Mapuro gokutunda kovaresi
Ngapi omu Jerusarema ezi va tumbura mwaJesaya 60:1, za ‘katuka nokuminikira’?
Jesaya 60:1 kutanta asi: “Katuka, Jerusarema, minikira ngwendi ezuva; uyerere waHOMPA kuna kukuminikira!” Sitata saJerusarema kwa kere nkurusitata saJuda posiruwo sina, aso kwa fanekesere muhoko nagunye gwaIsraeli. (Jes. 60:14; 62:1, 2) Nonkango daJesaya kuretesa po mapuro gavali aga gana kukwama ko. Lyokuhova, siruwo musinke Jerusarema ntani monkedi musinke za ‘katukire’ ntani monkedi musinke za minikire pasifanekeso? Lyauvali, ngoso nonkango daJesaya kuna kusikilira mo momunene mosiruwo setu ndi?
Siruwo musinke Jerusarema ntani monkedi musinke za ‘katukire’ ntani monkedi musinke za minikire pasifanekeso? Jerusarema ntani ntembeli kwa kere erunda posiruwo esi Vajuda va ka kere mounkwate waBabironi nomvhura 70. Nye apa Vamede noVaperesiya va pangerere Babironi, Vaisraeli navenye ava va tungire moBabironi kwa mangurukire kutengura kosirongo sawo noku ka tameka ukareli wousili. (Esir. 1:1-4) Kutamekera momvhura 537 komeho Jesus a wize pevhu, Vajuda womomazimo nagenye 12 kwa yi rugene ngoso. (Jes. 60:4) Awo kwa tamekere kugava nonzambo kwaJehova nokudana yipito ntani nokutungurura ntembeli. (Esir. 3:1-4, 7-11; 6:16-22) Uyerere waJehova kwa tamekere kutemena koJerusarema, kutanta asi kovantu vendi. Vantu vendi kwa kere uzera konomuhoko edi da dilire kudiva Jehova.
Nye nampili ngoso, uporofete waJesaya kapi wa sikilire mo nawa-nawa posiruwo sina. Sinzi soVaisraeli kapi va twikilire kulimburukwa Jehova. (Neh. 13:27; Mara. 1:6-8; 2:13, 14; Mat. 15:7-9) Konyima awo kwa ya nyokere Jesus Kristusa. (Mat. 27:1, 2) Momvhura 70, Jerusarema nontembeli kwa zi zonagwire po sikando sauvali.
Jehova kwa pumbire asi oyo yiyo ngayi horoka. (Ndan. 9:24-27) Ayo kumoneka nawa-nawa asi kapi sa kere sitambo sendi asi Jerusarema zi sikise mo mauporofete nagenye va tumbura mwaJesaya egaununo 60.
Ngoso nonkango daJesaya kuna kusikilira mo momunene mosiruwo setu ndi? Nhi, nye nonkango odo kwa tamba ‘koJerusarema zekeguru.’ Mupositoli Peturusa kwa tjenge asi: “Azo yizo zinyetu.” (Gar. 4:26) Jerusarema zemeguru kwa tamba kombunga zaJehova zemeguru omu mwa hamena yisitwa yopampepo. Vana wopasifanekeso wombunga zaJehova kwa hamena mo Jesus ntani Vakriste wovagwavekwa 144 000 ava va kara nehuguvaro lyemeguru ngwendi Paurusa. Vakriste wovagwavekwa kuna kara “muhoko gokupongoka” kutanta asi “Vaisraeli vaKarunga.”—1 Pet. 2:9; Gar. 6:16.
Ngapi omu Jerusarema zekeguru za ‘katuka nokuminikira’? Azo kwa yi rugana oyo kupitira movagwaveka vepevhu. Hetakanesa eyi ya va horokera kumwe neyi va pumbire mwaJesaya egaununo 60.
Vakriste wovagwavekwa va hepere ‘kukatuka’ morwa awo kwa kere momundema gopasifanekeso apa varwanesi usili va vhukire konyima zonomfa dovapositoli. (Mat. 13:37-43) Posiruwo sina, awo kwa kere mepangero lyoBabironi zonene ezi za fanekesa maukarelikarunga nagenye goyipempa. Vagwavekwa kwa twikilire kukara mepangero lyoBabironi zonene dogoro “uhura wouzuni,” siruwo esi sa tamekere mo-1914. (Mat. 13:39, 40) Konyima tupu zosiruwo, mo-1919, awo kwa mangurukire nokutameka kuminikira ramba zopasifanekeso pokuzuvhisa mbudi zongwa. a Ngomu da pitire po nomvhura, vantu wokonomuhoko nadinye kwa tamekere kukara mouzera owo kukwatera mo yihupwa yovagwavekwa ava va tumbura mwaJesaya 60:3 asi “ohompa.”—Ehor. 5:9, 10.
Komeho, vagwavekwa ngava ka minikira unene uzera wokutunda kwaJehova. Monkedi musinke? Apa ngava fa, awo ngava hamena ‘koJerusarema zompe,’ ndi vahompa novapristeli ava va hamena mosivaro 144 000.—Ehor. 14:1; 21:1, 2, 24; 22:3-5.
Jerusarema zompe nga zi ka sikisa mo uporofete ou wa kara mwaJesaya 60:1. (Hetakanesa Jesaya 60:1, 3, 5, 11, 19, 20 kumwe nEhororo 21:2, 9-11, 22-26.) Ngwendi moomu Jerusarema zanare nga zi pangere Israeli, mokulifana Jerusarema zompe ntani naKristusa, nga zi kara epangero lyomouzuni woupe. Ngapi omu Jerusarema zompe ‘azi wiza pevhu zi tunde kwaKarunga meguru’? Azo kuyirugana oyo pokurugana ko yuma eyi ayi kundama vantu vepevhu. Vantu wokonomuhoko nadinye ava ava limburukwa Karunga ngava ‘genda mouzera wazo.’ Awo ngava va mangurura mo mononzo nomonomfa. (Ehor. 21:3, 4, 24) Ngoyitundwamo, ‘yininke nayinye ngava yi wapukurura’ ngomu ga yi pumbire Jesaya ntani novaporofete wopeke. (Yirug. 3:21) Yininke oyo va wapukwilire kwa tamekere apa Kristusa ga kere Hompa ntani ngayi ka haga kehagero lyepangero lyendi lyonomvhura eyovi.
a Ukareli wousili ou va wapukwilire mo-1919, kwa u faturura hena mwaHesekiyeli 37:1-14 ntani mEhororo 11:7-12. Hesekiyeli kwa pumbire asi ukareli wousili wovagwavekwa navenye ngava u wapukurura konyima zapa ngava kara mepukiso lyomaukarelikarunga goyipempa. Uporofete wemEhororo kwa tumbura asi kambungagona kovagwavekwa ava ngava pitisire kwa ya ka hampurukilire konyima zosiruwo sosisupi esi va va tulire modorongo pwa hana konda zouhunga. Mo-1919, kwa va tulire va kare “mukareli gokulimburukwa gonondunge.”—Mat. 24:45; tara buke Pure Worship of Jehovah—Restored At Last!, epe. 118.
