Mvhura zokukwama ko, vanavazinyetu womoBeteli kwa geve madiviso asi koBeteli zaAfrika Mbindakano vana hepa ko valizambeli, morwa va gwene ehina lyepe lyokundurukisa. Name kwa geve edina lyange ntani ame kwa hefe apa va tambwire nge. Vanavazinyetu vatatu womoBeteli zaKanada nawo kwa va horowere. Awo kuna kara Dennis Leech naBill McLellan ntani naKen Nordin. Awo kwa tu tanterere asi ngatu ka kara moAfrika Mbindakano siruwo sosire!

Yipo na belele oyina nokuvatantera asi: “Yina, koyili eyi na hara kumutantera. Ame tanizi koAfrika Mbindakano!” Oyina kwa kere mukadi gokumwena nye va kere nepuro lyenene ntani nelikwatakano naJehova. Awo kapi va uyungire yoyinzi nye nayi divire asi vana kwatesa ko egano lyange. Nampili ngomu oyina notate va guvire kweyi na zire kosirongo sokoure, nye awo kapi va sivanene kuhamena etokoro eli na tulire po.

Moune wetu kwa tu dewire ure womakwedi gatatu moBeteli zaBrooklyn omu natu ruganesa ehina lyokundurukisa. Makura yipo twa zire nosikepa koAfrika Mbindakano mositata saCape Town. Ame opo ntani nina ku gwanesa nomvhura 20. Rugendo rwetu rokutunda koCape Town tuze koJohannesburg kwa tamekere ngurova nehina lyorutenda. Pomuhowo ose kwa sikamekere modoropa zonunu zaKaroo, evango eli lya kere ngwendi mburundu. Alyo kwa kere mbundu nomusi ntani upyu. Ose kwa tere pekende moune wetu nokulipura asi evango musinke eli lyokukara ngesi? Ose kwa kere nosinka kuhamena omu nga si kara sirugana setu sosipe. Ano konyima zonomvhura apa twa ya dingwire monodoropa odo, ose kwa ya dimbwilire asi vantu vamo vawa ntani awo kwa kara nombili.

Konyima zonomvhura dongandi, sirugana sange kwa kere sokurugana nomahina aga ngaga nduruka yifo yoRuhungu nonoAwake! Beteli ngazi nduruka yifo momaraka gomanzi gomoAfrika kukwatera mo gomoAfrika Mbindakano nye unene po yirongo yokomukuro gwaAfrika. Ose kwa hefe sili unene morwa ehina lyokundurukisa eli lya tu ninkisire tu wize koAfrika mbindakano, ngava liruganesa unene!

Konyima ame kwa rugene momberewa ezi ngazi pakere mbili yininke yokulisiga-siga ngwendi  kunduruka, kutuma yifo ntani noyirugana yetoroko. Eparu kwa gendere po nawa, ngani rugana unene ntani na kere nositambo.

Mo-1968 ame kwa kwere muzuvhisi gokukarerera Laura Bowen ogu ga tungire pepi noBeteli. Age nga rugana moDepartemende zetoroko, ano sirugana sendi kwa kere sokutopa-topa. Mazuva gena, valikwali wovape kapi va va pulisilire kukara moBeteli, makura Beteli yipo za tu tumine tu ka kare vazuvhisi wosiruwo nasinye. Ame kwa kere nosinka. Nomvhura murongo edi na keremoBeteli, ngatu gwana nondya ntani nomararo, makura yipo na lipulire asi ngapi ngayi tu tompoka kuparuka noyimaliwa yoyisesu eyi ava gwana vazuvhisi wosiruwo nasinye? Ose ngatu gwana noranda 25 nkenye kwedi nsene tupu tuna sikisa mo novili edi va hepere po nomatengwiro ko ntani noyimbapiratjangwa. Yimaliwa oyo ngatu yi ruganesa kougendero, konondya, kosipangero, mokufutira evango eli twa tungire ntani noyihepwa yimwe.

Ose kwa tu tumine tu ka zuvhisire mositata saDurban esi sa kara pepi nefuta lyaIndia. Vaindia vanzi va kere ko ano sinzi sawo kwa wizire va ya rugane mofabrika zosuka mo-1875. Ngesi awo kurugana yirugana yapeke ntani simpe kutwikira kukwama mpo zawo nokutereka nondya dawo doutovara dopampo. Ntani awo ngava uyunga Ruingilisa, ano eyi kwa tu rerupilire kuvazuvhisira.

Vazuvhisi wosiruwo nasinye va hepere kuzuvhisa novili 150 nkenye kwedi. Name naLaura kwa here kurugana novili ntazimwe ezuva lyetu lyokuhova. Nye ezuva olyo, kwa kere ko sili upyu wounene. Ose kapi twa kere nomatengwire ko ntani novarongwa woBibeli, twa hepere nye kurugana novili ntazimwe tunda embo zende embo. Konyima zokutameka tani tara kovili nokudimburura asi nominute 40 tupu tuna rugana. Yipo na li pulire asi ngapi omu ngatu sikisa mo sirugana esi?

