1, 2. (a) Maudigu musinke ava ligwanekere nago sinzi sovageni? (Tara efano pepenuno 8.) (b) Ekorangedo musinke ga geve mupositoli Paurusa, ntani mapuro musinke natu kakonakona?

NOMVHURA 30 da kapita, Osei ^[1] ogu ga kere asi kapisi gumwe goNombangi daJehova, kwa tundire koGhana a ze koEuropa. Age kwa uyungire asi: “Ame na dimbwilire asi sinzi sovantu kapi va pakerere nge mbili. Mukarompepo gwamo gwa lisigire nogu gomosirongo setu. Apa na tundire pokapare nokuzuvha utenda ou na dira kuzuvha rumwe makura tani tameke kulira.” Ure womvhura, Osei kapi ga vhulire kugwana yirugana yoyiwa morwa kapi ga divire nawa eraka. Morwa kukara ure nekoro lyendi ga lizuvhire mukuma nokudiworoka kembo lyawo.

² Nsene o kara moukaro wokulifana nou waOsei, ngapi no hara va kutekure? Ove no hara va kutambure nawa koSinyanga soUhompa, yi kare asi kupi watunda ndi sipapa soge musinke.  Bibeli kukorangeda Vakriste wousili asi: “Walye omu divara kutambura vagenda [kutanta asi kulikida nkenda kovageni.]” (Heb. 13:2) Ngesi tatu kakonakona mapuro aga: Ngapi omu Jehova a tara vageni? Morwasinke natu rundwilira nkareso zetu omu atu tara vageni? Ntani ngapi natu vatera vanayirongo ndi vageni va lizuvhe asi tuna va tambura mombungakriste zetu?

3, 4. Kuliza naExodus 23:9, yisinke ga ndindilire ko Karunga kovakareli vendi vanare omu nava tekura vanayirongo ntani morwasinke?

³ Apa Jehova ga zowere Vaisraeli moEgipite age kwa va pere noveta kuhamena vanayirongo ava va lipakerere nawo. (Ex. 12:38, 49; 22:21) Morwa rorunzi vanayirongo kuhepa, Jehova kwa tulire po mawapaiko gokuvakwafa. Kupupura kwa kere limwe lyewapaiko olyo.—Lev. 19:9, 10.

⁴ Jehova kapi tupu ga tanterere Vaisraeli va fumadeke vanayirongo, nye hena va va likide nkenda. (Resa Exodus 23:9.) Vaisraeli nawo kwa kere ‘vanayirongo’ moEgipite. Nampili komeho va ka kare vapika, Vahebeli kwa va ninkire va li kare ure noVaegipite morwa nompo dawo noukarelikarunga wawo. (Gen. 43:32; 46:34; Ex. 1:11-14) Nampili ngomu Vaisraeli va hepere unene ngovapika, Jehova kwa ndindilire ko kwawo va tekure vanayirongo ngwendi ‘Vaisraeli vakwawo.’—Lev. 19:33, 34.

5. Yisinke ngayi tu vatera tu gazadare ko omu Jehova a tara vanayirongo?

⁵ Naina Jehova simpe kupakera mbili vanayirongo ava ava wiza komapongo getu. (Deut. 10:17-19; Mara. 3:5, 6) Nsene tu gazadara ko komaudigu aga ava ligwanekere nago, ngwendi elitondororo ntani udigu weraka, ngatu papara nonkedi tu va likide nkenda neharo.—1 Pet. 3:8.

6, 7. Yisinke yina kulikida asi posiruwo sovapositoli, Vakriste va lirongere kunyokera po elitondororo?

⁶ Posiruwo sovapositoli, Vakriste va lirongere kunyokera po elitondororo eli lya kere moVajuda. Momvhura 33, poPentekoste, ava va tungire moJerusarema kwa tambwire ava va tundire komavango gokulisiga-siga ava va litezwilire va kare Vakriste. (Yirug. 2:5, 44-47) Epakero mbili eli va likidire Vakriste woVajuda kovapuli vakwawo wokomavango gokulisiga-siga kwa likidire asi va kwete egano eyi ayi tanta ‘kutambura vagenda’ ndi kulikida nkenda kovageni.

⁷ Nye apa mbungakriste zawo za ligwedererere, tapa horoka ukaro ou wa likidire elitondororo. Vajuda ava ngava uyunga Rugereka kwa sivanene asi vafisavayavawo kapi ngava va tara eho. (Yirug. 6:1) Mokukohonona po udigu owo, vapositoli kwa horowere vagara ntambali yipo va divilise asi kwato ogu vana kusigilira. Vagara owo navenye kwa kere nomadina goSigereka, eyi kulikida asi vapositoli kwa here kugusa po madiro kulizuvha aga ga kere mombungakriste.—Yirug. 6:2-6.

