1. Yisinke na vhura kurugana Jehova yipo a sikise mo sitambo sendi?

JEHOVA kuvhura a kare nkenye eyi, yipo a sikise mo sitambo sendi. Pasihonena, age kwa kere murongi, muhengagwidi ntani muzuvhisi gombudi zongwa nayimwe hena yoyinzi. (Jes. 48:17; 2 Kol. 7:6; Gar. 3:8) Nye nampili ngoso, age kuruganesa vantu yipo va sikise mo sitambo sendi. (Mat. 24:14; 28:19, 20; 2 Kol. 1:3, 4) Jehova kuvhura kutupa unongo nononkondo edi twa hepa yipo tu sikise mo nkenye eyi ana hara. Eyi yiyo ali tanta edina lyendi, kuliza novalirongi wovanzi.

2. (a) Morwasinke atu lizuvhire poyiruwo yimwe asi Jehova nampo kapi aku tu ruganesa? (b) Yisinke natu ka zogera mosirongwa esi?

² Natuvenye kwa hara Jehova a tu ruganese, nye vamwe kulizuvha asi nampo Jehova kapi ana kuvaruganesa. Awo nampo kulizuvha ngoso, morwa yeeyi va kurupa ndi ukaro wawo ndi morwa udivi ou va kara nawo. Nye vamwe kulizuvha asi ya va gwanena po eyi vana kurugana, kapisi hepero hena va ruganene Jehova momunene. Mosirongwa esi tatu ka zogera omu Jehova na vhura kutuvatera natuvenye yipo tu sikise mo sitambo sendi. Ntani natu ka zogera hena yihonena yomoBibeli yovagara novakadi, ava ga pere Jehova eharo nononkondo yipo va rugane eyi ga here. Ntani natu ka zogera hena omu natu pulisira Jehova yipo a tu ruganese.

3. Kuliza nononkango edi da kara moVafilipi 2:13, ngapi omu Jehova na vhura kutupa eharo lyokurugana eyi tuna hara?

³ Resa Vafilipi 2:13. * Jehova kuvhura kutupa eharo lyokurugana eyi tuna hara. Ngapi omu a vhuru kuyirugana eyi? Pasihonena,  nampo tuna dimburura asi gumwe gomombungakriste ana hepa evatero, ndi poyili yimwe yina hepa mo mombungakriste. Ndi vakuronambunga kuna resa mbilive zokutunda komberewa zomutayi omu muna kara mbudi asi kokuli oku kuna hepa evatero. Eyi nampo kuvhura yi tu ninkise tu lipure asi: ‘Ngapi omu nani vhura kuvatera?’ Ndi nampo kuna tu pe situmbukira soudigu nye tuna kara nosinka nsene ngatu si sikisa mo. Ndi konyima zokuresa moNonkango daKarunga, nampo tatu lipura asi, ‘Ngapi omu nani tura pasirugana egano eli yipo ni vatere wopeke?’ Jehova kapi nga vhura kutusininika tu rugane yuma. Nye apa a mono asi ose kuna kugazadara kuhamena eyi natu rugana, age kuvhura kutupa eharo yipo tu rugane eyi tuna kugazadara.

4. Ngapi omu Jehova a tu pe nonkondo dokurugana yuma?

⁴ Jehova kuvhura kutupa hena nonkondo yipo tu rugane yuma. (Jes. 40:29) Age kuvhura kutupa mpepo zokupongoka yipo tu gwederere kediwo lyetu. (Ex. 35:30-35) Kupitira mombunga zendi, Jehova kuvhura kuturonga omu natu rugana yirugana yongandi. Nsene kuna kulizuvha asi kapi to vhuru kusikisa mo situmbukira esi va ku pa, hundira evatero kwendi. Mokumona asi Guhyetu gemeguru ugavi, mu hundira a ku pe “nonkondo edi dononene.” (2 Kol. 4:7; Ruk. 11:13) MoBibeli kwa kara mo yihonena yoyinzi omu Jehova ga vaterere vagara novakadi pokuvapa eharo nononkondo yipo va rugane eyi va here. Ngomu natu ka zogera yihonena eyi, gazadara ko nonkedi dimwe omu Jehova na kuruganesa nove yipo o rugane eyi va rugene.

