1. Yisinke ga ku ruganena Jehova?

NGAPI WA gendere o ya kare gumwe goNombangi daJehova? Pomuhowo, ove nampo kwa zuvhire “Mbudi zoNgwa” kovakondi woge ndi kogu o rugana nendi ndi komunasure mukweni ndi nampo Nombangi kwa ya zuvhisilire pembo lyeni. (Mar. 13:10) Ano konyima, gumwe kwa ruganesere siruwo sendi sosinzi nononkondo dendi, yipo a ku ronge Bibeli. Ngomu wa twikilire kulironga, ove kwa ya tamekere kuhara Jehova ntani wa ya lirongere asi age kwa ku hara. Jehova ga ku kokera kousili ntani mokumona asi ove ngesi murongwa gwaKristusa, wa kara nehuguvaro lyokukaparuka narunye. (Joh. 6:44) Tuna si huguvara asi wa kara norupandu kweyi Jehova ga ruganesa gumwe a ku ronge usili ntani kweyi ga ku tambura o kare mukareli gwendi.

2. Yisinke natu ka zogera mosirongwa esi?

² Mokumona asi twa diva usili, ose twa kara nositumbukira sokuvatera vantu yipo nawo ngava ka gwane mwenyo gwanarunye. Ayo kuvhura kuturerupira kuzuvhisa tunda embo zende embo, nye ayo kuvhura kutudigopera kutameka kulironga Bibeli nomuntu. Nove yimo o lizuvhu ngoso ndi? Nsene yimo o lizuvhu, magano gomosirongwa esi naga kuvatera. Natu ka zogera eyi a yi tu tumangeda yipo tu tulise po varongwa. Natu ka konakona hena omu natu funda po maudigu aga naga tu ninkisa tu dire kulironga Bibeli novantu. Pomuhowo, tuzogereni konda zeyi natu zuvhisira ntani nokuronga vantu mbudi zongwa.

3. Morwasinke atu zuvhisire?

³ Apa Jesus ga kere pevhu, age kwa pangerere vasikuli vendi yininke yivali. Sokuhova, age kwa va tanterere va zuvhise mbudi zongwa zoUhompa ntani ga va likidire omu nava zuvhisa. (Mat. 10:7; Ruk. 8:1) Pasihonena, Jesus kwa tanterere varongwa vendi eyi nava rugana nsene vantu kuna kupurakena kombudi zongwa ntani neyi nava rugana nsene kapi vana kupurakena. (Ruk. 9:2-5) Age hena kwa pumbire asi sirugana sokuzuvhisa ngasi li gwederera unene apa ga tanterere varongwa vendi asi ngava gava ‘umbangi konomuhoko nadinye.’ (Mat. 24:14; Yirug. 1:8) Yikare asi vantu va tambwire mbudi zongwa ndi hawe, varongwa va hepere kuzuvhisa kuhamena Uhompa waKarunga neyi ngau ka sikisa mo komeho.

4. Kuliza naMateusa 28:18-20, yisinke hena twa hepa kurugana kugusa ko kuzuvhisa?

⁴ Sininke musinke sauvali ga pangerere Jesus varongwa vendi va rugane? Age kwa va pangerere va ronge vantu yipo va limburukwe nayinye eyi ga rongere. Vantu vamwe kuuyunga asi mpangera ezi ga geve Jesus zokuzuvhisa nokutulisa po varongwa kwa tembe tupu koVakriste womosiruwo sanare. Nye ayo kapisi usili. Jesus mwene kwa uyungire asi sirugana esi nga si twikira nomomazuva getu “dogoro nokouhura wouzuni.” (Resa Mateusa 28:18-20.) Ayo kumoneka asi Jesus kwa geve mpangera ezi apa ga monekerere varongwa vendi wokupitakana po-500. (1 Kol. 15:6) Apa Jesus ga monekerere Johanesa, age kwa tente asi ana hara varongwa vendi navenye va vatere vantu va lironge kuhamena Jehova.—Ehor. 22:17.

5. Kuliza no-1 Vakolinte 3:6-9, sifanekeso musinke ga ruganesere Paurusa esi sa lifana nokuzuvhisa ntani nokuronga?

⁵ Mupositoli Paurusa kwa fanekesere sirugana sokuzuvhisa kokulima, eyi kutanta asi twa hepa kurugana yoyinzi kupitakana tupu kukuna mbuto. Age kwa diworokesere Vakolinte asi: ‘Ame nyame na tapeka, Aporo gokutekera . . . Ose varugani kumwe naKarunga, mepya lyendi.’(Resa 1 Vakolinte 3:6-9.) Ngovarugani naKarunga ‘mepya lyendi,’ ose kukuna mbuto noku zi tekera ntani noku zi tara omu zina ku kura. (Joh. 4:35) Nye twa yi diva asi Karunga yige a kulisa mbuto ozo.

