1. Ngapi omu 2 Vakolinte 3:1-3 azi tu vatere tu mone mulyo gokuronga varongwa woBibeli va ture po ezokomeho dogoro kekuho? (Tara efano lyopontunda.)

NGAPI o lizuvhu apa o mono murongwa goBibeli gomombungakriste zeni kuna kugwana ekuho? Yosili ove kuhafa. (Mat. 28:19) Nsene asi nyove wa lironga nomurongwa ogo, ayo kukuhafesa unene pokumumona kuna kumukuhwa. (1 Tes. 2:19, 20) Apa varongwa wovape ava gwana ekuho, awo kuhafesa ava va lironga nawo ntani nombungakriste nazo kuhafa.—Resa 2 Vakolinte 3:1-3.

2. (a) Epuro musinke lyomulyo natu ka zogera ntani morwasinke? (b) Yisinke elirongo lyoBibeli? (Tara nonkango dokonhi.)

² Ayo kutuhafesa mokumona asi nomvhura ne dina ka pita, hambara nkenye kwedi ose kwa lirongere novarongwa woBibeli * 10 000 000 mouzuni mudima. Ano monomvhura odo ne, vantu wokusika 280 000 nkenye mvhura kwa gwene ekuho ngoNombangi daJehova. Ngapi omu natu vatera mamiliyona govarongwa owo va gwane ekuho? Mokumona asi Jehova simpe kuna kupulisira vantu yipo va ya kare varongwa vaJesus, twa hepa kurugana paapa twa hulira yipo tu va vatere va gwane ekuho paapa sina kara ko siruwo. Siruwo esi sina hupu ko sisupi.—1 Kol. 7:29a; 1 Pet. 4:7.

3. Yisinke natu ka zogera mosirongwa esi?

³ Mokumona asi kutulisa po varongwa mulyo unene,  Mbungagendesi kwa pulire Nobeteli asi yisinke twa hepa kurugana yipo tu vatere varongwa woBibeli va ture po ezokomeho dogoro va ka gwane ekuho. Mosirongwa esi ntani sokukwama ko, tatu ka tarurura eyi natu lirongera ko kovazuvhisi wokukarerera nokovatumwa ntani kovatareli wonombunga. * (Yis. 11:14; 15:22) Awo kwa faturura eyi nava rugana varongwa woBibeli novarongi woBibeli yipo elirongo lyoBibeli li tompoke. Mosirongwa esi tatu ka zogera yininke yitano eyi ga hepa kurugana murongwa goBibeli a ture po ezokomeho dogoro nga gwane ekuho.

4. Yisinke ngayi horoka nsene asi ose nkenye apa kulironga novantu usikamo pevero lyonzugo ndi lyembo?

⁴ Sinzi sovanavazinyetu kurugana elirongo lyoBibeli usikamo pevero lyonzugo ndi lyembo. Nampili ngomu za kara nkedi zongwa zokutameka nzogera, azo nkenye apa kukara zonsupi ntani poyiruwo yimwe kapi azi kara nkenye sivike. Vamwe kuvatera varongwa vawo va kare neharo lyokulironga pokupura murongwa nsene ga kara noserefoni yipo va vhure kumutumina ko magano gamwe gomoBibeli. Nkedi ozo kuvhura zi twikire makwedi gongandi nye azo kapisi nkedi zongwa po mokurugana elirongo lyoBibeli. Murongwa goBibeli kapi nga tura po ezokomeho a ligave kwaKarunga nokugwana ekuho nsene asi oso yiso selike siruwo a ruganesa mokulironga Nonkango daKarunga.