5. Yisinke natu lirongera ko kosiruwo esi Jehova ga ruganesere Mosesa yipo a ka zowore vantu vendi?

⁵ Jehova kwa ruganesere Mosesa yipo a ka zowore Vaisraeli. Nye siruwo musinke ga tokwere Jehova kumuruganesa? Ngoso, ayo kwa horokere apa Mosesa ga lizuvhire asi kuvhura a pitisire Vaisraeli konyima zokumuronga “unongo naunye woVaegipite” ndi? (Yirug. 7:22-25) Hawe, Jehova kwa ruganesere Mosesa konyima zapa ga mu vaterere a kare nelinunupiko ntani nougomoki. (Yirug. 7:30, 34-36) Jehova kwa pere Mosesa uradi yipo a ze komupangeli gononkondo gomoEgipite. (Ex. 9:13-19) Yisinke natu lirongera ko? Jehova kuruganesa tupu vantu ava ava honene yikara yendi ntani nava ava mu huguvara yipo ava pe nonkondo.—Fil. 4:13.

6. Yisinke natu lirongera ko monkedi omu Jehova ga ruganesere Barasirayi yipo a vatere hompa Ndafita?

⁶ Konyima zonomvhura dononzi, Jehova kwa ruganesere hena Barasirayi yipo a vatere hompa Ndafita. Apa Ndafita novantu vendi va tjwayukire Abisaromo, awo kwa va kwete ‘nzara nenota, awo hena kwa rorokere.’ Barasirayi ogu ga kere mukurupe ntani novakwawo, kwa tulire eparu lyawo mosiponga yipo va vatere Ndafita novantu vendi. Barasirayi kapi ga gazarere asi Jehova kapi hena na mu ruganesa morwa age ana kurupa. Nye age kwa ruganesere eyi ga kere nayo, yipo a vatere vakareli vaJehova ava va hepere evatero. (2 Sam. 17:27-29) Yisinke natu lirongera ko? Yi kare asi ose tu vakurupe ndi hawe, Jehova kuvhura a tu ruganese yipo tu vatere vapuli vakwetu ava va kara momukunda gwetu ndi wokoyirongo yapeke ava vana hepa evatero. (Yis. 3:27, 28; 19:17) Nampili kapi yina kututompoka kugava evatero olyo nyamwetu, kuvhura tu gave yigava koyirugana youzuni mudima, yipo yigava oyo ngava ka yi ruganese mokuvatera vanavazinyetu ava vana hepa evatero.—2 Kol. 8:14, 15; 9:11.

7. Ngapi omu Jehova ga ruganesere Simiyoni ntani ngapi omu sihonena sendi asi tu korangeda?

 ⁷ Jehova kwa tumbwidilire mukurupe gomulimburukwi gedina Simiyoni asi kapi nga fa, age ga hana kumona Mesiyasa. Etumbwidiro olyo nampo kwa korangedere Simiyoni, morwa age kwa ndindilire Mesiyasa nomvhura dononzi. Jehova kwa tungikire Simiyoni morwa epuro noulimburukwi wendi. Ezuva limwe “mpepo zokupongoka” kwa mu twere kontembeli. Apa ga ka sikire, age kwa mwene Jesus, ntani Jehova kwa mu ruganesere yipo a divise uporofete kuhamena munona ogu ngaya kara Kristusa komeho. (Ruk. 2:25-35) Nampili ngomu Simiyoni nampo ga dogorokere komeho Jesus a tameke nosirugana sendi, age kwa hefe morwa situmbukira esi ga gwene. Komeho age ngaka gwana mauwa gomanzi. Mouzuni woupe, mugara ogo gomulimburukwi ngaka mona omu Uhompa waJesus ngau ka retera mauwa vantu navanye pevhu. (Gen. 22:18) Nose twa hepa kulikida rupandu kwankenye situmbukira esi ga tu pa Jehova.

8. Ngapi omu Jehova na vhura kuturuganesa ngwendi Baranabasa?

⁸ Mosiruwo soVakriste wokuhova, mugara gumwe gedina Josefa kwa pulisilire Jehova a mu ruganese. (Yirug. 4:36, 37) Mokumona asi age nga hengagwida vakwawo, eyi yiyo nampo vapositoli ngava mu zigidire asi Baranabasa, edina eli ali tanta asi “Muradipiki” ndi muhengagwidi. Pasihonena, konyima zapa Sauru ga ya kere Mukriste, sinzi sovapuli vakwawo kwa mu tjilire morwa yeeyi nga hepeke Vakriste nare. Nye Baranabasa kwa vaterere nokuhengagwida Sauru, ntani Sauru nampo ga yi haferere sili. (Yirug. 9:21, 26-28) Konyima apa vakuronambunga womoJerusarema va here kukorangeda vapuli vakwawo ava va tungire komavango gokoure ngwendi Antiyokiya zomoSiliya, awo kwa tumine Baranabasa. Awo kwa horowere muntu gouhunga. Bibeli kututantera asi Baranabasa “ta korangeda navenye asi va kwatere unene kwaHompa nonomutjima dawo nadinye.” (Yirug. 11:22-24) Jehova kuvhura a tu ruganese nose naina, yipo tu hengagwide vapuli vakwetu. Pasihonena, age kuvhura a tu ruganese yipo tu hengagwide ava va fisa. Ndi kuvhura a tu tumangede tu ka dingure ndi tu bele gumwe ogu ana kuvera ndi ogu ana guwu yipo tu mu hengagwide. Nove ngo pulisira Jehova a ku ruganese ngwendi moomu ga yi rugene Baranabasa ndi?—1 Tes. 5:14.

