Nicolas naCéline kwa ligwanekerere noudigu wapeke. Beteli zaFrance kwa va tumine mombungakriste zapeke. Awo kwa uyunga asi: “Pomuhowo ose kwa hefe, ano konyima twa tamekere kurongora vakaume vetu. Ose kapi twa divire nawa vanavazinyetu womombungakriste ezi twa dirukilire.” a Ngapi omu na yi kutompoka kudirukira kombungakriste zompe nampili yi ku karere udigu? Ngapi omu wopeke nava kuvatera? Mauwa musinke nomu gwanena mo nsene mu likorangeda-korangeda nava womombungakriste zeni?

YININKE YINE EYI NAYI KUVATERA YIPO O YIKE MBUNGAKRISTE EZI WA DIRUKIRA

1. Huguvara mwaJehova. (Epis. 37:5) Kazumi gomoJapan kwa dirukire mo mombungakriste zawo ezi ga kere nomvhura 20 apa mugara gwendi va mu tumine aka ruganene kevango lyapeke. Ngapi ‘ga ligeve mwene kwaJehova’? Age kwa tanta asi: “Ame ngani tantere nkenye apa Jehova kuhamena yinka eyi na kere nayo. Nkenye apa ngani kanderere, Jehova nga pe nge nonkondo edi na hepere.”

Yisinke no rugana yipo o huguvare unene mwaJehova? Ngwendi moomu sitji sa hepa mema noyininke yimwe yemevhu yipo si kure, epuro lyetu nalyo lya hepa yuma yipo li pame. Nicolas ogu tuna tumbura kwa tedere ko kosihonena saAbirahamu naJesus ntani Paurusa ava va tulire po malizambero yipo va rugane mpango zaKarunga, ano eyi kwa mu vaterere a kare nehuguvaro asi Jehova nga mu vatera. Nsene o lironga Bibeli nkenye apa, ngayi kuvatera o lididimikire maudigu meparu ntani ngo diva yininke eyi ngo vhura kutantera womombungakriste zeni zompe.

 2. Nyokera po kuhetakanesa mbungakriste zeni zompe nezi zanare. (Muud. 7:10) Jules ga hepere kuyika mbungakriste zawo zompe apa ga tundire moBenin a ze koAmerika. Age kwa uyunga asi: “Ame kwa lizuvhire asi na hepere kutantera nkenye gumwe kuhamena eparu lyange.” Age kwa ligusire ko mwene kombungakriste zawo zompe morwa eyi ngava rugana ya lisigire neyi ga yika. Konyima zapa ga liyikire novanavazinyetu, age kwa tjindjire monkedi omu nga tara yininke. Age kwa tanta asi: “Ame ngesi nayi dimburura asi nkenye oku ono kara mouzuni, vantu kapi va lisiga nye awo kuuyunga nokurugana yininke monkedi zokulisiga. Ayo mulyo kutambura vantu monkedi omu va kara.” Yipo nye, nyokera po kuhetakanesa mbungakriste zeni zompe nezi zanare. Muzuvhisi gokukarerera Anne-Lise kwa uyunga asi: “Ame kapi na dirukire yipo ni ka gwane yininke yokulifana ngwendi yeeyi na sigire. Ame kwa dirukire ni ka lironge yininke yoyipe.”

Vakuronambunga nawo kapisi va hetakanese mbungakriste ezi vana kara ngesi nezi zanare. Nsene mbungakriste kurugana yininke monkedi zapeke, ayo kapi yina kutanta asi awo kurugana yininke monkedi zepuko. Ayo ya wapa kudiva momunene maukaro gomombungakriste zompe, komeho o gave magano. (Muud. 3:1, 7b) Ayo ya kara nomulyo kutulira po vanavazinyetu sihonena sosiwa mevango lyokuvasininika va kwame magano goge.​—2 Kol. 1:24.

3. Litura mo mombungakriste. (Fil. 1:27) Apo kuhepa siruwo ntani yirugana yoyinzi yipo o dirukire kombungakriste zompe ntani ayo ya kara nomulyo o tameke kuza kepongo konyima tupu zokudiruka. Nsene womombungakriste zeni zompe kapi ava ku mono nkenye apa, ayo ngayi va digopera kukuvatera. Lucinda ogu ga dirukilire novana vendi vavali wovakadona mositata sosinene somoSouth Africa kwa uyunga asi: “Vakaume vange kwa korangedere nge ni tulise po ukaume nava womombungakriste nokuza nawo mokuzuvhisa ntani ni gave malimbururo komapongo. Ose hena kwa pulisilire vanavazinyetu va ruganese embo lyetu yipo va pongere mo mapongo gomokuzuvhisa.”

Kulihameka moyirugana yomombungakriste kumwe novanavazinyetu, ngayi kuvatera o nkondopeke epuro lyoge neli lyovanavazinyetu. Anne-Lise ogu tuna tumbura kwa gwene ekorangedo kovakuronambunga yipo a zuvhisire nkenye gumwe. Yitundwamo musinke ya kere? Age kwa tanta asi: “Ezi kuna kara nkedi zongwa po omu no lizuvha asi wa hamena kombungakriste.” Ntani nsene o lizambera kurugana yininke ngwendi kuzeresa moSinyanga noku sipakera mbili, ove ngo yi likida asi ono hafere kukara mombungakriste zeni zompe. Nsene o lihameka mo unene, ngayi kurerupira kuyika vanavazinyetu.

