JOSEFA GOMOAREMATEYA kwa lizuvhire asi kapi ga kere nouradi wokukauyunga naPiratusa. Age kwa kere mugara gokurunda mutwe. Nye pwa hepere gumwe gokuka hundira simpu saJesus kwaPiratusa yipo va ka si vhumbike kevango lyewa. Apa Josefa ga zire kwaPiratusa, kapi ya ka kere udigu ngwendi moomu ga yi gazarere. Apa Piratusa ga zuvhire mbudi komupitisili govakwayita asi Jesus ana fu, yipo ga geve epulisiro kwaJosefa a ka simbe simpu. Makura Josefa ta tengura, kevango oku va mu dipagerere Jesus.—Mar. 15:42-45.

• Yilye ga kere Josefa gomoAremateya?

• Elikwatakano musinke ga kere nalyo kumwe naJesus?

• Morwasinke esimwititi lyendi lya karera nomulyo?

Evangeli lyaMarukusa kwa tumbura Josefa asi gumwe gekuto ‘gomunasigongi somasimbi.’ Sigongi somasimbi kwa kere nononkondo dokupangera momukunda. (Mar. 15:1, 42-43) Josefa kwa kere gumwe govampitisili, yiyo nye ga vhulire kuza a ka zogere naPiratusa. Josefa kwa kere mugara gongawo.—Mat. 27:57.

Sigongi somasimbi kwa nyengere unene Jesus. Awo yipo va liyongere omu nava genda va ka mu dipage. Nye Josefa kwa kere “mugara gomuwa gomuhungami.” (Ruk. 23:50) Mokulisiga nomasimbi makwawo, age kwa kere nonkareso zongwa ntani nga limburukwa nompango daKarunga. Nage kwa ‘ndindilire Untungi waKarunga’ eyi yiyo nampo ya mu ninkisire a kare murongwa gwaJesus. (Mar. 15: 42-43; Mat. 27:57) Age nampo kwe here mbudi zaJesus morwa usili nouhungami kwa kere nomulyo kwendi.

MwaJohanesa 19:38 kwa tanta asi Josefa kwa “kere murongwa gwaJesus mokahorehore morwakutjira Vajuda.” Morwasinke? Morwa ga yi divire asi Vajuda kwa nyengere Jesus ntani awo kwa tokomenene kutjida mosinagoge navenye ava va pulire mwaJesus. (Joh. 7:45-49; 9:22) Vantu ava ngava tjida mosinagoge, kwava nyengere nokuvatekura momudona ntani kapi ngava va tambura momukunda. Eyi yiyo ya ninkisire Josefa a dire kulidivisa asi age murongwa gwaJesus. Ngano ga lidivisire, age ngano ga zumbanesere situmbukira sendi.

Josefa kapisi gelike ga kere moukaro wina. Etjangwa lyaJohanesa 12:42 kwa tanta asi ‘sinzi somasimbi kwa pulire [mwaJesus]. Nye morwaVafalisayi yiyo va dilire kuyipwagesa, neisi nava va tjida mo mosinagoge.’ Nikodemusa gumwe gomosigongi somasimbi, nage kwa pitire moukaro owo.—Joh. 3:1-10; 7:50-52.

Josefa kwa kere murongwa gwaJesus, nye kapi ga kere nouradi mokulidivisa mwene. Nye eyi kapi ya lizire neyi ga tente Jesus asi: “Nkenye ogu a tongonona nge komeho zovantu, name ngani ka mu tongonona komeho zOtate vemeguru. Ano nkenyogu a patana nge komeho zovantu, name ngani ka mu patana komeho zOtate vemeguru.” (Mat. 10:32, 33) Josefa kapi ga patanene asi kapi ga diva Jesus nye kapi tupu ga kere nouradi wokulidivisa asi age murongwa gwendi. Nove wa kara nouradi ndi?

Nampili ngoso, Josefa ga rugene yininke yoyiwa. Bibeli kwa likida asi age kapi ga kwatesere ko egano lyomasimbi lyokukakwata  Jesus. (Ruk. 23:51) Josefa nampo kapi ga kere po apa Jesus va mu pangwire. Eyi kwa guvisire unene Josefa morwa kwato eyi ga vhulire kurugana ko.

