1. Ngapi omu Karunga ga nkondopekere vakareli vendi wovalimburukwi womosiruwo sanare?

 RORUNZI Nonkango daKarunga kufaturura vagara wovalimburukwi asi awo kwa nkondoparere. Nye kapi ngava lizuvhu nkenye apa asi vana nkondopara. Pasihonena, poyiruwo yimwe Hompa Ndafita nga lizuvhu asi age kwa nkondoparere ngwendi “hotepopero zondundu.” Nye poyiruwo yimwe age kwa kere ‘noutjirwe.’ (Epis. 30:7) Mpepo zaKarunga kwa pere Simisoni nonkondo dononene, nye Simisoni ga yi divire asi pwa hana nonkondo dokutunda kwaKarunga, age nga ‘gomoka a fane vantu navenye.’ (Vap. 14:​5, 6; 16:17) Vagara ava wovalimburukwi kwa nkondoparere morwa Jehova yige ga va pere nonkondo.

2. Morwasinke mupositoli Paurusa ga uyungire asi apa ani dili nonkondo ame kunkondopara? (2 Vakolinte 12:​9, 10)

² Mupositoli Paurusa nage ga yi dimbwilire asi ga hepere nonkondo dokutunda kwaJehova. (Resa 2 Vakolinte 12:​9, 10.) Paurusa nage nga vera-vera ngwendi sinzi setu. (Gar. 4:​13, 14) Poyiruwo yimwe nage ngayi mu digopere kurugana yininke youhunga. (Rom. 7:​18, 19) Ntani poyiruwo yimwe nga kara nosinka nowoma kuhamena eyi nampo nayi vhura kumuhorokera. (2 Kol. 1:​8, 9) Nye nampili ngoso, apa Paurusa ga dilire nonkondo, age kwa nkondoparere. Ngapi omu ga gwene nonkondo? Jehova kwa pere Paurusa nonkondo edi ga hepere yipo a lididimikire maudigu gendi.

3. Mapuro musinke natu ka limburura mosirongwa esi?

³ Jehova kwa tumbwidira asi nga tu nkondopeka nose. (1 Pet. 5:10) Nye ose kapi tatu vhuru kundindira asi tu gwane nonkondo odo twa hana kurugana ko yuma. Mokuyifanekesa, indjina  kuninkisa etuwa ligende. Nye nampili ngoso, musingi ga hepa kulyata komaholi mokulininkisa ligende. Mokulifana, Jehova ga liwapaikira kutupa nonkondo edi twa hepa, nye twa hepa kurugana ko yuma yipo tu gwanene mo mauwa. Yininke musinke ga tu pa Jehova eyi nayi tunkondopeka? Ntani yisinke twa hepa kurugana yipo tu gwane nonkondo odo? Tatu ka gwana malimbururo komapuro ogo pokukalironga omu Jehova ga nkondopekere muporofete Jona, Mariya ozina vaJesus ntani mupositoli Paurusa. Natu ka tara hena omu Jehova a twikire kunkondopeka vakareli vendi neina mononkedi dokulifana.

4. Ngapi omu natu gwana nonkondo dokutunda kwaJehova?

⁴ Nkedi zimwe omu natu gwana nonkondo dokutunda kwaJehova kuna kara pokukanderera kwendi. Jehova nga limburura makanderero getu pokutupa “nonkondo edi va dira kukara nado vantu.” (2 Kol. 4:7) Ose hena kuvhura kugwana nonkondo pokuresa Nonkango dendi ntani nokuteda ko. (Epis. 86:11) Mbudi zaJehova ezi za kara moBibeli kwa kara “nononkondo.” (Heb. 4:12) Apa o kanderere kwaJehova nokuresa Nonkango dendi, ove ngo gwana nonkondo edi wa hepa yipo o lididimikire, o twikire kukara noruhafo ndi o sikise mo situmbukira soudigu. Kakoneke omu Jehova ga nkondopekere muporofete Jona.

5. Morwasinke muporofete Jona ga heperere nonkondo?

⁵ Muporofete Jona ga hepere nonkondo. Age kwa hendukire sirugana esi ga mu pere Jehova asi ngano a si rugane. Ngoyitundwamo, age hambara a zumbanese eparu lyendi mekundungu lyenene ntani kwa tulire vakwawo ava ga rondere nawo mosiponga. Apa va mu zuguminine mefuta, emumfi kwa mu minine makura Jona yipo ga kere mevango lyoutjirwe unene, age kwa ka kere mezimo lyemumfi. Ngapi ono kugazara ga lizuvhire Jona? Age ngoso ga yi ndindilire asi ta fire mo ndi? Age ngoso ga kere nomasinganyeko nsene asi Jehova ga mu sigilire ndi? Jona nampo kwa kere noutjirwe wounene.

