1. Morwasinke natu karerera Jehova gelike?

TWA hepa kukarera Jehova gelike morwa yige Musiti gwetu ntani yige ga tu pa eparu. (Ehor. 4:11) Nye ayo kapisi ureru kuyirugana. Nampili ngomu twa hara Jehova nokumufumadeka, yininke yimwe kuvhura kutuninkisa tu dire kumukarera gelike. Tu zeni tu ka konakone omu ayi vhuru kuhoroka. Nye pomuhowo tu konakoneni eyi ayi tanta kukarera Jehova gelike.

2. Kuliza naExodus 34:14, yisinke ngatu rugana nsene twa hara Jehova?

² Kuliza noBibeli, kuhara Jehova unene kutanta asi twa hepa kumukarera gelike. Ose kapi tatu vhuru kuhara unene nkenye ogu ndi nkenye eyi kupitakana omu twa hara Karunga.—Resa Exodus 34:14.

3. Nokonda musinke donongwa deyi natu karerera Jehova gelike?

³ Ose twa kara nonokonda donongwa deyi natu karerera Jehova gelike morwa maumbangi aga twa lironga kumuhamena. Ose twa lironga yikara yendi yoyiwa. Twa diva eyi ga hara neyi ga nyenga. Ose twa ya lironga sitambo sendi kovantu ntani kusikwatesa ko. Ose kulizuvha mfumwa kweyi ga tu pulisira tu kare vakaume vendi. (Epis. 25:14) Yininke nayinye eyi atu lirongo kuhamena Musiti gwetu kutuvatera tu mu hedere pepi.—Jak. 4:8.

4. (a) Yisinke a rugana Satana yipo tu dire kuhara unene Jehova? (b) Yisinke natu ka zogera mosirongwa esi?

⁴ Satana yige a pangere uzuni ou. Age kuruganesa yininke  eyi ya kara mo yipo vantu va yi mone asi ayo mulyo unene ntani nokuninkisa vantu yi va karere udigu kunyokera po madowo gomadona. (Efe. 2:1-3; 1 Joh. 5:19) Sitambo sendi kuna hara asi tu hare yininke yapeke yipo tu dire kuhara unene Jehova. Tu zeni tu zogere nonkedi mbali omu Satana a yi rugana. Zokuhova, age kutuninkisa tu kondjere emona, ano zauvali, age kutuninkisa tu horowore yilihafeso yoyidona.

5. Morwasinke natu nyokerera po kuhara unene yimaliwa?

⁵ Natuvenye kwa hara kukara nonondya dokugwanena po noyikoverero yoyiwa ntani nevango lyewa oku natu tunga. Nye nampili ngoso, twa hepa kunyokera po kuhara unene yimaliwa. Sinzi sovantu naina, kwa “dowokera yimaliva” ntani noyininke yoyiwa eyi ya kara mouzuni. (2 Tim. 3:2) Jesus ga yi divire asi varongwa vendi nawo kuvhura ngava tameke kuhara yimaliwa. Age kwa tente asi: “Muntu simpe a vhuru kukerera ohekuru vavali, morwa na nyenga po gumwe, ta hara po mukwawo, ndi na korera kwagumwe, ta nusa po mukwawo. None nokuvhura si kukerera Karunga nomamona.” (Mat. 6:24) Muntu ogu a karere Jehova ntani nokuruganesa siruwo sendi sosinzi mokukondjera emona, ogo ngoso kuna kukarera vahekuru vavali. Apa a yi rugana, age ngoso kapi ana kukarera Jehova gelike.

