1. Ngapi omu o lizuvhu kuhamena usili?

 VANTU vaJehova kwa hara usili ou wa kara moBibeli. Ose kwa nkondopeka epuro lyetu kupitira moBibeli. (Rom. 10:17) Ose twa yi pura asi Jehova kwa tura po mbungakriste “ezi za kara ngwendi ngundi ntani etateko lyousili.” (1 Tim. 3:15) Ntani ose kuhafa kweyi atu limburukwa ‘ava ava tu pitisire’ ngomu ava faturura usili womoBibeli ntani nokutupa mavyukiso aga aga tu vatere yipo tu rugane mpango zaKarunga.​—Heb. 13:17.

2. Kuliza naJakopo 5:19, yisinke nayi vhura kutuhorokera konyima zokulironga usili?

² Nye nampili ngoso, konyima zapa twa tambura usili ntani nokuyitambura asi twa hepa kukwama mavyukiso gokutundilira kombunga zaJehova, simpe kuvhura kutupukisa. (Resa Jakopo 5:19.) Satana kuna hara tu hageke kuhuguvara moBibeli ndi momavyukiso aga atu gwana kombunga zaJehova.​—Efe. 4:14.

3. Morwasinke ya karera nomulyo tu kwaterere kousili? (Vaefeso 6:13, 14)

³ Resa Vaefeso 6:13, 14. Ntantani Satana a ruganese nonkondo dendi yipo a pukise vantu navenye va rwanese Jehova. (Ehor. 16:13, 14) Ntani twa yi diva asi Satana nga hetekera  ko paapa ga hulira yipo a pukise vantu vaJehova. (Ehor. 12:9) Yiyo ya karera nomulyo tu liyomberese nyamwetu yipo tu dive elisigo eli lya kara pokatji kousili noyipempa ntani yipo tu limburukwe kousili. (Rom. 6:17; 1 Pet. 1:22) Eyi ya kara nomulyo yipo ngatu paruke udigu wounene.

4. Yisinke natu ka zogera mosirongwa esi?

⁴ Mosirongwa esi, natu ka konakona yikara yivali eyi natu hepa kukara nayo yipo yi tu vatere tu dimburure usili ou au tundu moBibeli ntani noku tambura mavyukiso gokutunda kombunga zaJehova. Ntani natu ka zogera yininke yitatu eyi twa hepa kurugana yipo tu twikire kukwaterera kousili.

YIKARA EYI TWA HEPA YIPO TU DIMBURURE USILI

5. Nsene tu tjira Jehova, ngapi ngayi tu vatera tu dive asi ou usili?

⁵ Kutjira Jehova. Kutjira Jehova kutanta asi kumuhara unene nokudira kurugana nkenye eyi nayi mu guvisa. Mokuhafesa Jehova twa hepa kudiva asi eyi yiwa eyi yidona ntani twa hepa kudiva asi eyi yipempa eyi usili. (Yis. 2:3-6; Heb. 5:14) Twa hepa kutjira po unene Jehova kupitakana vantu morwa nsene tu kondjera kuhafesa vantu, kuvhura ngatu rugane eyi ayi dili kuhafesa Jehova.

6. Ngapi omu kutjira vantu kwa ninkisire vena vagara 10 va uyunge yininke yepuko?

⁶ Ose kuvhura ngatu sige usili nsene tu tjira unene vantu kupitakana Karunga. Tu tareni omu ya horokerere vamwe ava ga tumine Jehova va ka tare sirongo esi ga tumbwidilire Vaisraeli. Movagara 12 ava va tumine, ava 10 kwa tjilire unene Vakanani kupitakana Jehova. Awo kwa tanterere Vaisraeli vakwawo asi: “ Ose kapi tatu vhuru kuza tu ka rwise vantu ava va kara mo, yeeyi awo nonkondo unene kutupitakana.” (Num. 13:27-31) Momutaro govantu,  yosili Vakanani kwa kere nononkondo unene kupitakana Vaisraeli. Nye Vaisraeli kapi va gazadarere ko Jehova asi kuvhura a va vatere yipo va funde po nonkore dawo. Vagara vena murongo kapi va demenene kweyi ga here kuvaruganena Jehova ntani awo kapi va tedere ko kweyi ga va ruganene Jehova. Ngano va yi rugene, ngano va yi dimbwilire asi Jehova nonkondo kupitakana Vakanani. Nye Josuwa naKarebu kwa tjilire unene Jehova. Yipo va tanterere Vaisraeli asi: “Nsene Jehova ana tu hafere, age nga tu twara mosirongo oso ntani nga si tu pa.”​—Num. 14:6-9.

