1. Morwasinke ya karera nomulyo kuliwapayikira simpagwa?

 NSENE TU liwapayikira yuma yongandi, ayo kuvhura kupopera nomwenyo detu. Pasihonena, apa asi horoka simpagwa, vantu ava va liwapayikira narunye kuparuka ntani ayo ku va vhulika kuvatera vantu wopeke. Mbunga zomoEuropa ezi azi hetekere ko kugava mbatero kovantu kwa uyunga asi: “Eliwapayikiro lyewa kuvhura kupopera nomwenyo.”

2. Morwasinke natu liwapayikilira udigu wounene? (Mateusa 24:44)

² “Udigu wounene” ntaantani tupu u tameke. (Mat. 24:21) Nye udigu wounene ngau lisiga noyimpangwa yoyinzi yapeke, morwa ose twa yi diva asi ta u wiza. Konyara hambara nomvhura 2 000 dina kapita, Jesus ga rondwere varongwa vendi va liwapayikire ezuva olyo. (Resa Mateusa 24:44.) Nsene asi twa liwapayikira, ayo ngayi tu karera ureru kupita mo mosiruwo oso soudigu ntani noku vatera vantu wopeke va rugane yokulifana.—Ruk. 21:36.

3. Ngapi omu elididimiko nonkenda ntani neharo nayi tu vatera tu liwapayikire udigu wounene?

³ Konekeni yikara yitatu eyi twa hepa kutunga po eyi ngayi tu vatera yipo tu liwapayikire udigu wounene. Yisinke ngatu vhura kurugana nsene va tu pura tu zuvhise mbudi zokutukukisa zompanguro ntani nsene vantu ava va dira kupura mwaKarunga va tu rwanesa? (Ehor. 16:21) Ose ngatu hepa elididimiko yipo ngatu limburukwe Jehova ntani noku kara nehuguvaro asi nga tu popera. Yisinke ngatu rugana nsene vanavazinyetu va zumbanesa yiweka yawo yimwe ndi yiweka yawo nayinye? (Hab. 3:17, 18) Ose ngatu hepa kukara nonkenda ezi nga zi tu tumangeda yipo tu va pe evatero eli vana hepa. Yisinke ngatu vhura kurugana apa ngatu tunga pepi unene kumwe novanavazinyetu ure wosiruwo songandi, posiruwo esi mbunga zelipakerero lyonomuhoko nga zi tu homokera? (Hes. 38:10-12) Ose ngatu hepa kuvalikida eharo lyenene, yipo ngali tu vatere tu pite mo mosiruwo oso soudigu.

4. Ngapi omu Bibeli azi yi likida asi twa hepa kutunga po elididimiko, nonkenda ntani neharo?

 ⁴ Nonkango daKarunga kutukorangeda tu twikire kutunga po elididimiko, nonkenda ntani neharo. Rukasa 21:19 kutanta asi: “Mokudidimika kweni yimo ngomu parukira.” Vakorosi 3:12 kutanta asi: “Kareni . . . nonkenda.” Ntani 1 Vatesaronika 4:9, 10 kutanta asi: “Yeeyi Karunga mwene ga mu ronga mu lihara-hare. . . . Nye ta tu mu korangeda vakwetu asi mu twikire kuyirugana momunene.” Novelise nadinye edi kwa di tambesere kovarongwa ava va likidire nare elididimiko nonkenda ntani eharo. Nye nampili ngoso, awo va hepere kutwikira kutunga po yikara eyi. Nose twa hepa kurugana yokulifana. Mokutuvatera tu likide yikara oyo, ta tu ka zogera omu Vakriste wokuhova womosiruwo sovapositoli va likidire nkenye simwe soyikara oyo. Ano konyima ntani natu ka tara omu natu vhura kuhonena varongwa owo ntani noku yi likida asi tuna liwapayikire udigu wounene.

