1-2. Muntu musinke ga kere Sadoko? (1 Histoli 12:22, 26-28)

 GAZADARA ko kombunga zovagara wokupitakana po-340 000, awo kuna pongo kumwe yipo va ture Ndafita a kare hompa goVaisraeli navenye. Awo kwa ka kere mazuva gatatu konondundu domamanya, edi da kere pepi naHeburoni. Awo kwa zoraganene nokuuyunga nokudimba marusumo noruhafo yipo va hamberere Jehova. (1 Hist. 12:39) Mokatji kombunga mwa kere mudinkantu gedina Sadoko, sinzi sovantu ngano kapi va vhulire kumudimburura. Nye nampili ngoso Jehova ga mu dimbwilire, ntani ana hara tu yi dive asi Sadoko yipo ga kere. (Resa 1 Histoli 12:22, 26-28: Nkenye ezuva kovakwayita vaNdafita ngaku ligwederere wovape, makura mbunga zendi zovakwayita tazi nenepa unene. Vakwayita 4 600 vakwami vaJehoyada ruvharo rwaArona 3 700 ntani ekoro lyaSadoko mudinkantu gokuvhura kurwa.) Muntu musinke ga kere Sadoko?

² Sadoko kwa kere mupristeli ogu nga ruganene kumwe nomupristeli gomunene Abiyatara. Karunga kwa pere hena Sadoko unongo wounzi ntani evhuliko lyokukwata egano mpango zendi. Apa vantu va hepere evatero, awo ngava pura mavyukiso kwaSadoko yipo ava vatere. Age kwa kere hena mugara gouradi. Mosirongwa esi tatu ka lironga omu Sadoko ga likidire uradi.

3. (a) Morwasinke vakareli vaJehova nava hepera kukara nouradi? (b) Yisinke natu ka konakona mosirongwa esi?

³ Posiruwo esi somazuva gopouhura, Satana kuna kuhetekera ko paapa ga hulira kupitakana pwanare yipo a zonagure po epuro eli twa kara nalyo mwaJehova. (1 Pet. 5:8) Twa hepa kukara nouradi ngomu tuna kundindira mwaJehova yipo nga ka zonagure po Satana nouzuni ou woudona. (Epis. 31:24) Ngesi tatu ka konakona nonkedi ntatu, omu natu vhura kuhonena uradi waSadoko.

 KWATESA KO UHOMPA WAKARUNGA

4. Morwasinke vantu vaKarunga va hepera uradi mokukwatesa ko Uhompa waKarunga? (Tara hena efano.)

⁴ Ngovantu vaJehova, ose kukwatesa ko Uhompa waKarunga nomutjima nagunye, nye ose nkenye apa kuhepa uradi mokuyirugana oyo. (Mat. 6:33) Pasihonena, mouzuni ou woudona twa hepa uradi yipo tu paruke kuliza nonompango daJehova ntani tu zuvhise mbudi zongwa zoUhompa. (1 Tes. 2:2) Mokumona asi vantu vana ligaunuka mouzuni ou morwa kulihameka moupolitika, twa hepa uradi yipo tu dire kulihameka mo. (Joh. 18:36) Sinzi sovantu vaJehova kwa ligwanekera noudigu woyikwaeparu ndi kuvatoona ndi kuvatura monodorongo morwa kudira kulihameka moupolitika ndi moyita.

5. Morwasinke Sadoko ga heperere uradi mokukwatesa ko Ndafita?

⁵ Sadoko kapi tupu ga zire koHeburoni a ka dane silika saNdafita sokumutura mouhompa. Age kwa zire noyirwiso yendi ntani ga liwapaikilire kurwa. (1 Hist. 12:38) Age kwa tokomenene kukwama Ndafita moyita ntani noku ka popera Vaisraeli kononkore dawo. Nampili ngomu Sadoko ga dilire kukara nediwo lyenzi lyokurwa ngomukwayita, nye age kwa kere mugara gouradi.