Ayo kumoneka asi konyima zonomfa daJesus, Josefa kapi hena ga ya kere nowoma. Age kwa tokwere kukwatesa ko varongwa vaJesus. MwaMarukusa 15:42-43 kwa likida eyi ga rugene: “Makura tagu mu dama a ze kwaPiratusa a ka hundire simpu saJesus.”

Ayo kumoneka asi Josefa yipo ga kere apa Jesus ga dogorokere. Ntani hena yige ga hovere kuyidiva asi Jesus ana dogoroka komeho Piratusa aka yi zuvhe. Yipo nye, apa Josefa ga pulire Piratusa kuhamena simpu, ta ‘tetuka pokuzuvha asi [Jesus] nare ana fu.’ (Mar. 15:44) Josefa nampo ga mwene omu Jesus vana kumupampara kositji. Eyi nampo ya mu tumangedere a likonakone nyamwendi nokutokora kulidivisa nyamwendi kovantu asi age murongwa gwaJesus. Age kapi hena ga ya kere murongwa gomokahore-hore.

Kuliza noVeta zoVajuda, nkenye muntu ogu ngava dipaga pokumutulika kositji va hepere kumuvhumbika lyoolyo ezuva. (Deut. 21:22, 23) Nye Varoma awo ngava sigilire yimpu yi liworere koyitji ndi pamwe ngava yi zuguma. Nye Josefa kapi ga here oyo yi horokere simpu  saJesus. Yipo ga tjokwere ntoko memanya ezi za karerere pepi nokuvadipagerere Jesus. Mokumona asi ntoko ozo kwa kere zompe ntani kapi va zi ruganesa rumwe, kulikida asi kapi pwa pitire siruwo sosire apa Josefa ga tundire koAremateya * a ya tunge moJerusarema. Age kwa rende ntoko ozo nositambo sokuvhumbika mo vekoro lyendi. (Ruk. 23:53; Joh. 19:41) Josefa kwa rugene sininke sosiwa apa ga vhumbikire Jesus montoko ezi ga litjokwerere. Ayo hena kwa sikisire mo uporofete ou asi Mesiyasa ngava mu vhumbika kumwe ‘novanangawo.’—Jes. 53:5, 8, 9.

Mavangeli nagenye gane kwa tumbura asi konyima apa Josefa ga gusire simpu saJesus kositji, ta si dingire mekehe lyepe lyezera makura ta si tura montoko ezi ga litjokwerere. (Mat. 27:59-61; Mar. 15:46, 47; Ruk. 23:53, 55; Joh. 19:38-40) Nikodemusa yige gelike va tumbura moBibeli ogu ga vaterere Josefa, age kwa retere sidumba sokuvhonga-vhonga. Mokumona asi awo kwa kere vanangawo awo nampo kwa gwene evatero kovarugani vawo va tware simpu saJesus nokuka si vhumbika. Nye nampili ngoso, aso kwa kere sirugana sosidigu. Nkenye ogu nga gumu simpu ngava mu tara asi ana nyata pampo ure womazuva gatano nagavali ntani nkenye eyi nga kwata nayo kwa nyete pampo. (Num. 19:11; Hag. 2:13) Ava ngava nyata pampo kapi ngava va pulisire va kare po posipito soPaska. (Num. 9:6) Josefa ngano va mu swawire vakwawo apa ngano va zuvhire asi ga lihamekere mo mokukavhumbika simpu saJesus. Nye posikando esi kapi ga tjilire kulidivisa asi age murongwa gwaJesus morwa kwa here kukavhumbika Jesus kevango lyewa.

Kutunda apa Jesus va mu vhumbikire, Josefa kapi hena va mu tumbura moBibeli. Eyi kutuninkisa tu lipure asi: Yisinke ya mu horokerere? Bibeli kapi za tumbura ko hena yuma kumuhamena. Nye kuliza neyi tuna zogere, age nampo ga ya lidivisire mwene kovantu. Nampili ngomu ya kere udigu kuvatera varongwa vaJesus, age ga yi rugene.

Esimwititi eli kutuvatera tu gazadare ko kepuro eli asi: Ose kumona yirugana ndi yiweka ndi ekoro ndi umanguruki wetu asi mulyo unene kupitakana elikwatakano lyetu naJehova ndi?