1. Yisinke ayi wiza momagano getu apa atu gazadara ko komuntu ogu ga kara nonkenda?

APA ATU gazara kuhamena muntu gonkenda, ayo kutudiworokesa muntu gombili, gougavi ntani gomutjima gomuwa. Ayo hena kutudiworokesa esimwititi lyaJesus lyokuhamena Musamaliya gonkenda. Mugara ogo gomusamaliya kwa fililire nkenda Mujuda ogu va toonene vawidi nokumuvaka. Musamaliya ogo kwa fililire nkenda Mujuda ogu va toonene ntani ga mu pakerere mbili. (Ruk 10:29-37) Sifanekeso esi kuturonga sikara sosiwa saKarunga sonkenda. Karunga kwa kara nonkenda morwa ga tu hara. Ntani age kutulikida nkenda mononkedi dokulisiga-siga nkenye ezuva.

2. Nkedi musinke zimwe omu muntu na vhura kulikida nkenda?

² Pwa kara hena nkedi zimwe omu muntu na vhura kulikida nkenda. Muntu ogu ga kara nonkenda kuvhura a tokore kudira kutengeka muntu ogu ana fire episuro. Jehova kutulikida nkenda. MuEpisarome kwa tente asi: “Kapi a tu futisa moomu twa yi liruganena.” (Epis. 103:10) Nye poyiruwo yimwe, Jehova kupisura ava ava tura nzo.

3. Mapuro musinke natu ka konakona?

³ Sirongwa esi ta si ka zogera mapuro gatatu aga gana kukwama ko. Morwasinke Jehova a likidire nkenda? Ngapi episuro lyalikwatakana nosikara sonkenda? Ntani yisinke nayi tu vatera tu likide nkenda? Tu zeni tu ka tare omu Bibeli na zi ka limburura mapuro aga.

4. Morwasinke Jehova a likidire nkenda?

⁴ Karunga kwa hara kulikida nkenda. Mupositoli Paurusa kwa tjenge asi: “Nkenda zaKarunga nene unene.” Kuliza negaununo  eli, Paurusa kwa fatwilire asi Karunga nkenda morwa age kwa pa vagwavekwa ehuguvaro lyokukaparukira meguru. (Efe. 2:4-7) Nye Jehova kapi a likida nkenda kovagwavekwa velike. MuEpisarome Ndafita kwa tjenge asi: “Jehova kuruganena navenye uwa ntani nkenda zendi kuzimonenena moyirugana yendi nayinye.” (Epis. 145:9, NW.) Mokumona asi Jehova ga hara vantu, age kuvalikida nkenda nsene pana kara konda zokuyirugana.

5. Ngapi omu Jesus ga lirongere sikara soguhwe sonkenda?

⁵ Jesus yige ga diva unene omu Jehova ga kara neharo lyokulikida nkenda. Jehova naJesus kwa kere kumwe nomvhura dononzi meguru komeho Jesus a wize pevhu. (Yis. 8:30, 31) Yikando yoyinzi Jesus ga mwene omu oguhwe ngava likida nkenda vananzo. (Epis. 78:37-42) Yikando yoyinzi apa Jesus nga rongo vantu, age nga uyunga kuhamena sikara esi sosiwa soguhwe.

