1-2. Monkedi musinke omu Mukriste nampo na vhura kukara ngwendi etungo lyononzugo dokulirondanga? (1 Vakolinte 15:58)

 MO-1978, etungo lyere unene lyononzugo 60 dokulirondanga, kwa li dikire moTokyo, moJapan. Vantu kwa kere nosinka kuhamena omu etungo olyo ngali twikira ngorooro kusikama mokumona asi mositata oso nga mu horauka makankamo gevhu gomanzi. Yisinke ya ninkisire etungo olyo li dire kugwa komakankamo gevhu? VaEngineer ndi asi vantu ava va lirongera kutunga matungo, kwa tungire etungo olyo lyere yipo asi li vhure kuzenduka nye kapisi li zunguruke posiruwo sekankamo lyevhu. Yipo nye etungo olyo kapi lyavhulire kugwa komakankamo gevhu morwa alyo kwa li tunga nawa yipo li vhure kuligumagura nakauke lyahana kugwa kekankamo lyevhu. Vakriste kwa fana ngwendi etungo olyo lyere. Monkedi musinke?

² Mukriste ga hepa kutwikira kukara nehetakano pokatji kokulikorerera ntani nokulinyunganga. Ga hepa kukara ana nkondopara ntani noku tokomena nkenye apa kulimburukwa noveta nonompango daJehova. (Resa 1 Vakolinte 15:58.) Age ga liwapayikira ‘kulimburukwa nkenye apa’ ntani kapi a li gusa-gusa mo. Ano koruha rumwe, ga hepa ‘kulizuvha novakwawo’ nsene asi ukaro kuna ku yi pulisira ndi nsene asi hepero. (Jak. 3:17) Mukriste ogu ga ga kara nehetakano lyangesi kunyokera po kukara goudigu kupulisira yininke nokuruganena kumwe nage. Mosirongwa esi ta tu ka zogera kuhamena omu natu vhura kukara twa hana kulinyunganga. Ta tu ka zogera hena yininke yitano eyi a ruganesa Satana yipo atu ninkise yi tu karere udigu kulimburukwa Jehova ntani natu ka lironga omu natu nyokera yininke oyo.

3. Noveta musinke ga gava Jehova edi da kara moYirugana 15:28, 29?

³ Jehova yige ga kara nononkondo dononene po dokutulisa po noveta ntani age nkenye apa kuninka noveta dendi di kare doureru  yipo vantu vendi va di kwate egano. (Jes. 33:22) Pasihonena, Mbungagendesi zomosiruwo soVakriste wokuhova womosiruwo sovapositoli kwa tumbwire yininke yitatu omu Vakriste nava twikira kukara vana nkondopara: (1) pokunyokera po kukarera yikarunga yoyimpempa ntani noku karera Jehova gelike (2) pokulimburukwa veta zaJehova asi honde za pongoka, ntani (3) pokulimburukwa nompango domoBibeli yipo tu nyokere po ruhonda. (Resa Yirugana 15:28, 29.) Ngapi omu Vakriste neina nava limburukwa Jehova moyininke eyi yitatu?

4. Ngapi omu natu vhura kukarera Jehova gelike? (Ehororo 4:11)

⁴ Ose kunyokera po kukarera yikarunga yoyimpempa, noku karera Jehova gelike. Age kwa pangerere Vaisraeli va mu karere gelike. (Deut. 5:6-10) Ntani apa ga mu hetekere Muzonaguli, Jesus kwa yi likidire nawa-nawa asi ose twa hepa kukarera Jehova gelike makura. (Mat. 4:8-10) Yipo nye, ose kapi atu karere mafano goukarelikarunga. Ntani ose kapi atu karere hena vantu yi kare asi vampitisili womaukarelikarunga, vanapolitika ndi vaduki ava va fumana, vantu ava ava ruganesa mokudana yidanauka ndi vadimbi wononsumo ndi tu va tekure ngwendi yikarunga. Ose kuhama kwaJehova ntani noku mu karera gelike ogu ga “sita yininke nayinye.”—Resa Ehororo 4:11.

