SIRONGWA SELIRONGO 30
Twikira kuhara unene Jehova ntani novantu wopeke
“Eharo ngano li tu ninkise tu kure mwanayinye.”—EFE. 4:15.
RUSUMO 2 Edina lyoge Jehova
ETWAROMO a
1. Mausili musinke wa lirongere apa wa tamekere kulironga Bibeli?
TO DIWOROKA yininke nayinye eyi wa lirongere apa wa tamekere kulironga Bibeli? Ove nampo ya ku tetukisire apa wa ya dimbwilire asi Karunga ga kara nedina. Ayo nampo ya kuhengagwidire apa wa ya dimbwilire asi Karunga kapi a hwike vantu momundiro gwanarunye. Ntani ayo nampo ya kuhafesere apa wa ya lirongere asi ove ngo ka mona hena vahali woge ava va fa ntani noku ka paruka kumwe nawo paapa pevhu moParadisa.
2. Kugusa ko kulironga mausili gomoBibeli, ezokomeho musinke hena wa tura po? (Vaefeso 5:1, 2)
2 Moomu wa lirongere Nonkango daKarunga, yimo hena eharo lyoge lyokuhara Jehova lyaya kura. Eharo olyo kwa kutumangedere o ture pasirugana eyi wa lironga. Ove kwa tura po matokoro gomawa kuliza nonompango domoBibeli. Ove kwa lironga kugazara ntani noku rugana youhunga morwa ove wa here kuhafesa Karunga. Ngwendi moomu tupu munona a honene vakurona vendi veharo, ove kwa honena Guhyetu gemeguru.—Resa Vaefeso 5:1, 2.
3. Mapuro musinke nampo natu vhura kulipura nyamwetu?
3 Ose nampo kuvhura tu lipure nyamwetu asi: ‘Ame ngesi na hara unene Jehova kupitakana apa na tamekere kukara Mukriste ndi? Kutunda apa na gwana ekuho, ame kugazara noku rugana yininke ngwendi Jehova, unene po pokulikida eharo kovanavazinyetu ndi?’ Ya ha tu dompesa nsene tu dimburura asi eharo lyetu lyokuhara Jehova novantu wopeke kapi lina nkondopara ngwendi ‘moomu lya kere muhowo.’ Yininke yokulifana kwa horokerere Vakriste womosiruwo sovapositoli. Nye Jesus kapi ga va nyokere ntani nose kapi nga tu nyoka. (Ehor. 2:4, 7) Age gayi diva asi ose kuvhura tu tengwidire po eharo eli twa kere nalyo muhowo apa twa tamekere kulironga usili.
4. Yisinke natu ka zogera mosirongwa esi?
4 Mosirongwa esi ta tu ka zogera omu natu twikira kuhara unene Jehova ntani novantu wopeke. Ano konyima ntani natu ka dimburura mauwa aga natu vhura kugwanena mo ntani naga nava gwanena mo wopeke apa atu twikire kuhara unene Jehova ntani novantu wopeke.
TWIKIRA KUHARA UNENE JEHOVA
5-6. Maudigu musinke ga ligwanekerere nago mupositoli Paurusa mosirugana sendi, nye yisinke ya mu tumangedere yipo a twikire kukarera Jehova?
5 Mupositoli Paurusa nga hafere kukarera Jehova, nye age ga kere nomaudigu gomanzi aga ga hepere kulididimikira. Rorunzi Paurusa nga gendi yinano yoyire, ntani marugendo momazuva gena kapi ga kere ureru. Momarugendo gendi, poyiruwo yimwe Paurusa nga “ligwanekere noyimpagwa yomomukuro neyi yokovakorotji.” Pwa kere hena yiruwo apa nonkore dendi nga di mu toona. (2 Kol. 11:23-27) Ntani vapuli vakwawo kapi va kere nkenye apa norupandu kwendi koyinike eyi ga va ruganene yipo ava vatere.—2 Kol. 10:10; Fil. 4:15.
6 Yisinke ya vaterere Paurusa yipo a twikire kukarera Jehova? Paurusa kwa lirongere yoyinzi kuhamena yikara yaJehova moMatjangwa ntani moyininke eyi ga limonenene. Ntani Paurusa gayi pulire nawa-nawa asi Jehova Karunga kwa mu here. (Rom. 8:38, 39; Efe. 2:4, 5) Ntani age kwa ya here unene Jehova. Paurusa kwa yi likidire asi ga hara Jehova ‘pokukwafa vapongoki ntani nokutwikira kuvakwafa.’—Heb. 6:10.
