1, 2. Sininke musinke sa kara nosiponga unene, ntani yilye ga si retesere po?

NOTEREFONA nonoramba dorutjeno nomatuwa kuna kara yininke yimwe eyi yina kurerupika maparu govantu. Nampili ngoso, mauta nonoboma nomakanya ntani nayimwe hena kuna kutura maparu govantu mosiponga. Nye kosili sininke simwe esi sa kara nosiponga unene kupitakana yininke nayinye oyo. Sininke musinke oso? Aso kuna kara yimpempa. Yimpempa kutanta asi kuuyunga yininke ya hana asi usili mokuzeda muntu ndi mokumugombeka. Yilye ga hovere kutanta yimpempa? Jesus kwa tente asi: “‘Muzonaguli’ yige ‘guhya yimpempa.’” (Resa Johanesa 8:44.) Siruwoke ga hovere kutanta yimpempa?

² Satana kwa tente yimpempa nomvhura mayovi da ka pita mosikunino saEdeni. Adamu naEva kwa haferere eparu mosikunino sina ga va tulire Karunga. Satana ga divire mpangera ezi Jehova ga tanterere oAdamu naEva asi nsene va lya yiyimwa “yokositji esi asi gava ediwo lyeyi yoyiwa neyi yoyidona,” ngava fa. Nampili ngoso, age kwa ruganesere ezoka li tantere Eva asi: “Ndangako asi ngomu fe one [yimpempa yokuhova]. Karunga kwa yi tantera eyi morwa ga diva asi nsene ngomu lya ko, neisi ngomu gwana nondunge, ngomu mu fane mokudiva yoyiwa neyi yoyidona.”—Gen. 2:15-17; 3:1-5.

3. Morwasinke natu uyungira asi Satana kwa rugene sininke sosidona unene, ntani ngapi omu ya tu kundama?

 ³ Satana kwa rugene sininke sosidona unene morwa ga yi divire nawa-nawa asi, nsene Eva a lya kosiyimwa oso, nga fa. Ano konyima Adamu naEva kapi va limburukwire kompangera zaJehova makura tava fu. (Gen. 3:6; 5:5) Kutunda pena ga zonene Adamu, ‘nomfa kwa lihanena movantu mudima.’ Ano “nomfa ngadi pangere vantu navenye, navaava va dilire kuzona moomu ga zonene Adamu.” (Rom. 5:12, 14) Ngoyitundwamo, ose kapi twa sikilira mo ntani kapi atu paruka narunye ngamoomu ga yi harerere Karunga. Naina meparu muna zura “upyakadi noudigu,” ntani vantu ava va kara noukanguki wouwa yiwo velike ava ka sika ponomvhura 70 ndi 80 ngoso. (Epis. 90:10) Yininke nayinye oyo kutuhorokera morwa yimpempa yaSatana.

4. (a) Mapuro musinke natu ka konakona? (b) Kuliza nEpisarome 15:1, 2, yilye gokuvhura tupu kukara kaume kaJehova?

⁴ Jesus kwa uyungire asi Muzonaguli “kapi ga kara mousili, yeeyi usili mwendi mutupu.” Naina, usili simpe mutupu mwaSatana morwa age kuna kutwikira ‘kupukisa uzuni naunye’ noyimpempa yendi. (Ehor. 12:9) Nye, ose kapi tuna hara Muzonaguli a tu pukise. Tu konakoneni mapuro gane aga naga tu vatera. Ngapi omu Satana ana kupukisa vantu? Morwasinke ava kumbagerere vantu? Ntani, ngapi omu natu ‘uyunga usili’ nkenye apa, yipo tu dire kuzumbanesa elikwatakano lyetu naJehova ngwendi Adamu naEva?—Resa Episarome 15:1, 2.