9. Yisinke natu lirongera ko monkedi omu Jehova ga vaterere Vasily a kare musita gomuwa gopampepo?

⁹ Jehova kwa vaterere munazinyetu gedina Vasily aya kare musita gomuwa gopampepo. Apa Vasily va mu tulire a kare mukuronambunga, age kwa kere nonomvhura 26. Age kwa lizuvhire asi kapi nga vhura kuvatera vapuli vakwawo, unene po ava va kere nomaudigu. Nye nampili ngoso, age kwa gwene edeuro kovakuronambunga vakwawo ava va kere noudivi ntani kosure zovakuronambunga. Vasily nga rugana hena unene yipo a ture po marunduruko. Pasihonena, age kwa litulilire po yitambo yoyinunu. Ano ngomu ga yi sikisire mo, ayo kwa mu vaterere a funde po woma. Age ngesi kwa tanta asi: “Yininke eyi ngayi tjilisa nge nare, ngesi kuna kuretera nge ruhafo. Apa Jehova a vatere nge ni gwane etjangwa lyewa, yipo ni ka li ruganese mokuhengagwida vapuli vakwetu mombungakriste, ayo kuhafesa nge unene.” Nsene o honena Vasily ntani nokupulisira Jehova a ku ruganese, age ngaku pa udivi yipo o sikise mo yitumbukira yomombungakriste.

10. Yisinke ga rugene Abigayili ntani yisinke ono kulirongera ko kwendi?

¹⁰ Apa Ndafita novantu vendi va tjwayukire hompa Sauru, awo kwa hepere evatero. Vakwayita vaNdafita kwa pulire mugara goMuisraeli gongawo gedina Nabali yipo ava pe ko nondya dononsesu. Awo kwa mu hundilire morwa awo kwa kungire nonzwi daNabali momburundu. Nye Nabali ta nyoka kuvapa yuma morwa uruva. Eyi kwa handukisire Ndafita ntani age kwa tokwere kudipaga Nabali novagara navenye vemembo lyendi. (1 Sam. 25:3-13, 22) Nye mukada Nabali gomuwa gedina Abigayili kwa kere nondunge. Age kwa likidire uradi, ntani kwa liganderere konompadi daNdafita nokumulikwambera yipo a dire kutura nzo zedipago pokutengwida kuwoko. Abigayili kwa korangedere Ndafita a sige yininke nayinye momawoko gaJehova. Nonkango daAbigayili ntani nounongo ou ga likidire kwa gumine Ndafita komutjima. Age ga yi dimbwilire asi Jehova yige ga tumine Abigayili. (1 Sam. 25:23-28, 32-34) Abigayili kwa tungire po yikara yoyiwa eyi ya ninkisire Jehova a mu ruganese. Mokulifana, Jehova kuvhura a ruganese vanavazinyetu wovakadi ava va kara nonondunge, yipo va korangede mapata gawo ntani navamwe womombungakriste.—Yis. 24:3; Tit. 2:3-5.

11. Yisinke va rugene vana vaSarumu, ntani wolye vana kuhonena sihonena sawo neina?

¹¹ Konyima zonomvhura dononzi kutunda posiruwo saNdafita, vana wovakadi vaSarumu kwa kere nawo vamwe womosivaro sava Jehova ga ruganesere mokutungurura makuma gaJerusarema. (Neh. 2:20; 3:12) Nampili ngomu guhyawo ga kere mupangeli, vana vaSarumu wovakadi kwa kere neharo lyokurugana sirugana oso soudigu ntani sosiponga. (Neh. 4:15-18) Eyi va rugene kwa lisigire neyi va rugene vagara womoTekoa ava ‘va nyokere kurugana’ sirugana esi. (Neh. 3:5) Gazara tupu omu vana vaSarumu wovakadi va hefe apa sirugana sokutungurura makuma sa pwire momazuva 52. (Neh. 6:15) Mosiruwo setu, vanavazinyetukadi ava va kara neharo nawo kuvatera yipo va tunge nokuwapukurura matungo aga ga hamena koukareli waJehova. Udivi wawo nelituromo lyawo kuvatera yipo sirugana oso si tompoke.

