1, 2. (a) Mbili musinke natu vhura kuhafera ngesi? (b) Morwasinke natu dilira kukara nombili zene-zene ngesi? (Tara efano.)

NATUVENYE kwa hara eparu lyombili lyahana yinka. Tatu pandura Jehova kweyi ga tu pa ‘mbili zendi,’ ezi azi tu popere komagazaro nokomalizuvho gomadona. (Fil. 4:6, 7) Morwa twa ligava kwaJehova ose twa kara nombili zendi. Eyi kutanta asi twa kara nelikwatakano lyewa kumwe nendi.—Rom. 5:1.

² Nampili ngoso, siruwo saJehova sokureta mbili zanarunye kapi sina siki mo simpe. Ose kuna kuparuka pomazuva gopouhura, yipo nye maudigu manzi gokuturetera yinka ntani kwa tu kundurukida vantu wonyanya. (2 Tim. 3:1-4) NgoVakriste twa hepa kurwanesa po Satana nomarongo gendi goyimpempa aga a retesa po. (2 Kol. 10:4, 5) Nye erwaneso lyenene kuvhura kutundilira kovanekoro vetu wovahapuli. Vamwe kuvhura va tu sindagure ndi va tu rundire asi kwa ku gaununa ekoro ndi va tu swaure yipo asi tu sige epuro lyetu. Ngapi natu tara marwaneso gokutundilira kovanekoro? Ngapi natu vhura kugalididimikira?

3, 4. (a) Ngapi omu erongo lyaJesus lya kundamene vantu? (b) Posiruwo musinke ayi kara udigu kukwama Jesus?

³ Jesus ga yi divire asi erongo lyendi ngali reta maligaunuko movantu ntani wokumukwama ngava hepa uradi mokulididimikira marwaneso ogo. Marwaneso ogo ngaga kundama mbili zemepata. Jesus kwa tente asi: “Mwa ha gazara asi ame kwa wizira ni rete mpora pevhu, ame kureta rufuro na wizira. Morwa ame kwa wizira, ni ya pake po malinyengo pokatji komuna gomugara naguhwe, nopokatji komuna gomukadi nazina, nopokatji komuntu nangumweyi zendi. Ano ava ga tunga nawo muntu, yiwo ngava kara wonkore zendi woowo.”—Mat. 10:34-36.

⁴ Yisinke ga tembe Jesus pokuuyunga nonkango edi asi: “Mwa ha gazara asi ame kwa wizira ni rete mpora”? Age kwa here vantu va dive asi mokuyakara varongwa vendi awo ngava li gwanekera nomarwaneso. Sitambo sendi kwa kere sokuronga usili, nye kapisi sokugaununa mapata. (Joh. 18:37) Varongwa va hepere kudiva asi ayo kapi ya kara ureru mokumukwama unene po nsene vakaume novanekoro vawo va siga usili.

5. Yisinke va ligwanekerere nayo varongwa vaJesus?

⁵ Jesus kwa tente asi marwaneso gokutundilira kovanekoro kuna kara sininke simwe va hepa kulididimikira vasikuli vendi. (Mat. 10:38) Mokumuhafesa, varongwa vendi va hepere kulididimikira marwaneso gokutundilira kovanekoro. Awo va gwanene mo mauwa kupitakana eyi va zumbanesere.—Resa Marukusa 10:29, 30.

6. Yisinke natu diworoka nsene vanekoro kuna kuturwanesa morwa kukarera Jehova?

⁶ Twa hepa kuhara vekoro lyetu nampili kuna kuturwanesa morwa kukarera Jehova. Nye twa hepa kudiworoka asi Jehova naJesus yiwo natu hara po unene. (Mat. 10:37) Twa hepa kudimburura asi Satana kuvhura kuruganesa eharo lyetu kovanekoro yipo tu teze po ulimburukwi wetu kwaJehova. Tu tarurureni maukaro gamwe omu mwa hamena marwaneso gokutunda kovanekoro nomu natu ga lididimikira.