5. Morwasinke atu limburukwire kompangera zaJehova kombinga zeparu nohonde asi kwa pongoka?

⁵ Ose kulimburukwa veta zaJehova kombinga zeparu nohonde asi kwa pongoka. Morwasinke? Morwa Jehova kwa tanta asi honde kwa karera po eparu, uhwi womulyo ou ga tu pa. (Lev. 17:14) Apa Jehova ga pulisilire pomuhowo vantu asi kuvhura tupu va lye nyama zoyikorama, age kwa va pangerere asi kapisi va lye honde. (Gen. 9:4) Age kwa rugurukire kuuyunga mpangera ezi apa ga geve Veta zaMosesa koVaisraeli. (Lev. 17:10) Ntani age kwa pangerere Mbungagendesi zomosiruwo sovapositoli va vyukise Vakriste navenye asi “mwa ha lihameka . . . kohonde.” (Yirug. 15:28, 29) Ose kulimburukwa mpangera ezi apa atu tura po matokoro gouhaku. b

6. Yisinke natu rugana yipo tu limburukwe konompangera daJehova dokuzeruka?

⁶ Ose kulimburukwa konompangera daJehova dokuzeruka. (Heb. 13:4) Pokuruganesa mbuyungiso zopasifaneso, mupositoli Paurusa kwa tu pukwilire asi “dipageni” madowo geni gorutu. Eyi kutanta asi twa hepa kurugana ko nkenye eyi natu vhura kurugana ko yipo tu nyokere po nkenye madowo gomadona. Ose kunyokera po kutara ndi kurugana nkenye eyi nayi vhura kutwaredesa koruhonda. (Koros. 3:5; Joba 31:1) Apa atu ligwanekere neheteko, ose kunyokera po poopo nkenye magazaro ndi yirugana eyi nayi vhura kuzonagwisa po ukaume wetu kumwe naJehova.

7. Yisinke tuna tokomene kurugana, ntani morwasinke?

⁷ Jehova kuna kundindira ko kwetu tu ‘limburukwe nomutjima nagunye.’ (Rom. 6:17) Mavyukiso aga atu pe nkenye apa mawa kwetu ntani ose kapi ta tu vhuru kutjindja noveta dendi. (Jes. 48:17, 18; 1 Kol. 6:9, 10) Ose tuna tokomene kuhafesa Jehova ntani nokulikida nkareso ngwendi ezi ga likidire muepisarome ogu ga tjenge asi: “Ame kwa tokora asi ni limburukwe konompangera doge dogoro narunye.” (Epis. 119:112) Nye nampili ngoso, Satana nga hetekera ko kutuninkisa yi tu karere udigu kukara tuna nkondopara. Nonkedi musinke a ruganesa?

8. Ngapi omu Satana a ruganesa mahepeko yipo a tu ninkise yi tu karere udigu kukara tuna nkondopara?

⁸ Mahepeko. Muzonaguli kuruganesa nyanya ntani makondjeso yipo a tu ninkise yi tu karere  udigu kukara tuna nkondopara. Sitambo sendi kuna kara asi atu ‘lipapagwire,’ yipo asi a zonagwise po elikwatakano lyetu kumwe naJehova. (1 Pet. 5:8) Vakriste ava va parukire konyima zosiruwo saJesus kwa va tjilisire noku va toona ntani kwa va dipagere morwa erwameno lyawo lyokukara vana nkondopara. (Yirug. 5:27, 28, 40; 7:54-60) Satana kutwikira kuruganesa mahepeko neina. Ose kuyimonenena monkedi omu varwanesi ava tekura vanavazinyetu womoRussia ntani womoyirongo ya peke ntani varwanesi kuhepeka vanavazinyetu mononkedi dokulisiga-siga.