5. Ngapi omu Vakriste womomazuva gaPaurusa va lididimikilire maudigu gawo?

⁵ Vakriste wokuhova womomazuva gaPaurusa va hepere kulididimika. (Heb. 10:36) Kugusa ko kulididimikira maudigu aga ngava ligwanekere nago vantu navenye womosiruwo sawo, awo ngava ligwanekere hena nomaudigu gapeke morwa awo kwa kere Vakriste. Sinzi sawo kapi tupu ngava va hepeke vampitisili womaukarelikarunga goVajuda ntani novapangeli woVaroma, nye ngava va hepeke hena vanekoro vawo. (Mat. 10:21) Ntani awo va hepere kudivilisa asi kapisi ga va pukise marongo goyimpempa govarwanesi ava ngava hetekere ko kugaununa mbungakriste. (Yirug. 20:29, 30) Nye nampili ngoso, Vakriste owo kwa lididimikilire noulimburukwi. (Ehor. 2:3) Yisinke ya va vaterere va lididimikire? Awo kwa tedere ko koyihonena yomoBibeli yelididimiko, pasihonena sihonena saJoba. (Jak. 5:10, 11) Awo kwa kanderere kwaJehova yipo ava pe ko nonkondo. (Yirug. 4:29-31) Ntani awo kwa twikilire kudiworoka asi Jehova ngava tungika nsene va twikira kulididimikira.—Yirug. 5:41.

6. Yisinke ono kulirongera ko kweyi ga rugene Merita yipo a lididimikire erwaneso?

⁶ Nose kuvhura kulididimikira nsene tu resa nkenye apa yihonena yelididimiko eyi ya kara moNonkango daKarunga nomoyimbapiratjangwa yetu ntani noku teda ko. Pokuyirugana eyi, munazinyetu gomukadi Merita, ogu ga tunga moAlbania, ga vhulire kulididimikira erwaneso lyokutundilira kovanekoro. Age kwa uyunga asi: “Sihonena saJoba esi sa kara moBibeli kwa korangedere nge sili unene. Age kwa hepere sili unene ntani nampili ngomu ga dilire kudiva ogu ga retesere po maudigu gendi, age kwa uyungire asi: ‘Ame ngani kara ngorooro mokupira unzoni wange dogoro kezuva lyonomfa dange.’ (Joba 27:5) Ame kwa gazadarere ko omu maudigu gaJoba ga digopere unene kupitakana gange. Mokulisiga naJoba, age kapi ga divire ogu ga retesere po maudigu gendi, nye ame nadivire ogu ga retesere po maudigu gange.”

7. Yisinke twa hepa kurugana nampili yi kare asi kapi tuna kuligwanekera noudigu wounene ngesi?

⁷ Ose hena kuvhura kutwikira kulikida elididimiko pokukanderera kwaJehova nkenye apa ntani noku mu tantera maudigu getu nagenye. (Fil. 4:6; 1 Tes. 5:17) Nampo ove ngesi kapi ono kuligwanekera noudigu wounene. Nye nampili ngoso, ove kukanderera kwaJehova noku mu pura yipo a ku vatere nkenye apa o guwu, apa o piyagana ntani apa o dili kudiva asi yinke eyi norugana? Nsene o kanderera nkenye apa kwaKarunga gwetu yipo a ku vatere nomaudigu goge gomanunu aga ono kuligwanekera nago ngesi, ayo kapi ngayi kudigopera kukanderera kwendi apa ngo ligwanekera nomaudigu gomanene komeho. Makura ove ngo yi pura nawa-nawa asi age ga diva asi siruwo musinke na vhura kukuvatera ntani neyi navhura kurugana ko yipo a ku vatere.—Epis. 27:1, 3.

8. Ngapi omu sihonena saMira asi likida asi kulididimikira maudigu neina kuvhura kutuvatera ngatu lididimikire maudigu aga nga tu ligwanekera nago komeho? (Jakopo 1:2-4) (Tara hena efano.)