6. Yisinke ya hamena mo mosirugana setu sokuronga?

⁶ Ose kuna kupapara vantu “ava gwa tumbukira mwenyo gwanarunye.” (Yirug. 13:48) Mokuninka asi vantu va kare varongwa, twa hepa ku va vatera (1) va kwate egano eyi vana kulironga, (2) va yi pure ntani (3) va ture pasirugana eyi vana kulironga moBibeli. (Joh. 17:3; Koros. 2:6, 7; 1 Tes. 2:13) Navenye womombungakriste kuvhura kuvatera varongwa woBibeli pokuvalikida eharo noku vatambura nsene vana wiza kepongo. (Joh. 13:35) Munazinyetu ogu a lirongo nomurongwa gwendi, ga hepa kulitulira po siruwo sokukara kumwe nendi noku mu vatera a nyokere po yininke yoyidona nomapuliro goyipempa. (2 Kol. 10:4, 5) Ayo kuvhura yi guse makwedi mokuvatera murongwa a ture po malitjindjo meparu lyendi yipo a wapere kugwana ekuho. Nye age nga gwanena mo uwa.

7. Yisinke a yi tu tumangeda tu lihameke mosirugana sokuzuvhisa nokutulisa po varongwa?

⁷ Yisinke ayi tu tumangeda tu zuvhise nokutulisa po varongwa? Sininke sokuhova kuna kara asi morwa twa hara Jehova. Apa o litura mo unene mokusikisa mo mpangera zokuzuvhisa nokutulisa po varongwa, ove ngoso kuna kuyilikida asi wa hara Karunga. (1 Joh. 5:3) Gazadara ko kositwa esi: Kuhara Jehova  kwa ku tumangedere o zuvhise tunda embo zende embo. Nye ayo ya ku karerere ureru kuzuvhisira vantu ndi? Nampo pira. Wa kere nowoma apa wa tamekere kuzuvhisira pembo lyokuhova mosirugana sa tunda embo zende embo ndi? Nampo wa kere nowoma. Nye wa yi divire asi esi kuna kara sirugana esi ga tu harera Jesus tu rugane ntani wa sikisire mo mpangera ozo. Ano mwaza siruwo, ya ya ku karerere ureru kuzuvhisa. Nye ngapi o lizuvhu ngesi kuhamena kurugana elirongo lyoBibeli? Ove kulizuvha woma ndi? Nampo. Nye nsene o pura Jehova a ku vatere o funde po woma nokukara nouradi yipo o tameke elirongo lyoBibeli, age nga ku vatera yipo o kare neharo lyokutulisa po varongwa.

8. Kuliza naMarukusa 6:34, yisinke hena nayi tu tumangeda tu zuvhise?

⁸ Sininke sauvali esi a si tu tumangeda tu ronge vantu usili kuna kara asi kuhara vantu. Sikando simwe Jesus novarongwa vendi kwa rorokere apa va zuvhisire unene. Awo kwa paparere evango yipo va ka pwizumuke po, nye mbunga zovantu kwa va sikwire. Nkenda kwa tumangedere Jesus a ronge vantu yininke “yoyinzi” (Resa Marukusa 6:34.) Age kwa va zuvhisilire nampili ngomu ga rorokere. Morwasinke? Jesus kwa gazadarere ko omu va lizuvhire vantu ava va kere mombunga ozo. Age kwa here kuvavatera morwa ga dimbwilire asi awo kwa kere moruhepo ntani va hepere ehuguvaro. Neina vantu kuna kara moukaro wokulifana, awo vana hepa evatero nampili ngomu vana ku moneka ngwendi vana hafa. Awo kuna fana ngwendi nonzwi dokuzumbana da hana musita go ku dipitisira. Mupositoli Paurusa kwa tente asi vantu vangoso kapi va diva Karunga ntani kapi va kara nehuguvaro. (Efe. 2:12) Awo kuna kugenda ‘monzira ezi azi twara kokudona.’ (Mat. 7:13) Eharo nonkenda ngayi tu tumangeda tu zuvhisire ko vantu womomukunda gwetu. Ano nkedi zongwa zokuvavatera kuna kara pokulironga nawo Bibeli.