4. Tulisa po vakaume. (2 Kol. 6:11-13) Kulikida elituromo mwava wopeke kuna kara nkedi zimwe omu no vhura kulikida eharo, yipo nye kuvhura o lidive nava wopeke komeho ndi konyima  zepongo. Hetekera ko kudiva madina gawo. Nsene o diworoka madina govantu ntani o kare goureru kuhedera, awo ngava hara kutulisa po ukaume nove.

Mevango lyokukara nosinka asi va ku tambure, pulisira vanavazinyetu va ku dive asi ove muntu musinke. Lirongera ko kwaLucida ogu ga uyunga asi: “Ame ngesi na kara novakaume wovanene morwa ngani va zigida va wize pembo lyetu.”

“LITAMBURA-TAMBURENI”

Vantu vamwe kuvatjilisa apa ava zi moSinyanga omu mwa kara vantu ava va dira kudiva. Yisinke no rugana yipo o va vatere yi va karere ureru? Paurusa kwa uyungire asi: “Litambura-tambureni moomu ga mu tambura Kristusa.” (Rom. 15:7) Nsene vakuronambunga va honena Kristusa yipo va vatere wovape, awo ngava lizuvha asi vana va tambura. (Tara kakende “ Yisinke nayi kuvatera yipo yi ku tompoke kudirukira kombungakriste zapeke?”) Navenye womombungakriste kukwatera mo vanona kuvhura va vatere wovape va lizuvhe asi vana va tambura.

Kutambura wopeke kwa kwatera mo kuvazigida komambo getu ntani kuvavatera. Pasihonena, munazinyetu gomukadi kwa vaterere munazinyetu gomukadi ogu ga dirukilire momukunda gwawo pokumulikida sitata nomu ava ruganesa maugendero ngwendi nombesa nomahina gorutenda. Nkareso zamunazinyetu gomukadi ogo kwa gumine komutjima munazinyetu ogo gomupe nokumuvatera a yike.

KUDIRUKA KUNA KARA NKEDI ZONGWA ZOKUTUNGA PO YIKARA YOYIWA

Apa Simbonde a kuru, age kulizuhununa sipapa sendi yikando yoyinzi komeho a tuke. Mokulifana, nsene kuna kudirukira kombungakriste zompe, wa hepa kunyokera po nkenye eyi nayi kuninkisa o dire kulihameka mo unene mosirugana saJehova. Nicolas naCéline kwa uyunga asi: “Kudiruka kuna kara nkedi zokugwana edeuro. Mokuninka asi tu liyike novantu wovape ntani nomavango  gomape, twa hepa kutunga po yikara yoyipe.” Jean-Charles ogu ka tu tumbura ketameko, kwa uyunga kuhamena mauwa aga lya gwanena mo epata lyendi. Age kwa tanta asi: “Mombungakriste zetu zompe vana vetu kuna kuhedera unene Jehova pepi. Konyima tupu zomakwedi, munetu gomukadona kwa tamekere kugwana maruha mepongo lyomosivike, ano gomumati kwa kere muzuvhisi gokudira kugwana ekuho.”

Yisinke no rugana nsene ukaro woge kapi una kukupulisira o ze oku vana hepa vazuvhisi? Kuvhura o ture pasirugana magano gomosirongwa esi yipo o lizuvhe ngwendi mombungakriste zompe ono kara. Ngomu ono kuhuguvara mwaJehova, litura mo unene moyirugana yomombungakriste pokuzuvhisa novakweni ntani pokutulisa po vakaume wovape ndi kunkondopeka ukaume novakaume woge. Kuvhura o vatere ava vana hepa ekwafo. Mokumona asi eharo kudimbwilisa Vakriste wousili, pokuyirugana ngoso ove ngo hedera unene Jehova pepi. (Joh. 13:35) Ove kuvhura o kare nehuguvaro asi: “Karunga kumuhafesa unene nonzambo dangoso.”​—Heb. 13:16.

Nampili ngomu pwa kara maudigu, sinzi soVakriste ya va tompoka kudirukira kombungakriste zompe, yipo nye nove kuvhura yi ku tompoke. Anne-Lise kwa uyunga asi: “Kudirukira kombungakriste zompe kwa vatera nge ni lidive novanavazinyetu wovanzi.” Kazumi ngesi ga yi pura nawa-nawa asi: “Nsene o diruka, Jehova nga ku vatera mononkedi edi wa dira kulimonena rumwe.” Ngapi kuhamena Jules? Age kwa tanta asi: “Vakaume ava na tulisa po kwa vatera nge ni lizuvhe asi vana tambura nge. Ame ngesi kulizuvha asi na hamena kombungakriste zetu zompe ntani kapi ani lizuvhu ngwendi asi ni tengure.”