5. Ngapi omu Satana ana kupukisa vantu?

⁵ Mupositoli Paurusa ga yi divire asi ose kuvhura ‘kufunda Satana, yeeyi magano gendi twa ga diva.’ (2 Kol. 2:11) Ose twa yi diva asi uzuni mudima kukwatera mo maukarelikarunga goyimpempa nomaupolitika nonongesefa dononene, kwa kara mepangero lyoMuzonaguli. (1 Joh. 5:19) Yipo nye, ayo kapi ayi tu tetukisa apa Satana nonompepo dendi donondona ava ruganesa vanamakuto ‘mokukumbagera.’ (1 Tim. 4:1, 2) Pasihonena, vantu ava va kara nonongesefa dononene kuruganesa matjingiso goyimpempa yipo va randese yininke yosiponga nokufukilira mo vantu.

6, 7. (a) Morwasinke vampitisili womaukarelikarunga ava ava rongo yimpempa va karera nousima wounene? (b) Yimpempa musinke wa zuvha eyi ava rongo vampitisili womaukarelikarunga?

⁶ Vampitisili womaukarelikarunga ava ava rongo yimpempa kwa kara nousima wounene morwa awo kutura maparu govantu mosiponga. Nsene muntu a tambura erongo lyoyimpempa nokurugana eyi ga nyenga Karunga, kuvhura nga dire kukagwana mwenyo gwanarunye. (Hos. 4:9) Jesus ga yi divire asi vampitisili womaukarelikarunga momazuva gendi ngava kumbangere vantu. Yipo ga vyukilire kuvatantera asi: “Ani nane vakwetu, one valirongi womatjangwa noVafalisayi, vayilipaki one! One kuvindakana sirongo nefuta, asi mu tezwilise po nampili gumwe. Ano eyi na litezurura, tomu mu ninki hena a hamene koMundiro gwanarunye [ezonaguro lyanarunye], a mu pitakane hena nyonevene pwaruvali!” (Mat. 23:15) Jesus kwa tente asi vampitisili owo womaukarelikarunga kwa lifene naguhyawo Muzonaguli, ogu za singonona Bibeli asi “mudipagi.”—Joh. 8:44.

⁷ Naina mouzuni muna vhuka vampitisili womaukarelikarunga, vamwe kuvatumbura asi vapastore ndi varuti navamwe hena ngoso. Ngwendi Vafalisayi, awo ‘kufofera usili’ womoNonkango daKarunga ntani “awo kwa  pirura usili waKarunga u kare yimpempa.” (Rom. 1:18, 25) Awo kuronga yimpempa asi mwenyo gomuntu kapi agu fu ntani asi apa a fu muntu kumuhampurukurura. Awo kuronga hena asi Karunga kutambura wokulikwara mugara nomugara ndi mukadi nomukadi.

8. Yimpempa musinke ngava divisa vanapolitika, nye ose yisinke twa hepa rugana?

⁸ Vanapolitika nawo kuna kukumbagera vantu. Yimpempa yimwe yoyinene eyi yina kuwiza kuna kara apa vanapolitika ngava divisa asi: “Nayinye mompora kutupu upyakadi.” Ano “yipo ngali va gwanena ezonauko poopo.” Twa ha va pulisira va tu pukise tu dire kudimburura asi ose kuna kuparuka moyiruwo yoyidona. Ose twa “diva nawa-nawa asi ezuva lyaHompa ngali wiza, moomu a wiza muwidi masiku.”—1 Tes. 5:1-4.

9, 10. (a) Morwasinke ava kumbagerere vantu ntani yitundwamo musinke ayi kara? (b) Yisinke natu diworoka kuhamena Jehova?

⁹ Apa yikwakonentu ayi ya vhuka, vantu kuyiruganesa unene. Eyi kwa lifana noyimpempa. Naina, kapisi vanamakuto velike ava tanta yimpempa nokuyihanesa. Yimpempa kuna kara ruha romparukiso zovantu mouzuni ou. Sirongwa sosiparatjangwa “Eyi atu kumbagerere” ga tjanga mutjangi Y. Bhattacharjee kwa tanta asi: “Yimpempa kwa ya kara ruha romparukiso zovantu.” Narunye vantu kukumbagera yipo va lipopere ndi va gwanene mo mauwa. Awo hena kukumbagera mokuhoreka mapuko gawo ndi nonzo edi va tura ntani yipo va gwane yimaliwa nayimwe ngoso. Sirongwa oso kwa tanta hena asi vamwe kapi ayi va digopere kukumbagera “vageni novarugani novakaume ndi vahali vawo.”

