1-2. (a) Yisinke ngava divisa vapangeli wouzuni ou ezuva limwe? (b) Mapuro musinke twa hepa kulimburura?

GAZARA tupu apa vapangeli wouzuni ou ngava divisa asi “nainye mompora kutupu upyakadi.” Awo kuvhura ngava likangange asi ngesi uzuni mombili una kara. Awo ngava tu harera tu gazare asi awo kuvhura kugusa po maudigu nagenye govantu. Nye awo kapi ngava vhura kukandana po eyi ngayi va horokera. Kuliza noBibeli, awo ‘ngali va gwana ezonauko poopo . . . nokusi ngava hendukira.’—1 Tes. 5:3.

² Pana kara mapuro gomulyo aga twa hepa kulimburura: Yisinke ngayi horoka ‘poudigu wounene’? Yisinke ana tu harere Jehova eyi ngatu ka rugana? Ntani yisinke natu rugana ngesi yipo ngatu ka limburukwe Jehova poudigu wounene?—Mat. 24:21.

3. Kuliza nEhororo 17:5, 15-18, ngapi omu Karunga nga zonagura po “Babironi zonene”?

³ Resa Ehororo 17:5, 15-18. “Babironi zonene” ngava ka zi zonagura po. Ngomu tuna yi tumbura, nomuhoko kapi ngadi vhura kukandana po eyi ngayi horoka posiruwo oso. Morwasinke? Morwa Karunga nga “tura monomutjima dawo yigazo yokusikisa mo eyi ga panga.” Yininke musinke eyi ga panga? Mokukazonagura po maukarelikarunga goyimpempa nagenye. Karunga nga ruganesa nombinga murongo ‘dosikasama sosigeha ge’ di sikise mo eyi ga panga. Nombinga murongo odo kwa fanekesa mapangero nagenye aga aga kwatesa ko “sikasama” esi sa divikwa asi  United Nations. (Ehor. 17:3, 11-13; 18:8) Apa mapangero ogo ngaga homokera maukareli karunga goyimpempa, aso ngasi kara sidiviso asi udigu wounene una tameke. Aso ngasi kara sihorokwa sokutjilisa esi ngasi kundama vantu navenye.

4. (a) Yisinke nampo ngayi ninkisa mapangero ga homokere maukareli karunga goyimpempa? (b) Yisinke nampo ngava rugana vantu womomaukareli karunga goyimpempa?

⁴ Kapi tuna diva nokonda deyi mapangero ngaga homokerera Babironi zonene. Awo nampo ngava tanta asi maukareli karunga kuninkisa yirongo yi dire kukara mombili ntani kupukisa mapangero. Ndi nampo kuvhura ngava tante asi maukareli karunga kwa lipongaikira emona lyenzi nomatungo gomanzi. (Ehor. 18:3, 7) Ayo kumoneka asi apa mapangero ngaga homokera maukareli karunga, ago kapi ngaga zonagura po vantu navenye ava va hama komaukareli karunga ogo. Nye ayo kumoneka asi mapangero ngaga zonagura po tupu maukareli karunga. Apa ngava zonagura po maukareli karunga ogo, vantu vamo ngava dimburura asi vampitisili vawo kwato eyi va rugana mokuvapopera ntani ngava hetekera ko kuligusa ko komaukareli karunga ogo.

5. Yisinke ga tumbwidira Jehova kuhamena udigu wounene ntani morwasinke?

⁵ Bibeli kapi za likida asi siruwo sokuhura kupi ngayi gusa mokuzonagura po Babironi zonene, nye ose twa diva asi kapi ngayi gusa siruwo sosire. (Ehor. 18:10, 21) Jehova kwa tumbwidira asi nga “supipika” mazuva ogo yipo ngava dire kuzonagura po “vahoroworwa vendi” ntani noukareli karunga wousili. (Mar. 13:19, 20) Nye yisinke ana tu harere Jehova ngatu ka rugane apa ngau tameka udigu wounene dogoro poyita yaHarumagedoni?

6. Yisinke natu rugana hena kugusa ko kudira kuhama komaukareli karunga goyimpempa?

⁶ Ngomu ka tu yi lirongere mosirongwa sina ka pita, Jehova kuna hara vakareli vendi va liguse ko koBabironi  zonene. Nye yinzi ya hamena mo kupitakana tupu kuligusa ko komaukareli karunga goyimpempa. Twa hepa hena kutwikira kuhama koukareli karunga wousili waJehova. Tu tareni nonkedi mbali omu natu yirugana.