 ⁸ Ayo ngayi tu tompoka kulididimikira udigu wounene ou una kuwiza nsene tu lididimikira maudigu aga atu ligwanekere nago neina. (Rom. 5:3) Morwasinke tuna kuuyungira ngoso? Sinzi sovanavazinyetu kwa ya dimburura asi nkenye udigu ou va lididimikira kwa va vatera yipo va lididimikire udigu wokukwama ko. Apa ava lididimikire udigu nevatero lyaJehova, awo kuya kara nepuro lyenene asi Jehova ana hara ku va vatera. Ntani hena epuro, kwa va vatera va lididimikire udigu wokukwama ko. (Resa Jakopo 1:2-4.) Mira, muzuvhisi gokukarerera gomoAlbania, kwa ya dimburura asi elididimiko eli ga likidire apa nga ligwanekere nomaudigu, kwa mu vatera yipo a twikire kulididimikira maudigu aga ana kuligwanekera nago ngesi. Age kwa uyunga asi poyiruwo yimwe age kulizuvha asi yige gelike tupu ana kuligwanekera nomaudigu gomanzi po unene. Nye age kudiworoka eyi ga mu ruganena Jehova monomvhura 20 edi dina ka pita yipo a mu vatere. Ntani age ku li tantera mwene asi: ‘Wa ha hageka kukarera Jehova ngesi, age kwa kuvatera yipo o lididimikire maudigu gomanzi.’ Nove kuvhura kugazadara ko omu Jehova ga kuvatera yipo o lididimikire. Kara nehuguvaro asi age kukumona nkenye apa o lididimikire udigu ntani asi age nga kutungika. (Mat. 5:10-12) Makura apa ngau tameka udigu wounene, ove ngo diva asi ngapi omu nolididimikira ntani ove ngo tokomeka kutwikira kulididimikira.

9. Ngapi omu mbungakriste zomoAntiyokiya zomoSiliya za likidire nkenda?

⁹ Koneka eyi ya horokere apa Vakriste womoJudeya va kere nonzara zonene. Konyima zapa mbungakriste zomoAntiyokiya zomoSiliya za zuvhire kuhamena nzara ozo, awo kwa fililire nkenda vapuli vakwawo womoJudeya. Yipo nye awo kwa rugene ko yuma yipo va vatere vapuli vakwawo. “Yipo va tokwere kugava yuma mokuvatera vapuli vakwawo womoJudeya, nkenye ogu kwa geve kuliza neyi ga kere nayo.” (Yirug. 11:27-30) Nampili ngomu vanavazinyetu ava va hepere va tungire ure, Vakriste womoAntiyokiya kwa tokomenene ku va vatera.—1 Joh. 3:17, 18.

10. Mononkedi musinke natu likida nkenda apa vapuli vakwetu asi va kundama simpagwa songandi? (Tara hena efano.)

¹⁰ Nose kuvhura kulikida nkenda neina apa atu dimbura asi vapuli vakwetetu sina va kundama simpangwa. Ose kurugana ko yuma usimbu-simbu yipo tu vatere, pasihonena nampo pokupura vakuronambunga nsene asi kuvhura tu ka vatere mosirugana songandi, pokugava yigava koyirugana youzuni mudima ndi pokukanderera po ava sina kundama simpagwa. b (Yis. 17:17) Pasihonena, mo-2020, nokomitiye devatero moyimpagwa dokupitakana po-950 kwa di tulisire po uzuni mudima yipo di pakere mbili ava wa kundamene uvera woKorona. Ava ava ruganene kumwe nonokomitiye devatero vana fire epandadeko lyetu lyenene. Morwa awo kwa kara nonkenda kovapuli vakwawo, awo kwa gava mbatero zoyininke yopanyama eyi va hepere vanavazinyetu, kwa va vatera yipo va twikire kukarera Jehova ntani momaukaro gamwe, awo kwa wapukurura ndi kwa tungurura mambo nomavango goukareli.—Hetakanesa 2 Vakolinte 8:1-4.

11. Ngapi omu atu likida efumano kwaGuhyetu gemeguru apa atu likida nkenda?

¹¹ Apa atu likida nkenda kovanavazinyetu konyima zapa a si horoka simpagwa, vantu wopeke kudimburura malizambero aga atu tura po. Pasihonena, mo-2019, ekundungu eli ava tumbura asi Dorian kwa zonagwire Sinyanga soUhompa moBahamas. Ngomu vanavazinyetu va tungwilire Sinyanga, awo kwa pulire ko mugara gumwe  ogu ga dira kukara asi Mbangi, yipo ava tantere asi yimaliwa yingapi nava vhura kumufuta yipo ava vatere ko noyirugana yimwe eyi ya hepere po. Age kwa va tanterere asi: ‘Ame nina hara kugava . . . yiruganeso, novantu ava nava ka rugana ntani noyininke eyi nava ka ruganesa. . . . Ame kuna hara kuyiruganena eyi mbunga zeni. Ayo kukorangeda nge sili unene omu omu lizuvhu kuhamena vakaume veni.” Sinzi sovantu womouzuni kapi va diva Jehova. Nye sinzi sawo kunomena eyi adi rugana Nombangi daJehova yipo va vatere vantu wopeke. Ose kuhafa unene apa atu ya dimburura asi apa atu likida nkenda kovantu wopeke, ayo kuvhura kuvaninkisa yipo va hare ku diva ko yoyinzi kuhamena Jehova ogu ga kara ‘nokenda zonene unene’!—Efe. 2:4.