5. Kuliza naRukasa 14:27-33, yisinke ga nkondopekere Jesus eyi nayi tu vatera ngomu tuna kutulisa po varongwa?

⁵ Sikando simwe, Jesus kwa fatwilire eyi ga hepa kurugana muntu yipo a kare murongwa gwendi. Age kwa uyungire kuhamena muntu ogu ga here kutunga ruhungu ntani hompa ogu ga here kuza a ka rwe yita. Jesus kwa uyungire asi mutungi ga hepere “tanko kuhingira a varure eyi ngaru pita” yipo a divilise asi ruhungu oro ngaru pwa. Jesus kwa uyungire hena asi hompa ga hepere ‘tanko kuhingira a tare nsene nonkondo ko dokurwisa hompa mukwawo.’ (Resa Rukasa 14:27-33.) Monkedi zokulifana, Jesus ga yi divire asi nkenye muntu ogu ga hara kukara murongwa gwendi, ga hepa kulikonakona nawa yipo a dive eyi ayi tanta kukwama Jesus. Yipo nye, twa hepa kukorangeda varongwa vetu woBibeli tu lironge nawo nkenye sivike. Ngapi natu yi rugana?

6. Yisinke natu rugana yipo varongwa va ture po ezokomeho?

 ⁶ Ngomu muna kulironga nomurongwa goge usikamo pevero lyonzugo ndi lyembo, hetekera ko kurepesa nzogera. Nampo kuvhura o zogere hena nage nampili matjangwa gavali gokugwederera ko nkenye apa nomulironga. Nsene murongwa ana yiki, mupura nsene kolili evango oku nomuvhura kuhingira yipo mu twikire nonzogera zeni. Elimbururo eli naku tantera na li likida nsene sili ana hara kulironga Bibeli. Mokumuvatera a lironge yininke yoyinzi usimbu, kuvhura o mu pure nsene asi ana hara kulironga yikando yivali mosivike. Nye yinzi hena ya hamena mo kupitakana tupu kulironga rumwe ndi ruvali mosivike.

7. Ngapi murongi goBibeli na liwapaikira komeho a ka lironge novarongwa vendi?

⁷ Ngomurongi goBibeli, wa hepa kuliwapaikira nawa komeho o ka lironge novarongwa woge woBibeli. Ove kuvhura o tameke kuliwapaikira pokuresa sirongwa nokutara matjangwa. Konakona nawa yitwa yomulyo yipo o yi kwate egano. Gazadara ko kosiparatjangwa sosirongwa, yiparatjangwagona, mapuro, matjangwa aga va likida asi “resa,” mafano ntani novidiyo edi nadi vhura kufatura sirongwa oso. Makura gazadara ko kuhamena murongwa goge ntani nokumufatwilira monkedi zoureru a vhure kuyikwata egano nokuyitura pasirugana.—Neh. 8:8; Yis. 15:28a.

8. Yisinke natu lirongera ko kononkango daPaurusa edi da kara moVakorosi 1:9, 10 kuhamena kukanderera po varongwa woBibeli?

⁸ Ngomu ono kuliwapaikira, kanderera kwaJehova kuhamena murongwa goge ntani noyihepwa yendi. Pura Jehova a ku vatere o ka ronge monkedi ezi nazi vhura kumutwa komutjima. (Resa Vakorosi 1:9, 10.) Hetekera ko kugazara yininke eyi nayi vhura kudigopera murongwa goge kukwata egano ndi kutambura. Diworoka asi sitambo setu kuna kara sokuvatera murongwa dogoro kekuho.

9. Ngapi omu murongi na vatera murongwa gwendi a liwapaikire elirongo lyoBibeli? Faturura.

⁹ Tuna si huguvara asi nsene o lironga nomurongwa goge nkenye sivike, ngayi mu vatera a kare norupandu koyininke nainye eyi ga mu ruganena Jehova naJesus ntani a hare kulironga yoyinzi. (Mat.  5:3, 6) Mokuninka asi murongwa a gwanene mo uwa melirongo lyoBibeli, ga hepa kudemenena kweyi ana kulironga. Mokuninka asi ayi sikise mo, mufatwilira eyi ya karera nomulyo kuliwapaikira komeho zankenye elirongo. Kuliwapaikira kutanta asi ga hepa kuresa sirongwa ntani nokugazadara ko omu na tura pasirugana eyi ana kulironga. Ngapi omu no vatera murongwa goge? Liwapaikira kumwe nage sirongwa yipo o mu likide omu ava yi rugana. * Mu likida omu na gwana malimbururo ntani nomu na tenda nonkango domulyo edi nadi mu vatera a gwane elimbururo. Makura mu pura a gave elimbururo mononkango danyamwendi. Nsene a yi rugana ngoso, ngayi ku vatera o dimburure nsene asi kuna kukwata egano eyi ana kulironga. Nye kosili sininke simwe hena esi wa hepa kutantera murongwa goge a rugane.