7. (a) Ngapi omu natu twikira kukwaterera konompango daJehova dokupongoka? (b) Ngapi omu Vahebeli 10:24, 25 azi likida mulyo gokuponga kumwe posiruwo esi?

⁷ Nkedi zokuhova, twa hepa kutwikira kukwaterera konompango daJehova dokupongoka. Kapi tatu vhuru kukwama eyi ava rugana vantu womouzuni. Pasihonena, kapi tatu vhuru kukwatesa ko nkareso zoruhonda, kukwatera mo kulikwara mugara nomugara ndi mukadi nomukadi. (Mat. 19:4, 5; Rom. 1:26, 27) Nkedi zauvali, twa hepa kutwikira kukarera Jehova kumwe novapuli vakwetu. Ose kuyirugana eyi nkenye oku tuna kara, yi kare asi koSinyanga soUhompa ndi momambo ndi mokahorehore. Yi kare asi yisinke ngayi horoka, ose kapi ngatu hageka kuponga kumwe. Ya kara nomulyo tu yi rugane ngesi “unene pokumona asi ezuva lyaHompa tali hedere pepi.”—Resa Vahebeli 10:24, 25.

8. Mbudi musinke nampo ngatu ka divisa komeho?

⁸ Poudigu wounene, mbudi ezi ngatu ka zuvhisa nampo ngazi ka litjindja. Ngesi ose kuna kuzuvhisa mbudi zongwa zoUhompa ntani kuna kukondjera kutulisa po varongwa. Nye posiruwo oso, ose nampo ngatu ka zuvhisa mbudi zokuvyukilira vantu. Bibeli kwa fanekesa mbudi ozo komvhura zakamanya. (Ehor. 16:21) Ose nampo ngatu ka zuvhisa asi uzuni waSatana ntaantani va ka u zonagure po. Komeho, ose ngatu ka gwana mauzera asi mbudi musinke ngatu ka zuvhisa ntani nomu ngatu ka zi zuvhisa. Ngoso ose ngatu ka ruganesa nonkedi dokuzuvhisa edi twa ruganesa nomvhura dononzi ndi? Ndi ngatu ka ruganesa nonkedi dapeke? Kapi tuna diva. Yi kare asi nkedi musinke ngatu ka ruganesa, ayo kumoneka asi ose ngatu ka divisa mbudi zompanguro zaJehova.—Hes. 2:3-5.

9. Ngapi omu mapangero nampo ngaga tara sirugana setu, nye ehuguvaro musinke twa kara nalyo?

⁹ Ayo kumoneka asi mbudi ezi ngatu ka divisa, yizo ngazi ninkisa mapangero ga hare kutuzonagura po. Ngwendi moomu tupu Jehova atu vatere apa atu zuvhisa naina, posiruwo oso ose ngatu ka hepa evatero lyendi hena. Twa kara nehuguvaro asi Karunga ngaka tu pa nonkondo yipo tu ka sikise mo sirugana sendi.—Mika 3:8.

10. Kuliza naRukasa 21:25-28, ngapi omu udigu wounene ngau kundama vantu?

¹⁰ Resa Rukasa 21:25-28. Posiruwo soudigu wounene, vantu ngava tukuka apa ngava mona yininke eyi va huguvara kuna kuyizonagura po. Awo ngava kara “noruhodi” ntani ngava kara nosinka asi kuvhura ngava va dipage posiruwo soudigu wounene ou wa dira kukara ko rumwe. (Sef. 1:14, 15) Posiruwo oso, eparu ngali digopa unene, nampili kovakareli vaJehova vaava. Mokumona asi ose kapisi wouzuni ou, kuvhura ngatu ligwanekere nomaudigu. Kuvhura ngatu dire kukara noyininke yimwe eyi twa hepa meparu.

11. (a) Morwasinke vantu navenye ngava harera kutuzonagura po? (b) Morwasinke natu dilira kukara noutjirwe kuhamena udigu wounene?