Konyima ose kwa ya tulire po mawapaiko gomawa. Ose nkenye ezuva ngatu wapaike mboroto nosopa ndi kosiva, nokuyitura moyipako. Apa ngatu pwizumuka po, ose ngatu sikameke etuwa lyetu mositji, ano poyiruwo yimwe, vanona wo­Vaindia ngava sikama noku tutarurura. Konyima zomazuva gongandi, ose kwa ya dimbwilire asi apa ngatu kara mokuzuvhisa, siruwo ngasi genderere.

Ayo kwa tu hafesere sili pokuronga usili vantu wovawa womomukunda ogo. Vaindia kwa kere vantu wovawa vefumadeko ntani va here Karunga. Vahindu wovanzi kwa tambwire mbudi zetu. Awo kwa here kulironga kuhamena Jehova, Jesus, Bibeli, uzuni woupe wokomeho ntani ehuguvaro lyovafe. Konyima zomvhura zimwe, ose kwa kere novarongwa woBibeli 20. Ose ngatu hafere muzuhwa nepata limwe eli ngatu lirongo nalyo. Ose kwa hefe sili.

Ano konyima zosiruwo tatu gwana hena situmbukira sapeke sokudingura nombungakriste edi da kere pepi nefuta lyaIndia. Ose ngatu kara momambo govanavazinyetu nkenye sivike nokurugana kumwe novazuvhisi womombungakriste yipo tu va korangede. Awo kwa tu tekwire nawa ngwendi ekoro lyawo ntani ngatu danauka novana vawo. Konyima zonomvhura mbali, vanavazinyetu wokoBeteli yipo va tu belele nokututantera asi “tuna hara muwize koBeteli.” Ame kwa limbwilire asi “ose kuna kuhafera sirugana setu sokudingura oku tuna kara.” Nye ose kwa kere neharo lyokuturuganesa nkenye oku.

Sirugana sange kwa kere somoDepartemende zoyirugana yokuzuvhisa. Ame ngani rugana novanavazinyetu ava va kere noudivi. Siruwo sina, apa mutareli gonombunga nga dingura nombungakriste, age nga tjangere Beteli kuhamena ukaro womombungakriste ozo. Makura vanavazinyetu womoDepartemende zoyirugana yokuzuvhisa, ngava tumine mbungakriste mbilive zokuliza nomauzera aga ga geve mutareli gonombungakriste. Nombilive odo ngava di tumu nositambo sokukorangeda nokugava mapukururo aga ga kere hepero. Vahamutjanga ngava rugana unene yipo va toroke mbilive ezi nga tumu mutareli gonombunga. Mbilive ozo kwa kere moRuingilisa ano  ngava zi toroka meraka lyoRuxhosa noRuzulu ntani nomomaraka gamwe hena. Awo hena ngava toroka mbilive ozo momaraka gamwe gomoAfrika. Ame kwa pandwire sili unene vatoroki ava ngava rugana unene mokuvatera nge ni kwate egano maudigu aga ngava ligwanekere nago vanavazinyetu wovasovagani.

Posiruwo sina, moAfrika Mbindakano kwa kere mo elitondororo lyomarudi. Nkenye rudi kwa tungire komavango gawo, ano vantu womarudi gokulisiga-siga kapi ngava kara kumwe. Vanavazinyetu wovasovagani ngava uyunga maraka gavene nokuzuvhisa momaraka gavene ntani ngava pongere monombungakriste domaraka gawo.

Ame kapi na divire vanavazinyetu wovanzi wovasovagani morwa ame kwa kere mombungakriste zoRuingilisa. Nye konyima ame na ya gwene mpito zokulironga eraka lyovanavazinyetu nonompo dawo ntani nayimwe hena. Ame kwa lirongere maudigu aga ngava ligwanekere nago vanavazinyetu nonompo ntani nomapuliro gomaukarelikarunga. Vanavazinyetu kwa kere nouradi wokunyokera po nompo edi da dira kuliza nomatjangwa nampili ngomu ngava ligwanekere nomarwaneso gokutundilira kovanekoro ntani nava womomukunda. Vantu wokonomukunda kwa kere ruhepo sili. Sinzi sawo kapi va gwene erongo nawa-nawa ndi kapi ngava dimbi sure, nye awo kwa fumadekere Bibeli.

Ame ngani rugana hena moBeteli koruha rokukondjera umanguruki woukarelikarunga ntani nokudira kulihameka moyita. Ayo ngayi korangeda nge pokumona ulimburukwi nouradi wovanona woNombangi ava ngava tjida kosure morwa kudira kulihameka momakanderero gawo nononsumo domaukarelikarunga.

