1921—Nomvhura efere da ka pita

PLAY

RUHUNGU romo-1 Murongagona 1921, kwa pulire varesi epuro eli asi: “Sirugana musinke tuna ku ndindira momvhura ezi?” Ruhungu oro kwa geve elimbururo eli lya kara metjangwa lyaJesaya 61:1, 2, NW, eli lya va diworokesere kuhamena sirugana sawo sokuzuvhisa. “Jehova kwa horowora nge nizuvhise mbudi zongwa kovantu wokulinunupika . . . , Age kwa tuma nge ni sanseke asi siruwo sina siki mo sokuparura HOMPA mbunga zendi a funde nonkore dazo.”

VAZUVHISI WOURADI

Mokuninka asi sirugana sokuzuvhisa si va tompoke, valirongi woBibeli va hepere kukara nouradi. Awo va hepere kuzuvhisa “mbudi zongwa” kovantu wokulinunupika, ntani va hepere hena kutantera vadinikarunga asi “siruwo sina siki mo sokuparura.”

Munazinyetu gomugara J. H. Hoskin ogu ga tungire moKanada, kwa twikilire kuzuvhisa nouradi nampili ngomu ga ligwanekerere nomarwaneso. Ketameko lyomvhura zo-1921, age kwa ligwene nomurongi gumwe gomoukarelikarunga waMethodist. Munazinyetu Hoskin kwa tamekere nzogera nomurongi ogo pokuuyunga asi: “Twa hepa kuzogera monkedi zongwa kuhamena Bibeli ntani nampili magano getu ga lisige moyuma yongandi, ose kuvhura kutokora kuhageka nzogera ezi nokukara vakaume.” Nye oyo kapi ya horokere. Munazinyetu Hoskin kwa uyunga asi: “Ose kwa uyungire tupu nominute dononsesu. Mugara gwina kwa toonene mevero ntani ame kwa gazarere asi ekende lyevero olyo ta li tauka nokugwira pevhu.”

Mugara ogo kwa uyungire kuziguruka pokutanta asi: “Morwasinke ono ku dilira kuza kovantu ava va kara asi kapisi Vakriste?” Munazinyetu Hoskin kapi ga limbwilire. Nye apa ga tundire po age kwa litanterere mwene asi ‘nye mugara gwina kapi ana likida nkareso ezi za wapera Mukriste!’

Ezuva lyokukwama ko apa mupitisili ogu ga ka udisire mongereka zawo, age kwa ka uyungire yininke yoyidona kuhamena munazinyetu Hoskin. “Mupitisili ogo kwa tanterere vantu asi ame muntu goyipempa po unene modoropa nazinye ntani va hepere kudipaga nge.” Nye oyo kapi ya konderere munazinyetu Hoskin a hageke sirugana sendi sokuzuvhisa. Age kwa twikilire kuzuvhisira vantu wovanzi. Munazinyetu Hoskin kwa tanta hena asi: “Ame kwa haferere unene sirugana sokuzuvhisa modoropa zina. Ano vantu vamwe kwa tanterere nge asi ‘twa yi diva asi ove kuna kurugana sirugana saKarunga’ ntani vamwe kwa pere nge yininke eyi na hepere.”

ELIRONGO LYANYAMOGE NTANI ELIRONGO LYEPATA

Mokuvatera vantu va kwate egano Bibeli, valirongi woBibeli kwa pwagesere mapuro ntani nomalimbururo aga ga kere mosifo esi tuna kutumbura neina asi Awake! Pwa kere mapuro gomoBibeli aga vakurona va hepere kuzogera novana vawo. Vakurona “ngava pura vana vawo mapuro ntani noku va vatera va gwane malimbururo moBibeli.” Mapuro ngwendi “Nobuke dingapi dakara moBibeli?,” kwa vaterere vanona yipo va lironge yininke youreru moBibeli. Ntani mapuro gamwe ngwendi “Nkenye Mukriste gousili ga hepere ku yi ndindira asi nga ligwanekera nomahepeko ndi?” Epuro olyo kwa wapaikire vanona yipo va kare nouradi wokuzuvhisa.