9. Faturura hepero zeyi twa hepera kutakamesa makondjeso.

⁹ Makondjeso. Satana kuruganesa “yineya” yipo a tu hepeke. (Efe. 6:11) Gazadareni ko tupu eyi ya horokerere munazinyetu gomugara gedina Bob, ogu ga kere mosipangero morwa va hepere ku mu rugana etauro lyenene. Age kwa divisire vandokotora asi yi kare asi ukaro musinke na vhura kupita, age kapi na tambura honde. Ndokotora gokutaura ga tambwire etokoro lyendi. Nye nampili ngoso, esiku limwe komeho va ka mu taure, ndokotora gwa peke yipo ga wizire aya dingure Bob konyima zapa vekoro lyendi va tengwire kembo. Age kwa tanterere Bob asi vandokotora kapi nava ruganesa honde, nye awo nava zi wapayika yipo zi kare popepi kuninkira tupu nsene asi na zi kara hepero. Ndokotora nampo kwa gazarere asi Bob na tjindja etokoro lyendi posiruwo esi va dilire kukara po vekoro lyendi. Nye Bob kwa twikilire kukara ana nkondopara ntani age kwa uyungire asi kapi na tambura honde yikare asi yisinke eyi nayi horoka.

10. Morwasinke ya karera siponga nsene tu gazara ngwendi vantu ava ava ncenuna noveta daJehova? (1 Vakolinte 3:19, 20)

¹⁰ Magazaro govantu ava ava ncenuna noveta daKarunga. Nsene tu gazara ngwendi vantu ava ava ncenuna noveta daJehova, nose kuvhura ngatu tameke kuncenuna Jehova nonoveta dendi. (Resa 1 Vakolinte 3:19, 20.) “Unongo wouzuni ou” rorunzi kuninkisa vantu va dire kulimburukwa Karunga. Vakriste wongandi womoPeregamu ntani nava womoTiyatira kwa va pukisire vantu ava va va kundurukidire ava ngava hondere ntani ava ngava karere mafano. Jesus kwa tumine epukururo lyononkondo konombungakriste odo nadinye, morwa yeeyi ngava lihameke mo moruhonda. (Ehor. 2:14, 20) Neina, vantu ava va tu kundurukida kuvhura va hetekere ko kutuninkisa tu tambure magano gepuko. Vanekoro ntani novantu ava atu kara-kara nawo kuvhura va hetekere ko kutuninkisa tu yi pure asi ose kwa kara mesiliko unene ntani asi twa hepa kuteza po noveta daJehova. Pasihonena, awo kuvhura va uyunge asi kapisi hepero tu kare tuna kuhuka monkareso nomoyirugana yetu ntani asi nompango domoBibeli da pwa mo.

11. Yisinke twa hepa kunyokera po mokuninka asi tu twikire kukara tuna nkondopara?

¹¹ Poyiruwo yimwe, ose kuvhura tu uyunge asi Jehova ku tu pa mavyukiso gokudira kuzera nawa. Ose hena kuvhura ngava tu heteke yipo tu ‘pitakanese pweyi va tjanga moMatjangwa.’ (1 Kol. 4:6) Vampitisili womaukarelikarunga womomazuva gaJesus kwa kere nousima wonzo ezi. Awo kwa gwederere ko noveta davene koveta ntani kwa ninkisire vantu yi va digopere kulimburukwa veta. (Mat. 23:4) Jehova ku tu pa mavyukiso gokuzera kupitira moNonkango dendi ntani kupitira mombunga zendi. Ose kapi twa kara nokonda zeyi natu gwederera ko komavyukiso aga atu pe. (Yis. 3:5-7) Yipo nye, ose kapi twa hepa kupitakanesa pweyi va tjanga moBibeli ndi tu tulire po vapuli vakwetu noveta kuhamena yininke yopamundinda.

12. Ngapi omu Satana a ruganesa “magano goyimpempa”?

¹² Yimpempa. Satana kuruganesa “magano goyimpempa” ntani “noyininke youzuni” yipo a pukise noku gaununa vantu. (Koros. 2:8) Mosiruwo sovapositoli, eyi kwa kwaterere mo unongo wouzuni, ou wa demenene komagano nomarongo goVajuda aga ga dilire kutundilira moMatjangwa  ntani marongo aga ga likidire asi Vakriste va hepa kulimburukwa koVeta zaMosesa. Eyi kwa kere yimpempa, morwa ayo kwa ninkisire vantu va dire kuhama kwaJehova, ntundiliro zounongo. Neina, Satana kuruganesa yikwakonentu yipo a hanese yimpempa yahana mutompo ntani nomarapoto goyimpempa aga ava hanesa vampitisili womaupolitika. Ose twa yi limonena eyi posiruwo souvera woKorona. c Nombangi daJehova edi da purakenene mavyukiso aga za geve mbunga zaJehova, kwa nyokerere po kukara nosinka esi va kere naso vantu ava va purakenene konombudi depuko.—Mat. 24:45.

