SIRONGWA SELIRONGO 42
Yi pura nawa-nawa asi wa gwana usili
“Konakoneni nayinye, makura mu kwaterere kweyi yoyiwa po.”—1 TES. 5:21.
RUSUMO 142 Kwaterera kehuguvaro lyetu
ETWAROMO *
1. Morwasinke sinzi sovantu vana piyaganene?
PWA KARA maukarelikarunga gomanzi aga aga litumbura asi awo Vakriste ntani nokugazara asi awo kukarera Karunga monkedi ezi azi mu hafesa. Eyi yiyo sinzi sovantu vana karere mepiyagano lyenene. Awo kupura asi: “Pwa kara ukarelikarunga umwe tupu wousili, ndi maukarelikarunga nagenye kuhafesa Karunga?” Mokumona asi ose Nombangi daJehova, ngoso twa yi pura asi eyi atu rongo vantu kuna kara usili ntani asi monkedi ezi atu karere Jehova yizo zelike nkedi a vhuru kutambura ndi? Kuvhura sili tu yi pure yininke oyo ndi? Tu zeni tu ka konakone maumbangi aga gana kukwama ko.
2. Kuliza no-1 Vatesaronika 1:5, morwasinke Paurusa gayi pulilire asi eyi ga lirongere kwa kere usili?
2 Mupositoli Paurusa kwa pulire nawa-nawa usili ou ga lirongere. (Resa 1 Vatesaronika 1:5.) Paurusa kapi tupu ga pulire usili owo yipo a li hafese mwene. Age kwa yi pulire morwa nga konakona unene Nonkango daKarunga. Ntani age kwa pulire asi “nayinye eyi va tjanga moMatjangwa gokupongoka kwa tunda kwaKarunga.” (2 Tim. 3:16) Yisinke ga dimbwilire apa ga lirongere? Paurusa kwa dimbwilire moMatjangwa asi Jesus kwa kere Mesiyasa getumbwidiro, ano ou kuna kara umbangi ou ngava semburura vampitisili woVajuda. Vampitisili womaukarelikarunga ogo ngava litumbura vene asi awo kukarera Karunga, nye yirugana yawo kwa likidire asi awo kwa mu nyokere. (Tit. 1:16) Mokulisiga, Paurusa kapi ga lifene novagara owo ntani age kapi ga tokwere asi yinke na vhura kupura moNonkango daKarunga neyi na dira kupura. Age ga liwapaikilire kuronga nokutura pasirugana ‘mapukururo gaKarunga.’—Yirug. 20:27.
3. Mokuninka tu yi pure asi twa gwana usili, ngoso twa hepa kugwana malimbururo komapuro nagenye ndi? (Tara kakende “ Yirugana yaJehova nomagazaro gendi yinzi unene, ‘nokuvhura si kuyinongauka.’”)
3 Vamwe kugazara asi ukareli wousili wa hepa kulimburura mapuro nagenye, kukwatera mo mapuro gamwe aga va dira kulimburura nawa-nawa moBibeli. Nye egano olyo usili ndi? Tu tareni sihonena saPaurusa. Age kwa korangedere vapuli vakwawo asi “konakoneni nayinye,” nye ga uyungire hena asi pwa kere yininke yoyinzi eyi ga dilire kukwata egano. (1 Tes. 5:21) Age kwa tjenge asi: “Ose kwa kara nediwo lyesesu.” Age kwa uyungire hena asi: “Ose kapi tuna kumona nawa ngwendi googu ana kulitara montarero zosivera.” (1 Kol. 13:9, 12) Paurusa kapi ga kwete egano yininke nayinye, eyi ya lifana hena nose. Nye nampili ngoso, age ga divire usili kuhamena sitambo saJehova. Eyi ga divire ya mu gwanene po mokuyipura asi eyi ga pulire nani usili.
4. Ngapi omu natu yi pura nawa-nawa asi twa gwana usili ntani yisinke natu ka zogera kuhamena Vakriste wousili?
4 Nkedi zimwe omu natu yi pura nawa-nawa asi twa gwana usili kuna kara pokuhetakanesa omu Jesus nga rugana ukareli wousili nomu vana kuurugana Nombangi daJehova neina. Mosirongwa esi tatu ka zogera asi Vakriste wousili (1) kunyokera po yikarunga yoyipempa, (2) kufumadeka edina Jehova, (3) kwa hara usili ntani (4) va li hara-hara.