6. Ngapi omu Jesus ga tu vatera tu kwate egano nkenda ezi va kara nazo oguhwe?

⁶ Mosirongwa sa ka pita, ka tu lirongere sifanekeso esi ga ruganesere Jesus somumati gokuzumbana, yipo tu kwate egano omu Jehova ga kara neharo lyokulikida nkenda. Mumati ogo kwa tundire membo ‘nokukahepeka upingwa wendi, pokukaparuka eparu lyedona.’ (Ruk. 15:13) Ano konyima, age kwa li tezwilire koyirugana yendi yoyidona, nokulinunupika ntani nokutengura kembo. Ngapi omu va lizuvhire oguhwe? Konyima tupu zosiruwo sosisupi, mumati ogo ga dimbwilire nkareso zoguhwe zongwa. Jesus kwa uyungire asi: “Age [mumati] simpe ure, oguhwe nare vana mu mono, tava mu fire nkenda makura tava duka va ka mu lidingire, tava mu ncumita unene.” Guhya kapi ga handukilire munendi. Age kwa mu fililire nkenda pokumugusira po ntani nokumutambura membo. Mumati ogo kwa tulire nzo zonene, nye oguhwe kwa mu gusilire po morwa ga li tezwilire. Guhya gomosifanekeso oso kwa fanekesa Jehova. Mosifanekeso oso, Jesus kwa likidire asi Jehova ga kara neharo lyokugusira po vananzo ava ava likida elitezururo lyosili.—Ruk 15:17-24.

7. Ngapi omu nkenda zaJehova azi likida asi ga kara hena nounongo?

⁷ Jehova kulikida nkenda morwa age kwa kara nounongo wounzi. Ntani age kutura po matokoro gomawa aga aga retere yisitwa yendi mauwa. Bibeli kuuyunga asi: “Unongo ou wa tunda meguru” kuninkisa muntu “a kare nonkenda” nonkareso zongwa. (Jak. 3:17) Ngwendi mukurona geharo, Jehova ga yi diva asi nkenda zendi kuvhura kuvatera vana vendi va  gwanene mo mauwa. (Epis. 103:13; Jes. 49:15) Mokumona asi Jehova kulikida nkenda, vantu vendi kwa kara nehuguvaro lyokomeho nampili ngomu va dira kusikilira mo. Mokumona asi Jehova ga kara nounongo, age kulikida nkenda nkenye apa a yi kara hepero zokuyirugana ngoso. Nye nampili ngoso, mokumona asi Jehova munongo, age kapi a likida nkenda nsene asi ayo nayi likida asi age kutarera udona.

8. Yisinke va hepa kuvarugana vananzo poyiruwo yimwe ntani morwasinke?

⁸ Tu tante asi mukareli gwaKarunga ta tameke kuparuka eparu lyedona pokudira kulimburukwa Karunga. Yisinke natu rugana? Paurusa kwa tente asi: “Hagekeni kulikwatakana nage.” (1 Kol. 5:11) Vakriste wokudira kulitezurura kuvagusa mo mombunga. Ayo mulyo kuyirugana ngoso mokupopera vanavazinyetu wovalimburukwi ntani ayo kulikida upongoki waJehova. Nye vamwe kugazara asi apa muntu ava mu gusa mombunga, ngoso Karunga kapi ana mu fire nkenda. Nye ayo usili ndi? Tu zeni tu ka yi tare.

9-10. Kuliza noVahebeli 12:5, 6, morwasinke natu uyungira asi kugusa muntu mombunga kuna kara ewapaiko lyewa lyonkenda? Yifanekesa.

⁹ Ayo kutuguvisa apa a tu zuvhu ediviso mombungakriste asi muntu ogu twa hara ntani ogu twa diva “kapi ana kara hena gumwe goNombangi daJehova.” Ayo kuvhura yi tu ninkise tu lipure nsene ka yi kere hepero mokumugusa mombunga. Nsene muntu vana mu gusa mombunga, ayo ngoso ku tanta asi kuna mu likida nkenda ndi? Nhi. Nsene tu dira kupisura muntu ogu lina fire episuro, ayo ngayi likida asi kapi twa mu hara ntani kwato nkenda kwendi. (Yis. 13:24) Nsene muntu vana mu gusa mombunga, kuvhura yi mu vatere a litjindje nokulitezurura ndi? Nhi. Vanavazinyetu wovanzi ava va tulire nzo kwa tanta asi apa vava gusire mombunga, kwa va vaterere va dimburure udona ou va rugene nokulitezurura ntani nokutjindja nkareso zawo yipo va tengure kwaJehova.—Resa Vahebeli 12:5, 6.