7. Ngapi ava va kwara vahapuli nava vhura kutara ukaro wawo?

⁷ Bibeli kwa rondora asi ava ngava kwara ‘ngava ligwanekera nomaudigu gomouzuni ou.’ (1 Kol. 7:28) Nsene wa kwara muhapuli ove ngo ligwanekera nomaudigu mononkwara doge. Nampili ngoso, wa hepa kutara yininke ngwendi moomu ayi tara Jehova. Kapi ya wapa kulizumba ndi kuligaunuka nomulikwali goge morwa asi kapi a karere Jehova. (1 Kol. 7:12-16) Nampili ngomu nturagumbo gomuhapuli na dira kulihameka mo mweyi yopampepo, nye simpe mukadendi ga hepa kumufumadeka morwa yige mutwe gepata. Ayo ya lifana simpe, mugara ga hepa kulikida eharo kwa mukadendi gomuhapuli.—Efe. 5:22, 23, 28, 29.

8. Mapuro musinke no lipura nsene mulikwali goge kuna kukupura o dire kulihameka mo unene mokukarera Jehova?

⁸ Ngapi nsene mulikwali goge kuna kukupura o dire kulihameka mo unene mokukarera Jehova? Pasihonena, munazinyetukadi gumwe kwa mu tanterere mugara ngwendi asi ga hepa tupu kuza mokuzuvhisa mazuva gongandi. Nsene nove kuna kara moukaro wokulifana, lipura asi: ‘Mulikwali gwange kuna kupura nge asi ni hageke kukarera Jehova ndi? Nsene kapisi yimo, kuvhura ni  rugane eyi ana kupura nge ndi?’ Nsene o kara nonondunge kapi ngo kara nomaudigu gomanzi mononkwara deni.—Fil. 4:5.

9. Ngapi Vakriste nava ronga vana vawo va fumadeke vakondi vawo wovahapuli?

⁹ Kuronga vanona kuvhura kukara udigu nsene mulikwali goge muhapuli. Nye nampili ngoso, wa hepa kuronga vana woge va limburukwe mpango ezi asi: “O fumadeke oguho nonyoko.” (Efe. 6:1-3) Nye ngapi nsene mulikwali goge kapi a kwama nompango domoBibeli? Tura po sihonena sosiwa pokufumadeka mulikwali goge. Gazadara ko yikara yendi yoyiwa nokumupandura koyininke nayinye yoyiwa ga ku ruganena. Nyokera po kuuyunga momudona mulikwali goge komeho zovana woge. Nye mevango lyoyo va fatwilira asi nkenye muntu ga hepa kutokora nsene asi ta karere Jehova. Nkareso zongwa zovanona kuvhura kukoka vakurona wovahapuli va wize koukareli wousili.

10. Ngapi mulikwali goMukriste na ronga vana vendi usili womoBibeli?

¹⁰ Poyiruwo yimwe mulikwali gomuhapuli kuvhura a tokore asi vanona va hepa kulihameka moyipito yosipagani ndi va va ronge marongo goyimpempa. Vanturangumbo vamwe kuvhura kunyokesa vakadi vawo mokudira kulironga novana vawo Bibeli. Nampili ngoso mukadi goMukriste ga hepa kupapara nompito mokuronga vana vendi. (Yirug. 16:1; 2 Tim. 3:14, 15) Pasihonena, mugara gomuhapuli kuvhura a nyokese mukadendi mokulironga Bibeli novana vendi ndi kuza nawo  komapongo. Age ga hepa kufumadeka etokoro lyamugara gwendi, nye simpe ga hepa kuronga vana vendi nsene pana moneka mpito. Ano monkedi ozo, vanona ngava lironga kuhamena Jehova. (Yirug. 4:19, 20) Vanona owo va hepa kutura po matokoro gavene mokukarera Jehova.—Deut. 30:19, 20. *

11. Yisinke nayi vhura kureta udigu pokatji koge novanekoro wovahapuli?

¹¹ Apa twa tamekere kulironga noNombangi daJehova, nampo kapi twa tanterere ko vekoro. Ngomu lya ya nkondoparere epuro lyetu twa ya dimbwilire asi twa hepa kuvatantera ko kuhamena epuliro lyetu. (Mar. 8:38) Nsene asi oyo ya reta udigu pokatji koge nekoro lyoge lyovahapuli, tarurura eyi wa hepa kurugana nokukwaterera koulimburukwi woge.