6. Ngapi omu Ndafita ga tulilire po Sadoko sihonena sosiwa sokukara nouradi, yipo a si kwame? (Episarome 138:3)

⁶ Kwalye ga lirongerere Sadoko kukara nouradi? Age ga divire vagara wovanzi ava va kere nononkondo nouradi. Ntani ga lirongerere ko koyihonena yawo. Pasihonena, sihonena saNdafita souradi ‘sokupitisira Vaisraeli moyita’ kwa tumangedere Vaisraeli navenye yipo va mu kwatese ko nomutjima nagunye. (1 Hist. 11:1, 2) Ndafita nkenye apa nga huguvara mwaJehova yipo a mu vatere a funde po nonkore dendi. (Epis. 28:7; resa Episarome 138:3.) Sadoko hena kwa lirongere uradi  kovagara ava ngwendi Jehoyada ntani nomazimo gamwe 22 govagendesi aga ga kwatesere ko Ndafita. (1 Hist. 11:22-25; 12:26-28) Vagara navenye ava kwa tokomenene kukwatesa ko Ndafita yipo a kare hompa ntani nokumupopera.

7. (a) Yisinke natu lirongera ko koyihonena yomomazuva getu kuhamena uradi? (b) Yisinke ono lirongere ko kosihonena samunazinyetu Nsilu esi vana likida movidiyo?

⁷ Ose kugwana nonkondo nouradi pokukonakona yihonena yava va kere nouradi ava va kwatesere ko upangeli waJehova. Hompa gwetu Jesus Kristusa kwa nyokerere po kulihameka momaupolitika gomouzuni ou apa ga kere pevhu. (Mat. 4:8-11; Joh. 6:14, 15) Age nkenye apa nga huguvara mwaJehova yipo a gwane nonkondo. Tuna kara hena noyihonena yoyinzi yovanavazinyetu wovagara wovadinkantu ava va nyoka kulihameka moukwayita ndi moupolitika. Kuvhura tu rese yihonena yawo ko-jw.org. a

VATERA VANAVAZINYETU

8. Siruwo musinke vakuronambunga ava hepa uradi yipo va vatere vanavazinyetu?

⁸ Vantu vaJehova kwa hara kulivatera-vatera. (2 Kol. 8:4) Nye nampili ngoso, poyiruwo yimwe awo kuhepa uradi mokuyirugana oyo. Pasihonena, apa ayi horoka yita, vakuronambunga kudimburura asi vanavazinyetu vana hepa ekorangedo, evatero lyawo, kuvapa ko nondya ndi mudwaro ntani evango eli nava kara. Vakuronambunga kwa hara vanavazinyetu, eyi yiyo nye ava va vaterere pokuvapa eyi vana hepa nampili yi kare siponga mokuyirugana. (Joh. 15:12, 13) Apa ava yi rugana eyi, awo kuhonena sihonena saSadoko ogu ga kere nouradi.

9. Kuliza na-2 Samwere 15:27-29, yisinke Ndafita ga tanterere Sadoko na rugana? (Tara hena efano.)

⁹ Eparu lyaNdafita kwa kere mosiponga. Munendi Abisaromo kwa tokomenene kumudipaga yipo a mu guse uhompa. (2 Sam. 15:12, 13) Ndafita ga hepere kutjwayuka usimbu moJerusarema. Age kwa tanterere marenga gendi  asi: “Tu zeni, nsene kuna hara tu yoworokeni kwaAbisaromo!” (2 Sam. 15:14) Ngomu marenga ga katukire, Ndafita kwa dimbwilire asi pwa hepere kukara gumwe moJerusarema yipo a mu divise kuhamena eyi ga hepere kurugana Abirasomo. Yipo ga tumine Sadoko kumwe novapristeli vamwe, va tengure mositata yipo va ka kare vantu ava nava mu pa nombudi. (Resa 2 Samwere 15:27-29.) Awo va hepere kutakamesa. Eyi Ndafita ga tanterere vapristeli owo va ka rugane kwaAbisaromo kwa kere siponga unene. Abisaromo kwa kere muntu gonyanya, kwa lihere mwene ntani kwa here kudipaga oguhwe. Gazadara ko eyi Abisaromo ga rugene ngano Sadoko ntani novapristeli vamwe nsene ngano ga dimbwilire asi awo kwa mu nomenene yipo va popere Ndafita.

10. Ngapi Sadoko ntani novapristeli vakwawo va poperere Ndafita?

¹⁰ Ndafita kwa pulire Sadoko ntani nakaume gwendi gumwe gomulimburukwi Usayi yipo va mu vatere kweyi ga tokwere kurugana. (2 Sam. 15:32-37) Usayi ga hepere kulininkisa mokukwatesa ko Abisaromo ntani nokumupa mavyukiso kuhamena omu na homokera Ndafita. Ano eyi ngano ya vhulire kupa Ndafita siruwo yipo a liwapaikire. Apa Abisaromo ga purakenene egano lyaUsayi, Usayi yipo ga tanterere Sadoko ntani Abiyata kuhamena eyi ya horokere. (2 Sam. 17:8-16) Vagara ava vavali yipo va tanterere ko Ndafita kuhamena mbudi ozo. (2 Sam. 17:17) Nevatero lyaJehova, Sadoko ntani novapristeli vakwawo kwa poperere Ndafita kosiponga.​—2 Sam. 17:21, 22.