7. Ngapi omu natu tjira unene Jehova? (Tara hena efano.)

⁷ Mokuninka asi tu tjire unene Jehova, twa hepa kukondja yipo tu mu hafese mwankenye matokoro aga atu tura po. (Epis. 16:8) Lipura mapuro aga nsene kuna kuresa yihorokwa yomoBibeli: ‘Ngano nyame ya horokerere, ngano yinke na tokwere kurugana?’ Pasihonena, gazara asi nove yipo wa kere apa vagara vena 10 va geve nombudi depuko. Ngano wa yi pulire ndi? Ndi ngano wa heme kwaJehova morwa wa mu hara unene? Sinzi soVaisraeli kapi va tambwire usili ou gava tanterere Josuwa naKarebu. Eyi yiyo Vaisraeli vena va fililire momburundu.​—Num. 14:10, 22, 23.

8. Yikara musinke twa hepa kukondjera po ntani morwasinke?

⁸ Elinunupiko. Jehova kuhorwera usili vantu wokulinunupika. (Mat. 11:25) Ose kwa tambwire usili morwa twa linunupika. (Yirug. 8:30, 31) Nye kapisi tu linenepeke. Nsene tu linenepeka, ayo ngayi tu ninkisa tu dire kutambura mavyukiso gomoBibeli nomapukururo gokutunda kombunga zaJehova.

9. Ngapi omu natu twikira kukara nelinunupiko?

⁹ Mokukara nelinunupiko, twa hepa kudiworoka asi Jehova ga tu pitakana. (Epis. 8:3, 4) Kuvhura hena tu kanderere kwaJehova yipo tu tunge po elinunupiko yipo tu kare vantu woureru kuronga. Jehova nga tu vatera tu tare magano gendi aga a gava kupitira moBibeli ntani kupitira mombunga zendi asi mulyo kupitakana getu. Mereso lyoge lyoBibeli, papara yitwa eyi ayi likida omu Jehova ga hara vantu wokulinunupika nokunyenga vantu ava ava linenepeke. Hetekera ko paapa wa hulira kulinunupika nsene o gwana situmbukira esi nasi ninkisa wopeke vakutare asi ove mulyo.

OMU NATU KWATERERA KOUSILI

10. Wolye ga horowora Jehova yipo va gave mavyukiso nomapukururo kovantu vendi?

¹⁰ Twikira kulimburukwa komavyukiso aga azi gava mbunga zaJehova. Mosiruwo soVaisraeli, Jehova kwa ruganesere Mosesa naJosuwa mokugava mavyukiso kovantu vendi. (Jos. 1:16, 17) Apa Vaisraeli va tere vagara ava ngovakareli po vaKarunga, age kwava tungikire. Konyima zonomvhura dononzi apa va totere po mbungakriste, vapositoli 12 yiwo va geve mavyukiso. (Yirug. 8:14, 15) Konyima, mokambunga oko kwa ya gwederere ko vakuronambunga womoJerusarema. Apa va kweme mavyukiso gokutunda kovagara wovalimburukwi, “nombungakriste kwa twikilire kupama mepuro ntani sivaro sado kwa ligwederere nkenye ezuva.” (Yirug. 16:4, 5) Momazuva getu, Jehova kututungika apa atu kwama mavyukiso gokutunda kombunga zendi. Nye ngapi na lizuvha Jehova nsene tu dira kupurakena ava ga horowora? Mokulimburura epuro eli, tatu ka konakona eyi ya horokerere Vaisraeli  ngomu va kere morugendo rokuza moSirongo sEtumbwidiro.

11. Yisinke ya horokerere Vaisraeli ava va rwanesere etokoro lyaKarunga lyokuhorowora Mosesa ava pitisire? (Tara hena efano.)

¹¹ Morugendo roVaisraeli rokuza moSirongo sEtumbwidiro, vagara ava va divikwire kwa rwanesere Mosesa nositumbukira esi ga mu pere Jehova. Awo kwa uyungire asi: “Vaisraeli navenye [kapisi Mosesa tupu] va pongoka ntani Jehova kwa kara mokatji kawo.” (Num. 16:1-3) Nampili ngomu “Vaisraeli navenye” va pongokere kosipara saKarunga, Jehova kwa horowere Mosesa a pitisire vantu vendi. (Num. 16:28) Awo kapi va rwanesere Mosesa, nye kwa rwanesere Jehova. Awo kapi va demenene kweyi ga here Jehova, nye awo kwa demenene pokukara nononkondo ntani nokudivikwa. Karunga kwa dipagere vapitisili vena wovarwanesi ntani nava va va kwatesere ko. (Num. 16:30-35, 41, 49) Neina ose twa yi diva asi Jehova kapi a hafere vantu ava ava dili kulimburukwa mavyukiso gokutundilira kombunga zendi.