¹⁰ Tu tareni sifanekeso esi. Tu tante asi musita ta dimburura asi nzwi zendi zimwe kuna kuvera. Nye ga yi diva asi mo ku zi vatera zi veruke, ga hepa kuzigusa mo mosiunda sononkwawo yipo zi likarere. Nye nonzwi kwa hara kukara mosiunda nononkwawo. Azo kuvhura zi kare nowoma nsene va zi tura zelike. Eyi ngoso kulikida asi musita mudona nsene a gusa nzwi ozo mosiunda zi ka likerere ndi? Hawe. Age ga yi diva asi nsene a sigilira nzwi ozo zina kuvera mosiunda nononkwawo, azo nga zi hanesa ehamba kononzwi nadinye. Yipo nye, pokuzininka zi likarere, nga yi popera nonzwi nonkwawo nadinye mosiunda.—Hetakanesa Levitikus 13:3, 4.

11. (a) Monkedi musinke muntu ogu va gusa mombunga ga fana ngwendi nzwi zokuvera? (b) Yisinke nava rugana ava vagusa mombunga ntani evatero musinke nava vhura kugwana?

¹¹ Nsene Mukriste vana mu gusa mombunga, kuvhura tu yi fanekese ngwendi konzwi zina zokuvera. Ayo kwa fana ngwendi kuna kuvera pampepo. (Jak. 5:14) Ngwendi moomu tupu vantu wokuvera ava kagwisa ko wopeke, muntu ogu ga dira kukara nelikwatakano lyewa naJehova kuvhura kuninkisa wopeke va rugane yoyidona. Yipo nye, ayo hepero komuntu ogu ana dili kulitezurura va mu guse mo mombunga. Episuro lyangoso kulikida asi Jehova ga hara vakareli vendi wovalimburukwi womombungakriste ntani alyo kuvhura kuvatera munanzo a dimburure udona ou ga rugana ntani nokulitezurura. Muntu ogu va gusa mombunga kuvhura kuza komapongo yipo a ka nkondopeke epuro lyendi. Age hena kuvhura kugwana yimbapiratjangwa ntani nokutarera elikwamo lyo-JW Broadcasting^®. Ano apa vakuronambunga ava mono ezokomeho eli ana kutura po, awo kuvhura va mu peko mapukururo poyiruwo yimwe ga  mu vatere a tengwidire po elikwatakano lyendi naJehova yipo va mu tengwidire mombunga. *

12. Sininke musinke sosiwa seharo esi va hepa kurugana vakuronambunga komunanzo ogu ana kudira kulitezurura?

¹² Ayo mulyo tu diworoke asi vananzo wokudira kulitezurura, yiwo ava gusa mombunga. Vakuronambunga va yi diva asi esi kuna kara sininke sosinene esi va hepa kutarurura nawa. Awo va yi diva asi Jehova kupisura “mouhunga.” (Jer. 30:11) Awo va hara vapuli vakwawo ntani kapi va hara kurugana nkenye eyi nayi tura elikwatakano lyovapuli vakwawo mosiponga. Nye poyiruwo yimwe, sininke esi va hepa kurugana mokulikida eharo nonkenda, kuna kara pokugusa munanzo mombunga ure wongandi.

13. Morwasinke Mukriste ogu ga kere moKolinte va heperere kumugusa mombunga?

¹³ Tu tareni eyi ga rugene mupositoli Paurusa kuhamena munanzo ogu ga dilire kulitezurura. Mugara gumwe goMukriste gomoKolinte nga hondere kumwe nozina wositumbwena. Aso kwa kere sininke sosidona sili. Mosiruwo sanare, Jehova kwa tanterere Vaisraeli asi: “Mugara ogu ana kurara nomukadi gumwe gopovakadi woguhwe, ta swaura oguhwe, navenye mouvali wawo moomu vana lihonderere, va va dipage.” (Lev. 20:11) Paurusa kapi ga tanterere mbungakriste zi dipage mugara gwina. Nye age kwa tanterere Vakolinte va mu guse mo mombunga. Nkareso zondona zomugara gwina kwa kundamene vamwe womombungakriste ntani vamwe kapi va gazarere asi eyi ga rugene kwa kere nzo zonene.—1 Kol. 5:1, 2, 13.

