1. Ngapi omu twa yi diva asi ose kuna kuparuka “pomazuva gopouhura”?

NSENE asi ove kwa ku reta konyima zo 1914, eyi kulikida asi ove kwa paruka “pomazuva gopouhura.” (2 Tim. 3:1) Natuvenye twa zuvha eyi ga tente Jesus nga yi horoka pomazuva aga. Yihorokwa oyo kuna kara yita, erumbu, ekankamo lyevhu, mauvera gomukagu, evhuko lyoudona ntani nehepeko lyovakareli vaJehova. (Mat. 24:3, 7-9, 12; Ruk. 21:10-12) Ose hena kumona vantu kuna kulikida nkareso ezi ga pumbire mupositoli Paurusa. (Tara kakende “ Nkareso ezi vana kulikida vantu naina.”) NgoNombangi daJehova, ose twa yi pura nawa-nawa asi ose kuna kuparuka ‘pomazuva ogo’ gouhura.—Mika 4:1.

2. Mapuro musinke twa hepa kugwana elimbururo?

² Mokumona asi ngesi pana piti siruwo sosire kutunda apa ga tamekere ‘mazuva gopouhura’ momvhura 1914, eyi kulikida asi ose kuna kuparuka kehagero lyomazuva ogo. Yipo nye, twa hepa kudiva malimbururo komapuro aga gomulyo: Yisinke ngayi ka horoka kouhura ‘womazuva gopouhura?’ Ntani yisinke ana tu harere Jehova tu rugane posiruwo esi?

3. Kuliza nouporofete ou wa kara mo-1 Vatesaronika 5:1-3, yisinke ngava divisa vapangeli?

³ Resa 1 Vatesaronika 5:1-3. Paurusa kwa tumbwire “ezuva lyaHompa.” Metjangwa eli, ezuva olyo kwa tamba kosiruwo esi ngasi tameka nehomokero “lyoBabironi zonene,” ndi maukarelikarunga goyimpempa, dogoro koHarumagedoni.  (Ehor. 16:14, 16; 17:5) Komeho li tameke “ezuva” olyo, nomuhoko ngadi divisa asi “Nayinye mompora, kutupu upyakadi.” Vapangeli poyiruwo yimwe kuruganesa nonkango odo apa ava tulisa po malizuvhasano noyirongo yapeke. * Nye ediviso eli va tumbura moBibeli ngali li siga. Morwasinke? Apa ngava gava ediviso olyo, vantu ngava yi pura asi vapangeli yina va tompoka kutulisa po mbili mouzuni naunye. Nye konyima, udigu wounene ngau tameka ntani ngali va gwana “ezonauko poopo.”—Mat. 24:21.

4. (a) Mauzera musinke tuna dili kudiva kuhamena ediviso eli asi “nayinye mompora, kutupu upyakadi”? (b) Mauzera musinke twa diva ko?

⁴ Ose twa diva ko mauzera gamwe kuhamena ediviso eli asi “Nayinye mompora, kutupu upyakadi.” Nye nampili ngoso, koyili eyi twa dira kudiva. Kapi tuna diva eyi ngayi ninkisa vapangeli va gave ediviso olyo ntani nomu ngava li divisa. Ntani kapi tuna diva nsene ediviso olyo ngava li divisa sikando simwe tupu ndi yikando yoyinzi. Yi kare asi yisinke ngayi horoka, kapisi ngatu pulisire nkenye eyi yi tu ninkise tu pure asi vapangeli wouzuni ou kuvhura kureta mbili mouzuni ou. Bibeli kututantera asi twa hepa kuvangarara. Ediviso olyo ngali kara sidiviso esi ngasi likida asi “ezuva lyaHompa” tali tameke.

5. Kuliza no-1 Vatesaronika 5:4-6, yisinke natu rugana yipo tu liwapaikire “ezuva lyaHompa”?

⁵ Resa 1 Vatesaronika 5:4-6. Nonkango daPaurusa kuna kututantera eyi natu rugana yipo tu liwapaikire “ezuva lyaHompa.” Kapisi tu ‘rare ngwendi wovena.’ Twa hepa ‘kuvangarara.’ Pasihonena, twa hepa kutakamesa mokudira kulihameka mwankenye ruha roupolitika, morwa nsene tu li hameka mo, ose ngatu hamena ‘kouzuni ou.’ (Joh. 15:19) Ose twa yi diva asi Uhompa waKarunga yiwo welike ngau ka reta po mbili mouzuni ou.