OSE KUNYOKERA PO YIKARUNGA YOYIPEMPA
5. Yisinke natu lirongera ko kwaJesus kuhamena omu natu karera Karunga ntani ngapi natu tura pasirugana eyi ga rongere?
5 Mokumona asi Jesus kwa here unene Jehova, age kwa mu karere gelike yikare asi apa ga kere meguru ndi apa ga ya kere pevhu. (Ruk. 4:8) Age kwa tanterere varongwa vendi yipo nawo va karere Jehova gelike. Jesus novarongwa vendi wovalimburukwi kapi ngava ruganesa mafano mokukarera Jehova. Mokumona asi Karunga mpepo, kwato gokuvhura kurugana sininke sokumufana. (Jes. 46:5) Nye ngapi kuhamena kurugana mafano govantu vamwe ava ava tara asi vapongoka ntani nokugakanderera? Sipango sauvali moyipango murongo, Jehova kwa uyungire asi: “Walye o liruganene mafano gokuhonga ndi nkenye sihwi seyi yekeguru ndi seyi yepevhu . . . Walye o yi nyongamene.” (Ex. 20:4, 5) Vantu ava va hara kuhafesa Karunga va kwata nawa egano nonkango odo.
6. Sihonena musinke adi kwama Nombangi daJehova neina mokukarera Jehova?
6 Vantu ava va lironga kuhamena ehisitoli kwa tanta asi Vakriste womosiruwo sovapositoli ngava karere Karunga gelike. Pasihonena, buke History of the Christian Church kwa uyunga asi Vakriste womosiruwo sanare “kapi va here” kutura mafano momavango gawo goukareli. Neina Nombangi daJehova nado kukwama sihonena soVakriste womosiruwo sovapositoli. Ose kapi atu kanderere mafano ndi vaengeli ntani kapi atu kanderere kwaJesus. Ntani kapi atu djamene erembe ndi tu rugane yininke yimwe eyi nayi likida asi ose kuna kukarera epangero. Yikare asi yisinke ngava tu sininika vantu tu rugane, ose tuna tokomene kulimburukwa nonkango daJesus edi asi: “Jehova Karunga goge gelike a huru yige no karera.”—Mat. 4:10.
7. Elisigo musinke lya kara po pokatji koNombangi daJehova ntani nomaukarelikarunga gapeke?
7 Neina, sinzi sovantu kwa hara kupurakena kovampitisili womaukarelikarunga ava va divikwa unene. Awo kwa hara unene vampitisili owo ntani kuhara kuvakarera. Sinzi sovantu kuza konongereka dovampitisili owo nokuranda nobuke dawo ntani kugava yimaliwa yoyinzi kovampitisili owo. Vamwe kupura nayinye eyi ava uyunga vampitisili owo. Vantu ava ava zi konongereka odo, kuhafera unene vampitisili vawo ngwendi asi Jesus vana mono. Mokulisiga, vantu ava ava karere Karunga monkedi zongwa kapi ava kwama vantu. Nampili ngomu atu fumadeke ava ava tu pitisire, nye ose kukwama erongo lyaJesus eli asi: “Namuvenye vezimo limwe tupu.” (Mat. 23:8-10) Ose kapi atu karere vantu, yikare asi vampitisili womaukarelikarunga ndi vampitisili womaupolitika. Ntani kapi atu kwatesa ko eyi ava tokora kurugana. Mevango lyokuyirugana oyo, ose kapi atu lihameke mo moyininke oyo ntani twa li gusa ko koyininke youzuni. Mwanayinye eyi, ose twa li siga nomaukarelikarunga aga aga uyunga asi awo Vakriste.—Joh. 18:36.
OSE KUFUMADEKA EDINA LYAKARUNGA, JEHOVA
Vakriste wousili kwa kara nomfumwa zokutantera ko wopeke kuhamena edina lyaKarunga, Jehova (Tara paragarafu 8-10) *
8. Ngapi omu tuna yi diva asi Jehova ana hara tu yererepeke edina lyendi nokulidivisa kovantu navenye?
8 Sikando simwe Jesus kwa kanderere asi: “Tate, yererepeka edina lyoge.” Jehova mwene kwa limbwilire ekanderero olyo nezwi lyenene eli lya tundire meguru nokutumbwidira asi nga yererepeka edina lyendi. (Joh. 12:28) Jesus kwa yererepekere edina lyoGuhwe apa nga zuvhisa pevhu. (Joh. 17:26) Yipo nye, ayo ya tumbukira Vakriste wousili mokuruganesa edina lyaKarunga ntani nokulidivisa kwava wopeke.