6. Kuliza naJona 2:​1, 2, 7, yisinke ya nkondopekere Jona ngomu ga kere mezimo lyomfi?

⁶ Yisinke ga rugene Jona yipo a gwane nonkondo apa ga kere mezimo lyemumfi? Age kwa kanderere. (Resa Jona 2:​1, 2, 7.) Nampili ngomu ga dilire kulimburukwa Jehova, age galitezwilire ntani ga kere nepuro asi Jehova napurakena kekanderero lyendi. Jona kwa gazadarere ko hena koMatjangwa. Morwasinke tuna kuuyungira ngoso? Ekanderero lyendi eli va tumbura mwaJona egaununo 2 kwa ruganesa mo nonkango dokulifana nedi da kara moMapisarome. (Pasihonena, hetakanesa Jona 2:​2, 5 kumwe nEpisarome 69:1; 86:7.) Ayo kulikida nawa-nawa asi Jona ga divire nawa matjangwa. Matjangwa ogo kwa vaterere Jona a kare nehuguvaro asi Jehova nga mu vatera. Jehova ga parwire Jona, ano konyima age ga liwapaikilire kurugana sirugana esi ga mu tanterere Jehova a rugane.—Jona 2:10–3:4.

7-8. Ngapi omu munazinyetu gomugara gomoTaiwan ga gwene nonkondo posiruwo somaudigu?

⁷ Sihonena saJona kuvhura kutuvatera nsene kuna kuligwanekera nomaudigu. Pasihonena, munazinyetu gomugara gomoTaiwan, Zhiming, b kwa kara nomauvera gomanene. Ntani vemekoro lyendi kumutekura momudona morwa yeeyi ga pura mwaJehova. Age kugwana nonkondo kwaJehova kupitira mokukanderera ntani pokulironga. Age kwa tanta asi: “Poyiruwo yimwe apa ani ligwanekere nomaudigu, ame kukara nosinka sosinene, ano eyi kuninkisa nge ni dire kulitura yipo ni rugane elirongo lyanyamwange lyoBibeli.” Nye age kutwikira kuhuguvara mwaJehova yipo a mu vatere. Age kwa tanta hena asi: “Pomuhowo, ame kukanderera  kwaJehova, ano kutunda opo ame kuruganesa mambako gange gokomatwi yipo ni purakene kononsumo doUhompa. Poyiruwo yimwe ame kudimba nezwi lyokudameka dogoro ni liture. Makura konyima tani tameke kulironga.”

⁸ Elirongo lyoBibeli kwa nkondopekere munazinyetu gomugara Zhiming momaudigu gendi. Pasihonena, ngomu ga verukire ketauro lyenene, nesa gumwe kwa mu tanterere asi mokumona asi turuhagona toyininke yoyigeha yomorutu rwendi tuna sesupa, age va hepa kumutura honde. Momasiku komeho va ka mu taure, Zhiming kwa resere kuhamena munazinyetu gomukadi ogu ga kere netauro lyokulifana. Turuhagona toyininke yoyigeha yomorutu rwendi kwa sesupire unene kupitakana Zhiming, nye nampili ngoso munazinyetu ogo gomukadi kapi ga tambwire honde ntani ga verukire. Sihorokwa oso kwa nkondopekere Zhiming yipo a twikire kulimburukwa.

9. Yisinke norugana nsene kuna kulizuvha sinka sosinene kuhamena udigu woge? (Tara hena mafano.)

⁹ Posiruwo soudigu, ove kukara nosinka unene kukanderera kwaJehova ndi? Ndi ove kulizuvha eroroko unene mokulironga? Diworoka asi Jehova kukwata egano nawa-nawa ukaro woge. Yipo nye, nampili yikare asi ove kuna kanderere ekanderero lyesupi, kara nehuguvaro asi Jehova nga ku pa eyi ono hepa. (Efe. 3:20) Nsene asi ayo kukukarera udigu kuresa nokulironga morwa ove kuna kuvera ndi ono roroka ndi ono kara nosinka sosinene, ove kuvhura o purakene Bibeli ndi yimbapiratjangwa yetu eyi va kwateka. Ove hena kuvhura o purakene nampili rusumo rwetu rumwe ndi vidiyo zimwe ezi za kara ko-jw.org. Pokukanderera kwaJehova ntani pokupapara malimbururo moBibeli ntani moyininke yimwe eyi a gava Jehova, ove ngoso kuna kumupulisira yipo a ku nkondopeke.

