1. Yisinke nava rugana Vakriste navenye ava va gwana ekuho?

WA GWANA ekuho ndi? Nsene yimo, ove kwa yi likidire kovantu navenye asi wa kara nepuro mwaJehova ntani ono hara kumukarera kumwe nombunga zendi. * Nye nampili ngoso, wa hepa kutwikira kunkondopeka epuro lyoge. Twikira kukara nepuro asi Jehova kuna kuruganesa mbunga zendi naina, yipo zi rugane eyi ana zi harere.

2-3. Monkedi musinke omu Jehova ana kugendesa mbunga zendi naina? Gava sihonena.

² Monkedi omu Jehova ana kupitisira mbunga zendi naina, kulikida yikara yendi, sitambo sendi ntani nonompango dendi. Tu zeni tu ka konakone yikara yitatu yaJehova eyi tuna kumona mombunga zendi.

³ Sokuhova, “Karunga kapi ga paka mpongo.” (Yirug. 10:34) Eharo kwa tumangedere Jehova yipo a gave Munwendi a kare sizoweseso kovantu navenye. (1 Tim. 2:6; Joh. 3:16) Jehova kuruganesa vantu vendi yipo va zuvhise mbudi zongwa kovantu ava vana hara kupurakena ntani nokuvatera vantu va gwanene mo uwa monzambo zaMunwendi. Sauvali, Jehova age kuna kara Karunga gombili ogu ga dira kuhara epiyagano. (1 Kol. 14:33, 40) Yipo nye, twa hepa kuyindindira asi vakareli vendi navenye ngava mu karera monkedi zongwa zombili. Sautatu, Jehova kuna kara ‘murongi’ gomunene. (Jes. 30:20, 21) Eyi yiyo nye mbunga zendi azi demenene kuronga vantu marongo gomoBibeli kupitira mombungakriste  ntani mokuzuvhisa. Ngapi omu Vakriste womosiruwo sanare va honenene yikara eyi yitatu yaJehova? Ngapi omu vakareli vaJehova womosiruwo setu vana kuhonena yikara oyo? Ntani ngapi omu mpepo zokupongoka nazi kuvatera ngomu ono kutwikira kuruganena kumwe nombunga zaJehova naina?

4. Kuliza noYirugana 1:8, yisinke Jesus ga pangerere varongwa vendi va rugane ntani yisinke ya va vaterere?

⁴ Mosiruwo sovapositoli. Mbudi ezi ga zuvhisire Jesus kwa geve ehuguvaro kovantu navenye. (Ruk. 4:43) Age kwa tanterere vasikuli vendi yipo va twikire kurugana sirugana esi ga tamekere. Age kwa va tanterere va zuvhise “dogoro nokooku wa ka twa uzuni.” (Resa Yirugana 1:8.) Yosili sirugana esi kapi va si rugene kononkondo davene. Awo kwa hepere mpepo zokupongoka ezi ga va tumbwidilire Jesus.—Joh. 14:26; Sak. 4:6.

5-6. Ngapi omu mpepo zokupongoka za vaterere varongwa vaJesus?

⁵ Varongwa vaJesus kwa gwene mpepo zokupongoka poPentekoste momvhura 33. Nevatero lyompepo zokupongoka, awo kwa tamekere kuzuvhisa. Ano konyima zosiruwo sosisupi, vantu wovanzi kwa tambwire mbudi zongwa. (Yirug. 2:41; 4:4) Apa vantu va tamekere kuhepeka varongwa vaJesus, awo kapi va kere noutjirwe nye va pulire evatero kwaJehova. Awo kwa kanderere asi: ‘Kwafa vakereli woge, va udise nonkango doge nomupampi nagunye.’ Konyima, awo kwa zulire mpepo zokupongoka ntani kwa twikilire ‘kuudisa nonkango daKarunga nomupampi.’—Yirug. 4:18-20, 29, 31.

⁶ Varongwa vaJesus kwa ligwanekerere hena nomaudigu gamwe. Pasihonena, awo kapi va kere noMatjangwa gokugwanena po. Ntani awo kapi va kere noyimbapiratjangwa ngwendi eyi tuna kara nayo naina. Varongwa va hepere hena kuzuvhisira vantu womaraka gokulisiga-siga. Nampili ngomu va ligwanekerere nomaudigu ogo, awo va twikilire kuzuvhisa mbudi zongwa kwankenye “sisitwa somouzuni.”—Koros. 1:6, 23.