12. Morwasinke vanekoro wovahapuli nava tu rwanesera, nye ngapi natu vhura kuvalikida nkenda?

¹² Kara nonkenda kovanekoro wovahapuli. Ose tuna hafa kweyi twa diva usili womoBibeli. Nye nampili ngoso vanekoro kuvhura va gazare asi kwa tu pukisa ndi kwa hama koukarelikarunga woukorokotji. Awo kuvhura va gazare asi kapi twa va hara morwa kapi atu dana kumwe nawo mapwizumuko. Ntani kuvhura va kare nowoma asi eparu lyetu ngali kara mosiponga. Twa hepa kuhetekera ko kukwata egano omu ava tara yininke nokupurakena nawa koyinka yawo. (Yis. 20:5) Mupositoli Paurusa kwa hetekerere ko kukwata egano ‘vantu navenye kuliza noyikara yawo nayinye’ pokuvazuvhisira mbudi zongwa, nkedi ezi nose kuvhura kutuvatera.—1 Kol. 9:19-23.

13. Monkedi musinke twa hepa kuuyunga novanekoro wovahapuli?

¹³ Uyunga nougomoki. Bibeli kwa tanta asi: “Nonkango deni adi kare nkenye apa donongwa.” (Koros. 4:6) Twa hepa kuhundira mpepo zaJehova yipo tu kare noyikara yoyiwa nsene tatu uyunga novanekoro. Kapisi hepero ku litangwisa nawo kuhamena ukareli wawo woyimpempa. Nsene va tu koresa kweyi ava rugana ndi ava uyunga twa hepa kuhonena vapositoli. Mupositoli Paurusa kwa tjenge asi: “Va tu rundire, nye ose tatu va uyungire momuwa.”—1 Kol. 4:12.

14. Mauwa musinke atu gwanene mo pokukara nonkareso zongwa?

¹⁴ Kara nonkareso zongwa. Kuuyunga nougomoki kutuvatera tu kare nombili novanekoro, nye nkareso zetu zongwa yizo azi va kundama po unene. (Resa 1 Peturusa 3:1, 2, 16.) Kupitira mosihonena soge, yi likida kovanekoro woge asi Nombangi daJehova kuhafera nonkwara donongwa, kurera vana vawo, kuparuka eparu lyokukuhuka ntani awo kwa kara noruhafo. Nampili vekoro lyetu va dire kutambura usili, ose kuvhura kukara noruhafo morwa twa diva asi nkareso zetu zongwa kuhafesa Jehova.

15. Ngapi natu liwapaikira maukaro aga naga retesa po ediro kulizuvha?

¹⁵ Liwapaikira pomuhowo. Gazadara ko ukaro ou nau vhura kureta ediro kulizuvha nomu noukohonona po. (Yis. 12:16, 23) Munazinyetukadi gomoAustralia kwa tanta asi: “Otamweyi zange kwa rwanesere usili. Komeho zo kuuyunga nawo, ose ngatu kanderere kwaJehova a tu vatere mokukauyunga nawo monkedi zongwa. Ose ngatu liwapaikire yirongwa, mokuka zogera nawo monkedi  zombili. Ntani ose kwa sesupikire siruwo setu mokudira kuzogera yirongwa yokuhamena ukarelikarunga.”

