AME kwa hampurukira nge momukunda gwaWichita moAmerika momazuva 10 Sindimba 1936. Ose tuvane mezimo lyetu, ame nyame mbeli. Otate William nonane Jean kwa kere vakareli vaJehova woupampi. Otate kwa kere mukwafimbunga. Onane kwa va rongere Bibeli zinyawo Emma Wagner. Omama Emma kwa rongere vantu wovanzi Bibeli kukwatera mo Gertrude Steele ogu ga kere mutumwa moPuerto Rico nomvhura dononzi. * Na kere noyihonena yoyiwa yoyinzi yokuvhura kutemwinina.

Ezuva limwe ame opo nomvhura dange ntano, name notate kwa gavagere sifo soRuhungu ntani Consolation (ngesi Awake!) kovantu ava va pitire monzira. Posiruwo sina, sirongo setu kwa lihamekere moyita yauvali youzuni. Ndokotora ogu ga korwere kwa wizire ta ya swaura otate morwa kudira kulihameka moyita nokuuyunga asi awo kwa kere woma. Age kwa hederere pepi otate nokuuyunga asi: “Ove evaya toona nge sa.” Na kere nowoma nye na haferere nkareso zotate. Awo kwa twikilire kugavera yifo kovantu ava va ya pongere. Ta pa ya piti mukwayita makura ndokotora ta zigire asi: “Rugana ko yuma kweli evaya eli!” Mukwayita ga mwene asi ndokotora ana korwa makura ta mu tantere asi: “Zende kembo o ka kororokwe!” Makura ndokotora nomukwayita tava tundu po. Ame kwa haferere uradi ou Jehova ga pere otate. Otate kwa kere nonosaloni mbali ano ndokotora gwina kwa kere gumwe ogu ngava kurura.

Apa na kere nonomvhura ntantatu, vakondi vange tava randesa embo nonosaloni dawo, tava tungu karafana makura tatu dirukire koColorado oku va hepere vazuvhisi. Vakondi kwa ka kere vazuvhisi wokukarerera ntani ngava rugana mazuva gamwe kofarama. Nevatero lyaJehova ntani upampi  wawo mokuzuvhisa, tava tulisa po mbungakriste. Momazuva 20 Pembagona 1948, yipo na gwene ekuho kumwe navamwe ava va lirongere Bibeli kukwatera mo Billie Nichols namukadendi. Otate yiwo va tu kuhwire momukuro. Konyima oBillie namunwawo kumwe namukadendi kwa ya kere vatareli wonombunga.

Ose kwa kere novakaume wovanene nava va lihamekere siruwo nasinye mosirugana soUhompa ngwendi epata lyaSteele omu mwa hamenene Don naEarlene, Dave naJulia ntani Si naMartha ava va tulire po sihonena sosiwa. Sihonena sawo kwa likidire nge asi kutura Uhompa muhowo kureta ruhafo meparu.

Apa na kere nonomvhura 19, kaume kange Bud Hasty ta pura nge ni ze nendi komukunda gwapeke tu ka rugane uzuvhisi wokukarerera. Mutareli gonombunga tatu pura tu ze komukunda Louisiana omu mwa kere Nombangi daJehova edi da tengwire monyima. Age kwa tu tanterere tu rugane mapongo nagenye nkenye sivike yi kare asi vangapi vana kuwiza ko. Tatu ka gwana evango lyewa makura tatu liwapaike. Ngatu rugana mapongo nagenye nye tuvavali tupu ngatu kara mo. Ngatu li pe marufo mokupitisira mapongo ano gumwe nga limburura mapuro nagenye. Nsene asi mosiuyungwa kuna hamene mo elikido, ngatu li rugana tuvavali pwa hana muntu mombunga. Konyima munazinyetukadi gomukurupe ta tameke kuwiza komapongo. Mwaza siruwo varongwa vamwe woBibeli navamwe ava va tengwire monyima tava tameke kuwiza komapongo makura mbungakriste ta zi ya kuru.