7. Monomvhura 100 da ka pita, ngapi omu vakareli vaJehova va divire eyi Jehova ga hepere ko kwawo ntani yisinke va rugene?

⁷ Mosiruwo setu. Jehova kuna kutwikira kupitisira vantu vendi nokuvapa nonkondo yipo va sikise mo mpango zendi. Age kupitisira vantu vendi kupitira moNonkango dendi Bibeli edi za retesa po mpepo zendi zokupongoka. MoBibeli ose kugwana mo mauzera omu Jesus nga zuvhisa ntani nosirugana esi ga tanterere varongwa vendi va rugane. (Mat. 28:19, 20) Ruhungu romoPembankuru 1881, kwa tente asi: “Jehova kapi ga tu horowora yipo tu gwane mfumwa kovantu ndi yipo tu ngawope, nye age kwa tu horowora yipo tu ruganese nayinye eyi twa kara nayo tu zuvhise mbudi zongwa.” Sifo simwe esi va pwagesere mo 1919 sedina To Whom the Work Is Entrusted, kwa tente asi: “Yirugana yinzi yokurugana, nye ayo yirugana yaHompa ntani age nga tu pa nonkondo yipo tu vhure kuyisikisa mo.” Ngwendi Vakriste womosiruwo sovapositoli, vanavazinyetu owo kwa kere nouradi mokurugana unene morwa va huguvarere asi mpepo zokupongoka nga zi va vatera yipo va zuvhisire vantu navenye. Nose twa huguvara asi mpepo zokupongoka ngazi tu vatera.

8-9. Nonkedi musinke dokulisiga-siga azi ruganesa mbunga zaJehova mokuhanesa mbudi zongwa?

⁸ Mbunga zaJehova kwa ruganesa yiruganeso yoyiwa yipo va zuvhise mbudi zongwa. Ano yiruganeso eyi kwa kwatera mo yimbapiratjangwa yokunduruka, sidanauka “Photo-Drama of Creation,” nongaramafona, matuwa gomambako, malikwamo gokoradiyo, ano naina kuna kuruganesa intaneta nonokompiuta. Mbunga zaJehova nazo naina, kuna kutoroka yimbapiratjangwa momaraka gomanzi. Morwasinke? Yipo vantu navenye  va zuvhe mbudi zongwa momaraka gawo. Jehova kapi ga kara nompongo. Age kwa tente asi mbudi zongwa ngava zi udisira “yirongo nayinye nomarudi nagenye nomaraka nagenye nonomuhoko nadinye.” (Ehor. 14:6, 7) Age kuna hara vantu navenye va zuvhe mbudi zongwa.

⁹ Ngapi kuhamena vantu ava atu dili kuzuvhisira morwa kwa tunga momambo omu atu dili kuvhura kukasika? Mokuninka asi vantu owo nawo va gwane mbudi zongwa, mbunga zaJehova kwa tarwilire nonkedi dimwe omu natu zuvhisa. Pasihonena, mo-2001, Mbungagendesi kwa geve epulisiro lyokuruganesa yitoroli noyitafura moFransa. Ano mwaza siruwo ngendeseso ezi kwa ya zi ruganesere hena moyirongo nayopeke. Mo-2011, nkedi zimwe zompe kwa zi tamekere moAmerika mositata New York omu va kara vantu wovanzi. Momvhura tupu zokuhova apa va ruganesere nkedi ozo, nobuke 102 129 ntani yifo 68 911 kwa yi hanesere. Ano vantu wokusika 4 701 kwa here kulironga Bibeli. Yosili, eyi kuyimonenena asi Jehova kwa ruganesere mpepo zendi zokupongoka mokukwatesa ko sirugana oso. Ano konyima, Mbungagendesi kwa geve epulisiro yipo va ruganesa yitoroli noyitafura mouzuni mudima.

10. Yisinke twa hepa kurugana yipo tu kare varongi novazuvhisi wovawa?

¹⁰ Yisinke no rugana. Ruganesa edeuro eli a gava Jehova kupitira momapongo. Lihameka mo nkenye apa mokuzuvhisa kumwe novapuli vakweni womokambunga keni komoyirugana yokuzuvhisa. Vanavazinyetu womokambunga keni kuvhura kukuvatere yipo o kare muzuvhisi gomuwa ntani nomurongi gomuwa. Ntani yihonena yawo yoyiwa kuvhura yi ku korangede. Twa hepa kutwikira kuzuvhisa, yi kare asi moukaro musinke tuna kupita. Ngomu lina yi uyunga etjangwa eli lina kwatesa ko siparatjangwa, ose kusikisa mo mpango zaKaruga kupitira mompepo zokupongoka nye kapisi mononkondo danyamwetu. (Sak. 4:6) Ntani ose twa kara nehuguvaro asi Jehova nga tu pa nonkondo morwa ose kuna kurugana sirugana sendi.