6. Yisinke natu lirongera ko kononkango edi Jesus ga tanterere mbungakriste zaRawodikeya?

⁶ Koyiha yomvhura 100, vantu womombungakriste zaRawodikeya kwa li kangangere asi: “Ame ni ngawo, na ngawopa unene, nayimwe si ya pira nge.” Nye Jehova naJesus kwa va tere asi awo ‘vanehudi novanaruhepo nepongo novatwiku, awo hena rutuutu.’ Jesus kapi ga va  pukwilire morwa yeeyi va kere nongawo, nye age kwa va pukwilire morwa awo kwa here unene yimaliwa eyi ya va ninkisire va ture elikwatakano lyawo naJehova mosiponga. (Ehor. 3:14-17) Nsene tuna dimburura asi ose kuna kutameka kuhara yimaliwa, twa hepa kurugana ko yuma. (1 Tim. 6:7, 8) Nsene tu dira kurugana ko yuma, ngatu tameka kuhara yininke nayopeke, ntani Jehova kapi nga tambura ukareli wetu. Age kapi ga hara “marumbasano.” (Deut. 4:24) Yisinke ayi likida asi ove kwa hara unene yimaliwa?

7-9. Yisinke ono lirongere ko kosihorokwa somukuronambunga gedina David?

⁷ Tu konakoneni sihonena somukuronambunga gedina David ogu ga tunga moUnited States. Age kwa tanta asi age nga rugana unene. Mongesefa ezi nga rugana, age kwa mu pere posa zonene ntani vantu kwa mu divire asi age gumwe ogu ga diva nawa kurugana sirugana oso mosirongo sawo. David kwa tanta asi: “Ame kwa gazarere asi Jehova yige ana kutungika nge.” Nye yosili Jehova yige ga mu tungikire ndi?

⁸ David ga ya dimbwilire asi yirugana yendi kuna kukundama elikwatakano lyendi naJehova momudona. Age kwa tanta asi: “Apa ngani kara komapongo nomokuzuvhisa, ame ngani gazara maudigu gokoyirugana. Ame ngani tambura yimaliwa yoyinzi, nye na kere nosinka unene, ntani twa kere nomaudigu mononkwara detu.”

⁹ David ga ya dimbwilire asi ga hepere kutokora asi yipi ya kere po nomulyo kwendi. Age kwa tanta asi: “Ame kwa rugene ko yuma yipo ni wapukurure ukaro wange.” David kwa tanterere muhona gwendi asi ana hara kusesupika siruwo esi a  ruganesa koyirugana. Yisinke ya horokere? Muhona gwendi kwa mu tjidire mo moyirugana. Yisinke ga rugene ko David? Age kwa tanta asi: “Ezuva lyokukwama ko, ame kwa tulire mo ehundiro yipo ni kare muzuvhisi gokuvatera.” Nage namukadendi kwa tamekere kurugana yirugana yokuzeresa yipo va lirerese ko. Konyima zosiruwo age kwa tamekere uzuvhisi wokukarerera ntani mukadendi nage kwa rugene yokulifana. Valikwali ava kwa tokwere kurugana sirugana esi ava mono vantu asi kwato mulyo, nye sirugana esi kapisi yiso sa kara nomulyo kwawo. Nampili ngomu ava dili kugwana yimaliwa yoyinzi ngesi, nye awo kugwana nsonso ezi va hepa nkenye kwedi mokufutira yihepwa yawo. Awo kwa hara kutura Jehova muhowo meparu lyawo, ntani va yi limonena asi Jehova kupakera mbili ava ava tura Uhompa wendi muhowo.—Mat. 6:31-33.

10. Ngapi omu natu takamesa mutjima gwetu?

¹⁰ Yi kare asi twa kara noyimaliwa yoyinzi ndi yoyisesu, natuvenye twa hepa kutakamesa nomutjima detu. Ngapi natu yi rugana? Wa ha hara unene emona. Ntani wa ha pulisira yirugana yoge yi kare mulyo unene kupitakana ukareli woge kwaJehova. Ngapi omu no yi diva asi ove ono dowokere yimaliwa? Lipura mapuro aga asi: ‘Ame nkenye apa kugazara kuhamena yirugana yange apa ani kara komapongo nomokuzuvhisa ndi? Ame nkenye apa kugazara nsene asi ngani kara noyimaliwa yokugwanena po komeho ndi? Yimaliwa noyiweka kuna kureta maudigu mononkwara dange ndi? Ame kuvhura ni tambure sirugana esi ava mono vantu wovanzi asi kwato mulyo, yipo ni gwane siruwo sosinzi mokukarera Jehova ndi?’ (1 Tim. 6:9-12) Apa no lipura mapuro ogo, diworoka asi Jehova kwa tu hara ntani age kwa tumbwidira ava ava mu karere gelike asi: “Ame kapi ngani ku zumba ndi ni ku sige.” Eyi yiyo ya ninkisire mupositoli Paurusa a tjange asi: “Nyokeni edowo lyoyimaliva.”—Heb. 13:5, 6.