¹¹ Vantu womomaukareli karunga aga ngava zonagura po, ngayi ka va handukisa apa ngava ka dimburura asi ukareli woNombangi daJehova kapi va u zonagura po. Awo nampo ngava tantera ko vakwawo,  nampo kupitira nokointaneta kooku. Mapangero ntani nomupangeli gwawo Satana ngava tu nyenga morwa ukereli wetu welike ngau hupa po posiruwo oso. Sitambo sawo sokuzonagura po maukareli karunga nagenye kapi ngasi ka sika mo. Yipo nye, navenye ngava hara kutuzonagura po. Posiruwo oso, mapangero ngaga ka kara nye Gogo zaMagogo. * Mapangero ngaga lipakerera kumwe mokurwanesa vakareli vaJehova. (Hes. 38:2, 14-16) Kuvhura tu kare nosinka nsene tu gazadara kuhamena eyi ngayi ka tu horokera posiruwo oso, unene po mokumona asi kapi twa diva mauzera nagenye. Nye ose twa yi diva asi kapisi hepero tu kare noutjirwe kuhamena udigu wounene. Jehova ngaka tu pa mapukururo aga ngaga ka tu parura. (Epis. 34:19) Ose ngatu ka sikama tu ‘tare keguru nokukankura nomutwe detu, yeeyi eparu lyetu pepi ngali kara.’ *

12. Ngapi omu “mukareli gokulimburukwa gonondunge” ana kutuvatera tu liwapaikire eyi yina kara komeho?

¹² “Mukareli gokulimburukwa gonondunge” kuna kutupa eyi twa hepa, yipo ngatu ka twikire kulimburukwa Jehova poudigu wounene. (Mat. 24:45) Age kuyirugana eyi mononkedi dokulisiga-siga. Nkedi zimwe kuna kara kupitira moyigongi yomazuva gatatu eyi twa kere nayo momvhura 2016 dogoro 2018. Poyigongi oyo, ose kwa tu korangedere tu twikire kukara noyikara yimwe eyi twa hepa ngomu tuna kuhedera pepi nezuva lyaJehova. Tu zeni tu ka tarurure hena yikara oyo.

13. Yisinke nayi tu vatera tu twikire kukara noulimburukwi ntani morwasinke natu yi ruganena ngesi?

¹³ Ulimburukwi: Siparatjangwa sosigongi somazuva gatatu somo-2016 kwa kere asi: “Twikira kulimburukwa Jehova!” Posigongi oso, ose kwa lirongere asi nsene tu nkondopeka elikwatakano lyetu naJehova, ayo ngayi tu vatera tu mu limburukwe. Twa lirongere hena asi ose kuvhura tu hedere Jehova pepi kupitira mekanderero nokukonakona Bibeli nelituromo. Nsene tu yi rugana, ayo ngayi tu vatera tu lididimikire nampili maudigu gomanene. Mokumona asi uzuni waSatana ntaantani ngava ka u zonagure po, twa hepa kuyindindira asi ose ngatu ligwanekera nomaudigu gomanene aga ngaga vhura kuheteka ulimburukwi wetu kwaKarunga nokoUhompa wendi. Yipo nye, vantu kuvhura ngava tu sindagure. (2 Pet. 3:3, 4) Eyi kuvhura ngayi horoke morwa ose kapi atu kwatesa ko uzuni waSatana. Twa hepa kutwikira kukara noulimburukwi ngesi yipo ngayi tu vatere tu ka limburukwe Jehova poudigu wounene.

14. (a) Marunduruko musinke ngaga kara po kuhamena vanavazinyetu ava ava tu pitisire? (b) Ngapi omu ulimburukwi ngau ka tu vatera posiruwo oso?

¹⁴ Poudigu wounene, ngapa kara marunduruko kuhamena vanavazinyetu ava ava tu pitisire naina pevhu. Vanavazinyetu wovagwavekwa ava vana kara ngesi pevhu ngava va twara meguru yipo nawo ngava ka lihameke moyita yaHarumagedoni. (Mat. 24:31; Ehor. 2:26, 27) Eyi kutanta asi kapi hena ngatu kara noMbungagendesi. Nye nampili  ngoso, emukurumbunga simpe ngali kara novapitisili. Vanavazinyetu vamwe womombunga ozo, yiwo ngava kara vapitisili. Ose ngatu likida ulimburukwi pokukwatesa ko vanavazinyetu owo ntani nokukwama mapukururo gawo gokutunda kwaKarunga. Twa hepa kukwama mapukururo gawo nsene tuna hara kukaparuka.

