Natuvenye kapi twa kara nosiruwo sosinzi sokurugana elirongo lyanyamwetu lyoBibeli. Ngapi natu ruganesa nawa siruwo setu yipo tu gwanene mo mauwa gomanzi? Pomuhowo, ruganesa siruwo sosinzi kweyi ono kuresa. Nsene o lironga yininke yoyisesu ove ngo gwanena mo mauwa gomanzi kupitakana kuresa yoyinzi mongenderera.

Makura, tura yininke yomulyo muhowo. (Efe. 5:15, 16) Magano aga gana kukwama ko kuvhura kukuvatera:

• Resa Bibeli nkenye ezuva. (Epis. 1:2) Kuvhura yi wape nsene o tameka pokuresa magaununo aga natu ka zogera mepongo lyomokatji kosivike.

• Liwapaikira Ruhungu rwElirongo ntani epongo lyomokatji kosivike. Liwapaikira nawa yipo o ka gave elimbururo.—Epis. 22:22.

• Hetekera ko hena kuresa nokutarera nondya dimwe dopampepo ngwendi maRuhungu gokuhanesa, novidiyo ntani noyirongwa eyi ya kara ko jw.org.

• Rugana epaparo kosirongwa esi sina kukuza komutjima. Kuvhura o rugane epaparo kuhamena udigu ou ono kuligwanekera nawo ndi epuro eli ono kara nalyo ndi sirongwa somoBibeli esi ono hara kukwata nawa egano. Mokugwana ko magano, tara ruha “Bible Study Activities” oru rwa kara ko jw.org.