¹⁰ Yitundwamo musinke ayi kara morwa yimpempa oyo? Vantu kapi hena ava lihuguvara ntani malikwatakano kuyateka po. Pasihonena, gazadara ko tupu omu nayi guvisa mugara nsene asi mukadendi kulininkisa asi ga mu hara, nye age kuhondera. Ndi gazadara ko omu nayi guvisa mukadi nsene mugara gwendi kumuhepeka nokuhepeka vanona mokahorehore, nye povantu a lininkise asi age nturagumbo gomuwa. Nye, twa hepa kudiworoka asi vantu vangoso kapi tava vhuru kukumbagera Jehova, morwa “nayinye yeyi tupu, kwa lizara” komeho zendi.—Heb. 4:13.

11. Yisinke natu lirongera ko kosihonena saAnaniyasa naSafira? (Tara efano pepenuno 6.)

¹¹ Bibeli kwa simwitira omu ‘Satana ga pangerere nomutjima’ dovalikwali vamwe yipo va kumbagere Karunga. Ananiyasa naSafira kwa here kukumbagera vapositoli. Awo kwa randesere epya lyawo limwe, nye yimaliwa tupu yoyisesu yiyo va twere kovapositoli. Valikwali owo kwa here kulimonekesa kwava womombungakriste, yipo va tanterere vapositoli asi kuna gava nayinye. Nye, Jehova ga yi divire asi awo kwa kumbagerere yipo ga va tengekere.—Yirug. 5:1-10.

12. Yisinke ngayi horokera vanayimpempa ntani morwasinke?

¹² Ngapi omu Jehova a tara vanayimpempa? Satana nava ava mu honene pokutanta yimpempa ngava va zugumina “mekurudiva lyomundiro.” (Ehor. 20:10; 21:8; Epis. 5:6) Morwasinke? Morwa Jehova kuvatara asi kwato oku va lisigira ‘novarugani woyihuna.’—Ehor. 22:15.

13. Yisinke twa diva kuhamena Jehova, ntani yisinke ayi tu tumangeda tu rugane?

¹³ Bibeli kwa tanta asi: “Karunga kapi ga kara ngwendi muntu ogu a tanta yimpempa.” Azo kutanta hena asi: ‘Karunga kapi a vhuru kukumbagera.’ (Num. 23:19; Heb. 6:18)  Jehova kwa nyenga “eraka lyoyimpempa.” (Yis. 6:16, 17) Nsene tuna hara kumuhafesa, twa hepa kutanta usili nkenye apa. Eyi yiyo nye atu dilire ‘kulitantera-tantera yimpempa.’—Koros. 3:9.

14. (a) Ngapi omu twa lisiga nava va hamena komaukarelikarunga gapeke? (b) Faturura mpango ezi za kara mwaRukasa 6:45.

¹⁴ Ngapi omu twa lisiga nava va hamena komaukarelikarunga gapeke? Ose ‘kuliuyungira yousili.’ (Resa Sakaliya 8:16, 17.) Paurusa kwa fatwilire asi: ‘Ose kumoneka asi tu vakereli vaKarunga, pokuuyunga usili.’ (2 Kol. 6:4, 7) Jesus kwa tente asi: “Kana kupwagesa eyi ya zura momutjima.” (Ruk. 6:45) Yipo nye, muntu ogu va huguvara kupwagesa nonkango dosili nkenye apa. Age kuuyunga usili, yi kare asi kovageni novarugani vakwawo novakaume vakwawo ntani kovahali vendi. Tu tareni maukaro gamwe omu natu yi likida asi ose kuuyunga usili.

15. (a) Morwasinke ya karera epuko kurugana yoyidona mokahore-hore? (b) Yisinke nayi vatera vadinkantu va nyokere po makondjeso govakaume? (Tara nonkango dokonhi.)