Vanavazinyetu kwa ligwanekerere hena noudigu umwe mosirongo somoAfrika esi ngava tumbura asi Swaziland nye ngesi kusitumbura asi Eswatini. Apa hompa Sobhuza gwauvali ga fire, vantu navenye womosirongo oso va hepere kukwama mpo ezi za kere po nsene hompa ana fu. Vagara ngava kurura nohuki dawo ano vakadi ngava tete nohuki dawo di kare dononsupi. Vanavazinyetu wovanzi kwa va hepekere morwa kwa nyokere kulihameka mompo ezi za likwatakanene novadimu. Ulimburukwi wawo kwa hafesere Jehova. Ose kwa lirongerere ko yoyinzi koulimburukwi  nelididimiko lyovanavazinyetu womoAfrika, ano eyi kwa nkondopekere epuro lyetu.

Mo-1981 ngani vatere momberewa zokunduruka pokuruganesa nokompiuta yipo tu nduruke. Ame kwa haferere sirugana oso. Nkedi zokunduruka kwa litjindjire unene. Munangesefa gumwe kwa geve ehina lyepe koBeteli mawoko-woko yipo tu li heteke. Makura yipo twa pinganesere po mahina ntane aga twa kere nago ntani nomahina gatano gomape. Ose kwa gwene hena ehina lyepe lyokundurukisa. Ose kwa ndurukire yimbapiratjangwa yoyinzi kupitakana pwanare.

Nokompiuter ngava di ruganesa hena mokuwapaika nondanda pokuruganesa elikwamo eli ngava tumbura asi MEPS. Yikwakonentu kwa ligwederere unene kutunda apa twa tundire koBeteli zaKanada tu wize koAfrika Mbindakano. (Jes. 60:17) Natuvenye moune wetu kwa kwere vazuvhisi wokukarerera ava va here unene Jehova. Name naBill ngatu rugana simpe koBeteli. Ken naDennis kwa tungire pepi noBeteli nokurera vana vawo.

MoBeteli kwa kere mo yirugana yoyinzi. Yimbapiratjangwa ngava yi toroka nokuyinduruka momaraka gomanzi ntani noku yituma konoBeteli dapeke. Pwa hepere nye etungo limwe lyoBeteli lyepe lyokuruganena. Vanavazinyetu kwa tungire etungo limwe pevango lyewa lyokoutokero waJohannesburg. Ntani kwa litungikire mo-1987. Ayo kwa hafesere nge sili mokukara po apa vatungire etungo olyo ntani nokukara gumwe gomoKomitiye zoBeteli zaAfrika Mbindakano nomvhura dononzi.

Ose kwa tu tetukisire sili mo-2001 apa va tu zigidire tu ka kare moBeteli zomoAmerika. Nampili ngomu twa guvire mokusiga sirugana setu novakaume moAfrika Mbindakano, ose kwa hefe mokuka tameka eparu lyepe moBeteli zaAmerika.

Nye ose kwa kere nosinka morwa twa likere ure nozina vaLaura ava va kurupire. Kapi twa vhulire kuvavatera mwa nayinye, nye vambya vaLaura wovakadi kwa va vaterere mwa nayinye. Awo kwa uyungire asi “ose kapi tatu vhuru kukara mosirugana sosiruwo nasinye, nye nsene tu pakera mbili oyina, ngayi mu vatera mutwikire nosirugana seni.” Ose kwa pandwire kweyi va rugene.

Ntani hena mukurwange namukadendi ava va tungire moToronto moKanada, kwa pakerere mbili oyina ava va fisire otate. Posiruwo oso, oyina kwa tungire namukurwange kumwe namukadendi nomvhura dokupitakana 20. Ose kwa kere norupandu kweyi va pakerere mbili oyina dogoro apa va dogorokere konyima tupu zapa twa ka sikire moAmerika. Ayo kuhafesa sili mokukara navamwe mekoro ava va kara neharo lyokupakera mbili vakondi nampili ngomu ayi dili kukara ureru.

Nomvhura dononzi, sirugana sange moBeteli zaAmerika kwa kere sokurugana koyimbapiratjangwa. Ano ngesi va tulisa po nonkedi doureru mokusikisa mo sirugana oso. Ano monomvhura edi da ntaantani, ame kurugana moDepartemende zokurandanga. Kulizuvha sili mfumwa kweyi na rugana moBeteli ezi nomvhura dokupitakana 20. Ano amo ngesi kuna kara mo vaBeteli wokusika ko-5 000 ntani novalizambeli wokusika po-2 000.

Nomvhura nomurongo ntazimwe dakapita, kapi na gazarere asi ngani rugana yirugana eyi. Laura kwa kwatesa nge ko nomvhura nadinye edi. Ame kwa hafera sili eparu lyange. Twa hafera yirugana yetu yokulisiga-siga ntani vantu wovawa ava twa rugene nawo, kukwatera mo nava wokonoBeteli dononzi edi twa dingura mosirugana setu. Nomvhura dange ngesi dina pitakana po-80 ntani ame ngesi kurugana yirugana yoyisesu morwa vanavanzinyetu wovadinkantu va va deura va sikise mo yirugana yokulisiga-siga.

Mutjangi gEpisarome kwa tjenge asi: “Za kara nerago mbunga ezi asi Karunga gwazo HOMPA.” (Epis. 33:12) Nonkango edi usili. Na hafa sili kweyi na karera Jehova novantu vendi woruhafo.