6. Ngapi omu natu vatera vantu ntani morwasinke natu yi ruganena?

⁶ Kugusa ko kuvangarara, tuna hara hena kuvatera vantu yipo va lironge kuhamena yihorokwa yina kara komeho eyi za pumba Bibeli. Twa hepa kuyirugana ngesi morwa apa ngau wiza udigu wounene, vantu kapi ngava gwana hena siruwo sokutameka kukarera Jehova. Eyi yiyo nye sirugana setu sokuzuvhisa sina karere mongenderera! *

7. Yisinke ana hara Jehova tu rugane?

⁷ Mosiruwo sosisupi esi sina hupu ko komeho “ezuva” lyaJehova ngali tameke, Jehova ana hara tu liture mo unene mosirugana sokuzuvhisa. Twa hepa kudivilisa asi ose kuna kurugana “nomupampi moyirugana yaHompa.” (1 Kol. 15:58)  Jesus kwa pumbire eyi ngatu rugana. Apa ga uyungire kuhamena eyi ngayi horoka pomazuva gopouhura, age kwa tente hena asi: “Nye Mbudi zoNgwa yizo ngava hova tanko kuziudisira nomuhoko nadinye.” (Mar. 13:4, 8, 10; Mat. 24:14) Eyi kutanta asi nkenye apa atu zi mokuzuvhisa, ose kuna kuvatera mokusikisa mo uporofete owo womoBibeli.

8. Ngapi tuna yi diva asi sirugana sokuzuvhisa kuna kutompoka momazuva getu?

⁸ Nkenye mvhura, vantu wovanzi kuna kuvazuvhisira mbudi zongwa zoUhompa. Pasihonena, gazara kuhamena sivaro sovazuvhisi woUhompa mouzuni mudima pomazuva aga gopouhura. Mo-1914, sivaro sovazuvhisi kwa kere 5 155 moyirongo yokusika po-43. Naina, pana kara vazuvhisi wokusika po-8 500 000 moyirongo yokusika po-240. Nye eyi kapi yina kutanta asi twa hepa kuhageka kuzuvhisa. Twa hepa kutwikira kuzuvhisa kuhamena Uhompa waKarunga asi yiwo welike ngau ka gusa po maudigu govantu.—Epis. 145:11-13.

9. Morwasinke natu twikilira kuzuvhisa mbudi zoUhompa?

⁹ Sirugana setu sokuzuvhisa ngasi twikira ngororo dogoro apa Jehova nga ninka asi tu hageke. Siruwo sokuhura kupi sina hupu ko yipo vantu va lironge kuhamena Jehova naJesus? (Joh. 17:3) Kapi tatu diva. Nye eyi twa diva ko yeeyi asi komeho udigu wounene u tameke, vantu navenye ava “gwa tumbukira mwenyo gwanarunye” va kara simpe nosiruwo sokutambura mbudi zongwa nokukarera Jehova. (Yirug. 13:48) Ngapi omu natu vhura kuvatera vantu owo komeho udigu wounene u tameke?

10. Ngapi omu Jehova atu vatere yipo tu ronge vantu usili?

¹⁰ Kupitira mombunga zendi, Jehova kuna kutupa nayinye eyi twa hepa yipo tu ronge vantu usili. Pasihonena, nkenye sivike ose kugwana edeuro mepongo lyomokatji kosivike. Epongo eli kutuvatera tu dive eyi natu uyunga apa atu gwana vantu sikando sokuhova ntani napa atu tengwire ko. Ntani kuturonga hena omu natu rugana malirongo goBibeli. Mbunga zaJehova kwa tu pa hena yiruganeso yomokuzuvhisa. Ayo kutuvatera  . . .

•   tu tameke nzogera nomuntu,

• tu pindure elituromo,

• tu korangede vantu va hare kulironga yoyinzi yomoBibeli,

• tu ronge varongwa woBibeli usili ntani

• tu likide vantu kointaneta zetu nokuvazigida komapongo.

Kapi ya gwanena po tupu kukara noyiruganeso eyi. Twa hepa kuyiruganesa. * Pasihonena, nsene kuna kuzogera nomuntu ogu ana kulikida elituromo, mu sigira sitratate ndi sifo yipo a rese posiruwo esi ana kukundindira oka tengwire ko hena. Nkenye kwedi, twa hepa kulitura mo unene mokuzuvhisa.