7. Nkedi musinke zimwe omu natu vhura kutwikira kuhara unene Jehova?
7 Ose kuvhura kutwikira kuhara unene Karunga pokulironga Nonkango dendi nelituromo. Ngomu ono kuresa Bibeli, hetekera ko kukwata egano eyi sina kulikida nkenye sihorokwa kuhamena Jehova. Lipura nyamoge asi: ‘Ngapi omu sihorokwa esi asi likida asi Jehova ga hara nge? Nokonda musinke sina ku pa nge deyi nani harera Jehova?’
8. Ngapi omu makanderero naga tu vatera tu twikire kuhara unene Karunga?
8 Nkedi zimwe hena omu natu twikira kuhara unene Jehova, kuna kara pokukanderera kwendi nkenye ezuva ntani noku mu tantera omu tuna kulizuvha nawa-nawa. (Epis. 25:4, 5) Ano Jehova nga vhura kulimburura makanderero getu. (1 Joh. 3:21, 22) Munazinyetu gomukadi gedina Khanh, ogu ga tunga moAsia, kwa tanta asi: “Pomuhowo ame kwa here Jehova morwa yeeyi na lirongere kumuhamena, nye apa na mwene omu ana kulimburura makanderero gange, ame kwa tamekere kumuhara unene. Eyi kwa ninkisire nge ni rugane yininke eyi ayi mu hafesa. b
TWIKIRA KUHARA UNENE VANTU WOPEKE
9. Ngapi omu Timoteusa gayi likidire asi age kwa tulire po ezokomeho mokulikida eharo kovapuli vakwawo?
9 Konyima zonomvhura dongandi kutunda apa ga ya kere Mukriste, Paurusa yipo gaya li gwene nomudinkantu gomugara gedina Timoteusa. Timoteusa kwa here Jehova ntani age kwa here vantu. Paurusa kwa tanterere Vafilipi asi: “Kwato ogu ga kara nonkareso zongwa ngwendi zendi [Timoteusa], ogu nga vhura kuyamupakera nawa mbili.” (Fil. 2:20) Paurusa apa kapi ga uyungire kuhamena evhuliko eli ga kere nalyo Timoteusa lyokukara muwapayiki goyininke ndi mugavi yiuyungwa yanavenye, nye Paurusa kwa mu tetukisire pokumona omu Timoteusa ga here vapuli vakwawo. Pwa hana masinganyeko, mbungakriste ezi nga vatere Timoteusa kwa ndindilire nononkondo madinguro gendi.—1 Kol. 4:17.
10. Ngapi omu Anna namugara gwendi va likidire eharo kovapuli vakwawo?
10 Nose kupapara nonkedi omu natu vhura kuvatera vanavazinyetu. (Heb. 13:16) Konekeni sihonena saAnna, ogu kava tumbwire mosirongwa sina ka pita. Konyima zekundungu lyenene, nage namugara kwendi kwa ka dingwire epata limwe lyoNombangi ntani awo kwa ka dimbwilire asi ekundungu kwa zonagwire yipereki yonzugo zepata olyo. Ano ngoyitundwamo, epata olyo kapi lyakere noyikoverero yokuzera. Anna kwa uyunga asi: “Ose kwa gusire yikoverero yawo noku ka yi kuhwa ntani kwa yi tengwidire ayo tuna yikangura noku yi peta-peta. Kwetu, ose kwa yi mwene ngwendi asi yininke tupu yoyinunu eyi twa va ruganenene. Nye morwa twa yi rugene eyi, ose kwa ya kara vakaume wovanene dogoro ngesi.” Eharo lyaAnna namugara gwendi lyokuhara vanavazinyetu kwa va tumangedere yipo va vatere wopeke.—1 Joh. 3:17, 18.
11. (a) Ngapi omu vantu wopeke ava lizuvhu rorunzi apa atu yi likida asi twa va hara? (b) Kuliza noYisewe 19:17, yisinke a rugana ko Jehova apa atu likida eharo?
