Jehova kuna hara ava va kwara va kare noruhafo nokuhafera nonkwara dawo siruwo sosire ntani nokutunga po elikwatakano lyenene. (Mat. 19:4-6) Ngapi omu no gwana mulikwali gomuwa nsene ono hara kukwara? Mokumona asi Jehova yige Musiti gwetu, age ga diva eyi natu rugana yipo tu kare nononkwara doruhafo. Yipo nye, nsene o tura pasirugana nompango dendi, ove ngo hafa. Tarurura nompango dimwe edi dina kukwama ko.

Zokuhova, twa hepa kukwata egano nonkango edi asi: “Yilye gokuvura kukwata egano mutjima gomuntu? Kutupu yapeke eyi ya pitakana po moyimpempa; gwa vera unene, kwa tjinda kuveruka.” (Jer. 17:9) Apa vantu vavali ava vana hara kulikwara ava tameke kulivandekera, awo kutunga po malizuvho gomanene. Ano apa ayi horoka oyo, ayo udigu kutura po matokoro gomawa. Apa vantu ava tokora kulikwara morwa malizuvho, konyima awo kuvhura ngava ka livere. (Yis. 28:26) Ayo yiyo ya karera nomulyo va dire kuhova kulitantera malizuvho gawo ndi va li tumbwidire awo va hana kulidiva nawa.

Yisewe 22:3 kutanta asi: “Vantu wonondunge kumona udigu tau wiza, makura tava u henduka, nye ava va hana kugazara kuvyukilira mo, makura konyima ntani vana kulivera.” Siponga musinke sa kara momalikwamo gokointaneta gokulivandekera? Vantu vamwe ava va tamekere kulivandekera kupitira kointaneta, konyima va ya dimbwilire asi muntu ogu ngava livandekere nendi kwa va kumbagerere. Ntani vantu vamwe woyipempa kwa kumbagera vantu wovawa noku va vaka yimaliwa yawo. Poyiruwo yimwe vantu owo woyipempa kulininkisa asi awo Nombangi daJehova.

Tu tareni ko hena siponga simwe. Malikwamo gamwe gokointaneta gokulivandekera kuruganesa malikwamo gonokompiuta yipo va likide asi muntu musinke na vhura kulivandekera nomuntu gongadi. Nye nampili ngoso, kwato umbangi au likida asi nonkedi odo kutompoka. Ayo kapi tayi wapa mokuhuguvara elikwamo lyomokompiuta li ku vatere o ture po etokoro lyomulyo mokugwana mulikwali. Malikwamo gokokompiuta nokuvhura si ku ga huguvara ngwendi moomu  twa huguvara nompango domoBibeli.—Yis. 1:7; 3:5-7.

Mpango za kara moYisewe 14:15 kutanta asi: “Mugova kupura nkenye eyi, nye vanandunge kutakamesa nontambo dawo.” Komeho o tokore kukwara muntu gongadi, wa hepa kumudiva nawa. Nye nsene o ruganesa malikwamo gokointaneta gokulivandekera nomuntu, kuvhura yi kare udigu kumudiva nawa. Nampili yi kare asi kuna kulitantera mauzera gamwe ntani nokuzogera kumwe siruwo sosinzi kointaneta, kuvhura simpe mu dire kulidiva nawa. Vamwe ava va gazarere pomuhowo asi vana gwana mulikwali gouhunga, konyima kwa ya va tetukisire apa va ya li gwene nogo muntu.

Mutjangi gEpisarome kwa tente asi: “Ame kapi ani kara kumwe nava woyimpempa; ndi asi ni lizuke mundiro novayilipaki.” (Epis. 26:4) Vantu vamwe kugazara asi kwato epuko kukumbagera kupitira kointaneta ntani nokulininkisa va moneke ngwendi vantu wovawa. Awo kuvhura va dire kulikida yikara yawo yoyidona kointaneta. Ayo mulyo tu dive malimbururo komapuro aga gana kukwama ko. Vamwe kuvhura va uyunge asi awo Nombangi, nye awo ngoso sili va gwana ekuho ndi? Va kara nelikwatakano lyewa naJehova ndi? Womombungakriste va va fumadeka ndi? Ndi awo nampo kapisi sihonena sosiwa? (1 Kol. 15:33; 2 Tim. 2:20, 21) Kuliza nonompango doBibeli, koyili eyi nayivalimbikisa yipo va kware ndi? Wa hepa kugwana malimbururo komapuro ogo, nye ayo kapisi ureru mokudiva malimbururo ove wa hana kupura ko Nombangi dimwe edi da diva nawa muntu ogo. (Yis. 15:22) Nye mukareli gwaJehova gomulimburukwi kapi nga vhura kugazadara kukwara ‘muhapuli.’—2 Kol. 6:14; 1 Kol. 7:39.

Mokumona asi pwa kara siponga momalikwamo gokulivandekera kupitira kointaneta, pwa kara nonkedi donongwa omu no gwana muntu ogu no kwara. Kupi no gwana muntu ogu no vhura kukwara? Apa ayi tu tompoka kukara kumwe novakwetu ose kulidiva unene nawo kupitira komapongo koyigongi nokomapongasano gamwe.

Ano ngesi morwa uvera woCorona, ose kuruganesa yikwakonentu tu ponge kumwe komapongo, ako kuvhura tu gwane ko mpito zokulidiva noNombangi edi da dira kukwara. Ove kuvhura o zuvhe omu vana kugava yiuyungwa ntani nomu vana kulimburura mepongo. (1 Tim. 6:11, 12) Kuvhura hena muzogere konyima zepongo motumbunga otu va tura po. Kupitira mononkedi edi ove ngo diva omu a tekura vakwawo, ano eyi ngayi kuvatera o dimburure asi age muntu musinke. (1 Pet. 3:4) Ano mwaza siruwo, ngomu ngomu ya li diva unene, ove ngo dimburura nsene asi mwa kara noyitambo yokulifana ntani nsene mouvali weni kuvhura ngomu kare valikwali wovawa.

Apa vadike ava ruganesa nompango domoBibeli yipo va gwane mulikwali, awo ngava li monena usili wononkango edi asi: “Nsene mukadi [ndi mugara] ono gwana, sininke sosiwa ono gwana; ayo sidiviso asi HOMPA kwa ku hafera.”—Yis. 18:22.