10. Morwasinke ya karera nomulyo kuresa Bibeli nkenye ezuva ntani ngapi omu murongwa na gwanena mo mauwa?

¹⁰ Kugusa ko kulironga Bibeli nkenye sivike, koyili hena ga hepa kurugana murongwa goge nkenye ezuva yipo a gwanene mo uwa. Age ga hepa kuuyunga naJehova ntani nokumupurakena. Age kuvhura a purakene kwaJehova pokuresa Bibeli nkenye ezuva. (Jos. 1:8; Epis. 1:1-3) Mu likida omu na ruganesa elikwamo “Bible Reading Schedule” eli lya kara ko jw.org. * Nye mokugwanena mo uwa mereso lyoBibeli, mu korangeda a tede ko kweyi ana kuresa kuhamena Jehova ntani nomu nayi sikisa mo meparu lyendi.—Yirug. 17:11; Jak. 1:25.

11. Ngapi omu murongwa na lironga kukanderera monkedi zongwa ntani morwasinke ya karere nomulyo a kanderere nkenye apa?

¹¹ Korangeda murongwa goge goBibeli a uyunge naJehova pokukanderera nkenye ezuva. Kanderera kutundilira komutjima pwa nkenye etameko nehagero lyelirongo lyoBibeli ntani tumbura edina lyendi momakanderero ogo. Ngomu ana kupurakena makanderero goge, age nga li ronga omu na kanderera kwaJehova kutundilira komutjima ntani kupitira medina lyaJesus Kristusa. (Mat. 6:9; Joh. 15:16) Gazadara ko tupu omu kuresa Bibeli nkenye ezuva ntani kukanderera ngayi vatera murongwa goge a hedere pepi naKarunga. (Jak. 4:8) Nsene a yi rugana nkenye  ezuva, ngayi mu vatera a ture po ezokomeho yipo a ligave nokugwana ekuho.

12. Ngapi omu murongi na vatera murongwa gwendi a tunge po elikwatakano naJehova?

¹² Tuna hara kuvatera varongwa vetu woBibeli va lironge kuhamena Jehova. Nye eyi ava lirongo ya hepa hena kuvatwa komutjima yipo yi va tumangede va yi ture pasirugana. Jesus kwa rongere vantu monkedi zoureru ezi za ninkisire vantu va hafere eyi nga rongo. Nye vantu kwa kweme Jesus morwa age nga rongo yi va twe komutjima. (Ruk. 24:15, 27, 32) Murongwa goge ga hepa kutara Jehova asi age muntu ogu na vhura kutulisa po elikwatakano kumwe nage. Ntani ga hepa kutara Jehova asi age Guhya naKarunga gwendi ntani kaumwe kendi. (Epis. 25:4, 5) Pelirongo lyeni lyoBibeli, vatera murongwa goge a dimburure yikara yoyiwa eyi ga kara nayo Karunga. (Ex. 34:5, 6; 1 Pet. 5:6, 7) Yi kare asi sirongwa musinke muna kuzogera, demeneneni koyikara yaJehova. Vatera murongwa goge a dimburure asi Jehova ga kara noyikara yoyiwa, pasihonena eharo, nkenda ntani mbili. Jesus kwa tente asi: “Sipango po sosinene sokuhova” kuna kara ‘kuhara Jehova Karunga.’ (Mat. 22:37, 38) Vatera murongwa goge a hare unene Karunga.

