali wovakadona. Epata lyoHuberdeaus kwa hilire nzugo zonene ano vazuvhisi navenye wokukarerera ava va tungire mo ngava vatere mokuzifutira. Ose ngatu zi tumbura asi nzugo zonzera morwa komeho zonzugo kwa kere ko ruvara roruzera ntani kwa kere ko nongundi dononzera. Natuvenye ava twa tungire mo kwa kere vantu wokusika ko-12 ndi 14 ngoso. Ngovazuvhisi wosiruwo nasinye, name naRandi ngatu zuvhisa kongurangura, kositenguko ntani kongurova ntani ose ngatu yi hafere apa gumwe nga lipakerere kumwe nose mokuzuvhisa, nampili kongurova pokufu.

Ose kwa kere vakaume wovanene kumwe novazuvhisi owo wovalimburukwi ntani awo kwa ya kere ngwendi epata lyetu. Poyiruwo yimwe ose ngatu hingire komundiro ndi ngatu kara nezuva eli ngatu tereke kumwe nondya. Munazinyetu gumwe gomugara kwa kere mbimbi, yipo nye nkenye masiku moMapeu, rorunzi ose ngatu dimbi nokudana.

Sinzi sovantu womoRimouski kwa likidire elituromo mokulironga kuhamena Bibeli! Monomvhura tupu ntano, ose kwa hefe pokumona varongwa vamwe woBibeli kuna kutura po ezokomeho pokugwana ekuho. Mbungakriste kwa ligwederere ntani noku kara novazuvhisi wokusika po-35.

MoQuebec, ose kwa ka gwene edeuro lyewa ngovazuvhisi. Ose twa limonenene omu Jehova ga tu vaterere mokuzuvhisa ntani noyihepwa yetu yopanyama. Mokugwederera ko, ose kwa ka lirongere kuhara vantu womoFrench, neraka lyawo ntani nompo zawo, eyi kwa tu ninkisire hena tu hare nompo dovantu wopeke.—2 Kol. 6:13.

Beteli kwa tu pulire tu dirukire kodoropa zaTracadie, koUpumezuva wefuta lyaNew Brunswick, ose twa hana ku yi divira. Eyi kwa tu reterere udigu morwa ose kwa tulisire po kontaraka zokuhilisa nzugo ntani ame ngani rugana yirugana yokuronga poyiruwo-noyiruwo kumwe novakurona wosure. Mokugwederera ko, varongwa vetu vamwe woBibeli kwa tamekere kukara vazuvhisi ntani ose kwa kere mosirugana sokutunga Sinyanga soUhompa.

Ose kwa kanderere sikondovike nasinye kuhamena ediruko olyo ntani ose kwa ka dingwire doropa zaTracadie, ezi za lisigire nomu mwa fene moRimouski. Nye ose kwa tokwere asi, mokumona asi Jehova kuna tu harere tu ze kevango olyo, twa hepa ku za. Ose kwa hetekere  Jehova ntani twa limonenene omu ga gusire po nkenye udigu ou twa li gwanekerere nawo. (Mara. 3:10) Morwa Randi kwa kere nelikwatakano lyokupama kumwe naJehova, age kapi nga ligazara tupu mwene, ntani kwa kere muntu gokuzoresa, eyi kwa tu vaterere yi tu karere ureru kudiruka.

Robert Ross yige gelike tupu ga kere mukuronambunga mombugakriste zetu zompe. Age nga zuvhisire kooko kumwe namukadendi Linda ntani awo kwa tokwere kukara moomo mombungakriste konyima zapa va hampurukire mukeke gwawo gokuhova. Nampili ngomu va pakerere mbili mumatigona gwawo, awo kwa tu korangerere unene name naRandi morwa awo kwa kere nonkareso zokutambura vagenda membo lyawo ntani kwa kere noupampi mokuzuvhisa.

Konyima zapa twa zuvhisilire moTracadie ure wonomvhura mbali, yipo twa li gwanekerere nosininke simwe hena esi sa tu tetukisire, esi sa kere asi ezigido lyokukarugana mosirugana sokudingura nombungakriste. Ose ngatu ruganene koruha mukunda ronombungakriste edi nga di uyunga eraka lyoRuingilisa, ure wonomvhura ntambali. Ano konyima, yipo va tu dirwire tu ze koruha mukunda ronombungakriste edi nga di uyunga Rufrench moQuebec. Mutareli gwetu gonomukunda gomoQuebec, gedina Léonce Crépeault, nga pandadeke nge koyiuyungwa yange eyi ngani gava. Nye konyima age nga pura nge nkenye apa asi: “Ngapi omu no gava yiuyungwa yoge yipo yi vatere unene vanavazinyetu?” b Epuro eli kwa vaterere nge ni demenene kerongo eli ngani gava ntani noku lininka li kare lyoureru kukwata egano.

Situmbukira sange simwe esi ngani dira kudivara kuna kara esi na kere naso mo-1978, posigongi somazuva gatatu souzuni mudima esi sa kere moMontreal, sosiparatjangwa “Victorious Faith.” Ame ngani rugana koruha ronondya. Ose kwa ndindilire vantu wokusika ko-80 000 ntani ose twa hepere ku va pa nondya monkedi zapeke kupitakana omu ngatu yi rugana nare. Nayinye kwa kere yoyipe: yiruganeso, elikwamo lyonondya edi twa hepere kutereka, ntani monkedi omu twa terekere nondya. Ose kwa kere nonoeskasi dononene dokusika ko-20, nye ado kapi ngadi rugana poyiruwo yimwe. Komeho li tameke ezuva lyokuhova, ose kapi twa vhulire kuhwilira mosira somaudano dogoro masiku morwa elikwamo lyomaudano lyakarerere mo. Ntani ose twa hepere kutemesa masuga komeho li se ezuva yipo tu wapayike mulihako! Ose kwa rorokere, nye ame kwa lirongerere ko yoyinzi kelizambero lyovanavazinyetu nokonondunge dawo ntani konkareso zawo zokuzoragana. Ose kwa ya li divire nawa, ano eyi kwa tu ninkisa tu ya kare vakaume dogoro ngesi. Ame kwa hefe unene  mokuka kara posigongi oso somulyo unene esi sa karerere moQuebec, mukunda omu ga kere mahepeko gomanene koyiha yonomvhura 1940 ntani 1950.