16. Ngapi no nyokera po kulizuvha asi kapi oku hafesa vekoro lyoge?

¹⁶ Yimo, kapi to vhuru kukandana po madiro kulizuvha novanekoro wovahapuli. Marwaneso kuvhura kukuninkisa o lizuvhe unzoni, unene po morwa wa hara ekoro lyoge ntani wa hara kuvahafesa. Nsene yimo o lizuvhu ngoso, kondja mokulimburukwa Jehova unene kupitakana vekoro lyoge. Mokuyirugana oyo, ayo ngayi vatera vekoro lyoge va ya dimburure omu ya kara mulyo kukarera Jehova. Nye diworoka asi kapi to vhuru kusininika wopeke va tambure usili. Va vatera va dimburure mauwa aga aga tundu mokukwama nonzira daJehova. Karunga gwetu geharo kwa va pa mpito zokulifana mokuhorowora nsene asi tava mu karere.—Jes. 48:17, 18.

17, 18. Yisinke nayi kuvatera o lididimike nsene gumwe gekoro a hageka kukarera Jehova?

¹⁷ Nsene gumwe gekoro va mu gusa mombunga ndi a liguse mo mwene mombunga, ayo kureta kukora morwa kwa fana ngwendi kuna ku tu rufuro. Ngapi no vhura kulididimikira kukora oko?

¹⁸ Demenena kelikwamo lyoge lyopampepo. Litulira po siruwo sokuresa Bibeli nkenye apa, kuliwapaikira komapongo, kulihameka mokuzuvhisa nokukanderera o gwane nonkondo dokulididimikira. (Juda 20, 21) Nye ngapi nsene o lizuvha asi kapi ono kuyirugana nomutjima nagunye? Ya ha ku fisa unye. Elikwamo lyewa lyopampepo ngali kuvatera mokupangera malizuvho goge. Tarurura sihorokwa somutjangi gEpisarome 73. Posiruwo simwe age kwa mu karerere udigu kupangera magazaro nomalizuvho gendi. Nye kukarera Jehova ya mu vaterere a kare nomutaro gomuwa. (Epis. 73:16, 17) Kukarera Jehova noulimburukwi kuvhura kukuvatera nove.

19. Ngapi no likida efumadeko kewapaiko lyaJehova lyokugusa muntu mombunga?

¹⁹ Kwatesa ko episuro lyokutunda kwaJehova. Ewapaiko lyendi kuvhura kuretera mauwa navenye kukwatera mo ava va zona nampili ngomu ya kara udigu. (Resa Vahebeli 12:11.) Pasihonena, Jehova kwa tu pa evyukiso asi tu dire ‘kukara sinanga nankenye ogu’ ga dira kulitezurura. (1 Kol. 5:11-13) Nampili ngomu ya kara udigu, twa hepa kunyokera po kukara nogu va gusa mombunga yi kare asi kumubela ndi kumutjangera nombudi.

20. Ehuguvaro musinke natu vhura kukara nalyo?

²⁰ Kara nehuguvaro. Eharo “kuhuguvara nayinye” yipo nye kuvhura tu kare nehuguvaro asi ava va siga usili ngava ka tengura. (1 Kol. 13:7) Nsene o dimburura asi gumwe gekoro lyeni kuna kutura po marunduruko, mukanderera po yipo Jehova a mu vatere a tambure ezigido lyendi eli asi: “Tengura kwange.”—Jes. 44:22.

21. Yisinke no rugana nsene vekoro lyoge va kurwanesa morwa kukwama Jesus?

²¹ Jesus kwa tente asi nsene tu hara vantu unene kumupitakana, ose kapi ngatu kara nomulyo kwendi. Nye, age ga kere nehuguvaro asi varongwa vendi ngava kara nouradi mokumulimburukwa nampili momarwaneso govanekoro. Nsene asi ekoro lyoge kukurwanesa morwa kuna kukwama Jesus, huguvara mwaJehova a kuvatere o lididimikire. (Jes. 41:10, 13) Kara noruhafo pokudiva asi Jehova naJesus kuvahafesa eyi o rugana ntani ngava ka ku futa komeho.