9. Kuliza noVafilipi 2:13, ngapi omu na ku vatera Jehova?

⁹ Ove nampo kulizuvha woma kulironga novantu Bibeli morwa ngayi ku gusa siruwo sosinzi mokuliwapaikira nokuronga. Nsene yimo o lizuvhu ngoso, kanderera kwaJehova nokumutantera omu ono kulizuvha. Mupura a ku vatere o kare neharo lyokugwana muntu ogu nolironga nage. (Resa Vafilipi 2:13.) Mupositoli Johanesa kwa uyungire asi Karunga nga limburura makanderero gokuliza nompango zendi. (1 Joh. 5:14, 15) Kara nehuguvaro asi Jehova nga ku vatera yipo o kare neharo lyokutulisa po varongwa.

10-11. Yisinke nayi tu ninkisa tu dire kurugana elirongo lyoBibeli?

¹⁰ Ose twa yi diva asi ayo mulyo unene kuronga vantu, nye ayo kuvhura kutukarera udigu kutulisa po varongwa. Tu zeni tu ka konakone maudigu gamwe ntani nomu natu ga funda po.

¹¹ Pamwe ukaro wetu kapi au tu pulisire tu rugane unene. Pasihonena, vazuvhisi vamwe va kurupa ntani kuvera vera. Ukaro ou wa lifana nou woge ndi? Nsene yimo, tu tareni sininke simwe esi twa lironga mosiruwo souvera woCorona. Ose kwa dimburura asi kuvhura tu rugane malirongo goBibeli kupitira koselefoni ntani nokoyikwakonentu yimwe. Yipo nye, kuvhura o tameke elirongo lyoBibeli nagumwe nampili kuna kara pembo. Pwa kara hena uwa umwe. Vamwe kwa hara kulironga Bibeli nye kapi ava kara pembo poyiruwo eyi ava zuvhisa vanavazinyetu. Nye nampili ngoso, vantu kuvhura va kare pomambo kongurangura zonene ndi kongurova. Gazadara ko nsene kuvhura o lironge novantu Bibeli posiruwo oso. Jesus  kwa rongere Nikodemusa masiku, ano esi kuna kara siruwo esi ga here Nikodemusa.—Joh. 3:1, 2.

12. Yininke musinke nayi tu vatera yipo tukare varongi wovawa?

¹² Kuvhura tu kare nowoma asi kapi natu yi sikisa mo kuronga muntu Bibeli. Ose nampo kulizuvha asi komeho tu ronge muntu Bibeli, twa hepa kukara noudivi wounzi ndi twa hepa kukara murongi gomuwa. Nsene yimo o lizuvhu ngoso, koneka yininke yitatu eyi nayi kuvatera yipo yi ku tompoke kutameka elirongo lyoBibeli. Sokuhova, Jehova kukutara asi wa kara noudivi wokuronga wopeke. (2 Kol. 3:5) Sauvali, Jesus ogu ga kara ‘nononkondo nadinye demeguru, nedi depevhu’ ga ku pa situmbukira sokuronga. (Mat. 28:18) Ano sautatu, kuvhura o pure vakweni va ku vatere. Jesus kwa huguvarere mweyi va mu rongere oGuhwe. Yipo nye, nove kuvhura o huguvare magano govakweni. (Joh. 8:28; 12:49) Ntani hena kuvhura o pure ko mupitisili gomokambunga keni koyirugana yokuzuvhisa ndi muzuvhisi gokukarerera ndi nkenye muzuvhisi ogu ga kara noudivi yipo a ku vatere omu notameka nokurugana elirongo lyoBibeli. Nkedi zimwe omu nolironga kukara murongi gomuwa kuna kara pokukara pelirongo lyoBibeli eli ava pitisire vanavazinyetu ava tuna tumbura.

13. Morwasinke ya karera nomulyo tu yike nkedi zompe zokuronga?

¹³ Kuvhura yi tu karere udigu kuruganesa nonkedi donompe noyiruganeso yoyipe. Nkedi ezi atu rugana malirongo goBibeli ngesi za litjindji. Buke Hafera eparu narunye, kuna kara siruganeso sosinene. Komeho tu ka lironge nomuntu, twa hepa kuliwapaikira ntani nokuronga monkedi zokulisiga nomu ngatu yi rugana nare. Amo kwa tura mo noparagarafu dononsesu ntani murongi ga hepa kuruganesa siruwo sosinzi mokuzogera nomurongwa gwendi. Nsene kuna kuronga, muzuvhisi ga hepa kuruganesa novidiyo dononzi noyiruganeso yimwe ngwendi JW Library^®. Nsene kapi wa diva omu ava ruganesa yiruganeso oyo, pura ko gumwe ogu ga diva omu ava yi ruganesa yipo a ku vatere. Vantu kwa hara kurugana yininke eyi va yika. Ayo kapisi ureru kwetu mokuyika nonkedi donompe omu ava rugana yininke yongandi. Nye Jehova ntani vanavazinyetu, ngava kuvatera yipo o yike nokuhafera kulironga novantu pokuruganesa buke ozo. Muzuvhisi gumwe gokukarerera kwa tente asi buke ezi “ngwa unene morwa nampili murongwa ndi murongi kuvhura kuzihafera.”