11. Ngapi omu yilihafeso nayi vhura kukundama muntu?

¹¹ Jehova ana hara tu hafere eparu, ano yilihafeso kutuvatera tu hafere eparu. Bibeli kututantera asi: “Sosiwa po esi ga hepa kurugana mugara sokulya oku ta nu a bodjane eyi ga pongaika.” (Muud. 2:24) Nye, yilihafeso yoyinzi naina kuvhura kutukundama momudona. Ayo kuvhura kuninkisa vantu wovanzi va tameke kuhara eyi za silika Bibeli.

12. Kuliza no-1 Vakolinte 10:21, 22, morwasinke natu horowera nawa yilihafeso?

 ¹² Ose tuna hara kukarera Jehova gelike, yipo nye, kapi tatu vhuru kukara “pompanda zaHompa,” makura tu kare hena “pompanda zonompepo donondona.” (Resa 1 Vakolinte 10:21, 22.) Apa vantu ava li kumwe, ayo kulikida asi awo vakaume. Nsene tu horowora yilihafeso yonyanya, youmpure, yoruhonda ndi omu mwa hamena yikara yimwe yoyidona, ayo kwa fana ngwendi asi ose kuna kulya kumwe nononkore daKarunga, edi dina wapaike nondya odo. Ano ngoyitundwamo, ayo kapi ngayi tu kundama tupu nyamwetu, nye hena ngayi zonagura po elikwatakano lyetu naJehova.

13-14. Kuliza naJakopo 1:14, 15, morwasinke twa hepera kutakamesa koyilihafeso eyi atu horowora? Yi fanekesa.

¹³ Tu tareni nonkedi dimwe hena omu yilihafeso ya fana ngwendi nondya. Apa atu li nondya, ose kuhorowora eyi natu tura mokana. Nye konyima zokumina, kapi tatu vhuru kutokora omu nondya nadi kundama rutu rwetu. Nsene tu lya nondya donongwa, ngadi tu vatera tu kare tuna kanguka, nye nondya donondona ngadi tu retera mauvera. Ayo kugusa siruwo komeho tu ya dimburure omu nondya dina kukundama rutu rwetu.

¹⁴ Mokulifana, apa atu tokora kulihafesa, ose twa kara nononkondo dokuhorowora eyi natu hafera. Konyima zoyo, yilihafeso eyi atu horowora kukundama magazaro getu nomalizuvho getu. Yilihafeso yoyiwa kuvhura kutupwizumukisa, nye yoyidona kuturetera udona. (Resa Jakopo 1:14, 15.) Yitundwamo yoyilihafeso yetu kuvhura tu dire kuyimona ngesi, nye ngayi li horowora konyima zosiruwo. Eyi yiyo nye Bibeli azi tu rondwere asi: “Walye omu likumbagere! Karunga kapi a litarere asi va mu sense. Yeeyi nkenye eyi a kunu muntu, yiyo nga zangura yooyo. Ogu a kunu mepya lyomadowo gendi, nga zangura ezonauko.” (Gar. 6:7, 8) Eyi yiyo nye ya karera nomulyo tu nyokere po yilihafeso nainye omu mwa hamena yininke eyi ga nyenga Jehova.—Epis. 97:10.