8, 9. (a) Mapuro musinke naga tu vatera tu dive nsene twa kara nonkareso zelitondororo ndi zokulikangangera rudi rwetu? (b) Nkareso musinke natu gusa mo monomutjima detu? (1 Pet. 1:22)

⁸ Yi kare asi twa yi dimburura ndi hawe, nkenye muntu kwa mu kundama mpo zawo. (Rom. 12:2) Ose pamwe kuzuvha vamusinda, varugani ndi vanasure vakwetu kuna kuswaura rudi rwapeke. Ose ngapi agu tu  kunduma mutaro gwangoso? Ngapi omu atu lizuvhu apa gumwe a swaura rudi rwetu ndi sirongo setu?

⁹ Mupositoli Peturusa nage kwa tondwerere wonomuhoko dapeke, nye konyima ga ya lirongere kunyokera po nkareso ozo. (Yirug. 10:28, 34, 35; Gar. 2:11-14) Mokulifana, nsene tu nongonona asi tuna kara nonkareso zelitondororo ndi zokulikangangera rudi rwetu, twa hepa kurugana ko yuma tu guse mo monomutjima detu nkareso ozo. (Resa 1 Peturusa 1:22.) Twa hepa kudiworoka asi kapi twa sikilira mo nye ngava ka tu zowora morwa nkenda zaKarunga yi kare asi kupi twa tundilira. (Rom. 3:9, 10, 21-24) Yipo nye kapi tatu vhuru kulizuvha asi ose mulyo kupitakana wopeke. (1 Kol. 4:7) Twa hepa kukara nonkareso ngwendi mupositoli Paurusa ogu ga vyukililire kutantera vagwavekwa vakwawo woVakriste asi ‘kapisi mu vanayirongo hena, ndi asi mu vageni. Nye one onkwaKarunga.’ (Efe. 2:19) Nsene tu litura mo unene tu nyokere po elitondororo ngayi tu vatera tu dware muntu gomupe.—Koros. 3:10, 11.

10, 11. Monkedi musinke Bowasa ga likidire mutaro gwaJehova kovageni?

¹⁰ Monkedi ezi Bowasa ga tekwire Rutu goMumowaba kwa likidire asi ga kwete egano omu Jehova a tara vageni. Apa ga zire kepya lyendi, Bowasa ga dimbwilire mukadi gomunayirongo ana kupupura a kwame varugani. Apa Bowasa ga zuvhire asi mukadi kuna pura epulisiro lyokupupura nampili ngomu za yi pulisilire veta, age ta tantere vakareli vendi va pweze mahangu gamwe poyitungu yipo Rutu a ga tore.—Resa Rutu 2:5-7, 15, 16.

¹¹ Mokumona asi Bowasa kwa uyungisire Rutu kulikida asi ga kere nosinka kwendi nomoukaro ou ga kere nawo ngomunayirongo. Bowasa kwa tanterere hena Rutu a rugane novakareli vendi wovakadi yipo va dire kumusindagura vagara ava va rugene mepya. Ntani Bowasa ga divilisire asi Rutu nage a gwane mema nonondya. Bowasa kapi ga sensere Rutu morwa asi age munayirongo goruhepo nye kwa mu korangedere.—Rutu 2:8-10, 13, 14.

12. Ngapi omu nkareso zetu zongwa nazi vhura kuvatera vantu?

¹² Eyi ya tetukisire Bowasa kuna kara eharo lyanarunye eli ga likidire Rutu kwangumweyi zendi Naomi ntani kweyi ga ya kere mukareli gwaJehova. Nkenda zaBowasa kwa likidire eharo lyaJehova lyanarunye komukadi ogu ‘ga wizire a ya gwane egameno kwaKarunga gwaIsraeli.’ (Rutu 2:12, 20; Yis. 19:17) Mokulifana nanaina, nkareso zetu zongwa kuvhura kuvatera “vantu navenye” va dimburure usili womoBibeli nokukwata egano omu ga va hara Jehova.—1 Tim. 2:3, 4.

13, 14. (a) Morwasinke natu litulira mo kumorora vageni ava ava wiza komapongo getu? (b) Ngapi no vhura kugusa po woma wokuhedera worudi ropeke?