14. Yisinke twa hepa kudiworoka nsene kuna kuzuvhisira monomukunda edi ava dili kupurakena vantu ntani ngapi etjangwa lyo-1 Vakolinte 3:6, 7 a li tu korangeda?

¹⁴ Ose nampo kwa tunga momukunda ogu ayi tu karere udigu kutameka malirongo goBibeli. Vantu vamwe kuvhura va dire kuhafera mbudi zetu ndi va tu rwanese. Yisinke nayi tu vatera tu twikire kuzuvhisa? Diworoka asi mouzuni ou woudona, vantu kuvhura kulitjindja ntani vantu ava ngava dili kuhafera mbudi zetu kuvhura va ya tameke kulironga. (Mat. 5:3) Vamwe ava ngava nyoka kutambura yimbapiratjangwa yetu nare, konyima va ya tamekere kulironga. Twa yi diva hena asi Jehova yige mwenya muzangu. (Mat. 9:38) Jehova kuna hara tu twikire kukuna nokutekera, nye age yige a yi kulisa. (1 Kol. 3:6, 7) Ayo kutuhengagwida mokudiva asi nampili kapi tuna kara novarongwa woBibeli ngesi, nye Jehova kutufuta kuliza nelituromo lyetu lyokuvatera vantu, nye kapisi kuliza novantu ava atu lirongo nawo Bibeli ndi ava atu pe yimbapiratjangwa! *

15. Ngapi a lizuvhu Jehova apa a mono gumwe kuna kulironga Bibeli nokutura pasirugana eyi ana ku lironga?

¹⁵ Jehova kuhafa apa muntu a tambura usili womoBibeli nokutantera ko wopeke eyi ga lironga. (Yis. 23:15, 16) Jehova kumuhafesa unene apa a mono omu vakareli vendi vana kulitura mo unene mokuzuvhisa nokuronga. Pasihonena, nampili ngomu una kara ko uvera woCorona, momvhura 2020 ose kwa lirongere Bibeli novantu wokusika po-7 705 765 ano vantu wokusika po-241 994 kwa va kuhwire. Ano varongwa ava wovape kuna kutulisa po hena varongwa vamwe woBibeli wovape. (Ruk. 6:40) Ose kuhafesa Jehova apa atu litura mo mosirugana sokutulisa po varongwa.

16. Sitambo musinke sosiwa nolitulira po?

¹⁶ Kutulisa po varongwa kapisi ureru, nye nevatero lyaJehova kuvhura yi tu tompoke kuronga wovape yipo va hare Guhyetu gemeguru. Kuvhura o litulire po sitambo sokulironga nampili nomurongwa gumwe. Yosili ose kuvhura ngatu limonene yitundwamo yoyiwa nsene tu ruganesa nkenye mpito mokupura ava atu ligwana nawo nsene vana hara kulironga Bibeli. Kuvhura tu kare nehuguvaro asi Jehova ngatu tungika.

17. Uwa musinke ngatu gwana nsene tu kara novarongwa woBibeli?

¹⁷ Azo mfumwa sili mokuzuvhisira vantu nokuvaronga usili womoBibeli. Sirugana esi kuturetera ruhafo. Mupositoli Paurusa kwa vaterere sinzi sava va kere moTesaronika yipo va kare varongwa. Age kwa uyungire omu ga lizuvhire pokutanta asi: “Wolye ngatu huguvara, tu va hafere? Wolye ngava tu fumanekesa komeho zaHompa Jesus, apa nga wiza? One nyone malikangangero getu nehafo lyetu.” (1 Tes. 2:19, 20; Yirug. 17:1-4) Sinzi sovanavazinyetu yimo ava lizuvhu ngoso. Munazinyetu gomukadi Stéphanie namugara gwendi, kwa vatera vantu wovanzi va gwane ekuho. Age kwa tanta asi: “Kuvatera vantu va ligave kwaJehova, kureta ruhafo rorunene.”