12. Ngapi omu kutunga po sikara sonkenda neina nasi tu vatera tu liwapayikire udigu wounene? (Ehororo 13:16, 17)

¹² Morwasinke ngatu hepera kulikida nkenda posiruwo soudigu wounene? Bibeli kulikida asi ava ngava dira kukwatesa ko mapangero gouzuni ou, ngava ligwanekera nomaudigu ngesi ntani poudigu wounene. (Resa Ehororo 13:16, 17.) Vanavazinyetu kuvhura va hepe evatero lyoyininke eyi vana hepa yipo va paruke. Apa Hompa gwetu, Jesus Kristusa, nga wiza aya pangure vantu, tuna hara aya tu gwane ose kuna kulikida nkenda ntani nga tu zigida tu ka “pinge Uhompa.”—Mat. 25:34-40.

13. Kuliza nomu va yi likida moVaroma 15:7, ngapi omu Vakriste wokuhova womosiruwo sovapositoli va li likidire-likidire eharo?

¹³ Nkenye gumwe ga yi dimbwilire asi Vakriste wokuhova womosiruwo sovapositoli kwa li hara here. Nye ayo ngoso ya va karerere ureru kulikida eharo ndi? Konekeni elisigo eli lyakere mombungakriste zomoRoma. Vamwe kwa kere Vajuda ava va rongere kulimburukwa Veta zaMosesa, ano vamwe kwa tundililire konomuhoko da peke ntani kwa va rerere nonompo dokulisiga-siga. Vakriste vamwe nampo kwa kere vapika ano vamwe nampo kwa kere vamanguruki ntani vamwe nampo kwa kere novapika vawo. Ngapi omu Vakriste owo va twikilire kulilikida-likida eharo nampili ngomu mombungakriste mwa kere malisigo gangoso? Mupositoli Paurusa kwa va korangedere asi “litambura-tambureni.” (Resa Varoma 15:7.) Yisinke ga tembe Paurusa? Nkango “kutambura” kutanta asi kutambura nonkenda muntu membo ndi kutulisa po ukaume novantu. Pasihonena, Paurusa kwa tanterere Firemoni omu na vhura kutambura Onesimusa ogu ga tjwayukire upika pokuuyunga asi: “Mu tambura neharo.” (Fir. 17) Ntani Pilisikira naAkura kwa tambwire Aporo, ogu ga divire yoyisesu kuhamena Ukriste poku “mu twara kompengi.” (Yirug. 18:26) Mevango lyokupulisira malisigo aga va kere nago ga va gaunune, Vakriste owo kwa fundire po madiro kulizuvha gawo ntani kwa litambwire-tambwire.

14. Ngapi omu Anna namugara gwendi va likidire eharo?

¹⁴ Nose kuvhura kulikida eharo kovanavazinyetu pokukara vakaume vawo ntani poku kara kumwe nawo. Oyo ngayi va tumangeda nawo yipo va tu likide eharo. (2 Kol. 6:11-13) Tu tareni sihorokwa saAnna namugara gwendi. Konyima tupu zosiruwo sosisupi apa va dirukilire mosirugana sawo sosipe ngovatumwa koUtokero waAfrica, Korona makura yipo za tamekere. Morwa uvera woKorona, awo kapi va vhulire kugwanekera kumwe novapuli vakwawo womombungakriste zawo sipara nosipara ntani ayo kwa va digoperere kudiva vanavazinyetu. Ngapi omu valikwali ava va vhulire kulikida eharo? Awo ngava bela kupitira kovidiyo yipo va gwanekere kumwe novapuli vakwawo ntani awo kwa va tanterere asi awo kwa here ku va diva nawa. Mapata kwa haferere eharo eli va va likidire vatumwa ava ntani rorunzi awo kwa tamekere kuva bela noku va tumina nombudi. Morwasinke vatumwa ava va hetekerere ko kudiva vapuli vakwawo womombungakriste zawo zompe? Anna kwa uyunga asi, “Ame kapi ngani divara eharo eli va  tu likida vanavazinyetu nepata lyange moyiruwo yoyiwa neyi yoyidonantani yihonena yawo kwa tumangeda nge nilikide eharo.”

