1-2. Yisinke azi tu tantere Bibeli kuhamena vahompa vamwe woVaisraeli?

 MOBIBELI kwa tumbura mo vagara wokupitakana po-40, ava va pangerere moIsraeli. a Ntani azo kututantera usili kuhamena yininke yimwe eyi va rugene vamwe. Pasihonena, vahompa vamwe wovawa kwa ya rugene yininke yoyidona konyima. Tu tareni sihonena sahompa Ndafita. Jehova kwa uyungire asi: “Mukareli gwange Ndafita ogu ga ligeve kwange nokulimburukwa koyipango yange. Age nga rugana yeeyi na panda yelike.” (1 Vah. 14:8) Nye nampili ngoso, Ndafita kwa honderere nomukadi govantu ntani age kwa tulisire po mawapaiko yipo va dipage mugara gwendi moyita.​—2 Sam. 11:4, 14, 15.

² Bibeli kututantera hena asi vahompa vamwe wokudira kulimburukwa kwa rugene yininke yimwe yoyiwa. Tu tareni ko sihonena saRehabiyamu. Age “nga rugana yoyidona.” (2 Hist. 12:14) Nye nampili ngoso, Rehabiyamu kwa rugene yininke yimwe yoyiwa, pasihonena apa Jehova ga mu tanterere a ka rwanese mazimo murongo gaIsraeli, age ga yi rugene. Ntani hena vantu kwa gwanene mo mauwa apa ga nkondopekere makuma goyitata.​—1 Vah. 12:21-24; 2 Hist. 11:5-12.

3. Epuro musinke natu vhura kulipura ntani yisinke natu ka zogera mosirongwa esi?

³ Pwa kara epuro lyomulyo eli natu vhura kulipura. Nsene  asi vahompa woVaisraeli ngava rugana yoyiwa ntani yoyidona, ngapi omu Jehova ga yi divire nsene asi hompa mulimburukwi ndi hawe? Elimbururo kepuro olyo tali ka tu vatera tu dive eyi Jehova ana tu harere tu rugane. Tatu ka zogera yininke yitatu eyi Jehova ga tere yipo a dive nsene asi hompa mulimburukwi ndi hawe. Sokuhova, nsene asi hompa ogo ga here Jehova kutundilira komutjima. Sauvali, nsene asi hompa ogo ga litezwilire sili. Ntani sautatu nsene asi hompa ogo ga twikilire kukarera Jehova monkedi zouhunga.

AWO KWA HERE UNENE JEHOVA

4. Elisigo musinke lya kere po pokatji kovahompa wovawa ntani novahompa wovadona?

⁴ Vahompa ava va hafesere Jehova ngava mu karere nomutjima nagunye. b Hompa Jehosafata ‘nga ruganene Jehova paapa ga hulira.’ (2 Hist. 22:9) Bibeli kwa uyunga kuhamena Josiya asi: “Ohompa ava va hovere nava va hulililire kwendi, nagumwe si ga litezwilire ngwendi yige a tengure kwaHOMPA nomutjima nagunye.” (2 Vah. 23:25) Ngapi kuhamena Saromo ogu ga ya rugene yininke yoyidona konyima? Bibeli kuuyunga asi: “Mutjima gwendi kapi gwa hamene nawa-nawa kwaHOMPA Karunga gwendi.” (1 Vah. 11:4) Bibeli kwa uyunga hena kuhamena hompa gumwe gomudona Abiya asi: “Kapi nga limburukwa nawa-nawa kwaHOMPA Karunga gwendi.”​—1 Vah. 15:3.

5. Ngapi natu karera Jehova nomutjima nagunye?

⁵ Ngapi natu karera Jehova nomutjima nagunye? Kukarera Jehova kapi ayi tanta tupu asi kulizuvha tupu asi na hepa kukarera Jehova, nye kumuhara nokumulimburukwa meparu lyoge nalinye.