11 Apa atu kara nonkenda ntani apa atu likida eharo kovantu wopeke, awo kuvhura kumona asi ose kuna kuhetekera ko kuhonena Jehova. Ntani awo kuvhura kulikida rupandu konkenda ezi atu va likida kupitakana omu natu vhura ku yi gazarera. Khanh, ogu tuna tumbura, kudiworoka ava va mu vaterere. Age kwa uyunga asi: “Ame kupandura sili unene vanavazinyetu wovakadi ava ngava pitura nge mokuzuvhisa. Awo ngava wiza yipo va ya piture nge pembo lyange, ngava zigida nge yipo tu ka lye metaha kumwe ntani ngava divilisa asi nina ka sika nawa kembo. Ame ngesi nayi dimburura asi eyi kwa hepere nonkondo dononzi mokuyirugana. Ntani awo kwa yi rugene neharo.” Yimo kapisi nkenye ogu nga vhura kutupandura kweyi atu va ruganene. Khanh kwa uyunga kuhamena ava va mu vaterere asi: “Ame nina hara kutengwida kuwoko koyininke yoyinzi yoyiwa eyi va ruganena nge, nye ame kapi na diva oku va tunga ngesi. Nye nampili ngoso, Jehova ga diva oku va tunga ntani ame kuna kukanderera asi age ngava tengwidira nge po kuwoko.” Yosili Khanh mouhunga ana kara. Jehova kumona yininke nayinye eyi atu ruganene vantu wopeke nampili yikare asi yininke yoyinunu. Age ku yi tara ngonzambo zomulyo ntani ngwendi ngomakongo aga nga futa.—Resa Yisewe 19:17.
Apa muntu a tura po ezokomeho mokukarera Jehova, age kupapara nonkedi omu na vhura kuvatera wopeke (Tara paragarafu 12)
12. Ngapi omu vanavazinyetu nava likida eharo lyawo kombungakriste? (Tara hena mafano.)
12 Nsene asi ove munazinyetu gomugara, ngapi omu novhura kulikida eharo kovantu wopeke ntani noku rugana yininke yipo o va vatere? Munazinyetu gomugara gomudinkantu gedina Jordan kwa pulire mukuronambunga yipo a dive asi ngapi omu navhura kuvatera unene mombungakriste. Mukuronambunga kwa mu pandadekere kezokomeho eli ga tura po nare, makura yipo ga mu pere ko mapukururo omu navhura kurugana yoyinzi yipo a vatere mombungakriste. Pasihonena, age kwa geve egano asi Jordan a livinduke kukasika koSinyanga soUhompa noku morora wopeke, kulihameka momapongo, kuzuvhisa nkenye apa kumwe nokambunga kawo komoyirugana yomokuzuvhisa ntani nokupapara nonkedi omu navhura kuvatera vantu wopeke. Apa Jordan gayi rugene eyi, age kapi tupu ga lirongere omu navhura kurugana yininke yongandi, nye age kwa lirongere hena kuhara unene vanavazinyetu. Jordan kwa dimbwilire asi apa munazinyetu gomugara a kara mukwafimbunga, age kapi a tameke kuvatera vantu wopeke, nye mevango lyoyo, age kutwikira ku va vatera.—1 Tim. 3:8-10, 13.
13. Ngapi omu eharo lyatumangedere munazinyetu gomugara gedina Christian yipo a wapere kukara hena mukuronambunga?
13 Ngapi nsene asi ove kwa kere mukwafimbunga ndi mukuronambunga? Jehova kudiworoka yirugana eyi wa rugana ntani neharo eli lyakutumangedere yipo o yi rugane. (1 Kol. 15:58) Ntani age kumona eharo eli ono kutwikira kulikida. Munazinyetu gumwe gomugara gedina Christian kwa guvire apa va mu hagekesere kukara mukuronambunga. Nye nampili ngoso, age kwa tanta asi: “Ame kwa tokwere kurugana yininke nayinye eyi navhulire kurugana neharo yipo ni karere Jehova, yikare asi nakara nositumbukira ndi hawe.” Mwa za siruwo, age kwa mu tulire a kare hena mukuronambunga. Christian kwa tanta asi: “Ame kwa kere nowoma kukara mukuronambunga hena. Nye ame kwa tokwere asi nsene asi Jehova kwa harerere nge ni kare hena mukuronambunga konkenda zendi, ame ngani yirugana morwa na mu hara ntani na hara vanavazinyetu.”
14. Yisinke ono kulirongera ko kweyi ga uyungire munazinyetu gomukadi gomoGeorgia?
14 Vakareli vaJehova kulikida hena eharo lyawo kovantu vakwawo. (Mat. 22:37-39) Pasihonena, munazinyetu gomukadi Elena, gomosirongo saGeorgia, kwa uyunga asi: “Pomuhowo, sininke esi sa tumangedere nge ni zuvhise kwa kere eharo lyange lyokuhara Jehova. Nye ngomu na here unene Otate vemeguru, ame kwa ya here hena unene vantu wopeke. Ame ngani hetekere ko kugazara kuhamena maudigu aga va vhulire kuligwanekera nago ntani sirongwa esi nampo nasi ka va guma komutjima. Moomu na twikilire ku va gazara monkedi ezi, yimo hena na here ku va vatera.”—Rom. 10:13-15.