13. Gava sihonena omu no vatera murongwa goBibeli a lironge yikara yaJehova.

¹³ Ngomu ono kulironga nomurongwa goge, mu fatwilira nokonda deyi wa harera Jehova. Eyi ngayi mu vatera a dimburure asi ga hepa kutunga po mwene elikwatakano naJehova. (Epis. 73:28) Pasihonena, kolili nampo egano eli wa hara unene eli ali likida eharo lyaJehova nononkondo dendi eli lya kara moyimbapiratjangwa eyi atu lirongo novantu ndi metjangwa ndi? Nsene yimo, tantera ko murongwa goge. Mu tantera asi azo kuna kara konda zimwe ezi azi kuninkisa o hare unene Guhyetu gemeguru. Nye koyili hena yimwe eyi ga hepa kurugana murongwa goBibeli yipo a ture po ezokomeho dogoro kekuho.

14. Kuliza noVahebeli 10:24, 25, ngapi omu mapongo naga vatera murongwa a ture po ezokomeho?

¹⁴ Natuvenye tuna hara varongwa vetu va ture po ezokomeho dogoro va ka gwane ekuho. Nkedi zimwe omu natu va vatera, kuna kara pokuvakorangeda va wize komapongo. Varongi wovanzi kwa uyunga asi varongwa woBibeli ava ava wiza komapongo, kutura po ezokomeho usimbu.  (Epis. 111:1) Varongi vamwe woBibeli kutantera varongwa vawo asi awo ngava ka lironga yoyinzi kuhamena Bibeli nsene va za komapongo. Resa Vahebeli 10:24, 25 nomurongwa goge ntani mufatwilira mauwa aga nga gwanena mo nsene a wiza komapongo. Mulikida vidiyo Yisinke atu rugana ko koSinyanga soUhompa? * Mu vatera a tokomene kuwiza nkenye apa komapongo.

15. Ngapi natu korangeda murongwa goBibeli a wize nkenye apa komapongo?

¹⁵ Yisinke no rugana nsene murongwa goge kapi ga wiza rumwe komapongo ndi kuwiza poyiruwo yimwe? Sininke simwe no rugana kuna kara pokumutantera ko magano gamwe aga kolirongere kepongo. Nsene a dimburura omu o hafere mapongo, ngayi mu tumangeda nage a wize komapongo. Mu pa Ruhungu oru vana kuruganesa kepongo ndi Mbapira zekepongo. Mulikida maruha aga ngava ka zogera kepongo lyokukwama ko ntani mu pura yitwa eyi yina kumuhafesa. Yininke eyi a mono ndi eyi a zuvhu kepongo lyendi lyokuhova, ngayi lisiga unene neyi yokoukareli wendi wanare. (1 Kol. 14:24, 25) Komapongo, age ngaya gwana ko vamwe woyihonena yoyiwa ava nga vhura kuhonena ntani ava ngava vhura kumuvatera a ture po ezokomeho dogoro kekuho.

16. Yisinke ya hepa po mokurugana elirongo eli nali twaredesa dogoro kekuho ntani yinke ngatu ka zogera mosirongwa sokukwama ko?

¹⁶ Ngapi natu rugana elirongo lyoBibeli eli nali twaredesa murongwa dogoro kekuho? Twa hepa kuvatera nkenye murongwa a mone omu ya kara nomulyo kulironga nkenye sivike nokuliwapaikira komeho zelirongo. Twa hepa hena kumukorangeda a uyunge naJehova nkenye ezuva ntani nokutunga po elikwatakano kumwe nage. Twa hepa kukorangeda varongwa vetu va wize komapongo nkenye apa. (Tara kakende, “ Eyi va hepa kurugana varongwa va ture po ezokomeho dogoro kekuho.”) Nye nampili ngoso, sirongwa sokukwama ko ngasi ka faturura yininke yitano eyi ga hepa kurugana murongi yipo a vhure kuvatera murongwa goBibeli a ture po ezokomeho dogoro kekuho.