6. Ngapi omu natu twikira kukarera Jehova nomutjima nagunye? (Yisewe 4:23; Mateusa 5:29, 30)

⁶ Ngapi natu twikira kukarera Jehova nomutjima nagunye ntani nokuhonena vahompa wovawa? Twa hepa kunyokera po yilihafeso yoyidona novakaume wovadona ntani kudowokera emona. Twa hepa kunyokera po yininke eyi usimbu-simbu morwa ayo kutuninkisa tu dire kukarera Jehova nomutjima nagunye. Nsene tuna dimburura asi koyili yininke yimwe eyi yina kutuninkisa tu dire kuhara Jehova unene, twa hepa kuyinyokera po usimbu-simbu.​—Resa Yisewe 4:23; Mateusa 5:29, 30.

7. Morwasinke ya karera nomulyo tu nyokere po yininke eyi nayi tu ninkisa tu dire kuhara unene Jehova?

⁷ Kapisi tu pulisire yininke yi tu ninkise tu dire kuhara Jehova nomutjima nagunye. Nsene kapi tuna kutakamesa, kuvhura tu gazare asi yininke yoyidona kapi ta yi tu kundama morwa yeeyi tuna kulitura mo mokukarera Jehova. Mokuyifanekesa, gazara asi ove kuna kuzuvha upyu unene, mokuninka asi o kare ono tenderere wa hepa kunwa mema gomanzi. Yisinke nayi horoka nsene o kara ezuva nalinye momutenya? Ove kuvhura o zuvhe hena enota. Yisinke natu lirongera ko? Kapi ya gwanena po tupu kurugana yininke eyi nayi tu hedesera pepi naJehova. Ngwendi moomu tupu natu dira kukara siruwo sosire momutenya, mokulifana twa hepa kulikunga nyamwetu koyininke eyi nayi tu ninkisa tu dire kuhara unene Jehova.​—Efe. 2:2.

AWO KWA LITEZWILIRE

8-9. Yisinke ga rugene hompa Ndafita naHisikiya apa va va tanterere omu Jehova ga lizuvhire kuhamena nonzo dawo? (Tara efano .)

⁸ Ngomu tuna yi tumbura ketameko, hompa  Ndafita kwa tulire nzo zonene. Nye apa muporofete Natana ga mu zililire nokumutantera nonzo dendi, Ndafita kwa litezwilire. (2 Sam. 12:13) Nonkango edi ga tjenge Ndafita megaununo 51 kulikida asi age ga litezwilire sili. Ndafita kapi ga lininkisire kwaNatana asi ana litezurura ndi a nyokere po kumutengeka.​—Epis. 51:3, 4, 17.

⁹ Hompa Hisikiya nage kwa zonene kwaJehova. Bibeli kuuyunga asi: “Hisikiya kwa linenepekere unene pokulikida ehafo lyendi morwa eyi ga mu ruganenene Hompa. Ano Juda naJerusarema, yiwo va yi heperere.” (2 Hist. 32:25) Morwasinke Hisikiya ga linenepekerere? Morwa nampo yeyi ga mu vaterere Jehova a kare ngawo ndi nampo yeyi ga fundire nonkore dendi Vaasiliya ndi morwa nampo yeyi ga verukire kouvera wounene. Nampo elinenepeko yilyo lya mu ninkisire a likide ungawo wendi koVababironi, ano muporofete Jesaya kwa mu tanterere asi eyi ga rugene kapi ya hafesere Jehova. (2 Vah. 20:12-18) Nye Hisikiya kwa litezwilire nage ngwendi Ndafita. (2 Hist. 32:26) Ano konyima, Jehova kwa mu tere asi hompa gomuwa ogu nga kwama “sihonena sozinakuru Ndafita.”​—2 Vah. 18:3.

10. Yisinke ga rugene hompa Amasiya apa va mu pere epukururo?

¹⁰ Mokulisiga naNdafita naHisikiya, hompa Amasiya gwaJuda nga rugana yoyiwa “nampili ngomu nga dili kuyisikisa mo nawa-nawa.” (2 Hist. 25:2) Yininke musinke yepuko ga rugene? Konyima zapa Jehova ga mu vaterere a funde po Vaedomu, Amasiya kwa tamekere kukarera yikarunga yawo. c Apa muporofete gwaJehova ga mu pukwilire, hompa ogo kapi ga here kupurakena.​—2 Hist. 25:14-16.