11. Ngapi natu honena uradi waSadoko, nsene kuna kuvatera vanavazinyetu?

¹¹ Ngapi natu likida uradi ngwendi Sadoko, nsene va tu pura tu vatere vanavazinyetu moyiruwo yoyidigu? (1) Kwama mavyukiso. Momaukaro ogo, ayo ya wapa kulimburukwa yipo tu kare mouumwe. Limburukwa mavyukiso gokutunda koBeteli. (Heb. 13:17) Vakuronambunga va hepa kutarurura nkenye apa mavyukiso kuhamena omu nava liwapaikira  simpagwa ntani eyi nava rugana nsene sina horoka simpagwa. (1 Kol. 14:33, 40) (2) Kara nouradi nye wa hepa kutakamesa. (Yis. 22:3) Gazadara ko komeho o rugane yuma. Li kunga nyamoge kwankenye siponga. (3) Huguvara mwaJehova. Diworoka asi Jehova ana hara nove novanavazinyetu mu kare mepopero. Age nga ku vatera yipo ngayi ku tompoke kuvatera vanavazinyetu.

12-13. Yisinke ono lirongere ko kosihonena saViktor naVitalii? (Tara hena efano.)

¹² Tu tareni sihonena sovakuronambunga vavali Viktor naVitalii, ava ngava vatere vanavazinyetu pokuvatwarera nondya nomema moUkraine. Viktor kwa uyunga asi: “Ose ngatu papara nondya nkenye oku, nokuzuvha omu vana kuroya pepi nose. Munazinyetu gumwe kwa geve nondya domositora sendi. Nondya edi ga geve kwa vaterere vantu wovanzi, yipo va paruke posiruwo oso. Ngomu twa rongerere yininke moroli zetu, boma kwa gwilire hambara nometa 20 pepi nose. Ezuva nalinye ame kwa likwamberere Jehova yipo a pe nge uradi ou na hepere yipo ni twikire kuvatera vanavazinyetu.”

¹³ Vitalii kwa uyunga asi: “Ose kwa hepere uradi wounene mokuyirugana oyo. Rugendo rwange rokuhova kwa gusire novili 12, monzira nazinye ame kwa kanderere kwaJehova.” Vitalii kwa kere nouradi nye age hena nga takamesa. Age kwa uyunga hena asi: “Ame kwa twikilire kuhundira Jehova a pe nge ko unongo nelinunupiko. Ame kwa singire tupu moyitaura eyi va pulisira. Epuro lyange kwa nkondoparere apa na mwene vanavazinyetu omu ava ruganene kumwe. Awo kwa gusire mo yininke mositaura, kudamuna nokurondeka nondya, yidwara ntani yininke yimwe yomulyo moroli, name naViktar kwa tu pere nondya ntani nomavango aga twa hepere kupwizumukira ngomu twa kere morugendo.”

TWIKIRA KULIMBURUKWA JEHOVA

14. Ngapi nayi tu kundama nsene gumwe ogu twa hara a siga Jehova?

¹⁴ Udigu umwe wounene ou natu vhura kuligwanekera nawo, kuna kara apa gumwe gekoro ndi kaume gwetu gomunene a sigi Jehova. (Epis. 78:40; Yis. 24:10) Ngomu ono kuhara muntu ogo, yimo hena nayi ku digopera unene kulididimikira ukaro owo. Ndafita naSadoko nawo va hepere kulididimikira ukaro wokulifana.

