KULIZA noveta zaMosesa pwa kere maukaro gamwe omu va pulisilire Vajuda mokugana. Nye momazuva gaJesus, Vajuda kwa ya tamekere kukara nonkareso zokugana nkenye siruwo. Awo ngava yi ruganene eyi mokuninka vantu va pure eyi vana kuuyunga asi usili, nye Jesus ga nyokerere po nkareso ozo. Age kwa rongere asi: “Omu ninke tupu asi ‘Nhi’, ndi asi ‘Hawe.”—Mat. 5:33-37; 23:16-22.

Bukenkango zimwe kutuvatera tu kwate egano nkareso ezi va kere nazo Vajuda zokugana ndi zokupameka usili wononkango dawo. Azo kwa tanta asi mobuke zawo zonoveta amo kwa kere mo nomugano edi va hepere kusikisa mo ndi kuteza po.—Theological Dictionary of the New Testament.

Jesus kapisi yige tupu gelike ga nyokerere po nkareso ozo. Munahistoli gumwe goVajuda Flavius Josephus kwa tjenge kuhamena kambuga koVajuda aka ka nyokerere po kugana. Munahistoli gwina kwa tjenge asi ava va hamenene mokambuga kena kwa pulire asi kugana sininke sosidona unene sa pitakana kukumbagera. Age kwa tjenge hena asi vantu womokambuga oko kwa lizuvhire asi nkenye ogu a gana mokuninka vantu va pure asi eyi ana kuuyunga usili, ogo munayimpempa. Ano buke zimwe zoVajuda ava tumbura asi Sirach kwa uyunga kuhamena muntu ogu a gana nkenye siruwo asi: “Age mukumbageli gomunene.” Jesus kwa nyokerere po nkareso zokugana mawoko-woko. Yipo nye nsene twa kara nonkareso zokuuyunga usili, kapisi hepero tu gane mokulikida asi eyi tuna kuuyunga usili.