MAUWA AGA AGA TUNDU MOKULIKIDA EHARO KOVANTU WOPEKE
Nampili sininke simwe sosiwa esi atu ruganene vantu, aso kuvhura kuninkisa vantu wovanzi va gwanene mo uwa (Tara paragarafu 15-16)
15-16. Ngwendi moomu tupu vana kuyilikida pomafano, mauwa musinke ngatu vhura kugwanena mo nsene tu likida eharo kovantu wopeke?
15 Apa atu likida eharo kovanazinyetu, awo kapisi yiwo velike tupu ava gwanene mo uwa. Konyima za pa Korona za tamekere, munazinyetu gomugara Paolo namukadendi kwa vaterere vanavazinyetu wovakadi wovakurupe wovanzi yipo va lironge kuruganesa yikwakonentu yawo yipo va zuvhise. Munazinyetu gumwe gomukadi ogu ya digoperere kuruganesa sikwakonentu sendi kwa ya mu tompokere konyima. Age ga vhulire ku si ruganesa yipo a zigide vekoro lyendi koMurarero. Vekoro lyendi wokusika konomurongo ntazimwe kwa pongere kupitira koyikwakonentu. Munazinyetu ogu gomukadi ntani novanekoro vendi navenye kwa gwanenene mo uwa kweyi ga va ruganenene Paolo namukadendi. Konyima, munazinyetu ogo gomukadi kwa tjangerere Paolo asi: “Mpandu kweyi omu tu rongo ose vakurupe. Ame kapi ngani divara omu Jehova atu pakere mbili ntani nomu wa rugene unene yipo o tu vatere.”
16 Yihorokwa ngeyi kwa rongere Paolo sirongwa somulyo. Eyi kwa mu diworokesere asi eharo mulyo unene kupitakana ediwo ndi evhuliko lyokurugana yuma yongandi. Age kwa uyunga asi: “Ame kwa kere mutareli gonombunga. Neina, ame kudimburura asi nampili ngomu vanavazinyetu nampo va divara yiuyungwa yange eyi na geve, awo simpe kudiworoka yininke eyi nava ruganena.”
17. Wolye hena ava gwanene mo uwa apa atu likida eharo?
17 Apa atu likida eharo kovantu wopeke, nose nyamwetu kugwanena mo uwa mononkedi edi atu dili kundindira. Jonathan ogu ga tunga moZealand gayi limonena eyi. Ezuva limwe moMapeu kositenguko, age kwa mwene muzuvhisi gokukarerera kuna kuzuvhisa gelike konontere dositaura. Jonathan yipo ga tokwere kurugana kumwe nomuzuvhisi ogu gokukarerera nkenye Mapeu kositenguko. Posiruwo oso age kapi gayi dimbwilire asi nage nga gwanena mo uwa monkenda ezi ga likidire. Jonathan kwa uyunga asi: “Posiruwo esi ya horokere eyi, ame kapi na here sirugana sokuzuvhisa. Nye ngomu na purakenene muzuvhisi ogu gokukarerera monkedi omu a zuvhisa, noku mona omu a si mu gendi po nawa sirugana sendi sokuzuvhisa, ayo kwa tumangedere nge yipo ni hare unene sirugana esi sokuzuvhisa. Munazinyetu gomugara ogo kwa ya kara hena kaume kange ntani age kwa vatera nge yipo nikure pampepo, nihafere sirugana sokuzuvhisa ntani ni hedere pepi Jehova.”
18. Yisinke ana tu harere Jehova tu rugane?
18 Jehova kuna tu harere natuvenye tu twikire kumuhara unene ntani novantu wopeke. Ngwendi moomu tupu tuna yi lirongo, ose kuvhura kutwikira kuhara unene Jehova pokuresa Nonkango dendi noku teda ko ntani pokuuyunga nage nkenye ezuva kupitira mekanderero. Ose kuvhura kutwikira kulikida eharo kovanavazinyetu pokuvavatera mononkedi dokulisiga-siga. Ngomu tuna kuhara unene Jehova nava wopeke, ose ngatu hedera unene pepi Jehova ntani novanavazinyetu. Ntani ose ngatu hafera ukaume owo dogoro narunye!
RUSUMO 109 Hara nomutjima nagunye
a Yikare asi tu va pe mousili ndi ose kwa karera Jehova nomvhura dononzi, natuvenye kuvhura kutwikira kutura po ezokomeho. Sirongwa esi nasi ka zogera nkedi zomulyo omu natu vhura ku yi rugana eyi: pokutwikira kuhara unene Jehova ntani novantu wopeke. Ngomu ono kuteda ko kosirongwa esi, gazadara ko kuhamena ezokomeho eli wa tura po nare ntani nomu no twikira kutura po ezokomeho.
b Madina gamwe kwa ga tjindja.
