1, 2. Sirugana musinke va mu pere Josuwa konyima zonomfa daMosesa?

JEHOVA kwa tanterere Josuwa asi: “Muntu gwange Mosesa ana fu. Ove liwapaika, mu taguruke mukuro ogu gwaJorodana nezi mbunga nazinye, mu ze mosirongo esi na va pa Vaisraeli.” (Jos. 1:1, 2) Eli kwa kere elitjindjo lyenene kwaJosuwa ogu ga kere mukwafi gwaMosesa konyara nomvhura 40.

² Mokumona asi Mosesa kwa pitisilire Vaisraeli siruwo sosire, Josuwa nampo kwa kere nosinka asi kapi ngava mu tambura a kare mupitisili gwawo. (Deut. 34:8, 10-12) Buke zimwe kwa tanta kuhamena Josuwa 1:1, 2 asi: “Yi kare asi mosiruwo sanare ndi mosiruwo setu, aso kukara siruwo sosidigu apa muhoko agu gwana mupitisili gomupe.”

3, 4. Yisinke yina kulikida asi Josuwa kwa huguvarere mwaJehova ntani epuro musinke natu lipura?

³ Josuwa nampo kwa kere nowoma, nye konyima zomazuva gongandi ga tambwire mavyukiso gaJehova. (Jos. 1:9-11) Age kwa  huguvarere mwaJehova. Bibeli kwa likida asi Jehova kwa pitisilire Josuwa noVaisraeli kupitira momuengeli. Ayo kumoneka asi muengeli ogo nampo kwa kere MunwaKarunga gombeli ogu va singonona asi Nkango.—Ex. 23:20-23; Joh. 1:1.

⁴ Nevatero lyaJehova, Vaisraeli va ya tambwire Josuwa a kare mupitisili gwawo. Ose kuna kuparuka mosiruwo esi gana kuhoroka malitjindjo mombunga zaJehova, kuvhura tu lipure asi: ‘Ngomu zina kukura mbunga zaJehova, kuvhura tu huguvare mwaJesus ngoMupitisili gwetu ndi?’ (Resa Mateusa 23:10.) Tu tareni omu Jehova ga pitisilire vantu vendi poyiruwo apa ngaga horoka malitjindjo.

5. Yisinke ga ligwanekerere nayo Josuwa ngomu ga kere pepi nokusika koJeliko? (Tara efano pepenuno 22.)

⁵ Josuwa kwa mu horokerere sininke sokutetukisa apa tupu Vaisraeli va tagurukire mukuro gwaJorodana. Apa ga kere pepi nokusika koJeliko, ta ligwana nomugara ana kwaterere rufuro. Josuwa kapi ga divire mugara ogo, makura ta mu pura asi: “Ove kwetu wa hama ndi kononkore detu?” Ayo kwa tetukisire Josuwa apa mugara ogo ga lisingonwene mwene. Age kwa kere ‘Mupitisili govakwayita vaHOMPA,’ ogu ga liwapaikilire kupopera vantu vaKarunga. (Resa Josuwa 5:13-15.) Nampili ngomu sihorokwa oso asi likida moMatjangwa gamwe asi Jehova yige ga uyungisire Josuwa, ayo kulikida asi age kwa ruganesere muengeli ngomu nga yi rugana nkenye apa.—Ex. 3:2-4; Jos. 4:1, 15; 5:2, 9; Yirug. 7:38; Gar. 3:19.

6-8. (a) Morwasinke mapukururo gaJehova ga monekerere ngwendi ugova koVaisraeli? (b) Ngapi tuna yi diva asi mapukururo gena kwa kere gomawa ntani kwa ga geve posiruwo souhunga? (Tara nonkango dokonhi.)

⁶ Muengeli kwa tanterere Josuwa eyi ga hepere kurugana mokukafunda Jeliko. Pomuhowo, kwa monekere ngwendi kapisi mapukururo gomawa. Pasihonena, Jehova kwa geve mpangera asi vagara navenye va va rugane vamba, eyi ngano ya va ninkisire va dire kuza koyita mazuva gongandi. Ngoso aso kwa kere siruwo sosiwa mokurugana vamba vagara vena ndi?—Gen. 34:24, 25; Jos. 5:2, 8.

⁷ Nampo vakwayita owo kwa kere nosinka kuhamena omu ngava popera mapata gawo nsene ngadi va homokera nonkore dawo. Nye hararasi tupu, tava zuvhu mbudi asi: ‘Marungavero gaJeliko vana ga zedire unene morwa kusilika Vaisraeli.’ (Jos. 6:1) Sihorokwa oso kwava vaterere va huguvare mwaJehova.