9. Ngapi omu Vakriste womosiruwo sovapositoli va yi likidire asi va fumadeka edina lyaKarunga?
9 Konyima tupu zapa va tulisire po mbungakriste zokuhova mosiruwo sovapositoli, Jehova kwa diworokere “vantu wokonomuhoko dapeke ntani age kwa horowera mo vamwe edina lyendi.” (Yirug. 15:14) Vakriste womosiruwo sovapositoli ngava ruganesa edina lyaKarunga nokulidivisa kwava wopeke. Vapositoli ntani novarongwa vaJesus ngava ruganesa edina lyaKarunga mokuzuvhisa ntani napa ngava tjanga nobuke domoBibeli. Monkedi zangoso, awo kwa yi likidire asi yiwo tupu velike ngava divisa edina lyaKarunga.—Yirug. 2:14, 21.
10. Yisinke yina kulikida asi Nombangi daJehova yido tupu delike dakarera po edina lyaKarunga, Jehova?
10 Nombangi daJehova kuna kara vantu ava vakarera po edina lyaKarunga ndi? Tu tareni ko maumbangi gamwe. Neina sinzi sovampitisili womaukarelikarunga kwa rugana paapa va hulira yipo va horeke edina lyaKarunga. Awo kwa li gusa mo monoBibeli dawo edi va toroka ntani poyiruwo yimwe kapi ava li pulisire va li ruganese momaukarelikarunga gawo. * Eyi kulikida nawa-nawa asi Nombangi daJehova yiwo velike ava fumadeke edina lyaKarunga. Ose kuna kutwikira kudivisa edina lyaKarunga kupitakana maukarelikarunga nagenye. Ntani kuna kutwikira kurugana paapa twa hulira tu paruke kuliza nedina lyetu, Nombangi daJehova. (Jes. 43:10-12) Ose kwa nduruka noBibeli doNew World Translation of the Holy Scriptures, dokupitakana pomamiliyona 240. Edina Jehova kwa li tengwidira mo monoBibeli odo pomavango apa va li gusire vatoroki vamwe woBibeli. Ntani ose kunduruka yimbapiratjangwa yokupitakana pomaraka 1000, omu va ruganesa edina lyaKarunga Jehova.
OSE KWA HARA USILI
11. Ngapi omu Vakriste womosiruwo sovapositoli va yi likidire asi va here usili?
11 Jesus kwa here usili kuhamena Karunga ntani nositambo sendi. Monkedi omu Jesus nga paruka, kulikida asi age kwa here usili ntani nga u divisa kovantu. (Joh. 18:37) Varongwa vaJesus wousili nawo kwa here unene usili. (Joh. 4:23, 24) Mupositoli Peturusa kwa tumbwire Vakriste wousili asi awo kurugana ukareli ‘wousili.’ (2 Pet. 2:2) Mokumona asi Vakriste womosiruwo sovapositoli kwa here usili, awo kwa nyokerere po magano gomaukarelikarunga goyipempa nonompo ntani nomagano aga ga dilire kuliza nousili. (Koros. 2:8) Mokulifana, Vakriste neina kurugana paapa va hulira yipo va ‘kwaterere kousili’ ou va lironga moNonkango daKarunga.—3 Joh. 3, 4.
12. Yisinke ayi horoka apa ava ava pitisire ava dimburura asi pana hepa ekwatogano lyepe ntani morwasinke ava tulire po malitjindjo gangoso?
12 Nombangi daJehova kapi ava uyunga asi awo va kwata egano Bibeli nazinye. Poyiruwo yimwe, awo kwa tura mapuko monkedi omu ava faturura marongo gomoBibeli ntani kuhamena ewapaiko lyomombungakriste. Oyo kapisi yi tu tetukise. Bibeli za yi zeresa asi vantu vaKarunga ngava kwata egano usili womoBibeli nakauke-nakauke. (Koros. 1:9, 10) Jehova kuhorora usili nakauke-nakauke, ano ose twa hepa kundindira nelididimiko dogoro noku ngatu kwata nawa egano usili owo. (Yis. 4:18) Apa mbungagendesi azi dimburura asi twa hepa malitjindjo gongandi kuhamena monkedi omu atu rugana yininke, azo kapi azi likatakata, nye kutura po malitjindjo ogo usimbu. Sinzi sonongereka neina kutjindja marongo gawo morwa vana hara kuhafesa vantu ndi yipo va fumane mouzuni, nye Nombangi daJehova kutura po malitjindjo morwa kwa hara kuhedera Karunga pepi nokumukarera ngwendi moomu ngayi rugana Jesus. (Jak. 4:4) Ose kutura po malitjindjo ogo morwa yeeyi atu kwata nawa egano Matjangwa nye kapisi asi morwa magano govantu gana litjindji. Ose kwa hara usili.—1 Tes. 2:3, 4.