14. Ngapi omu Paurusa ga likidire nkenda komugara gomoKolinte ogu va gusire mombunga ntani morwasinke? (2 Vakolinte 2:5-8, 11)

¹⁴ Konyima zosiruwo, Paurusa ga ya yi dimbwilire asi mugara gwina ga tulire po malitjindjo. Munanzo gwina ga li tezwilire nawa-nawa. Nampili ngomu mugara ogo ga nyatekesere edina lyombungakriste, Paurusa kwa tanterere vakuronambunga asi ‘kapi ana hara kudemenena koyininke oyo.’ Age kwa tanterere vakuronambunga asi: “Mu gusireni po nomutjima nagunye nokumuhengagwida.” Paurusa kwa va tanterere va rugane ngoso “yipo ru dire kumudinina po ruguwo.” Paurusa kwa zuvhilire nkenda mugara ogo ga litezwilire. Paurusa kapi ga here kumona mugara ogo a guve unene, morwa yirugana yoyidona eyi ga rugene ntani yi mu ninkise a dire kulitezurura.—Resa 2 Vakolinte 2:5-8, 11.

15. Ngapi omu vakuronambunga nava kara nehetakano kombinga zepisuro nokulikida nkenda?

 ¹⁵ Ngwendi Jehova, vakuronambunga kwa hara kulikida nkenda. Awo kupisura muntu ogu ana kara mepuko nsene yina kara hepero, nye hena awo kulikida nkenda nsene yina kara hepero. Nsene vakuronambunga va dira kupisura ogu ana zono, ayo ngayi likida asi awo kwato nkenda ntani hena ngayi likida asi awo kuna kukwatesa ko udona ou ana rugana. Vakuronambunga yiwo velike ya tumbukira mokulikida nkenda ndi?

16. Kuliza noYisewe 21:13, yisinke a rugana Jehova kwava ava dili kulikida nkenda wopeke?

¹⁶ Vakriste navenye kuhetekera ko kuhonena Jehova pokulikida nkenda. Morwasinke? Konda zimwe kuna kara asi Jehova kapi nga purakena ava ava dili kufira nkenda vakwawo. (Resa Yisewe 21:13.) Natuvenye kapi tuna hara Jehova a dire kupurakena komakanderero getu. Yipo nye, ayo ya kara nomulyo tu fire nkenda wopeke. Mevango lyokunyoka kupurakena kokukora oku ana kuligwanekera nako Mukriste mukwetu, ya kara nomulyo tu purakene ‘konkugo zomuhepwe.’ Nose twa hepa kuhetekera ko kutura pasirugana nonkango edi asi: “Yeeyi ogu ga dira nkenda ngava mu pangura pwa hana nkenda.” (Jak. 2:13) Ose nga yi tu rerupira kulikida nkenda nsene tu diworoka asi nose twa zi hepa. Nye unene po twa hepa kulikida nkenda nsene gumwe vana mu tengwidire mombunga.

17. Ngapi omu hompa Ndafita ga likidire nkenda?

¹⁷ Yihonena yomoBibeli kutuvatera tu likide nkenda nomu natu nyokera po kutekura wopeke momudona. Pasihonena, gazadareni ko kuhamena hompa Ndafita. Yiruwo yoyinzi nga likida nkenda. Nampili ngomu Sauru ga here kumudipaga, Ndafita kwa likidire nkenda hompa ogu ga gwavekere Jehova ntani age kapi ga rugwidire kuwoko.—1 Sam. 24:9-12, 18, 19.

18-19. Yihorokwa musinke yivali eyi ayi likida asi Ndafita kapi ga likidire nkenda?

¹⁸ Nye nampili ngoso, Ndafita kapi nga likida nkenda nkenye apa. Pasihonena, apa Nabali mugara gomukukutu ga swawire Ndafita nokunyoka kupa Ndafita novantu vendi nondya, Ndafita kwa handukire ntani kwa tokwere kudipaga mugara ogo novagara navenye vemembo lyendi. Nye mukada Nabali gedina Abigayili kwa kere nonkenda ntani nelididimiko. Age kwa wapaikire usimbu nondya yipo a di tware kwaNdafita, makura Ndafita kapi ga dipagere hena Nabali novagara vemembo lyendi.—1 Sam. 25:9-22, 32-35.