⁸ Vaisraeli kwa va tanterere hena asi va ha ka homona Jeliko, nye va ka kunduruke sitata rumwe mezuva, momazuva gatano-nalimwe ntani rutano-naruvali, mezuva lyautano-nauvali. Vakwayita vamwe nampo kwa gazarere asi tava hepeke tupu siruwo sawo nononkondo dawo. Nye, Jehova ga divire konda zeyi ga yi ruganene. Pokukwama mapukururo gena kapi tupu ya nkondopekere epuro lyoVaisraeli, nye ya va poperere hena va dire kukarwa novakwayita vena vaJeliko wononkondo.—Jos. 6:2-5; Heb. 11:30. *

9. Morwasinke ya karera nomulyo kukwama mapukururo gokutunda kombunga zaJehova? Gava sihonena.

⁹ Yisinke natu lirongera ko kosihorokwa  esi? Poyiruwo yimwe ose kapi atu kwata egano nokonda deyi ava tulire po malitjindjo mombunga zaJehova. Pasihonena, nampo kapi ya tu hafesere apa va tulire po erunduruko lyepe kuhamena kuruganesa yikwakonentu mokuzuvhisa nokomapongo ntani pelirongo lyanyamwetu. Mauwa aga atu limonene morwa kukwama malitjindjo ogo, kunkondopeka epuro lyetu nokutuvatera tu twikire kukara mouumwe novanavazinyetu.

10. Yilye ga gendesere epongo eli va kere nalyo womombungagendesi moJerusarema?

¹⁰ Konyima zonomvhura 13 kutunda apa Koroneliusa ga ya kere Mukriste, Vajuda vamwe ava va ya kere Vakriste ngava tara vamba asi simpe mulyo. (Yirug. 15:1, 2) Apa moAntiyokiya mwa kere madiro kulizuvha kuhamena vamba, Paurusa kwa mu tumine a tware udigu owo kombungagendesi moJerusarema. Yilye ga gendesere Paurusa a tware mbudi ozo? Age kwa tente asi: “Ame kwa zililire ko, morwa kwa yi horwerere nge asi ni ze ko.” Eyi kulikida asi Kristusa yige ga gendesere mbungagendesi zi kohonone po udigu wina.—Gar. 2:1-3, NW.

11. (a) Yisinke va pulire sinzi soVakriste woVajuda kuhamena vamba? (b) Ngapi omu Paurusa ga yi likidire asi ga kwatesere ko etokoro lyovakuronambunga moJerusarema? (Tara nonkango dokonhi.)

¹¹ Kristusa kwa gendesere mbungagendesi mokuyizeresa asi kapi ya kere hepero koVakriste ava va kere asi kapisi Vajuda mokuvarugana vamba. (Yirug. 15:19, 20) Konyima zonomvhura dongandi kutunda apa va tulire po etokoro olyo, sinzi soVakriste woVajuda simpe ngava rugana vana vawo vamba. Apa vakuronambunga moJerusarema va zuvhire kovantu asi Paurusa kapi ana kukwama Veta zaMosesa, yipo va mu pere mavyukiso aga ga dilire kundindira. * (Yirug. 21:20-26) Awo kwa mu tanterere a ze novagara vane kontembeli yipo vantu va mone asi  Paurusa “kusikisa mo Veta nawa-nawa.” Paurusa ngano ga lipoperere pokuuyunga asi Vajuda vena woVakriste yiwo va dilire kukwata egano kuhamena vamba. Nampili ngoso, Paurusa ga kweme mapukururo govakuronambunga, morwa ga yi kwete egano asi awo kwa harerere vakareli vaKarunga va kare mouumwe. Kuvhura tu lipure asi: ‘Morwasinke Jesus ga pulisilire udigu wovamba u twikire nampili ngomu nomfa dendi da hagekesere po Veta zaMosesa?’—Koros. 2:13, 14.

12. Morwasinke nampo Kristusa ga sigire pa pite siruwo komeho zokukohonona po udigu wovamba?

¹² Vamwe kapi ava tambura usimbu malitjindjo aga aga horoka. Vakriste woVajuda kwa va gusire siruwo mokuyadimburura asi kapi hena va kere moVeta zaMosesa. (Joh. 16:12) Awo ngava twikire kugazara asi kurugana vamba kwa kere sidiviso esi ngasi likida asi muntu ga kere nelikwatakano naJehova. (Gen. 17:9-12) Ano vamwe kwa tjilire Vajuda vakwawo asi ngava va hepeka nsene va hageka kukwama veta zovamba. (Gar. 6:12) Nye, ngomu sa ya pitire siruwo, Kristusa kwa twikilire kuvapa mapukururo kupitira monombilive daPaurusa.—Rom. 2:28, 29; Gar. 3:23-25.

13. Yisinke nayi tu vatera tu kwatese ko Jesus monkedi omu a pitisire?

¹³ Nsene kapi tuna kukwata egano konda zeyi pana horokere malitjindjo, ya wapa kugazadara ko omu Jesus ga pitisilire vantu vaKarunga mosiruwo sanare. Yi kare asi mosiruwo saJosuwa ndi mosiruwo sovapositoli, Jesus nga gava mavyukiso mokupopera vantu vaKarunga nokukondopeka epuro lyawo nokuvavatera va twikire kukara mouumwe.—Heb. 13:8.