Ame kwa lirongerere ko yoyinzi kovatareli wonombunga vakwetu poyigongi yoyinene eyi ngayi karere moMontreal. Mvhura zimwe, munazinyetu David Splane, ogu ngesi ana kara gumwe gomoMbungagendesi, kwa kere mutareli gosigongi. Posigongi simwe apa va pulire nge ni rugane situmbukira oso, munazinyetu David nga kwatesa nge ko unene mosirugana esi.

Mo-2011, konyima zapa twa haferere sirugana sokudingura nombungakriste ure wonomvhura 36, yipo va zigidire nge ni ka kare murongi goSikora zoVakuronambunga. Name naRandi kwa rere ponombete dokulisiga-siga 75 monomvhura mbali, nye nampili ngoso, ayo kwa kere mulyo unene kwetu. Kehagero lyankenye sivike, vakuronambunga kwa kere norupandu rorunene morwa awo kwa lizuvhire asi Mbungagendesi kwa kere nosinka kuhamena elikwatakano lyawo kumwe naJehova.

Konyima, ame kwa ya rongere varongwa woSikora zoVazuvhisi woUhompa. Rorunzi varongwa ngava lizuvhu eroroko ntani kwa kere nosinka morwa elikwamo lyoyirugana yoyinzi eyi va hepere kurugana. Pasihonena kuhingira monkondwarongero ure wonovili ntambali nkenye ezuva, kurugana yiruganenambo ure wonovili ntatu nkenye ngurova ntani kurugana yirugana yine ndi yitano nkenye sivike. Name kumwe novarongi vakwetu kwa fatwilire asi awo ngano kapi va vhulire kuyirugana pwahana evatero lyaJehova. Ame ngani diworoka nkenye apa omu ya tetukisire varongwa pokumona asi pokuhuguvara mevatero lyaJehova, awo va vhulire kusikisa mo yoyinzi kupitakana omu va yi gazarere.

Elituromo lyoyina kovantu wopeke kwa vaterere varongwa vawo woBibeli va ture po ezokomeho ntani kwa vaterere otate yipo va rundurure nkareso zawo kuhamena usili. Konyima zomazuva gatatu kutunda apa oyina va dogorokere, otate kwa tu tetukisire pokuwiza koSinyanga soUhompa yipo va ya purakene kosiuyungwa sanavenye ntani awo kwa twikira kuponga mapongo nomvhura 26 edi da ya kweme ko. Nampili ngomu otate va dira kugwana ekuho, vakuronambunga kwa tantera nge asi awo nkenye apa yiwo ngava kara womuhoverera kuka sika komapongo nkenye sivike.

Oyina kwa sigira vana vawo sihonena sosiwa esi nava kwama. Vamumbya vange navenye vatatu kumwe novagara vawo kuna kukarera Jehova noulimburukwi. Vamumbya vange vavali kuvatera koBeteli, gumwe moPortugal ano gumwe moHaiti.

Name naRandi, ngesi ose kuna kara vazuvhisi wosiruwo nasinye moHamilton, moOntario. Apa twa kere mosirugana sokudingura nombungakriste, ose ngatu hafere kuza kumwe novanazinyetu va peke komatengwiroko gawo ntani kovarongwa vawo woBibeli. Nye ngesi ose tuna hafa pokumona varongwa vetu woBibeli omu vana kutura po ezokomeho pampepo. Ntani ngomu tuna kukara vakaume kumwe novanavazinyetu womombungakriste zetu zompe, ose kulizuvha ekorangedo pokumona omu Jehova ava vatere moyiruwo yoyiwa neyi yoyidona.

Pokutara kweyi yina ka pita, ose kulikida rupandu kelituromo eli va tu likida sinzi sovanavazinyetu. Ose kwa hetekera ko kulikida ‘sinka setu’ kwawo poku va korangeda yipo va karere Jehova paapa va hulira. (2 Kol. 7:6, 7) Pasihonena, mepata limwe, mugolikadi namunendi gomugara ntani nogu gomukadona navenye kwa kere mosirugana sosiruwo nasinye. Ame kwa pulire nturagumbo nsene asi ga gazadara ko rumwe kupiyonera. Age kwa limbwilire asi age nga kwatesa ko vazuvhisi owo vatatu wokukarerera. Makura yipo na mu pulire asi: “Kuvhura o va kwatese ko momunene ndi?” Ame kwa mu korangedere yipo nage a hafere sirugana esi ngava hafere awo. Konyima zomakwedi ntazimwe yipo ga ya kere muzuvhisi gokukarerera.

Name naRandi ngatu twikira kutantera ‘ava ngava ka kara ko’ kuhamena ‘yirugana yoyiwa’ yaJehova ntani tuna si huguvara asi awo ngava hafera kukarera Jehova momunene kupitakana omu twa yi hafera ose.—Epis. 71:17, 18.