12. Morwasinke natu twikilira kuhuguvara mombunga zaJehova?

¹² Kuvhura tu twikire kukara nehuguvaro mombunga zaJehova. Apa atu hepa kurundurura ekwatogano lyetu lyousili womoBibeli ndi monkedi omu atu karere Jehova, ava ava pitisire kapi ava likata-kata kutura po malitjindjo. (Yis. 4:18) Awo kuyirugana oyo morwa vana hara kuhafesa Jehova. Awo kurugana paapa va hulira yipo va ture po matokoro kuliza noNonkango daKarunga, aso kuna kara sihonena esi va hepa kukwama vantu navenye vaJehova.

13. Yisinke “sihonena sononkango donongwa” ntani yisinke twa hepa kurugana ko?

¹³ “Kwaterera kosihonena sononkango donongwa.” (2 Tim. 1:13) “Sihonena sononkango donongwa” kwa tamba komarongo goVakriste  aga ga kara moBibeli. (Joh. 17:17) Marongo ogo kuna kara etateko lyankenye eyi twa pura. Mbunga zaJehova za tu ronga tu kwaterere kosihonena oso. Nsene tu yi rugana, Jehova nga tu tungika.

14. Ngapi omu Vakriste vamwe va hagekere kukwaterera “kosihonena sononkango donongwa”?

¹⁴ Yisinke nayi horoka nsene tu hageka kukwama“sihonena sononkango donongwa”? Tu tareni ko sihonena. Mouye wokuhova, Vakriste vamwe kwa hanesere yipempa asi ezuva lyaJehova lina siki. Nampo pwa kere mbilive ezi va gazarere vantu asi mupositoli Paurusa yige ga zi tjenge ezi za kwatesere ko egano olyo. Vakriste vamwe womoTesaronika kwa pulire yipempa eyi ntani noku yi hanesa morwa kapi va konakonene mausili. Ngano va diworokere yininke eyi ga va rongere Paurusa apa ga kere nawo, ngano kapi va vhulire kuvapukisa. (2 Tes. 2:1-5) Paurusa kwa pukwilire vapuli vakwawo asi kapisi va pure nkenye eyi nava zuvha. Paurusa kwa hulisire mombilive zendi zauvali koVatesaronika nonkango edi asi: “Makundo aga nyamwange Paurusa nina ga tjanga nokuwoko kwange. Monkedi ezi yimo ani tjanga nombilive dange nadinye.”​—2 Tes. 3:17.

15. Ngapi omu natu lipopera koyipempa eyi ayi moneka ngwendi usili? Gava sihonena. (Tara hena mafano.)

¹⁵ Yisinke natu lirongera ko kononkango edi Paurusa ga tjangerere Vatesaronika? Nsene tu zuvha yuma yongandi eyi ya dira kuliza neyi twa lironga moBibeli ndi nsene tu zuvha nombudi doyipempa, twa hepa kuruganesa nondunge. Moyirongo eyi ngali pangere epangero lyaRusia, varwanesi usili kwa geve mbilive ezi za monekere ngwendi kwa tundire komberewa zonene zoNombangi daJehova. Mbilive ozo kwa korangedere vanavazinyetu vamwe va tulise po mbunga zavene zokulikarera. Mbilive ozo kwa monekere ngwendi zousili. Nye vanavazinyetu wovalimburukwi kapi va pulisilire mbilive ozo zi va pukise. Awo va ya dimbwilire asi mbudi ezi za kere mombilive kapi za lizire neyi va va ronga. Neina varwanesi  usili poyiruwo yimwe kuvhura va ruganese yikwakonentu yipo va tu piyaganeke noku tu gaununa. ‘Mevango lyokupiyagana,’ ose kuvhura tu lipopere nyamwetu pokukonakona nsene eyi atu zuvhu ndi atu resa kuna kuliza nomausili aga twa lironga.​—2 Tes. 2:2; 1 Joh. 4:1.

16. Kuliza noVaroma 16:17, 18, yisinke natu rugana nsene vamwe va uyunga nombudi edi da dira kuliza nousili?

¹⁶ Twikira kukara mouumwe novantu ava ava limburukwa Jehova. Karunga kuna hara tu mu karere mouumwe kumwe novanavazinyetu. Ose ngatu twikira kukara mouumwe nsene tupu tu kwaterera kousili. Nkenye ogu a hanesa nombudi edi da dira kuliza nousili, age kuretesa po eligaunuko mombungakriste, yipo nye, Karunga kuturondora asi: “Li kareni ure nawo.” Nsene tu dira kuyirugana, ose kuvhura ngatu hageke kukara mousili.​—Resa Varoma 16:17, 18.

17. Mauwa musinke atu gwanene mo apa atu dimburura usili noku u kwaterera?

¹⁷ Apa atu dimburura noku kwaterera kousili, ose ngatu kara pepi naJehova noku kara nepuro lyokupama. (Efe. 4:15, 16) Marongo gaSatana nonombudi doyipempa kapi ngayi tu pukisa ntani ngatu twikira kukara megameno lyaJehova poudigu wounene. Twikireni kukwaterera kweyi yousili “makura Karunga gombili nga kara none.”​—Fil. 4:8, 9.