14-16. Ngapi mavyukiso aga atu gwana ‘komukareli gokulimburukwa gonondunge’ aga likida asi Jesus ga kara nosinka kwetu?

¹⁴ Mavyukiso aga atu gwana ‘komukareli gokulimburukwa gonondunge’ kulikida asi Jesus kutupakera sinka. (Mat. 24:45) Marc, guhya govana vane kwa tanta asi: “Satana kuna kukondja mokutengwida nombungakriste monyima pokuhomokera mapata. Nye, mavyukiso aga twa gwana kuhamena kurugana ukareli wepata nkenye sivike, kuvatera vakurona va kunge mapata gawo.”

¹⁵ Mavyukiso gaKristusa kutuvatera tu nkondopeke epuro lyetu. Mukuronambunga gedina Patrick kwa tanta asi: “Pomuhowo, vamwe kapi ngava hafere kukaponga kotumbungagona tomoyirugana yokuzuvhisa mosikondovike. Nye, ewapaiko olyo kulikida asi Jesus ga kara nosinka kwanavenye womombungakriste. Vanavazinyetu wonomuga nava ngava dili kupwaga unene mokuzuvhisa, nawo ngesi kuna kuhafera kuzuvhisa, ntani awo kuna kukura pampepo.”

¹⁶ Kristusa kutuvatera hena tu demenene kosirugana somulyo esi vana kurugana mouzuni mudima. (Resa Marukusa 13:10.) Mukuronambunga gomupe gedina André, kukwama nkenye apa malitjindjo gomombunga zaJehova. Age kwa tanta asi: “Erunduruko lyokusesupika Vabeteli, kutudiworokesa asi siruwo esi kuna kara songenderera ntani twa hepa kulitura mo mokuzuvhisa.”

17, 18. Morwasinke ya karera nomulyo kugazadara ko komauwa aga tuna kugwana morwa kukwama marunduruko?

¹⁷ Mavyukiso aga atu gwana kwaHompa gwetu Kristusa kuna kutuvatera ngesi ntani ngaga ka tu vatera komeho. Gazadara ko komauwa aga o gwanene mo pokukwama mavyukiso  gomape. Poukareli weni wepata kuvhura mu zogere omu mwa gwanena mo mauwa momarunduruko gomape kuhamena sirugana sokuzuvhisa ntani mapongo gomosivike.

¹⁸ Nsene tu diworoka asi kukwama mavyukiso gokutunda kombunga zaJehova kuturetera mauwa, ngayi tu rerupira kugakwama ntani ngatu yi rugana noruhafo. Pasihonena, erunduruko lyokusesupika yimbapiratjangwa kutuvatera tu dire kuruganesa yimaliwa yoyinzi, ano kuruganesa yikwakonentu kutuvatera tu hanese unene mbudi zoUhompa. Nsene kuvhura, tu hetekereni ko kuruganesa unene yimbapiratjangwa yokoIntaneta nonovidiyo. Ezi kuna kara nkedi zimwe ezi natu kwatesa ko Kristusa mokudira kuruganesa yigava momudona.

19. Morwasinke natu kwamena mavyukiso gaKristusa?

¹⁹ Nsene tu kwama mavyukiso gaKristusa, ngayi nkondopeka epuro lyovanavazinyetu ntani nouumwe wetu. André kwa uyunga kuhamena erunduruko lyokusesupika Vabeteli asi: “Monkedi ezi va tambwire erunduruko olyo, kwa vatera nge ni huguvare [mwaKristusa] nokufumadeka [Vabeteli owo]. Awo kukwama etemba lyaJehova pokutambura noruhafo nkenye sirugana esi vana va pe.”

20, 21. (a) Morwasinke natu huguvarera Mupitisili gwetu Kristusa? (b) Epuro musinke ngatu ka zogera mosirongwa sokukwama ko?

²⁰ Mupitisili gwetu Jesus Kristusa ntaantani nga ka ‘funde momunene.’ (Ehor. 6:2; Epis. 45:4) Ngesi age kuna kuwapaikira vakareli vaKarunga kosirugana sosinene sokukawapukurura evhu ntani nokukaronga mamiliyona govantu ava ngava ka vhumbura.

²¹ Yi kare asi maukaro musinke natu ligwanekera nago, nsene tu huguvara Mupitisili gwetu Kristusa, age nga tu vatera tu ka sike mouzuni woupe. (Resa Episarome 46:1-3.) Poyiruwo yimwe, kuvhura yi tu digopere kutambura malitjindjo ndi marunduruko, unene po nsene kapi tuna yi ndindire. Ngapi natu twikira kukara nombili ntani nepuro mwaJehova momaukaro ogo? Epuro olyo ngatu ka li zogera mosirongwa sokukwama ko.