MUGAVI mbudi kuruganesa ehina yipo a konakone mukarompepo gokomeho. Apa a mono ekundungu lyosiponga lina kara komeho, age kurondora vantu komeho zosiruwo morwa ga kara nosinka kwawo.

Mokulifana, Jehova ngesi kuna kurondora vantu navenye kuhamena “ekundungu” eli lya pitakana makundungu nagenye aga ava divisa konombudi. Ngapi ana kuyirugana? Ntani ngapi tuna yi diva asi age kuna kupa vantu siruwo yipo va rugane ko yuma? Mokugwana malimbururo, tu zogereni tanko marondoro gamwe aga ga geve Jehova mosiruwo sanare.

Mosiruwo sanare, Jehova kwa rondwere vantu kuhamena mpanguro ezi za ndindililire vantu ava ngava dili kulimburukwa konompango dendi. (Yis. 10:25; Jer. 30:23) Age nkenye apa nga rondora vantu wokudira kulimburukwa komeho zosiruwo ntani ga va tanterere eyi nava rugana yipo va mu limburukwe. (2 Vah. 17:12-15; Neh. 9:29, 30) Mokuninka asi vantu va ture po marunduruko usimbu, Jehova kuruganesa vakareli vendi wovalimburukwi yipo va divise mbudi zerondoro kovantu navenye.—Amosa 3:7.

Nowa kuna kara gumwe govantu wovalimburukwi ava ga ruganesere Jehova mokugava mbudi zompanguro. Nomvhura dononzi, age nga rondora vantu womomazuva gendi ava ngava hondere ntani ava va kere nonyanya, kuhamena ekuruhanzo eli lya va kere komeho. (Gen. 6:9-13, 17) Age hena kwava tanterere eyi va hepere kurugana yipo va paruke ruhanzo. Nowa nga udisa unene. Eyi yiyo ava mu tumbwire asi ‘muudisi gouhungami.’—2 Pet. 2:5.

Nampili ngomu Nowa ga litulire mo unene mokurondora vantu, awo kapi va tambwire mbudi zendi. Awo kapi va kere nepuro. Ano awo kwa fire apa rwa wizire ruhanzo “ru va tware navenye.” (Mat. 24:39; Heb. 11:7) Apa rwa wizire ruhanzo, Awo kapi va kere nokonda zokutanta asi Karunga kapi ga va rondwere komeho zosiruwo.

Poyiruwo yimwe, Jehova nga gava erondoro kovantu karuwogona tupu komeho zi sike mpanguro zendi. Nampili ngoso, Jehova ga va pere siruwo yipo va ruganeko yuma. Pasihonena, age kwa geve erondoro komeho zosiruwo, kuhamena mahepeko murongo aga va ligwanekerere nago Vaegipite. Jehova kwa tumine Mosesa naArona va ka rondore Farawo novantu vendi kuhamena ehepeko lyauntambali lyomvhura zakamanya. Mokumona asi mvhura ozo kwa tamekere ezuva lyokukwama ko, ngoso Karunga ga va pere siruwo sokugwanena po yipo va papare oku nava hendukira mvhura ozo zakamanya ndi? Bibeli kutanta asi: “Vakareli vaFarawo vamwe ava va tjilire nkango zaHOMPA, kwa dukisilire yimuna yawo novapika vawo mononzugo, nye ava va dilire kupakera mbili nkango zaHOMPA, kwa sigire vapika vawo noyimuna yawo komaliro.” (Ex. 9:18-21) Yosili, Jehova kwa geve erondoro olyo nosiruwo. Eyi yiyo ya ninkisire vantu ava va limburukwire va paruke.

Farawo novantu vendi nawo kwa va rondwere komeho li horoke ehepeko lyomurongo. Nye awo kapi va tambwire erondoro olyo. (Ex. 4:22, 23) Eyi yiyo da fililire nombeli dawo donongara. Sihorokwa oso kuguvisa sili! (Ex. 11:4-10; 12:29) Awo va gwene siruwo sokurugana ko yuma kerondoro lina ndi? Nhi! Mosesa kwa rondwere Vaisraeli kuhamena ehepeko lyomurongo ntani ga va tanterere  eyi nava rugana yipo va popere mapata gawo. (Ex. 12:21-28) Vantu vangapi va purakenene kerondoro olyo? Makonakono kwa likida asi vantu mamiliyona gatatu kwava parwire nokuvavatera va tunde moEgipite. Sivaro oso kwa kwaterere mo Vaisraeli ntani “mbunga zonene zovantu peke.”—Ex. 12:38.

Yihonena eyi kulikida asi Jehova nkenye apa kupa vantu siruwo sokugwanena po yipo va purakene komarondoro gendi. (Deut. 32:4) Morwasinke Jehova ga yi ruganenene? Mupositoli Peturusa kwa tjenge asi Jehova “kapi ga hara asi ngapa zonauke nampili gumwe, age kwa hara asi navenye ngava litezurure.” (2 Pet. 3:9) Yosili, Jehova ga kara nosinka kovantu. Age kuna hara vantu va litezurure nokurugana ko yuma komeho li wize ezuva lyendi lyompanguro.—Jes. 48:17, 18; Rom. 2:4.

Nampili naina, vantu vana hepa kulimburukwa kerondoro eli vana kudivisa uzuni mudima. Apa Jesus ga kere pevhu, age kwa rondwere asi uzuni ou ngava u zonagura po ‘poudigu wounene.’ (Mat. 24:21) Age kwa geve mauzera kuhamena eyi ngayi horoka neyi ngava ligwanekera nayo varongwa vendi, ngomu siruwo oso ngasi hedera pepi. Yipo nye, age kwa pumbire yihorokwa yomulyo eyi yina kuhoroka ngesi uzuni mudima.—Mat. 24:3-12; Ruk. 21:10-13.

Kuliza nouporofete owo, Jehova kuna kuzigida vantu navenye yipo va ya mu karere nokumulimburukwa. Age kwa hara asi vantu wovalimburukwi va hafere eparu ngesi ntani nomatungiko gokomeho mouzuni woupe. (2 Pet. 3:13) Jehova kuna hara kuvatera vantu yipo va ture epuro momatumbwidiro gendi. Age kuyirugana oyo pokuvapa mbudi ezi ngazi va parura. Mbudi ozo kuzitumbura asi: “Mbudi zoNgwa ezi zoUntungi waKarunga.” Jesus kwa pumbire asi mbudi ozo “ngava zi divisa mwa za uzuni mudima, zi kare umbangi wonomuhoko nadinye.” (Mat. 24:14) Karunga kuna kuruganesa vakareli vendi wousili yipo va divise mbudi ozo moyirongo yokusika po-240. Jehova ana hara vantu wovanzi va tambure erondoro olyo yipo ngava ka paruke apa ezuva lyendi lyenene lyompanguro ngali wiza.—Sef. 1:14, 15; 2:2, 3.

Mokumona asi Jehova nkenye apa kupa vantu siruwo yipo va rugane ko yuma, epuro lyomulyo kuna kara asi: Vantu ngava purakena kerondoro eli ana kugava ngesi Karunga ndi? Ngovakareli vaKarunga, tu twikireni kuvatera vantu wovanzi yipo ngava ka paruke apa Karunga nga zonagura po uzuni ou.