11. Morwasinke va wapaikira elirongo lyoBibeli lyokointaneta?

¹¹ Nkedi zimwe omu Jehova ana kuvatera vantu va lironge usili kuna kara kupitira melirongo lyoBibeli lyokointaneta zetu jw.org^®. Morwasinke va wapaikira ruha oru? Nkenye kwedi, vantu wovanzi mouzuni mudima kupapara malimbururo kointaneta. Yirongwa eyi ya kara kointaneta zetu koruha oru, kuvatera vantu va lironge usili womoBibeli. Nampo vantu vamwe ava o zuvhisire, kapi va hara kutambura elirongo lyoBibeli. Nsene yimo ngoso, va likida ruha oru ndi va tumina ruha oru yipo va gwane yirongwa oyo. *

12. Yisinke nga lironga muntu kupitira melirongo lyoBibeli lyokointaneta zetu?

¹² Elirongo lyoBibeli lyokointaneta zetu kwa zogera ko yirongwa eyi: “Bibeli nomutjangi gwazo,” “Ava va zogera moBibeli unene” ntani “Ehuguvaro eli lya kara moBibeli.” Yirongwa oyo kuronga:

• Omu Bibeli nazi vatera muntu

• Yilye Jehova, Jesus ntani novaengeli

• Eyi Karunga ga sitilire vantu

• Eyi pwa karera udona noruhepo

Yirongwa oyo kwa zogera hena omu Jehova . . . 

• nga ka gusa po ruhepo nonomfa,

• nga ka vhumbura vafe ntani

• nokugusa po mapangero govantu nokureta Uhompa waKarunga.

13. Ngoso elirongo lyoBibeli lyokointaneta kuna kupinganesera po nkedi ezi atu rugana elirongo lyoBibeli novantu ndi? Faturura.

¹³ Elirongo lyoBibeli lyokointaneta kapi lina kupinganesera po nkedi ezi atu rugana elirongo lyoBibeli novantu. Jesus kwa tu pa situmbukira sokutulisa po varongwa. Yirongwa oyo, kwa yi wapaika yipo vantu ava vana kara neharo va yi lironge nokuyihafera ntani va kare neharo lyokudiva ko yoyinzi. Konyima awo kuvhura ngava hare kulironga Bibeli nose. Kouhura wankenye sirongwa, muntu kumukorangeda a ture mo ehundiro yipo gumwe goNombangi a mu ronge Bibeli. Morwa ewapaiko eli, ngesi nkenye ezuva mbunga zaJehova kugwana mahundiro gokointaneta govantu wokupitakana 230, ava vana hara kulironga Bibeli. Kulironga Bibeli na gumwe goNombangi kuna kara sininke somulyo.

14. Kuliza nononkango daJesus edi da kara mwaMateusa 28:19, 20, yisinke twa hepa kurugana ntani morwasinke?

¹⁴ Resa Mateusa 28:19, 20. Ngomu tuna kulironga Bibeli novantu, twa hepa kukondja yipo tu va ninke va ‘kare varongwa . . .  nokuvaronga va limburukwe nayinye eyi [Jesus] ga rekerere.’ Twa hepa kuvatera vantu va kwate egano eyi ya karera nomulyo va karere Jehova nokukwatesa ko Uhompa wendi. Eyi kutanta asi twa hepa kuvavatera va ture pasirugana eyi vana kulironga nokuligava kwaJehova ntani nokugwana ekuho. Eyi yiyo yelike  ngayi va vatera va ka paruke ezuva lyaJehova.—1 Pet. 3:21.

15. Siruwo musinke tuna dili kukara naso ntani morwasinke?

¹⁵ Ngomu tuna yi tumbura ketameko, siruwo esi sina hupu ko komeho va ka zonagure po uzuni ou, sisupi unene. Yipo nye, kapi tuna kara nosiruwo sokulironga novantu ava vana dili kuhara kutura po marunduruko yipo va ya tameke kukarera Jehova. (1 Kol. 9:26) Sirugana setu kuna kara songenderera! Vantu vanzi vana hepa kuzuvha mbudi zoUhompa komeho uhura u wize.