11. Kuliza no-2 Vakolinte 7:9, 11, yisinke twa hepa kurugana yipo Jehova a tu gusire po? (Tara hena mafano.)

¹¹ Yisinke tuna kulirongera ko koyihonena eyi tuna zogere? Twa hepa kulitezurura kononzo detu ntani nokurugana paapa twa hulira yipo tu nyokere po kurugana nonzo edi twa tulire nare. Nsene tuna gwana mapukururo kovakuronambunga nampili moyininke yoyinunu, kapisi tu lizuvhe asi Jehova novakuronambunga kapi va tu hara. Nampili vahompa woVaisraeli wovawa nawo ngava va pukurura. (Heb. 12:6) Nsene kuna kutupukurura, (1) twa hepa kulinunupika, (2) twa hepa kutura po malitjindjo ntani (3) twa hepa kutwikira kukarera Jehova kutundilira komutjima. Nsene tu li tezurura, Jehova nga tu gusira po.​—Resa 2 Vakolinte 7:9, 11.

AWO KWA KARERERE JEHOVA MONKENDI ZOUHUNGA

12. Yisinke ya ninkisire vahompa wovawa va lisige novahompa wovadona?

¹² Vahompa ava Jehova ga tere asi vawa, kwa mu karerere monkedi zouhunga. Nampili ngoso, nawo ngava tura mapuko ngwendi moomu tupu tuna yi lirongo. Nye awo ngava karere Jehova gelike ntani nokuzonagura po yikarunga eyi ya kere mosirongo. d

13. Morwasinke Jehova ga tarerere hompa Ahaba asi kapisi mulimburukwi?

¹³ Morwasinke Jehova ga tarerere vahompa vamwe asi kapisi valimburukwi? Awo kapi ngava rugana nkenye apa mapuko. Nampili hompa gomudona Ahaba kwa linunupikire ntani kwa liverere apa ga zuvhire asi Nabota  ana fu. (1 Vah. 21:27-29) Age hena kwa tungire yitata nokufunda yita yoVaisraeli. (1 Vah. 20:21, 29; 22:39) Nye koyili hena yimwe yoyidona unene eyi ga rugene hompa Ahaba. Mukadendi kwa mu ninkisire a kwatese ko ukarelikarunga woyipempa. Apa ga yi rugene, age kapi ga litezwilire.​—1 Vah. 21:25, 26.

14. (a) Morwasinke Jehova ga tarerere hompa Rehabiyamu asi hompa gomudona? (b) Yisinke va rugene sinzi sovahompa wovadona?

¹⁴ Tu tareni ko hena hompa gumwe gomudona gedina Rehabiyamu. Ngomu tuna yi tumbura moparagarafu 2, age kwa rugene yininke yoyiwa apa nga pangere. Nye apa upangeli wendi wa nkondoparere, age kwa hagekere kukarera Jehova nokutameka kukarera yikarunga yoyipempa. (2 Hist. 12:1) Kutunda nye opo, poyiruwo yimwe nga karere Jehova ano poyiruwo yimwe yikarunga yoyipempa. (1 Vah. 14:21-24) Rehabiyamu naAhaba kapisi yiwo velike ngava dili kukarera Jehova monkedi zouhunga. Sinzi sovahompa wovadona ngava karere yikarunga yoyipempa ntani ngava korangeda wopeke yipo nawo va rugane yokulifana. Kukarera Jehova monkedi zouhunga yiso sininke sa ninkisire Jehova a dimburure nsene asi hompa muwa ndi mudona.

15. Morwasinke ya karere nomulyo kukarera Jehova?

¹⁵ Morwasinke ya karerere nomulyo kukarera Jehova? Morwa vahompa kwa kere nositumbukira sokuvatera vantu vaKarunga yipo va mu karere monkedi zongwa. Ntani hena apa vantu ngava karere yikarunga yoyipempa, ayo kwa va ninkisire va ture nonzo dimwe dononene ntani nokutekura wopeke momudona. (Hos. 4:1, 2) Ntani vahompa woVaisraeli nava woVaisraeli, kwa ligeve kwaJehova.  Eyi yiyo Bibeli azi hetakanesere vantu ava ava karere yikarunga yoyipempa asi kuna kuhondera. (Jer. 3:8, 9) Muntu ogu a hondere kuguvisa unene mulikwali gwendi. Mokulifana, mukareli gwaJehova ogu a lihameke moukarelikarunga woyipempa kuguvisa unene Jehova. e​—Deut. 4:23, 24.