11. Ngapi omu Mbungagendesi zomosiruwo sovapositoli za vaterere mbungakriste yipo zi kare mombili nomouumwe?

¹¹ Mosiruwo sovapositoli. Mbungagendesi  zomoJerusarema, kwa ruganenene kumwe yipo mombungakriste mu kare mbili ntani mu dire kukara epiyagano. (Yirug. 2:42) Pasihonena, apa udigu wovamba wa horokere mombungakriste momvhura 49, Mbungagendesi kwa hingilire nokukonakona udigu owo nevatero lyompepo zokupongoka. Ngano kapi va u kohwenene po udigu owo, Vakriste ngano kapi va twikilire kuzuvhisa moomu ya wapera. Nampili ngomu womoMbungagendesi va kere asi awo Vajuda, awo kapi va pulisilire marongo goVajuda gava pukise. Awo kwa ruganesere Nonkango daKarunga ntani awo kwa hundilire mpepo zokupongoka yipo zi va vatere. (Yirug. 15:1, 2, 5-20, 28) Yitundwamo musinke ya kere? Jehova ga va vaterere va ture po etokoro lyewa ano mombungakriste kwa kere mombili nomouumwe ntani Vakriste owo kwa twikilire kuzuvhisa.—Yirug. 15:30, 31; 16:4, 5.

12. Yisinke ayi likida naina asi mombunga zaJehova kwa kara mo mbili ntani mwato epiyagano?

¹² Mosiruwo setu. Mbunga zaJehova kwa vatera vantu vaJehova yipo va kare mombili ntani mouumwe. Mo-1895, buke Zion’s Watch Tower and Herald of Christ’s Presence zomo-15 Mangundu, kwa kere mo siparatjangwa asi “Decently and in Order,” esi sa liza nononkango edi da kara mo-1 Vakolinte 14:40. Sirongwa oso kwa uyungire asi: “Vapositoli kwa tjangerere mbungakriste yininke yoyinzi kuhamena uumwe. Ayo mulyo kukwama ndi kulimburukwa yininke eyi ‘va tjanga momatjangwa.’” (Rom. 15:4) Mbunga zaJehova naina, kuna kuvatera vantu vaJehova yipo va kare mouumwe ngwendi moomu ya kere mosiruwo sovapositoli. Pasihonena, nsene o ka pongera kombungakriste zapeke ndi mosirongo sapeke omu vana kurugana Ruhungu, ove no diva asi ngapi omu nava rugendesa Ruhungu ntani sirongwa musinke vana kurugana ezuva olyo. Ntani kapi no lizuvha asi ono zumbana. Mpepo zokupongoka yizo zelike azi tu vatere tu kare mouumwe—Sef. 3:9.

13. Kuliza naJakopo 3:17, mapuro musinke natu lipura nyamwetu?

¹³ Yisinke no rugana. Jehova kuna tu harere ose vantu vendi ‘tu kondjere uumwe ou azi tu pe mpepo zokupongoka yipo tu kare nombili novakwetetu.’ (Efe. 4:1-3) Lipura nyamoge asi: ‘Ame kukondjera mbili nouumwe mombungakriste ndi? Ame kulimburukwa ava ava pitisire ndi? Vakwetu va huguvara  nge, unene po nsene na kara noyitumbukira mombungakriste ndi? Ame kulivinduka komapongo ntani na kara neharo lyokuvatera wopeke ndi?’ (Resa Jakopo 3:17.) Nsene o dimburura asi poyili eyi wa hepa kuwapukurura, hundira mpepo zokupongoka zi ku vatere. Nsene o pulisira mpepo zokupongoka zi ku vatere o rundurure yikara yoge, vapuli vakweni ngava kuhara ntani ngava kumona asi ove mulyo.

