NKENYE mvhura, vantu wovanzi ava vagusa mombunga kuvatengwidira mo. Gazadara ko tupu ‘ruhafo rorunene oru aru kara meguru,’ apa gumwe ava mu tengwidire mombunga. (Ruk. 15:7, 10) Nsene asi va kutengwidira mombunga, diva asi Jesus noVaengeli ntani naJehova vana hafa sili unene, kweyi va kutengwidira mombunga. Nye nampili ngoso, ngomu ono kuwapukurura elikwatakano lyoge naJehova, kuvhura ngo li gwanekere nomaudigu. Maudigu musinke gamwe ngo ligwanekera nago ntani yisinke ngayi kuvatera yipo oga funde po?

Vanavazinyetu wovanzi, simpe kukara nomalizuvho gomadona konyima zokuvatengwidira mombunga. Nampo nove kulizuvha ngwendi moomu ga lizuvhire hompa Ndafita. Nampili konyima zapa Jehova ga mugusilire po nonzo dendi, age kwa tente asi: “Mausima gange gana pitakana nge.” (Epis. 40:12; 65:3) Konyima zapa gumwe ava mutengwidire mombunga, age kuvhura a lizuvhe unzoni ndi a kare nonomuga nomvhura dononzi. Isabelle ogu va gusire mombunga ure wonomvhura dokupitakana po 20 * kwa tanta asi: “Ayo kudigopera nge kuyipura asi Jehova ga gusira nge po.” Nsene o dompa mutjima, kuvhura hena o tengure monyima. (Yis. 24:10) Wa ha pulisira yininke oyo yikuhorokere.

Vamwe kukara nosinka asi kapi tava vhuru kusikisa mo eyi ya hepa po, mokuwapukurura elikwatakano lyawo naJehova. Konyima zapa munazinyetu gomugara Antoine va mu tengwidilire mombunga, age kwa tente asi: “Ame kwa divarere sinzi soyininke eyi na lirongere komeho va guse nge mombunga.” Malizuvho gangoso kuninkisa vamwe va dire kulihameka mo unene moyirugana yopampepo.

Mokuyifanekesa, apa embo lyagumwe a li zonauka kekundungu, kuvhura yi mu ninkise a gazare asi  mokulitungurura ngali hepa yirugana yoyinzi ntani nosiruwo sosire. Mokulifana, nsene asi ove kwa tulire nzo zonene ezi za zonagwire po ukaume woge naJehova, kuvhura o lizuvhe asi ngayi hepa elituromo lyenene mokuwapukurura elikwatakano lyoge naJehova. Nye koyili eyi ngayi kuvatera o yi sikise mo oyo.

Jehova kututantera asi: “Wizeni tu ya wapaikeni nonkango.” (Jes. 1:18) Ove wa rugana ko yuma nare. Jehova ga ku hara kweyi wa yi rugana ngoso. Gazadara ko tupu, mokumona asi wa tengwira kwaJehova, age kuvhura a ku ruganese mokulikida Satana asi munayipempa!—Yis. 27:11.

Pokuyirugana ngoso, ove wa hedera nare pepi naJehova ntani age kwa tumbwidira asi nage nga ku hedera pepi. (Jak. 4:8) Vanavazinyetu womombungakriste, kuyihafera kweyi wa tengura kombunga zaJehova. Nye nampili ngoso, yinzi simpe wa hepa kurugana ko. Wa hepa kunkondopeka eharo lyoge lyokuhara kaume koge Jehova. Ngapi omu noyirugana eyi?

Hetekera ko kulitulira po yitambo eyi no sikisa mo. Diworoka asi ediwo eli wa lirongere kuhamena Jehova nositambo sendi so komeho, simpe ha wa yidivira. Nye ngesi, wa hepa hena kurugana yininke eyi. Pasihonena, kuza mokuzuvhisa nkenye apa, kuza komapongo, ntani no kukara kumwe novanavazinyetu. Koneka yitambo eyi yina ka kwama ko.

Uyunga naJehova nkenye apa. Jehova ga yi diva asi nsene o twikira kulizuvha unzoni, ngayi ku karera udigu kukanderera kwendi. (Rom. 8:26) Nye ‘twikira kukanderera’ kwaJehova, omu tantere asi ono hara kumuhedera unene pepi. (Rom. 12:12) Andrej kudiworoka omu ga lizuvhire. Age kwa tanta asi: “Ame kwa lizuvhire unzoni wounene ntani nonomuga, nye konyima zapa ngani kanderere, ame ngani lizuvhu ko hansa. Ame kwa lizuvhire mbili komutjima.” Nsene kapi ono diva eyi nokanderera, kona-kona makanderero gahompa Ndafita gelitezururo aga vatjanga mEpisarome 51 ntani 65.

Lironga Bibeli nkenya apa. Eyi ngayi kuvatera o kare nepuro lyokupama ntani o hare Jehova unene. (Epis. 19:7-11) Felipe kwa tanta asi: “Mokumona asi kapi ngani resa Bibeli nkenye apa nokuzilironga, eyi kwa ninkisire nge nitengure monyima ntani nokuguvisa Jehova. Ame kapi na here kutura epuko lyokulifana hena, makura yipo natokwere kulironga Bibeli nkenye apa.” Nove kuvhura o rugane yokulifana. Nsene ono hepa ko evatero kuhamena yirongwa eyi novhura kulironga pelirongo lyoge lyoBibeli, pura ko evatero kwa kaume koge ogu ga kura pampepo.

Tulisa po ukaume novanavazinyetu. Vamwe ava va tengwidira mombunga, kukara nosinka asi womombungakriste ngava va tara momudona. Larissa kwa tanta asi: “Ame kwa lizuvhire nomuga ntani kwa lizuvhire asi naguvisire unene vanavazinyetu womombungakriste. Ame kwa kere nomalizuvho gangoso siruwo sosire.” Diva asi vakuronambunga ntani novanavazinyetu, vana hara kukuvatera o wapukurure elikwatakano lyoge naJehova. (Tara kakende “ Eyi nava rugana ko vakuronambunga?”) Awo vana hafa sili unene kweyi va ku tengwidira mombunga ntani vana ku harere o hafe!—Yis. 17:17.

Yisinke nayi kuhedesera kombungakriste? Lihameka mo unene mweyi vana kurugana vapuli vakweni womombungakriste. Ngwendi pokuza nkenye apa komapongo ntani mokuzuvhisa. Ngapi omu ngayi kuvatera yininke oyo? Felix kwa tanta asi: “Vanavazinyetu womombungakriste kwa ndindilire nge nononkondo ni tengure. Ame kwa lizuvhire asi va hara nge. Navenye kwa vaterere nge ni lizuvhe asi name kwa hamena kombungakriste ntani asi kuvhura ni twikire kukarera Jehova.”—Tara kakende “ Yisinke wa hepa kurugana?”

Satana nga twikira kuretesa po ‘maudigu’ yipo ga ku dompese ngomu ono kuwapukurura elikwatakano lyoge naJehova. (Ruk. 4:13) Yipo nye, liwapaikira ngesi yipo o nkondopeke elikwatakano lyoge naJehova.

Jehova kwa tumbwidira kuhamena nonzwi dendi asi: “Edi da zumbana ngani di papara, edi da tjwayauka ngani ka di reta, edi da rwarwa ngani di dinga, dokuyova ngani di koreka.” (Hes. 34:16) Jehova kwa vatera wovanzi yipo va tengwidire po elikwatakano lyawo kumwe nendi. Diva asi age ana hara kukuvatera o tunge po elikwatakano lyokupama unene kumwe nendi.