VASIMAGULI kwa gwana nodopi dononzi moBabironi zanare edi va ruganesere mokudika sitata. Kuliza nomusimaguli Robert Koldewey, age kwa tanta asi nodopi odo ngava di ruganene mesuga lyomundiro eli lya kere “konze zositata oku kwa kere erova lyewa ntani yinhwa yoyinzi mokuyiruganesa ngomaholi.”

Vasimaguli kwa gwana umbangi asi vampitisili woVababironi ngava ruganesa hena masuga gawo gomundiro nositambo sapeke sosidona. Profesora Paul-Alain Beaulieu gokounivesiti zaToronto kwa tente asi: “Mauzera gomoBabironi kwa likida asi hompa kwa geve mpangera asi nkenye ogu ga nyokere kumulimburukwa ntani nokuswaura vakarunga vaBabironi, va hepere kumuzugumina mesuga lyomundiro yipo a pye.” Pasihonena, etjango limwe lyomosiruwo sahompa Nebukadenesara kwa tente asi: “Va zonagure ni, nokuvahwika, . . . Ninkeni musi gwawo gu tutumukire meguru nokuvadipaga pokuvazugumina momundiro.”

Eyi kudiworokesa varesi woBibeli kuhamena yihorokwa eyi va tumbura mwaNdaniyera egaununo 3. Ose kuresa mo asi hompa Nebukadenesara kwa rugene efano lyongorodo lyemunene medamenena lyaDura, konze zositata saBabironi. Apa vadinkantu wovagara vatatu woVahebeli va nyokere kutongamena efano, Nebukadenesara ta handuka unene nokugava mpangera asi esuga lyomundiro va li ‘pupyareke rutano-naruvali kupitakana apa va hepera,’ ntani ta ninki asi vagara owo vatatu va va “zugumine mesuga lyomundiro gokutwera.” Muengeli gononkondo kwa va parwire yipo va dire kufa.—Ndan. 3:1-6, 19-28.

Nodopi edi va gwene moBabironi nado kukwatesa ko asi Bibeli kwa vyuka. Sinzi sado kwa kara po nonkango dokufumadeka hompa. Pwazimwe kwa tjenge po asi: “Nebukadenesara, hompa gwaBabironi . . . Mbara ezi ga tunga hompa gomunene . . . Ngano ruvharo rwange ngaru pangere mo dogoro narunye.” Nonkango odo kwa li fana nononkango edi da kara mwaNdaniyera 4:30, omu Nebukadenesara ga li kangangere asi: “Tara tupu omu ga nenepa Babironi! Ame kwa mu tunga a kare nkurusitata sange si tumbukise nonkondo nefumano nouhompa wange.”