¹⁹ Sikando simwe, muporofete Natana kwa tanterere Ndafita kuhamena mugara gumwe gongawo ogu ga gusire nzwi zomugara gomuhepwe. Ndafita kwa handukire, makura yipo ga uyungire asi: “Karunga gomwenyo ani gana asi, mugara ogu ga rugana oyo yige kufa!” (2 Sam. 12:1-6) Ndafita ga divire veta zaMosesa ezi za tente asi nsene muntu ana vaka nzwi za mukwawo, ga hepere kufuta nonzwi ne. (Ex. 22:1) Ayo kapi ya kere uhunga mokutokwera mugara gwina konomfa. Sihorokwa oso kwa kere tupu esimwititi eli Natana ga tanterere Ndafita, yipo a kwate egano asi age kwa tulire nonzo dononene. Jehova kwa fililire unene nkenda Ndafita kupitakana omu Ndafita ngano ga vhulire kufira  nkenda mugara gomosifanekeso saNatana ogu ga veke nzwi zamukwawo.—2 Sam. 12:7-13.

20. Yisinke natu lirongera ko kosihonena saNdafita?

²⁰ Koneka asi apa Ndafita ga handukire, age kwa tokwere kukadipaga Nabali novagara navenye vemembo lyendi. Ano konyima, Ndafita kwa uyungire asi mugara gomosifanekeso saNatana va hepere kumudipaga. Kuvhura tu li pure asi nsene asi Ndafita kwa kere mugara gombili, morwasinke nye ga pangwilire muwidi gwina momudona? Tu gazadareni ko omu Ndafita ga lizuvhire. Posiruwo oso, Ndafita kwa kere nezwi lyedona lyokomutjima. Nsene gumwe a pangura vakwawo momudona, ayo kulikida asi elikwatakano lyendi naJehova kapi lyapama. Jesus kwa rondwere varongwa vendi asi: “Hagekeni kupangura, Karunga nage nga dire kumupangura. Monkedi omu omu pangura vakweneni, none yimo ngava mu pangura.” (Mat. 7:1, 2) Yipo nye, tu ruganeni paapa twa hulira tu nyokere po kupangura wopeke momudona ntani tu likide ‘nkenda zonene’ ngwendi moomu ayi rugana Karunga gwetu.

21-22. Mononkedi musinke dimwe natu likida nkenda?

²¹ Yinzi ya hamena mo mokukara nonkenda, kupitakana tupu kulizuvha asi twa kara nonkenda. Nkenda kutanta asi “kurugana ko yuma yipo o vatere wopeke.” Yipo nye, natuvenye twa hepa kukara nosinka sokuvatera womomapata getu, womombungakriste zetu ntani vantu womomukunda gwetu. Pwa kara nonkedi dononzi omu natu vhura kulikida nkenda wopeke. Kweli gumwe ogu ana hepa ehengagwido ndi? Kuvhura tu rugane ko yuma, pasihonena nampo pokugava nondya kwa gumwe ogu ana di hepa ndi pokuvavatera noyirugana yimwe ndi? Kweli Mukriste ogu va tengwidira mombunga ana hepa kaume ogu na vhura kumukorangeda ndi? Kuvhura tu tantere ko wopeke mbudi zongwa zehengagwido ndi? Ezi kuna kara nkedi zimwe zongwa omu natu likida nkenda kovantu ava atu kara nawo.—Joba 29:12, 13; Rom. 10:14, 15, 15; Jak. 1:27.

²² Nsene tu dimburura asi koveli vana hepa evatero, ose nga tu papara nonkedi dokulisiga-siga yipo tu va likide nkenda. Apa atu likida nkenda, ose kuhafesa Guhyetu gemeguru ogu ga kara ‘nonkenda zonene.’