14. Kuliza noVakorosi 1:9, 10, ngapi omu Jehova nga rongo vantu vendi mosiruwo sovapositoli?

¹⁴ Mosiruwo sovapositoli. Jehova kwa hara kuronga vantu vendi. (Epis. 32:8) Age kwa va harera va mu dive nokumuhara ntani yipo ngava kaparuke narunye. Mokuninka asi vantu va dive Jehova nokumuhara ntani nokukagwana mwenyo gwanarunye, awo va hepa erongo lyokutunda kwendi. (Joh. 17:3) Mosiruwo sovapositoli, Jehova kwa ruganesere mbungakriste zokuhova yipo va ronge vantu vendi. (Resa Vakorosi 1:9, 10.) Mpepo zokupongoka ezi ga tumbwidilire Jesus varongwa vendi kwa va vaterere. (Joh. 14:16) Mpepo zokupongoka kwa vaterere varongwa vaJesus va kwate egano Nonkango daKarunga nokudiworoka yininke nayinye eyi ga rugene Jesus, ano konyima awo kwa ya yi resere moMavangeli. Erongo eli kwa nkondopekere epuro lyawo. Alyo kwava vaterere hena va hare Karunga naMunwendi ntani yipo va lihara-hare.

15. Ngapi omu Jehova ga sikisa mo etumbwidiro lyendi eli lyakara mwaJesaya 2:2, 3?

¹⁵ Mosiruwo setu. Jehova kwa pumbire asi “momazuva aga gana kuwiza,” vantu wokonomuhoko dononzi ngava wiza koukareli wousili yipo aya va ronge. (Resa Jesaya 2:2, 3.) Ose kuna kumona omu uporofete owo una kusika mo. Eyi kuyimonenena nawa-nawa asi ukareli wousili wa lisiga nou woyimpempa. Ntani Jehova kuna kupa vantu vendi nondya dononzi dopampepo. (Jes. 25:6) Kupitira ‘momukareli gokulimburukwa gonondunge,’ Jehova kuna kutupa  nondya dopampepo dokulisiga-siga. Pasihonena, kupitira moyiuyungwa, moyirongwa yokuresa ntani monovidiyo. (Mat. 24:45) Ose kulizuvha ngwendi Elihu kaume kaJoba, ogu ga tente asi Jehova “yige murongi gomunene po kwanavenye.”—Joba 36:22.

16. Yisinke no rugana yipo o gwanene mo uwa merongo lyaJehova?

¹⁶ Yisinke no rugana. Mpepo zokupongoka nga zi kuvatera yipo o ture pasirugana eyi ono kulironga moNonkango daKarunga. Kanderera ngwendi muEpisarome ogu ga kanderere asi: “Ronga nge HOMPA eyi ono harere nge asi ni yi rugane, nkumwe ngani yi limburukwe; ronga nge kukuruganena sankondonkondo.” (Epis. 86:11) Ntani twikira kulironga Nonkango daKarunga noyimbapiratjangwa yimwe eyi atu gwana kombunga zaJehova. Yosili, sitambo soge kapisi si kare tupu sokukara nediwo. Eyi ono kulironga, wa hepa kuyipura asi ayo usili ntani wa hepa kuyitura pasirugana meparu lyoge. Ano mpepo zokupongoka ngazi kuvatera yipo o yisikise mo ntani wa hepa kukorangeda vapuli vakweni. (Heb. 10:24, 25) Morwasinke? Morwa awo kuna kara vepata lyoge lyopampepo. Hundira mpepo zokupongoka zi ku vatere o gave malimbururo gokutundilira komutjima mepongo ntani yipo zi ku vatere nsene ono kara noruha mepongo. Monkedi ozo, ove ngo yi likida kwaJehova naMunwendi asi wa hara “nonzwi” dawo.—Joh. 21:15-17.

17. Mononkedi musinke no yi likida asi ove kuna kukwatesa ko mbunga zaJehova?

¹⁷ Ntaantani tupu pevhu ngapa ka kare mbunga zimwe tupu ezi a zi pitisire mpepo zokupongoka. Litura mo unene mokuruganena kumwe nombunga zaJehova. Yi likida asi ove kwa hara vantu navenye ngwendi Jehova, pokuvazuvhisira mbudi zongwa. Honena Jehova, pokuretesa po uumwe nombili mombungakriste. Purakena komurongi gwetu gomunene, pokulironga nainye eyi atu rongo. Ano eyi nga yi kuvatera yipo ngo dire kukara nowoma apa ngava hagekesa po uzuni waSatana. Nye ove ngo ka paruka kumwe novantu wovalimburukwi ava ava kwatesa ko mbunga zaJehova.