15. Yisinke ono kulirongera ko kosihonena saVanessa kuhamena kuhara vanavazinyetu navenye? (Tara hena efano.)

¹⁵ Sinzi setu kwa kara monombungakriste omu mwa kara vanavazinyetu ava va tundilira konontundiliro dokulisiga-siga ntani ava va kara noyikara yokulisiga-siga. Ose kuvhura kulikida eharo kwanavenye pokudemenena koyikara yawo yoyiwa. Munazinyetu gomukadi Vanessa, ogu a vatere moNew Zealand, nga yi mu karere udigu kutulisa po ukaume kumwe navamwe womombungakriste. Nye age kwa ya tokwere asi mevango lyokuhetekera ko kunyokera po vanavazinyetu ava va kere noyikara eyi ngayi dili kumuhafesa, age nga kara-kara kumwe nawo siruwo sosinzi. Pokurugana ngoso, ayo kwa mu vaterere a dimburure yikara eyi a hafere Jehova mwawo. Age kwa uyunga asi: “Mokumona asi mugara gwange kwa ya kere mutareli gonombunga, ose ngatu kara kumwe novanavazinyetu ava va kara noyikara yokulisiga-siga ntani ayo ngayi tu karere ureru kukara kumwe nawo. Ame ngesi kuhafera kukara kumwe novanavazinyetu wokulisiga-siga. Jehova nage kuyihafera morwa age kwa tu kokera kombunga zovantu wokulisiga-siga. Apa atu hetekere ko kutara wopeke ngwendi moomu ava tara Jehova, ose ku yi likida asi twa va hara.—2 Kol. 8:24.

16. Morwasinke ngatu hepera kulikida eharo lyenene kovanavazinyetu poudigu wounene? (Tara hena efano.)

¹⁶ Ose ngatu hepa kulikida eharo lyenene kovanavazinyetu poudigu wounene. Apa ngau tameka udigu wounene, kupi ko ngatu gwana epopero? Konekeni eyi Jehova ga tanterere vantu vendi va rugane apa va va homokerere Vababironi. Age kwa tente asi: “Hwilireni mononzugo deni, vantu vange, zedireni ko mavero geni. Vandeni tanko noku nali pwa ehandu lyaKarunga.” (Jes. 26:20) Ayo kumoneka asi ose nampo ngatu hepa kukwama mavyukiso gokulifana poudigu wounene. “Nonzugo” kuvhura kutamba konombungakriste. Poudigu wounene, Jehova kwa tumbwidira asi age nga tu popera nsene tupu tu twikira kukara mouumwe kumwe novanavazinyetu. Yipo nye, twa hepa kurugana unene ngesi yipo tu likide eharo lyenene kovanavazinyetu. Ezoworo lyetu kuvhura ngali korere mokurugana yininke oyo!

17. Yisinke ngatu vhura kuka rugana poudigu wounene nsene tu li wapayikira ngesi?

¹⁷ “Ezuva lyaHOMPA lyenene” nga li reta sinka sosinene kovantu navenye. (Sef. 1:14, 15) Vantu vaKarunga nawo ngava ligwanekera nomaudigu. Nye nsene tu liwapayikira ngesi, ose ngatu kara tuna litura ntani noku vatera vantu wopeke. Ose ngatu lididimikira nkenye maudigu aga ngatu vhura kuligwanekera nago. Apa vapuli vakwetu ava hepa, ose kurugana paapa twa hulira yipo tu va vatere poku va likida nkenda ntani po kuva pa yihepwa eyi vana hepa. Ntani nsene tu likida eharo kovanavazinyetu ngesi ose ngatu vhura hena kuka va likida eharo komeho. Makura Jehova ngatu tungika neparu lyanarunye mouzuni omu ngamu dira kuka kara yimpagwa ntani maudigu.—Jes. 65:17.