Pwa kere hena mapuro nomalimbururo gava va kere nare nediwo lyomoBibeli. Ano malimbururo ngava ga gwana mobuke zokuhova zelirongo zoMatjangwa. Vantu wovanzi kwa lirongere yininke yoyinzi momapuro aga. Nye mo-21 Sindimba 1921, The Golden Age kwa divisire asi mapuro ogo kapi nava ga pwagesa hena. Morwasinke pwa karerere malitjindjo gangoso?

BUKE ZOMPE!

Buke The Harp of God

Sikarata esi asi likida eyi noresa

Sikarata somapuro

Vanavazinyetu ava ngava pitisire, va ya dimbwilire asi vantu va hepere kulironga Bibeli sirongwa simwe posikando. Ano konyima mwaMangundu 1921, kwa pwagesere buke The Harp of God. Vantu ava va haferere buke ozo, nawo kwa ya lihamekere mo melirongo eli ngava rugana pwa vene. Elirongo eli kwa vaterere vantu valironge sitambo saKarunga sokukagwana mwenyo gwanarunye. Ngapi omu ngava yi rugana?

Apa muntu nga gwana buke ozo, age hena nga gwana kakarata aka ngaka mulikida asi mapenuno musinke na resa mobuke ozo. Ano sivike sokukwama ko, nga gwana kakarata komapuro gokuhamena eyi ka resere mobuke ozo. Kakarata oko ngaka hagesa nereso lyosivike sokukwama ko.

Nkenye sivike, murongwa nga gwana sikarata sosipe ure woyivike 12 mombungakriste ezi za mu karera pepi. Yikarata oyo ngava yi gava kupitira movakurupe ava ngayi pili kuvhulika kuza tunda embo zende embo. Pasihonena, munazinyetu Anna K. Gardner, gomoAmerika kwa tanta asi: “Apa va pwagesere buke The Harp of God, azo kwa vaterere mukurwange gomukadi Thayle ogu ga kere noudigu wokugenda, yipo a li hameke mo mosirugana sokugavagera yikarata yomapuro nkenye sivike.” Apa muntu ngaya siki kehagero lyelirongo olyo, gumwe gomombungakriste nga mu dingura yipo a mu vatere a lironge yoyinzi kuhamena Bibeli.

Munazinyetu Gardner mosipundi sourema

SIRUGANA ESI SA KERE KOMEHO

Kouhura womvhura, munazinyetu J. F. Rutherford kwa tumine mbilive konombungakriste nadinye. Age kwa tjenge asi: “Sirugana soUhompa sina lihana nakunye mvhura ezi kupitakana nomvhura danare.” Ntani age kwa tente hena asi: “Yirugana simpe yinzi yina hupuko. Korangedeni wopeke yipo va lihameke mo mosirugana esi sosiwa.” Valirongi woBibeli kwa tulire pasirugana epukururo olyo. Ano momvhura 1922, awo kwa zuvhisire mbudi zoUhompa nouradi kupitakana pwanare.

Vakaume ava va dilire kukara nowoma

Valirongi woBibeli kwa likidire eharo pokuvatera vapuli vakwawo. Awo kwa kere vakaume wouradi ava ‘va kwefe vakwawo momaudigu’ ngomu nasi ka yi likida sihorokwa esi sina ku kwama ko.—Yis. 17:17.

Mo-31 Kudumonkuru 1921 mouvali, mugara gumwe gomusovagani kwa mu tulire modorongo morwa yeeyi ga homokerere mukadi gosirumbu. Konyima zosiruwo, vagara woyirumbu wokupitakana po-1 000, kwa homokerere kambungagona kovagara wovasovagani. Yirwanangana oyo kwa lihene usimbu dogoro kevango oku va tungire vasovagani eli ava tumbura asi Greenwood. Mambo gokupitakana po-1 400 kwa ga hwikire. Mauzera kulikida asi vantu 36 va fire, nye siruwo oso vanzi va fire kupitakana opo.