13. Morwasinke natu takamesera yipo yi dire kutudonganesa yininke?

¹³ Madonganeso. Twa hepa kudemenena koyininke “yomulyo po unene.” (Fil. 1:9, 10) Apa atu ligwanekere nomadonganeso, ose kumana siruwo setu sosinzi ntani nononkondo detu. Yininke eyi atu rugana ngwendi kulya, kunwa, yilihafeso ntani yirugana, kuvhura kukara madonganeso kwetu nsene tu yi tura yi kare yininke yomulyo po unene meparu lyetu. (Ruk. 21:34, 35) Mokugwederera ko, nkenye ezuva ose kuzuvha noku resa kuhamena vantu ava ava masha ntani nomalitatano govanapolitika. Twa hepa kudivilisa asi malitatano aga kapi gana kutudonganesa. Nsene tu dira ku yi rugana oyo, ose kuvhura ngatu tameke kukwatesa ko ruha rumwe ndi ruha rwa peke. Satana kuruganesa nonkedi nadinye edi vana tumbura yipo a zonagwise po erwameno lyetu lyokurugana youhunga. Tu zeni tu ka zogere omu natu nyokera po yiraha yendi ntani nomu natu twikira kukara tuna nkondopara.

14. Sininke musinke simwe esi nasi vhura kutuvatera yipo tu twikire kukara tuna nkondopara nokuhama kwaJehova?

¹⁴ Gazadara ko asi morwasinke wa ligavera kwaJehova ntani noku gwana ekuho. Ove kwa tura po nontambo odo morwa ove kwa here kuhama kwaJehova. Diworoka eyi ya kuvatera yipo o yi pure asi wa gwana usili. Ove kwa ya diva Jehova ntani noku tameka kumufumadeka noku mu hara ngaGuhwo gemeguru. Ove kwa ya tungire po epuro ntani kwa ku tumangedere o li tezurure. Mutjima goge kwa ku  tumangedere o hageke kurugana yirugana yoyidona ntani noku paruka kuliza nompango zaKarunga. Ove kwa lizuvhire rufuwo apa wa ya dimbwilire asi Karunga ga ku gusira po. (Epis. 32:1, 2) Ove ngo zi komapongo ntani wa tamekere kutantera ko wopeke kuhamena yininke yoyiwa eyi wa lironga. NgoMukriste ogu ga ligava kwaJehova nokugwana ekuho, ove ngesi kuna kugenda monzira zokutwara komwenyo ntani ove ngo rugana paapa wa hulira yipo o twikire kuzikwama.—Mat. 7:13, 14.

15. Morwasinke kulironga noku teda ko ya karera nomulyo?

¹⁵ Lironga Nonkango daKarunga ntani noku teda ko. Ngwendi moomu tupu sitji asi pama nsene si kara nonondandani dononde, nose kuvhura kukara tuna nkondopara nsene tu kara nepuro lyokupama moNonkango daKarunga. Moomu sina kukura sitji, nondandani daso kusimbama mevhu ntani kulihana. Apa atu lirongo noku teda ko, ose kunkondopeka epuro lyetu ntani ose ku yi pura nawa-nawa asi nonkedi daJehova dokurugana yininke nongwa. (Koros. 2:6, 7) Teda ko komapukururo gaJehova, nomavyukiso gendi ntani nomu epopero lyendi lya vaterere vakareli vendi mosiruwo sanare. Pasihonena, Hesekiyeli kwa purakenene nawa ngomu muengeli ga metere ntembeli ezi ga mwene Hesekiyeli memoneko. Emoneko eli kwa nkondopekere Hesekiyeli ntani alyo ku tu pa yirongwa yomulyo kuhamena omu natu limburukwa nompango daJehova yipo tu kwatese ko ukareli wousili. d (Hes. 40:1-4; 43:10-12) Nose kugwanena mo uwa apa atu litulire po siruwo yipo tu lironge ntani noku teda ko koyininke yokonhi-nhi eyi ya kara moNonkango daKarunga.