Ezuva limwe name naBud tatu ligwana napastore gongereka zimwe ogu ga tumbwire matjangwa na dilire kudiva. Na tukukire sili ta yi ninkisa nge ni gazadare ko kuhamena epuliro lyange. Sivike nasinye kwa litulire mo ni papare malimbururo komapuro aga ga tu pulire. Ayo ya vaterere nge ni kwate egano usili womoBibeli ntani kwa ndindilire nononkondo mokukalimburura pastore gwina.

Mwaza siruwo mutareli gonombunga ta pura nge ni dirukire komukunda Arkansas ni ka vatere mombungakriste ozo. Apa na ka kere ko ame ngani zi komukunda gwetu koColorado ni ka lirapote komberewa zovakwayita. Ezuva limwe name novazuvhisi vamwe wokukarerera kwa genderere metuwa lyange makura tatu gwana siponga makura etuwa lyange tali zonauka. Yipo twa toonene ngodi munazinyetugara  gumwe ogu ga ya tu simbire atu tware kembo lyendi konyima tatu ka za nendi kepongo. Tava ka gava madiviso kepongo kuhamena siponga setu ano vanavazinyetu tava tu pe yimaliwa. Munazinyetugara ta randesa etuwa lyange ponodola mayovi gatatu ngoso.

Ose twa vhulire kukasika koWichita kwamunazinyetu E. F. McCartney ogu ga kere muzuvhisi gokukarerera. Vana vendi womapange wovagara Frank naFrancis vakaume vange wovanene. Awo kwa kere netuwa lyokukurupa makura tava lirandesa nge ponodola mayovi gatatu ngoso. Esi yiso sikando sange sokuhova namwene asi Jehova kwa pakerere nge mbili morwa kutura muhowo yirugana yoUhompa. Morugendo oro yipo na ka lidivire namunazinyetukadi Bethel Crane. Ozina Ruth kwa kere muzuvhisi gomupampi moKansas ava va twikilire kukara muzuvhisi gokukarerera dogoro koyiha yonomvhura 90. Momvhura 1958 tatu likwara naBethel makura tatu ka kara vazuvhisi wokukarerera moEl Dorado.

Poku gazadara ko yihonena yoyiwa eyi twa mwene, yipo twa tokwere kuligava nyamwetu kombunga zaJehova mokututuma nkenye oku. Tava tu tumu ngovazuvhisi wosiruwo nasinye koArkansas. Momvhura 1962, twa hefe apa va tu zigidire kosikora zaGiliyata. Ano twa hefe apa twa ka mwene Don Steele mosikora zoozo twa kere. Apa twa ka mene, name naBethel tava tu tumu koKenya. Ose twa lizuvhire kukora komutjima apa twa tundire moAmerika nye twa hefe apa twa ka limwene novanavazinyetu pokapare kaKenya.

Ose twa ka haferere sirongo oso noyirugana yokuzuvhisa. Varongwa vetu woBibeli wokuhova ava va tulire po ezokomeho kwa kere Chris naMary Kanaiya. Awo simpe kuna kara vazuvhisi wosiruwo nasinye moKenya. Momvhura zokukwama ko tava tu tumu koUganda ngovatumwa wokuhova mosirongo oso. Ose twa haferere sirugana setu morwa vanzi va kere neharo lyokulironga Bibeli ntani tava ya kara Nombangi daJehova. Nye konyima zonomvhura ntatu noukahe, yipo twa tengwire koAmerika morwa mukadange kwa kere nomarutu gavali. Ezuva eli twa katukire tu tengure kwa lizuvhire kukora komutjima kupitakana omu twa lizuvhire apa twa tundire koAmerika. Ose kwa here vantu womoAfrika ntani twa kere nehuguvaro lyokukatengura hena.

Apa twa ka tundire koAfrika ose kwa ya tungire moColorado pepi novakondi vange. Tatu gwana mbeli zetu Kimberly ano konyima zomvhura noukahe ta kwama ko mumbyendi Stephany. Ose twa litulire mo mositumbukira setu sokurera vana vetu nokuvaronga usili womoBibeli. Ose kwa here kutura po sihonena sosiwa esi va tulire po vakondi vetu. Nye nampili ngomu sihonena sosiwa kwa kara nononkondo dokuvatera vanona, kapi yina kutanta asi awo ngava kura va karere Jehova. Morwa vamumbya vange vavali va ya hagekere kukarera Jehova. Na si huguvara asi komeho ngava honena yihonena yoyiwa eyi va tulire po vakondi vetu.