16. Yisinke ayi ninkisa Jehova a tare elisigo eli lya kara pokatji komuntu gomuwa nogu gomudona?

¹⁶ Yisinke natu lirongera ko? Twa hepa kunyokera po nkenye eyi ya likwatakana nokukarelikarunga woyipempa. Nye twa hepa hena kukarera Jehova monkedi omu ga yi harera ntani nokulitura mo mosirugana sendi. Muporofete Marakiya kwa fatwilire elisigo eli lyakara pokatji komuntu gomuwa nogu gomudona. Age kwa tjenge asi: “Vantu vange ngava mona hena malisigo pokatji keyi ngayi horokera vahungami novadinikarunga, pokatji kogu a kerere nge nogu a dili kukerera nge.” (Mara. 3:18) Yipo nye, kapisi tu pulisire nkenye eyi yikare asi ediro kusikilira mo lyetu ndi mapuko getu yi tu ninkise tu hageke kukarera Jehova. Kuhageka kukarera Jehova kuna kara nzo zonene.

17. Morwasinke ya karera nomulyo tu horowore nawa muntu ogu ngatu kwara?

¹⁷ Nsene asi ove mudike ntani ono hara kukwara, ngapi omu nonkango daMarakiya nadi kuvatera o horowore mulikwali gokuwapera? Muntu kuvhura a kare noyikara yoyiwa, nye nsene asi kapi a karere Jehova, ngoso Jehova kumutara asi age muntu gomuhungami ndi? (2 Kol. 6:14) Nsene ngo kwara muntu ogo, age nga ku vatera o hare unene Jehova ndi? Gazadara ko kositwa esi: Vakadi wovapagani vahompa Saromo, nampo va kere noyikara  yoyiwa. Nye kapi ngava karere Jehova ntani awo kwa ninkisire Saromo kanunu-kanunu a tameke kukarera yikarunga yoyipempa.​—1 Vah. 11:1, 4.

18. Morwasinke vakurona nava rongera vana vawo?

¹⁸ Vakurona, kuvhura mu ruganese yihonena yovahompa eyi va tumbura moBibeli yipo muvatere vana veni va kare neharo lyokukarera Jehova. Va vatereni va yi kwate egano asi vahompa ava ga tambwire Jehova kwa kere ava ngava mu karere ntani ava va korangedere vantu yipo va karere Jehova. Rongeni vana veni kupitira mweyi omu rugana neyi omu uyunga yipo va dimburure asi yininke yomulyo po unene meparu kuna kara kulironga Bibeli nokuza komapongo ntani kulihameka mokuzuvhisa. (Mat. 6:33) Nsene kapi muna kuyirugana, vana veni kuvhura ngava karere Jehova morwa vakondi vawo, nye kapisi morwa va hara Jehova. Ngoyitundwamo, kuvhura ngava lizuvhe asi kukarera Jehova kapisi sininke somulyo ndi kuvhura ngava hageke kukarera Jehova.

19. Ehuguvaro musinke va kara nalyo ava va hageka kukarera Jehova? (Tara hena kakende “ Kuvhura o tengure kwaJehova”)

¹⁹ Nsene muntu ana hageke kukarera Jehova, ngoso ayo kutanta asi kapi nga kara hena kaume kaJehova ndi? Hawe, morwa kuvhura a li tezurure ntani nokutameka hena kukarera Jehova. Mokuyirugana oyo, ga hepa kulinunupika ntani nokutambura evatero kovakuronambunga. (Jak. 5:14) Nye mokuninka asi a kare kaume gwaJehova, ga hepa kurugana unene.

20. Ngapi omu Jehova natu tara nsene tu honena vahompa wovawa?

²⁰ Yisinke tuna lirongere ko kovahompa woVaisraeli? Kuvhura tu kare valimburukwi ngwendi vahompa nsene tu karera Jehova nomutjima nagunye. Tu lirongereni ko komapuko getu nokulitezurura ntani nokutura po malitjindjo. Ntani tu diworokeni mulyo gokukarera Jehova monkedi zouhunga ntani nokumukarera gelike. Nsene o limburukwa Jehova, age nga ku tara asi ove muntu gomuwa.