16. Ngapi omu kuhuguvara mwaJehova ya poperere Bob? (Episarome 112:7)

¹⁶ Nkondopeka mutjima goge. Hompa Ndafita kwa uyungire asi age kapi nga zumbanesa eharo lyendi lyokuhara Jehova apa ga dimbire asi: “Nina liwapaike nuunu!” (Epis. 57:7) Nose kuvhura kunkondopeka mutjima gwetu pokuhuguvara nawa-nawa mwaJehova. (Resa Episarome 112:7.) Konekeni omu kuhuguvara mwaJehova ya vaterere Bob, ogu vana tumbura. Apa va mu tanterere asi honde na va zi wapayika yipo zi kare konontere kuninkira tupu nsene nazi  kara hepero, age kwa limbwilire poopo asi nsene napa kara mpito zokumutura honde, age ngano ta tundu mo mosipangero poopo. Konyima, Bob kwa ya uyungire asi: “Ame kapi na kere nomasinganyeko ntani kapi na kere nosinka.”

17. Yisinke natu lirongera ko kosihorokwa saBob? (Tara hena efano.)

¹⁷ Bob kwa kere ana likorerere morwa age ga tulire po nare etokoro lyokutwikira kukara ana nkondopara komeho a ze mosipangero. Sokuhova, age kwa here kuhafesa Jehova. Sauvali, age nga lirongo Bibeli ntani noyimbapiratjangwa yetu eyi ya zogera kuhamena omu eparu nohonde ya pongoka. Sautatu, age kwa yi pulire nawa-nawa asi kukwama mavyukiso gaJehova kureta mauwa. Nose kuvhura kukara tuna likorerere yikare asi maudigu musinke aga natu vhura kuligwanekera nago.

18. Ngapi omu sihonena saBaraka asi tu rongo kuhamena kuhuguvara mwaJehova? (Tara efano lyopontunda.)

¹⁸ Huguvara mwaJehova. Koneka omu ya mu tompokere Baraka morwa kuhuguvara mevyukiso lyaJehova. Nampili ngomu mosirongo sawo mwa dilire kukara yilikandwiso ndi magonga, Jehova kwa va tanterere va ze va ka rwise mupitisili govakwayita woVakanani Sisera novakwayita vendi ava va kere noyirwiso yoyinzi. (Vap. 5:8). Muporofete gomukadi Debora kwa tanterere Baraka a tunde konondundu yipo a ze kevango eli lya lyalyakana a ka rwise Sisera ntani noturukara twendi toyita 900. Ayo ngano ya digoperere Vaisraeli mokurwisa turukara oto toyita pevango lyokulyalyakana. Nye nampili ngomu Baraka ga yi divire eyi, age ga limburukwire. Ngomu vakwayita va tundire kondundu zaTaboro, Jehova kwa ninkisire mvhura zonene zi roke. Turukara toyita yovakwayita vaSisera kwa patamenene metata ntani Jehova kwa pere Baraka efundo. (Vap. 4:1-7, 10, 13-16) Mokulifana, Jehova ngatu vatera nose yipo tu funde nsene tu mu huguvara ntani nokuhuguvara momavyukiso aga aga tundu kombunga zendi.—Deut. 31:6.

19. Morwasinke ono harere kukara ono likorerere?

¹⁹ Ose ngatu twikira kurwa ngorooro yipo tu kare tuna likorerere sinene tupu asi ose kuna kuparuka mouzuni ou woudona. (1 Tim. 6:11, 12; 2 Pet. 3:17) Ngano tu tokomeneni mokudira kupulisira mahepeko, makondjeso, magazaro govantu ava ava ncenuna noveta daJehova, yimpempa ntani nomadonganesa yi tu nyungange. (Efe. 4:14) Nye mevango lyoyo, ngano tu twikireni kukara tuna nkondopara noku twikira kuhara Jehova nkenye apa ntani noku limburukwa konompango dendi. Ngomu tuna kuyirugana oyo, ose simpe twa hepa kukara hena nonondunge. Mosirongwa sokukwama ko, ose ngatu ka lironga omu Jehova naJesus va kara sihonena sosiwa kwetu kuhamena omu natu vhura kukara nonondunge.