10. Ngapi omu vanavazinyetu ava tu nkondopeke?

¹⁰ Jehova kuvhura kuruganesa vanavazinyetu va tu nkondopeke. Awo kuvhura va tu hengagwide apa atu ligwanekere noudigu ndi apa ayi tu digopere kusikisa mo situmbukira soudigu. (Koros. 4:​10, 11) Unene po twa hepa vakaume poyiruwo ‘yomaudigu.’ (Yis. 17:17) Vanavazinyetu kuvhura kutupa eyi twa hepa nokutuhengagwida ntani nokutukorangeda tu twikire kukarera Jehova noulimburukwi. Koneka omu  Mariya, ozina vaJesus va gwene nonkondo dokutunda kwava wopeke.

11. Morwasinke Mariya ga heperere nonkondo?

¹¹ Mariya ga hepere nonkondo yipo a rugane mpango zaJehova. Gazara tupu sinka esi ga kere naso apa muengeli Ngabiliyera ga mu tanterere asi nga kara nezimo nampili ngomu ga dilire kukwara. Posiruwo sina, age simpe kapi ga rera rumwe munona gwanyamwendi, nye nampili ngoso age ga hepere kupakera mbili mumatigona ogu ga vhulire kuyakara Mesiyasa konyima. Age kapi ga ligwanekera rumwe panyama nomugara, nye ga hepere kutantera Josefa asi ana kara nezimo. Oso nampo kwa kere sininke soudigu kurugana.—Ruk. 1:​26-33.

12. Kuliza naRukasa 1:​39-45, ngapi omu Mariya ga gwene nonkondo edi ga hepere?

¹² Ngapi omu Mariya ga gwene nonkondo dokusikisa mo situmbukira esi sokulikarera ntani soudigu? Age kwa pulire evatero kwava wopeke. Pasihonena, age kwa pulire Ngabiliyera yipo a mu pe ko mauzera gomanzi kuhamena situmbukira esi. (Ruk. 1:34) Konyima tupu zosiruwo, age kwa zire “kosirongo sokonondundu” saJuda nokukadingura ekoro lyendi Elisabeta. Oro kwa kere rugendo roruwa. Elisabeta kwa pandadekere Mariya ntani Jehova kwa mu ruganesere yipo a uyunge uporofete wokuhamena munaMariya gomumati ogu ngava hampuruka. (Resa Rukasa 1:​39-45.) Mariya kwa uyungire asi Jehova “kwa rugana yininke yoyinene nokuwoko kwendi.” (Ruk. 1:​46-51) Jehova kwa nkondopekere Mariya kupitira mwaNgabiliyera naElisabeta.

13. Yisinke ya horokere apa munazinyetu gomukadi gomoBolivia ga pulire evatero kovapuli vakwawo?

¹³ Ngwendi Mariya, nove kuvhura o gwane nonkondo dokutundilira kovanavazinyetu. Munazinyetu gomukadi Dasuri ga hepere nonkondo dokufana ngoso. Oguhwe kwa verere unene ntani uvera wawo kapi wa kere nouhaku ntani apa va kere mosipangero, age ga hetekerere ko kuvavatera paapa ga hulira. (1 Tim. 5:4) Ayo kapi ya kere ureru. Age kwa tanta asi: “Yiruwo yoyinzi ame kwalizuvhire asi kapi tani vhuru kutwikira.” Pomuhowo, age kapi ga pulire evatero kovakwawo. Age kwa tente asi: “Ame kwalitanterere nyamwange asi kapi nina hara kuninkisa vanavazinyetu va roroke. Jehova yige na pa nge evatero eli nina hepa. Nye konyima yipo na dimbwilire asi nsene niligusa ko kovanavazinyetu, ame ngoso kuna kuhetekera ko kukohonona po udigu pwanyamwange.” (Yis. 18:1) Dasuri kwa tokwere kutjangera vakaume vendi wongandi kuhamena ukaro wendi. Age kwa tanta asi: “Yosili kapi tani vhuru kuyifaturura nayinye kuhamena omu vanavazinyetu va hengagwidire nge. Awo ngava twara nondya kosipangero ntani ngava resere nge novelise dokuhengagwida. Yosili ayo kuhafesa pokudiva asi kapisi nyoselike tuna kara. Ose kwa hamena kepata lyaJehova lyenene eli nali vhura kutuvatera nokulira kumwe nose ntani nokutukorangeda tu twikire kukarera Jehova.”