15. Yisinke nayi tu vatera tu twikire kulididimikira maudigu ntani morwasinke ya karera nomulyo?

¹⁵ Elididimiko: Siparatjangwa sosigongi somazuva gatatu somo-2017 kwa kere asi: Twikira kudidimika! Sigongi esi kwatu vaterere tu twikire kulididimikira maudigu. Ose kwa lirongere asi mokulididimikira maudigu, ayo kwa korera pokuhuguvara mwaJehova. (Rom. 12:12) Ngano kapisi tu divare etumbwidiro eli ga tente Jesus asi: “Ogu nga didimika dogoro kouhura, yige nga yoworoka.” (Mat. 24:13) Eyi kutanta asi twa hepa kutwikira kulididimikira nkenye maudigu aga natu ligwanekera nago. Nsene tu lididimikira maudigu ngesi, epuro lyetu ngali pama unene komeho udigu wounene ngau tameke.

16. Yisinke ayi tu vatere tu kare nouradi ntani yisinke nayi tu vatera tu twikire kukara nawo?

¹⁶ Uradi: Siparatjangwa sosigongi somazuva gatatu somo-2018 kwa kere asi “Kara nouradi!” Sigongi esi kwa tu vaterere tu dimburure asi uradi kapi au wiza po mononkondo danyamwetu. Ngwendi moomu tupu twa huguvara mwaJehova yipo a tu vatere tu lididimikire, twa hepa hena kuhuguvara mwaJehova yipo tu kare nouradi. Yisinke nayi tu vatera yipo tu huguvare unene mwaJehova? Pokulironga Nonkango dendi nkenye ezuva nokuteda ko omu Jehova ga parwire vantu vendi mosiruwo sanare. (Epis. 68:20; 2 Pet. 2:9) Apa mapangero ngaga tu homokera poudigu wounene, ngatu hepa kukara nouradi nokuhuguvara unene mwaJehova. (Epis. 112:7, 8; Heb. 13:6) Yipo nye, nsene tu huguvara mwaJehova ngesi, ose ngatu kara nouradi apa Gogo ngatu homokera. *

17. Morwasinke natu dilira kukara nowoma kuhamena yita yaHarumagedoni? (Tara efano lyopontunda.)

¹⁷ Ngomu ka tu yi zogerere mosirongwa sa ka pita, sinzi setu kwa tameka kuparuka  pomazuva gopouhura. Nye simpe twa kara nehuguvaro lyokukaparuka poudigu wounene. Yita yaHarumagedoni yiyo ngayi ka kara ruha rokuhulilira rouzuni ou woudona. Nye kapisi hepero tu kare nowoma. Morwasinke? Morwa ayo ngayi kara yita yaKarunga. (Yis. 1:33; Hes. 38:18-20; Sak. 14:3) Jesus Kristusa nga pitisira yita oyo kumwe novakwayita vaKarunga posiruwo esi ga tura po Jehova. Age nga wiza kumwe novagwavekwa ntani novaengeli wovanzi. Awo ngava ya rwisa Satana nonompepo dendi donondona ntani nononkore daKarunga.—Ndan. 12:1; Ehor. 6:2; 17:14.

18. (a) Yisinke ga tumbwidira Jehova? (b) Ngapi omu Ehororo 7:9, 13-17, ali ku vatere o kare nehuguvaro lyokomeho?

¹⁸ Jehova kwa tumbwidira asi: “Nosirwiso si simwe esi ngasi ku rwadeka.” (Jes. 54:17) Ano “emukurumbunga” lyovakareli vaJehova wovalimburukwi ngali “tunda momahepeko gomanene.” Makura awo ngava ka twikira kukarera Jehova. (Resa Ehororo 7:9, 13-17.) MoBibeli kwa kara mo nokonda dononzi deyi natu karera nehuguvaro asi Jehova ngaka tu parura. Ose twa yi diva asi Jehova “kugamena valimburukwi.” (Epis. 31:23) Vantu navenye ava va hara Jehova nokumuhamberera, ngava ka mona omu Jehova ana kupongora edina lyendi lyokupongoka.—Hes. 38:23.

19. Ehuguvaro musinke lyewa tuna kundindira komeho?

¹⁹ Gazadara ko omu etjangwa lya-2 Timoteusa 3:2-5 ngali ka fana nsene lika faturura kuhamena vantu womouzuni woupe ava nga dira kukapukisa Satana. (Tara kakende “ Nkareso ezi ngava ka likida vantu komeho.”) Munazinyetu George Gangas, * ogu ga kere gumwe gomoMbungagendesi kwa fatwilire kuhamena meho asi: “Uzuni ngau ka wapa sili apa vantu navenye ngava ka karera Jehova! Ntaantani tupu ngatu ka paruke mouzuni woupe. Ose ngatu ka paruka narunye.” Eli kuna kara ehuguvaro lyewa sili.