15. Morwasinke Sadoko ga heperere uradi yipo a twikire kulimburukwa Jehova? (1 Vahompa 1:5-8)

¹⁵ Sadoko kwa twikilire kulimburukwa Jehova apa kaume zendi gomunene Abiyatara ga tokwere kudira kulimburukwa Jehova. Eyi kwa horokere apa Ndafita ga hagekere kupangera. Apa Ndafita ga kurupire nokuhara kufa, munendi Adoniya kwa here kulitura mwene a kare hompa nampili ngomu Jehova ga here Saromo a kare hompa. (1 Hist. 22:9, 10) Abiyatara kwa tokwere kukwatesa ko Adoniya. (Resa 1 Vahompa 1:5-8.) Pokuyirugana oyo, Abiyatara kapi ga limburukwire tupu kwaNdafita nye noku kwaJehova. Gazadara ko ngano omu ya guvisire Sadoko nomu ya mu ninkisire a lizuvhe. Monomvhura dononzi, nage naAbiyatara kwa rugana kumwe ngovapristeli. (2 Sam. 8:17) Awo ngava pakerembili kumwe “Sikesa sEgwanekero.” (2 Sam. 15:29) Navenye kwa kwatesere ko Ndafita ngahompa gwawo, nokurugana yininke yoyinzi mosirugana saJehova.​—2 Sam. 19:11-14.

16. Yisinke nampo ya vaterere Sadoko yipo a twikire kulimburukwa?

¹⁶ Nampili ngomu Abiyatara ga tokwere kutura po etokoro lyepuko, Sadoko kwa twikilire kulimburukwa Jehova. Ndafita ga yi divire asi age kuvhura a huguvare Sadoko nkenye apa. Apa va dimbwilire eyi ga here kurugana Adoniya, Ndafita kwa huguvarere Sadoko, Natana ntani Benaya yipo va gwaveke Saromo.  (1 Vah. 1:32-34) Sadoko nampo sa mu korangedere sihonena sovakareli vamwe vaJehova, ngwendi saNatana ogu ga limburukwire Jehova nokukwatesa ko hompa Ndafita. (1 Vah. 1:38, 39) Apa Saromo ga kere hompa, age kwa tulire “mupristeli Sadoko mevega lyaAbiyatara.”​—1 Vah. 2:35.

17. Ngapi omu no honena Sadoko nsene gumwe ogu wa hara a dira kulimburukwa Jehova?

¹⁷ Ngapi no honena Sadoko? Nsene gumwe ogu wa hara a siga Jehova, yi likida asi ove ono tokora kulimburukwa Jehova. (Jos. 24:15) Jehova nga ku pa nonkondo nouradi ono hepa, yipo o rugane youhunga. Kanderera kwaJehova ntani twikira kukara pepi novakaume ava ava mu limburukwa. Jehova kutara ulimburukwi woge asi mulyo ntani nga ku futa.​—2 Sam. 22:26.

18. Yisinke ono lirongere ko kosihonena saMarco naSidse?

¹⁸ Tu konakoneni sihorokwa saMarco namukadendi Sidse, ava va kere novana vavali wovakadi ava va tokwere kuhageka kukarera Jehova. Marco kwa tanta asi: “Ezuva eli ava hampuruka vana woge, ove kuvahara unene ntani ngo rugana nkenye eyi mokuvapopera kosiponga. Ayo kukoresa unene komutjima apa ava hageke kukarera Jehova.” Age kwa uyunga hena asi: “Jehova nga tu vatere yipo tu lididimikire. Age kudivilisa nkenye apa asi tu likorangede. Apa ani guwu morwa kweyi yina horoka, mukadange kuhengagwida nge nokukorangeda nge yipo ni rugane youhunga, ano apa mukadange a kara nosinka, name kurugana yokulifana.” Sidse kwa uyunga asi: “Ngano kapi ya tu tompokere kulididimikira nsene ngano Jehova kapi ga tu pere nonkondo edi twa hepere. Ame kwa guvire unene ntani kwa lipere nyamwange usima kweyi vana vange va hagekere kukarera Jehova, makura yipo na tanterere Jehova omu na lizuvhire. Konyima zosiruwo, munazinyetu gomukadi ogu na dilire kumona nomvhura dononzi, kwa wizilire nge nokukambeka mawoko gendi poyipepe yange ntani ta tara nge momeho nokuuyunga asi: ‘Sidse diworoka asi alyo kapisi epuko lyoge.’ Nevatero lyaJehova, ayo ya tompoka nge kukara noruhafo mokumukarera.”

19. Yisinke ono tokomene kurugana?

¹⁹ Jehova ana hara vakareli vendi navenye va kare nouradi ngwendi Sadoko. (2 Tim. 1:7) Nye nampili ngoso, Jehova kapi ana hara tu huguvare mononkondo danyamwetu. Ana hara tu mu huguvare. Yipo nye, nsene no ligwanekera noukaro omu ono hepa uradi, huguvara mwaJehova. Yi pura nawa-nawa asi, age nga ku pa uradi ngwendi Sadoko.​—1 Pet. 5:10.