OSE KWA LIHARA-HARA
13. Sikara musinke sosinene va likidire Vakriste womosiruwo sovapositoli ntani ngapi omu Nombangi daJehova vana kusilikida neina?
13 Vakriste womosiruwo sovapositoli kwava divilire koyikara yoyiwa eyi va kere nayo, nye unene po awo kwava divilire kosikara seharo. Jesus kwa tente asi: “Nsene mu lihara-hara, navenye ngava yi dimburura asi one sili varongwa vange.” (Joh. 13:34, 35) Nombangi daJehova neina mouzuni mudima kulilikida eharo ntani kwa kara mouumwe. Ose twa lisiga nomaukarelikarunga nagenye, nampili ngomu twa tundilira koyirongo yokulisiga-siga ntani nonompo dokulisiga-siga. Ose kumona eharo olyo, apa atu kara komapongo nokoyigongi. Eyi kutuvatera tu yi pure nawa-nawa asi ose kukarera Jehova monkedi ezi azi mu hafesa.
14. Kuliza noVakorosi 3:12-14, nkedi musinke zomulyo po natu vhura kulikida eharo kwava wopeke?
14 Matjangwa kutukorangeda tu ‘lihare unene.’ (1 Pet. 4:8) Nkedi zimwe omu atu likida eharo kuna kara pokuligusira-gusira po nokulididimikira-didimikira. Ose kupapara hena nonkedi omu natu kara nougavi ntani nomu natu tambura vanavazinyetu momambo getu, kukwatera mo ava ava tu zonene. (Resa Vakorosi 3:12-14.) Apa atu likida eharo lyangoso, ose kuyilikida asi ose sili Vakriste wousili.
‘EPURO LYETU LIMWE TUPU’
15. Mononkedi musinke dimwe atu honene Vakriste womosiruwo sovapositoli?
15 Ose kukwama hena sihonena soVakriste womosiruwo sovapositoli mononkedi dimwe. Mbunga zetu kwa zi wapaika hena ngwendi Vakriste vena, pasihonena twa kara novatareli wonombunga, vakuronambunga ntani vakwafimbunga. (Fil. 1:1; Tit. 1:5) Ngwendi Vakriste owo, ose kufumadeka noveta daJehova kuhamena eligwanekero panyama, nonkwara nohonde ntani ose kupopera mbungakriste kwava va dira kuhara kulimbuarukwa noveta daJehova.—Yirug. 15:28, 29; 1 Kol. 5:11-13; 6:9, 10; Heb. 13:4.
16. Yisinke natu lirongera ko kononkango edi da kara moVaefeso 4:4-6?
16 Jesus kwa uyungire asi sinzi sovantu ngava litumbura asi Vakriste, nye kapisi navenye ngava kara Vakriste wousili. (Mat. 7:21-23) Matjangwa kuturondora asi pomazuva gopouhura, sinzi sovantu “ngava moneka ngwendi vakareli vaKarunga.” (2 Tim. 3:1, 5) Nye Bibeli kututantera asi pwa kara “epuro limwe tupu” eli a hafere Karunga.—Resa Vaefeso 4:4-6.
17. Wolye va kara nepuro lyosili ava ava honene Jesus neina?
17 Wolye vana kulikida epuro lyousili? Tuna lirongo maumbangi gomanzi mosirongwa esi. Tuna mono sihonena esi ga rongere Jesus kuhamena ukareli wousili ntani nomu Vakriste womosiruwo sanare va u kweme. Vantu ava ava likida epuro lyousili kuna kara Nombangi daJehova. Ose kulizuvha mfumwa zonene kweyi twa kara Nombangi daJehova ntani nokudiva usili kuhamena Jehova nositambo sendi. Tu ruganeni paapa twa hulira yipo tu kwaterere kousili ou twa diva.
RUSUMO 3 Nonkondo nepuro nehuguvaro
^ para. 5 Mosirongwa esi, tatu ka tara sihonena soukareli wousili esi ga tulisire po Jesus ntani nomu va si kweme varongwa vendi womosiruwo sanare. Natu gwana hena umbangi ou una kulikida asi Nombangi daJehova kuna kutwikira kukwama ukareli owo wousili.
^ para. 10 Pasihonena mo-2008, mupapa gwau 16 gedina Benedict kwa uyungire asi edina lyaKarunga Jehova “kapisi va li ruganese” moukarelikarunga woVakatolika, momarusumo ndi momakanderero gawo.
^ para. 62 EFANO EPENUNO 21: Mbunga zaJehova kwa toroka Bibeli zoNew World Translation momaraka gokupitakana po-200 yipo vantu va zi liresere momaraka gawo ntani kwa tumbura mo edina lyaKarunga.