16. Kuliza nEhororo 18:2, 4, 5, 8, yisinke twa hepa kurugana natuvenye? (Tara hena nondanda dokonhi.)

¹⁶ Resa Ehororo 18:2, 4, 5, 8. Novelise edi kulikida eyi Jehova ana harere vakareli vendi va rugane. Vakriste navenye wousili va hepa kudivilisa asi kapi vana kurugana yininke eyi ya likwatakana noukareli woyimpempa. Komeho muntu a lironge Bibeli, age nampo kwa heme koukarelikarunga woyimpempa. Age nampo ngazi komapongo gawo ntani nokulihameka moyirugana yawo. Ndi nampo age nga gava yimaliwa koukarelikarunga owo. Komeho murongwa goBibeli va mu pulisire a kare muzuvhisi gokudira kugwana ekuho, age ga hepa kudivilisa asi kapi hena ana kulihameka mwankenye eyi ya hamena koukareli woyimpempa. Age ga hepa kutjanga mbilive zokulikida asi kapi hena ana hamene koukareli wendi wanare nankenye eyi ya likwatakana noBabironi zonene. *

17. Yirugana musinke ga hepa kunyokera po Mukriste ntani morwasinke?

¹⁷ Mukriste gousili ga hepa kudivilisa asi yirugana yendi kapi ya likwatakana noukarelikarunga woyipempa. (2 Kol. 6:14-17) Pasihonena, age kapi ta vhuru kutambura yirugana kongereka yipo va mu fute. Ntani hena, Mukriste ogu a rugana kongesefa zomuntu gwapeke, kapi ta vhuru kukarugana yirugana kevango lyoukarelikarunga woyimpempa. Ntani nsene kwa kara nongesefa zamwene, age kapi ta vhuru kupapara yirugana kevango lyoukarelikarunga woyimpempa ndi nkenye eyi ya likwatakana kumwe nawo. Morwasinke natu tulira po etokoro lyangoso? Morwa kapi tuna hara kukwatesa ko nonzo noyirugana yomaukarelikarunga aga a tara Jehova asi ga nyata.—Jes. 52:11. *

18. Ngapi munazinyetu gumwe ga kweme nompango domoBibeli?

 ¹⁸ Nomvhura dononzi da ka pita, mugara gumwe kwa pulire munazinyetu gomukuronambunga ogu ga kara nongesefa zamwene, a ka rugane yihongagura kongereka zomodoropa zawo. Mugara ogo ga yi divire asi munazinyetu ogo kunyoka nkenye apa ava mu pura a rugane yirugana yokongereka. Nye sikando esi, mugara ogo kwa here kugwana muntu ogu na ka mu vatera. Nye, munazinyetu ogo kwa nyokere morwa kapi ga here kuteza po nompango domoBibeli. Sivike sa kweme ko, mosaitunga zomodoropa zawo kwa tulire mo efano lyomugara ana kutura sikuruse pongereka. Ngano munazinyetu ga tambwire sirugana sina, ngano yige va fanekere mo. Gazadara tupu omu ngano va lizuvhire vapuli vakwawo kumuhamena. Ntani gazadara ko hena kuhamena omu ngano ga lizuvhire Jehova.

19-20. (a) Yisinke tuna lirongo? (b) Yisinke hena twa hepa kudiva?

¹⁹ Kuliza nomauporofete gomoBibeli, sihorokwa sosinene esi sina kukwama ko kuna kara ediviso eli asi “nayinye mompora, kutupu upyakadi.” Nye kuliza neyi ga tu ronga Jehova, ose twa yi diva asi vapangeli kapi ngayi va tompoka kuretesa po mbili. Yisinke ana tu harere Jehova tu rugane posiruwo esi? Jehova kuna tu harere tu liture mo unene mokuzuvhisa mbudi zoUhompa ntani nokutulisa po varongwa wovanzi. Ntani twa hepa hena kulikara ure nankenye eyi ya likwatakana noukarelikarunga woyimpempa. Eyi kutanta asi twa hepa kutunda moBabironi zonene ntani nokudira kutambura yirugana eyi ya likwatakana noBabironi.

²⁰ Poyili yimwe hena ngayi horoka kehagero ‘lyomazuva gopouhura’ ntani koyili hena Jehova ana tu harere tu rugane. Yininke musinke oyo ntani ngapi omu natu liwapaikira yihorokwa eyi yina kara komeho? Ngatu ka gwana malimbururo mosirongwa sokukwama ko.