¹³ Kuvhura tu likide nkenda kovanayirongo ndi kovageni pokuvamorora apa ava wiza komapongo getu. Walye twa yi dimburura asi sinzi sawo pamwe nomuga ntani kwa hara kukara velike. Ntani monkedi omu va va rera ndi morwa ruhepo, kuvhura kuvaninkisa va lizuvhe asi awo kwato mulyo. Yipo nye, nyose natu hova kuvahedera tu likide eharo nelituromo. Nsene mwa kara nelikwamo JW Language meraka lyeni, kuvhura zi ku vatere o lironge  omu nomorora wopeke meraka lyawo.—Resa Vafilipi 2:3, 4.

¹⁴ Nampo kuvhura o kare nowoma kuuyungisa worudi ropeke. Mokugusa po woma owo, kuvhura o va tantere ko kuhamena nyamoge. Monzogera zeni kuvhura ngo dimburure asi mwa hara yininke yokulifana ntani asi mwankenye rudi mwa kara mauwa nomaudona.

15. Yisinke nayi tu vatera tu kwate egano ava vana dili simpe kuyika mpo zomosirongo setu?

¹⁵ Mokuvatera wopeke va lizuvhe asi vana va tambura mombungakriste, lipura asi: ‘Ngano nyame nina kara kevango ndi kosirongo sapeke, ngapi nina hara va tekure nge?’ (Mat. 7:12) Lididimikira ava vana dili simpe kuyika mpo zomosirongo seni. Pamwe kapi tatu va kwata egano omu ava gazara ndi omu ava rugana yininke. Mevango lyokuvasininika va tambure mpo zetu, twa hepa tupu kuvatambura moomu va kara.—Resa Varoma 15:7.

16, 17. (a) Yisinke natu rugana yipo tu lidive nava worudi ropeke? (b) Mononkedi musinke natu vhura kuvatera vanayirongo womombungakriste zetu?

¹⁶ Nsene tu lironga kuhamena sirongo ndi mpo zawo, ngayi tu rerupira kukara nawo. Poukareli wetu wepata kuvhura tu rugane mapaparo kuhamena nompo dovantu ava twa dira kudiva mombungakriste ndi momukunda gwetu. Nkedi zimwe hena mokulidiva nawo, pokuvazigida komambo getu tu ya lye kumwe nawo. Mokumona asi Jehova ga “gava mpito kovapagani asi va wape kupura,” nose kuvhura tu tambure vageni “unene po vapuli vakwetetu.”—Yirug. 14:27; Gar. 6:10; Joba 31:32.

¹⁷ Pokulitulira po siruwo sokukara kumwe nomapata govanayirongo, ngatu kwata  egano elituromo lyawo lyokuyika nompo detu. Kuvhura ngatu dimburure asi vana hepa evatero lyokulironga eraka lyetu. Ntani kuvhura hena tu va vatere mononkedi dimwe ngwendi va gwane yirugana ndi evango lyokutunga. Elituromo lyetu ngali vatera unene vapuli vakwetetu.—Yis. 3:27.

18. Sihonena salye sokulikida efumadeko norupandu nava honena vanayirongo?

¹⁸ Vanayirongo nawo kuhetekera ko kuyika mpo zomosirongo esi va dirukira. Rutu ga tulire po sihonena sosiwa. Pomuhowo, ga fumadekere nompo domosirongo esi ga zire pokupura epulisiro lyokupupura. (Rutu 2:7) Age kapi ga lizuvhire asi va hepa kuyimuruganena morwa age munayirongo. Ntani ga kere norupandu konkenda ezi va mu likidire. (Rutu 2:13) Nsene vanayirongo va likida nkareso zongwa, vantu womomukunda novapuli vakwawo nga va va fumadeka.

19. Morwasinke natu tambwira vageni?

¹⁹ Tuna hafa kweyi Jehova ga pulisira vantu womarudi gokulisiga-siga va zuvhe mbudi zongwa morwa nkenda zendi. Nampo moyirongo yawo kapi va gwene mpito zokulironga Bibeli ndi umanguruki wokukara novantu vaJehova. Nye ngesi vana kara nompito zokulipakerera nose, ngano tu va vatere va lizuvhe asi tuna va tambura mombunga zetu. Nampili tu kare nohepwe, nkenda zetu kwawo kulikida asi Jehova kwa va hara. ‘Ngovana vaKarunga,’ tu litureni mo unene mokutambura vageni.—Efe. 5:1, 2.