12. Ngapi omu Jehova natu ruganesa ngwendi moomu ga ruganesere Tabita?

¹² Jehova kwa ruganesere Tabita a rugane “yirugana yoyinzi yoyiwa oku ta kwafa vahepwe” unene po vafisavayavawo. (Yirug. 9:36) Mokumona asi age kwa kere nougavi, ntani kwa kere nonkareso zongwa, vantu wovanzi kwa lilire apa ga fire. Nye awo kwa hefe unene apa Peturusa ga mu pindwire koufe. (Yirug. 9:39-41) Yisinke natu lirongera ko kwaTabita? Yi kare asi ove munona, mukondi, mugara ndi mukadi, nose kuvhura tu rugane yininke yoyinzi yipo tu vatere vapuli vakwetu.—Heb. 13:16.

13. Ngapi omu Jehova ga ruganesere munazinyetu gonomuga gedina Ruth ntani yisinke ga ya dimburura?

¹³ Munazinyetu gomukadi gonomuga gedina Ruth kwa here kukara mutumwa. Apa ga kere munona, age nga genderere kurugana tunda embo zende embo yipo a gavere yitratate. Age kwa tanta asi: “Ame ngani hafere sirugana oso.” Nye munazinyetu ogo ngayi mu karere udigu kuzogera novantu kuhamena Uhompa waKarunga. Nampili ngomu ga kere nomuga, Ruth kwa ya tamekere uzuvhisi wokukarerera apa ga kere nonomvhura 18. Mo-1946, age kwa zire koGiliyata ntani kwa mu tumine a ka zuvhisire koHawaii ntani nokoYapani. Jehova kwa mu ruganesere yipo a  zuvhise unene mbudi zongwa moyirongo oyo. Konyima zokulihameka mokuzuvhisa nomvhura 80, munazinyetu Ruth kwa tanta asi: “Jehova kwa nkondopeka nge. Age kwa vatera nge ni funde po nomuga dange. Ame ngesi nina yi pura nawa-nawa asi age kuvhura kuruganesa nkenye ogu ga mu huguvara.”

14. Kuliza noVakorosi 1:29, yisinke natu rugana nsene tuna hara Jehova a tu ruganese?

¹⁴ Kutunda kwanare, Jehova kwa ruganesa vakareli vendi yipo va sikise mo yirugana yokulisiga-siga. Ngapi omu nove ngaku ruganesa? Eyi kwa korera kelituromo lyoge nomu o kondjo mosirugana sendi. (Resa Vakorosi 1:29.) Nsene o pulisira Jehova, age kuvhura ngaku vatere yipo o kare muzuvhisi gomupampi nomurongi gomuwa nomuhengagwidi gomuwa nomurugani goudivi ntani kaume gomuwa ndi nkenye eyi tupu ga hepa yipo a sikise mo sitambo sendi.

15. Kuliza nononkango edi da kara mwa-1 Timoteusa 4:12, 15, yisinke nava likwambera vanavazinyetu kwaJehova yipo ava vatere?

¹⁵ Ngapi kuhamena vanavazinyetugara wovadinkatu? Vadinkatu wononkondo vana va hepa mokukara vakwafimbunga, yipo va vatere mbungakriste. Monombungakriste dononzi, vakuronambunga vanzi kupitakana vakwafimbunga. Vadinkantu, kareni neharo lyokurugana yoyinzi mombungakriste. Poyiruwo yimwe vanavazinyetu vamwe kuuyunga asi: “Ame ya gwanena nge po tupu yokukara muzuvhisi.” Nsene yimo o lizuvhu ngoso nove, likwambera kwaJehova yipo a kuvatere o tunge po eharo lyokukara mukwafimbunga ntani nokukupa nonkondo dokurugana paapa wa hulira mosirugana sendi. (Muud. 12:1) Vadinkatu, tuna hepa evatero lyeni!—Resa 1 Timoteusa 4:12, 15.

16. Yisinke twa hepa kuhundira Jehova ntani morwasinke?

¹⁶ Jehova kuvhura kukuninka o rugane nkenye eyi ana hara, yipo a sikise mo sitambo sendi. Yipo nye, likwambera kwendi yipo a ku pe eharo o rugane sirugana sendi ntani mu pura yipo a ku pe nonkondo edi wa hepa. Yi kare asi o munona ndi mukondi, ruganesa siruwo soge, nononkondo doge ntani noyiweka yoge yipo o fumadekese ko Jehova. (Muud. 9:10) Nsene ono gwana mpito zokuruganena Jehova unene, wa ha genderera kunyoka morwa utjirwe ndi morwa kuna kulizuvha asi kapi to yi vhuru. Aso kuna kara sili situmbukira somulyo sokurugana nkenye eyi yipo tu fumadekese ko Guhyetu Jehova!