¹⁵ Nsene ove mudinkantu, kuvhura yi ku digopere kulisiga novadinkantu ava ava dili kukarera Jehova. Oyo kwa ninkisa vadinkantu wovanzi va rugane yininke yoyidona mokahore-hore. Awo kumoneka ngwendi vantu wovawa apa ava kara novanekoro ntani komapongo, nye awo kurugana yoyidona apa ava kara novantu ava ava dili kukarera Jehova ntani apa ava ruganesa Intaneta. Kuvhura va uyunge nokupurakena konomusika donondona nokudwara yidwara yokudira kuwapera nokunwa unene marovhu ndi kuruganesa epangwe nokulivandekera mokahore-hore nayimwe hena ngoso. Monkedi zangoso, awo kukumbagera vakondi vawo novapuli vakwawo ntani Karunga. (Epis. 26:4, 5) Jehova ga yi diva nsene asi ose kuna ‘kumufumadekera konomurungu nye nomutjima detu ure nendi.’ (Mar. 7:6) Eyi yiyo ya karera nomulyo tu sikise mo nonkango domoYisewe asi: “Walye o kara nesupa lyovantu wovanzoni; nye o tjire nkenye apa HOMPA.”—Yis. 23:17. *

16. Yisinke twa hepa kurugana nsene kuna kutura mo ehundiro lyokulihameka mosirugana sosiruwo nasinye?

¹⁶ Nampo ono hara kukara muzuvhisi gokukarerera ndi kulihameka mosirugana sosiruwo nasinye, ngwendi kukarugana koBeteli.  Pokutura mo ehundiro, ya kara nomulyo asi o hungike momalimbururo goge kuhamena ukanguki noyilihafeso ntani nkareso zoge. (Heb. 13:18) Ngapi nsene wa rugana yininke yokunyata eyi wa dira simpe kutantera vakuronambunga? Papara evatero kwawo yipo o vhure kukarera Jehova nezwi lyewa lyokomutjima.—Rom. 9:1.

17. Yisinke natu rugana nsene varwanesi va tu puragera kuhamena vanavazinyetu?

¹⁷ Pasihonena, yisinke no rugana nsene epangero li hagekesa yirugana yokuzuvhisa mosirongo setu ntani nsene va ku kwata nokukupuragera kuhamena vapuli vakwetu? Kuvhura nye o va tantere nayinye ndi? Yisinke ga rugene Jesus apa mupangeli goVaroma ga mu puragerere? Age kapi ga mu limbwilire. Jesus kwa tulire pasirugana eyi za uyunga Bibeli asi pwa kara “siruwo sokumwena nosiruwo sokuuyunga.” (Muud. 3:1, 7; Mat. 27:11-14) Moukaro wangoso, hansa kumwena yipo tu dire kutura vanavazinyetu mosiponga.—Yis. 10:19; 11:12.

18. Yisinke no rugana nsene va ku pura vakuronambunga kuhamena munavazinyetu ogu ana tura nzo zonene?

¹⁸ Ngapi nsene gumwe mombungakriste a tura nzo zonene ntani ove ono yi diva? Vakuronambunga kuvhura va ku pure o va tantere eyi ono diva ko morwa awo kwa kara nositumbukira sokuzeresa mbungakriste. Yisinke no rugana, unene po nsene kuna hamene mo kaume koge gomunene ndi gekoro? Bibeli kwa tanta asi: “Nsene o tanta yosili, kuna hungike kurugana.” (Yis. 12:17; 21:28) Yipo nye, tantera vakuronambunga usili naunye, wa hana kuhoreka ko yimwe. Ya kara nomulyo kovakuronambunga mokudiva usili naunye yipo va dive asi ngapi omu nava vhura kumuvatera a tengwidire po elikwatakano lyendi naJehova.—Jak. 5:14, 15.

19. Yisinke ngatu ka zogera mosirongwa sokukwama ko?

¹⁹ Ndafita kwa kanderere asi Jehova ‘kwa hepa ko kwetu uhungiki nousili,’ eyi ayi tundu komutjima. (Epis. 51:6) Ndafita ga yi divire asi mokuninka asi tu uyunge usili, ya hepa kutundilira komutjima. Vakriste wousili awo “kuliuyungira yousili” nkenye apa. Nkedi zimwe hena omu natu likida asi twa lisiga nava va hamena komaukarelikarunga gapeke kuna kara pokuzuvhisa. Mosirongwa sokukwama ko ngatu ka zogera omu natu yi rugana oyo.