Munazinyetu gomugara Richard J. Hill mulirongi goBibeli gomusovagani ogu ga tungire moGreenwood, kwa uyunga eyi ya horokere. Age kwa tanta asi: “Apa ya horokere yirwanangana oyo masiku, ose kwa kere nepongo nga moomu twa hwa kuyirugana. Konyima zepongo, ose kwa zuvhire mauta vana ku royanga. Awo kwa royangere dogoro pokatji komasiku.” Apa lya sire moUtatu kongurangura mo-1 Pembagona, yirwanangana oyo kwa ligwederere. “Vantu vamwe kwa wizire nokututantera asi nsene tu na hara va tu popere, twa hepa kuza kosala zonene zepangero.” Ano munazinyetu Hill namukadendi ntani novanavawo vatano, kwa tjwayukilire kosala ozo. Kwa yi ngungunyikira asi vagara novakadi wokusika po-3 000, kwa kere mepopero lyovakwayita ava lya tumine epangero yipo va ka hagekese po yirwanangana oyo.

Posiruwo oso, munazinyetu Arthur Claus gosirumbu, kwa kere nouradi makura yipo ga tulire po etokoro. “Apa na zuvhire omu vantu vana ku rwanangana noku hwika mambo moGreenwood, ame yipo na tokwere kuza ni ka tare kaume kange Hill.”

Arthur Claus kwa vaterere vanona 14 valironge kuhamena Bibeli pokuruganesa buke The Harp of God

Apa na ka sikire pembo lya munazinyetu Hill, ame kwa mwene musinda gwendi gosirumbu ana kwaterere uta. Musinda ogo kwa kere kaume kamunazinyetu Hill. Age kwa gazarere asi munazinyetu Arthur nage kwa kere gumwe govarwanesi. Ano musinda ogo yipo ga zigilire asi: “Yisinke ono ku ya papara pembo lyogu mugara?”

Munazinyetu Arthur kwa uyungire asi: “Age ngano ga royere nge, nsene ngano kapi na mu limbwilire monkedi zongwa.” Ame kwa mu tanterere asi “ame kwa kere kaume kamunazinyetu Hill ntani rorunzi yipo ngani wiza pembo lyendi.” Munazinyetu Arthur nomusinda ogo ya va tompokere kupopera embo olyo kovarwanesi.

Konyima zosiruwo, munazinyetu Arthur ga ya dimbwilire asi munazinyetu Hill nepata lyendi kwa ka kere kosala zepangero. Arthur kwa mu tanterere asi vasovagani kapi va va pulisilire kutunda mo mosala pwa hana epulisiro lyopatjangwa lyokutunda komunamberewa ogu ngava takamesa. Arthur kwa tanta asi: “Ayo kapi ya kere ureru mokukauyunga nomunamberewa. Apa na mu tanterere asi na hara ku ya simba epata lya munazinyetu Hill, age yipo ga pulire nge asi: ‘Nokapakera mbili epata eli nokuvapa nayinye eyi va na hepa ndi? ’Ame yipo na limbwilire noruhafo asi yii.”

Kutunda opo, munazinyetu Arthur yipo ga genderere kuza kosala zepangero. Age kwa ka geve mbapira zepulisiro komunamberewa ogu ga ka gwene po. Munamberewa ogo yipo ga mupulire asi: “Morwasinke mukurona gomberewa ana sayinine mwene mbapira ezi? Ono diva asi nyove gokuhova kugusa mo vantu mosala ezi?” Konyima zosiruwo, munazinyetu Hill nepata lyendi yipo vava gwene. Navenye kwa rondere metuwa lyamunazinyetu Arthur yipo vaze kembo.

Munazinyetu Claus kwa divilisire asi munazinyetu Hill nepata lyendi mepopero vana kara. Uradi ou ga likidire munazinyetu Claus ntani neharo eli ga kere nalyo kovapuli vakwawo, kwa kundamene wopeke. Arthur kwa tanta asi: “Musinda gwaHill ogu ga takamesere embo lyendi, konyima ga ya fumadekere Nombangi. Vantu vamwe kwa tamekere kupurakena kombudi zoUhompa, morwa va dimbwilire asi vantu vaJehova kapi vakara nompongo ntani navenye kulitara asi va hetakana.”

RUHUNGU (SIFO SELIRONGO)