Ose twa haferere kurera vana vetu nokuhetekera ko kurugana yininke kumwe ngepata. Morwa twa tungire pepi nomukunda oku aku kara materengenze ose ngatu zi nawo tu ka danauke. Ngatu ruganesa siruwo oso mokuzogera novana vetu. Ose  hena ngatu zi nawo tu ka rare mowiza ano apa ngatu zoto mundiro ngatu simwitire. Nampili ngomu va kere vanona awo ngava simwitire eyi va here kurugana poukondi ntani kuhamena vagara ava va here kukwara. Ose ngatu va rongo nompango domoBibeli. Ntani ngatu va korangeda va litulire po sitambo sokurugana yirugana yoUhompa siruwo nasinye ntani nokuvaronga mulyo gokukwara muntu ogu ga kara nositambo ngwendi sawo. Ntani twa va vaterere va mone mulyo gokudira kukwara awo simpe vanona. Ose nkenye apa ngatu va tantere asi: “Kareni vadike dogoro nampili nomvhura 23.”

Ngwendi moomu va tu rerere vakondi vetu, ose ngatu zi novana vetu nkenye apa komapongo nomoyirugana yokuzuvhisa. Ose ngatu zigida pembo lyetu vamwe ava va kere mosirugana soUhompa sosiruwo nasinye. Ntani ngatu simwitire vana vetu omu twa ka haferere sirugana setu soutumwa. Ose kwa va tanterere asi ezuva limwe ngatu va twara koAfrika. Vana vetu va yi haferere sili.

Ose nkenye apa ngatu rugana elirongo lyepata omu ngatu rugana malikido goyininke eyi nayi vhura kukahoroka kosure. Vana vetu ngatu va ninki va kare Nombangi nokulimburura mapuro. Awo ngava yi hafere ntani ya va pere uradi wokuzuvhisa. Apa va ya kulire pamwe kapi ngava hafere elirongo lyepata. Ezuva limwe koyili va ruganene tani va tantere asi kapi twa kurugana elirongo lyepata. Awo kwa tukukire makura tava tameke kulira nokuuyunga asi vana hara kulironga. Yipo twa yi dimbwilire asi ose twa ronga vana vetu va kare neharo monomutjima dawo lyokulironga Bibeli. Awo va here kulironga Bibeli ntani twa va pere mpito zokupwagesa magano gawo. Ayo ngayi tu guvisa apa ngava dili kukwatesa ko marongo gamwe. Nye twa divire eyi ya kere monomutjima dawo. Apa ngatu va fatwilire, awo ngava kwatesa ko marongo gaJehova.

Nomvhura edi twa rerere vana vetu kwa genderere sili. Nevatero lyombunga zaKarunga twa vhulire kuronga vana vetu va hare Jehova. Ose twa hefe apa vana vetu va tamekere kurugana uzuvhisi wokukarerera apa va mene sure ntani awo va lirongere udivi mokulirera vene. Tava dirukire kodoropa zaTennessee novanavazinyetukadi vavali va ka vatere oku kwa hepere vazuvhisi. Ose twa va rongwere sili nye ya tu hafesere asi awo kwa ruganesere eparu lyawo mosirugana sokuzuvhisa siruwo nasinye. Name naBethel yipo twa tamekere hena kurugana uzuvhisi wokukarerera ou wa tu pere mpito tu gwane yitumbukira yimwe hena. Ngatu vatere mosirugana sokudingura nombungakriste ntani nomokuwapaika yigongi.