15. Uhwi musinke wouwa ga tu pa Jehova?

¹⁵ Sinzi sovakareli vaJehova kuhafera kutarera elikwamo lyo-JW Broadcasting^®. Munazinyetu gomukadi Marilyn kwa tanta asi: “Elikwamo lyo-JW Broadcasting kwa vatera nge ni kare muntu goruhafo ntani kuvhura ni tarere nayinye eyi ya kara ko, morwa nayinye yiwa. Apa ani guwu napa ani lizuvhu mukuma, ame kupurakena kosiuyungwa ndi kovidiyo zoukareli wongurangura. Ayo kuvatera nge ni hare unene Jehova nombunga zendi. Elikwamo lyoJW Broadcasting kwa vatera nge unene.” Nove kukuvatera elikwamo eli ndi? Kugusa ko elikwamo eli ali pwaga nkenye kwedi ko-JW Broadcasting, ako kuvhura kugwana ko hena yokupurakena, novidiyo ntani nonsumo donongwa.

16-17. Morwasinke natu takamesera siruwo esi atu ruganesa koyilihafeso ntani ngapi omu natu yi rugana?

¹⁶ Kugusa ko kuhorowora nawa yilihafeso, twa hepa hena kutakamesa siruwo esi atu ruganesa koyilihafeso. Nsene kapi tuna kutakamesa, ose kuvhura tu ruganese siruwo sosinzi koyilihafeso kupitakana siruwo esi atu ruganesa mokukarera Jehova. Sinzi sovantu kuvadigopera kuruganesa siruwo sosisupi koyilihafeso. Munazinyetukadi gedina Abigail gonomvhura 18 kwa tanta asi: “Apa ani tarere tivi, ayo kuvatera nge ni pwizumuke konyima zoyirugana. Nye apa ani dili kulipangera, ame kutarera tivi novili dononzi.” Munazinyetu  Samuel gomudinkantu kwa tanta asi: “Poyiruwo yimwe ame kutarera novidiyo dononsupi dononzi kointaneta. Apa ani tameke, ame kutarera tupu vidiyo zimwe, ano na hana kuyidivira, ame kuyadimburura asi nina ruganesa novili ntatu ndi ne ngoso.”

¹⁷ Ngapi omu no sesupika siruwo esi o ruganesa koyilihafeso? Pomuhowo, diva siruwo esi o ruganesa koyilihafeso. Hetekera ko kudidilika siruwo esi o ruganesa koyilihafeso mosivike. Tjanga pokalindeli novili edi o ruganesa mokutarera tivi, nedi o ruganesa kointaneta ntani nedi o ruganesa pokudana maudano gomoserefoni. Nsene o ya dimburura asi ove kuna kuruganesa siruwo sosinzi koyilihafeso, hetekera ko kukara nelikwamo. Pomuhowo, litulira po siruwo sokurugana yininke yomulyo, ntani nye no tura po siruwo soyilihafeso. Konyima, kanderera kwaJehova yipo a ku vatere o kwame elikwamo lyoge. Nsene o yi rugana, ayo ngayi ku vatera o kare nosiruwo ntani nononkondo dokurugana ereso lyoBibeli, ukareli wepata, kuza komapongo nokuza mokuzuvhisa. Ntani ove ngo hafera siruwo esi o ruganesa koyilihafeso, morwa ove kuna kutura Jehova muhowo.

18-19. Ngapi omu natu yi likida asi ose kukarera Jehova gelike?

¹⁸ Apa mupositoli Peturusa ga mene kutjanga kuhamena uhura wouzuni ntani kuhamena uzuni woupe, age kwa tente asi: “Vakwetu ava na hara, siruwo esi muna kundindira ehoroko lyeyi, kondjeni mu zere mwa hana sivadi kosipara saKarunga oku tomu kara nombili nendi.” (2 Pet. 3:14) Apa atu limburukwa epukururo olyo nokurugana paapa twa hulira mokukarera Jehova monkedi ezi a tambura, ose kulikida asi ose kuna kukarera Jehova gelike.

¹⁹ Satana nouzuni wendi ngava twikira kutuninkisa tu ture muhowo yininke ya peke mevango lyokutura Jehova muhowo. (Ruk. 4:13) Nye yi kare asi yisinke ngatu pita, kapisi tu pulisire nkenye ogu ndi nkenye eyi yi tu ninkise tu dire kutura Jehova muhowo. Ose tuna tokomene kukarera Jehova gelike!