Komeho vana vetu va dirukire koTennessee, awo kwa ka dingwire koIngiranda tava ka dingura nokoBeteli. Stephany age opo nomvhura dendi 19 ta ka lidiva naPaul Norton ogu nga rugana koBeteli. Apa va ka tengwire ko sikando sokukwama ko Kimberly tava ka lidiva naBrian Llewellyn. Apa Stephany ga kere nonomvhura 23 yipo va likwere naPaul. Ano mvhura za kweme ko apa Kimberly ga kere nonomvhura 25 tava likwara naBrian. Vana vetu va kere vadike dogoro nomvhura 23 ndi kupitakana opo. Ose twa va kwatesere ko nomutjima gwetu nagunye vagara ava va tokwere kukwara.

Vana vetu kwa tu tanterere asi sihonena setu nesi sovazinyakurwawo sa va vaterere va limburukwe mpangera zaJesus ‘zokuhova tanko kupapara Uhompa’ nampili apa ngava kara noudigu woyimaliwa. (Mat. 6:33) MwaKudumogona 1998, Paul naStephany yipo va va zigidire kosikora zaGiliyata konyima tava ka va tuma koMalawi. Brian naKimberly kwa va zigidire va ka rugane moBeteli zaIngiranda ano konyima tava ka va tuma koBeteli zaMalawi. Ose twa hefe sili unene morwa kwato hena nkedi zongwa ezi mudinkantu na vhura kuruganesa eparu lyendi.

MwaMurongagona 2001, yipo ga toonene nge ngodi munazinyetu Izak mutareli goyirugana yetoroko ogu tuna tumbura ketamekero. Age kwa tanterere nge asi awo kuna kutura po mawapaiko gokudeura ava ngava ka ronga vatoroki uzuni mudima va kwate egano Ruingilisa. Awo kwa here asi name ni ka hamene mo medeuro olyo nye ame opo nomvhura dange 64. Name namukadange tatu kanderere  ntani tatu zogere novakondi vetu ava va kurupire va tu pe ko mapukururo. Awo kwa tu harerere tu ze, nampili ngomu va hepere evatero lyetu. Yipo na toonene ngodi Izak nokumudivisa asi tuna tambura situmbukira oso.

Onane tava va kwateke kankera. Yipo nava tanterere asi tani kara ni vatere mumbyange Linda mokuvapakera mbili. Onane tava limburura asi: “Wa hepa kuza. Nsene no kara tani lizuvhu udona unene.” Mumbyange nage yimo ga lizuvhire. Nkareso zawo zelizambero nevatero lyovanavazinyetu ya tu hafesere sili. Ezuva lyokukwama ko apa twa ka sikire kevango oku va ka tu dewilire, Linda ta toonene nge ngodi a divise nge asi onane vana dogoroka. Ose twa litulire mo unene mosirugana setu ngwendi moomu va tu korangedere onane.

Apa lya pwire edeuro, tava tu tumu koBeteli zaMalawi, oku va kere vana vetu novagara vawo. Ose kwa hefe sili unene. Apa twa mene kuronga vatoroki womoMalawi tatu zi koZimbabwe ano konyima moZambia. Apa twa mene kudeura vatoroki ure wonomvhura ntatu noukahe tava tu tumu tu ze koMalawi tu ka tjange yihorokwa yovanavazinyetu ava va ligwanekerere nomahepeko morwa kudira kulihameka moyita. *

Momvhura 2005 twa lizuvhire hena kukora komutjima apa name namukadange twa tengwire kembo lyetu, oku twa ka twikilire nouzuvhisi wokukarerera. Momvhura 2006 Brian naKimberly kwa ka tengwire va ya tunge pepi nose mokuyarera vana vawo wovakadona Mackenzie naElizabeth. Stephany simpe mweli moMalawi namugara gwendi Paul ogu ana kara gumwe gomoKomitiye zoBeteli. Ngesi ame kuna kukokera konomvhura 80, ayo kuhafesa nge pokumona vadinkantugara ava na rugana nawo nomvhura dononzi kuna kurugana yitumbukira eyi ngani rugana. Ose kuna kara noruhafo morwa yihonena yoyiwa eyi va tu tulilire po ntani ose kwa temwinina yihonena oyo yipo vana vetu novatekuru vetu va gwanene mo uwa.