14. Morwasinke natu tambwira evatero lyokutunda kovakuronambunga?

¹⁴ Nkedi zimwe omu Jehova a tu pe nonkondo kuna kara kupitira movakuronambunga. Awo kuna kara mauhwi aga a ruganesa mokutunkondopeka nokutupwizumukisa. (Jes. 32:​1, 2) Yipo nye, nsene ono kara nosinka, tantera vakuronambunga yinka yoge. Ano nsene kuna kukupa evatero, litambura. Jehova kuvhura a ku nkondopeke kupitira movakuronambunga.

15. Ehuguvaro musinke va kara nalyo Vakriste navenye?

¹⁵ Matumbwidiro aga ga kara moBibeli kuvhura kutupa ehuguvaro nononkondo tu twikire kukarera Jehova. (Rom. 4:​3, 18-20) Vakriste vamwe va kara nehuguvaro lyokukaparukira narunye meguru, ano vamwe va kara nehuguvaro lyokukaparukira narunye paapa pevhu moparadisa. Ehuguvaro lyetu lyokomeho  kutunkondopeka tu lididimikire maudigu, tu zuvhise mbudi zongwa ntani tusikise mo yitumbukira yetu yokulisiga-siga mombungakriste. (1 Tes. 1:3) Ehuguvaro lyokulifana kwa nkondopekere mupositoli Paurusa.

16. Morwasinke mupositoli Paurusa ga heperere nonkondo?

¹⁶ Paurusa ga hepere nonkondo. Mombilive ezi ga tjangerere Vakolinte, age kwa lihetakanesere mwene kosipako serova. Age kwa mu ‘kundurukidire maudigu nakunye,’ ‘nokukara nepiyagano’ ‘nokumuhepeka’ ‘nokumutoona.’ Eparu lyendi kwa kere mosiponga. (2 Kol. 4:​8-10) Paurusa kwa tjenge nonkango odo morugendo rwendi rwautatu routumwa. Ano konyima zapa ga tjenge nonkango odo, age kwaligwanekerere nomaudigu gomanzi. Age kwaya ligwanekerere nonyanya zokutunda kovantu, kwa mu kwete, sikepa kwa mu tekerere ntani kwa mu tulire modorongo.

17. Kuliza no 2 Vakolinte 4:​16-18, yisinke ya vaterere Paurusa a twikire kulididimikira maudigu gendi?

¹⁷ Apa Paurusa ga demenene kehuguvaro lyendi, age kwa gwene nonkondo yipo a twikire kulididimikira. (Resa 2 Vakolinte 4:​16-18.) Age kwa tanterere Vakolinte asi nampili ‘rutu rwendi ruzonauke’ kapi nayi pulisira oyo yi mu dompese. Paurusa kwa demenene kehuguvaro lyendi. Ehuguvaro lyendi lyokukagwana mwenyo gwanarunye meguru kwa kere nomulyo unene kupitakana maudigu aga ga ligwanekerere nago. Paurusa kwa tedere ko kehuguvaro olyo, ano ngoyitundwamo, ‘mutjima gwendi ntani nonondunge dendi kwa kere yoyipe.’

18. Ngapi omu ehuguvaro lyankondopekere Tihomir nepata lyendi?

¹⁸ Ehuguvaro lyokomeho kwa nkondopekere munazinyetu gomugara Tihomir gomoBulgaria. Nomvhura dongandi dina ka pita, mumbyendi gomugara Zdravko kwa dogorokere mehudi lyetuwa. Ngoyitundwamo, Tihomir kwa guvire unene. Mokulididimikira udigu owo, nage namukadendi kwa gazadarere ko omu evhumbuko ngali ka kara. Age kwa faturura asi: “Pasihonena, ose kuzogera oku ngatu vhura kukaligwana naZdravko, nondya edi ngatu vhura kumuruganena ntani vantu ava ngatu vhura kuzigida yipo va wize apa ngava ka mu vhumbura. Ntani neyi  ngatu vhura kukazogera nendi kuhamena mazuva gopouhura.” Tihomir kwa tanta asi: “Pokudemenena kehuguvaro lyawo, ayo kunkondopeka epata lyawo litwikire kulididimika nokundindira mwaJehova apa nga vhumbura mumbyendi.

19. Yisinke nayi kuvatera yipo o nkondopeke ehuguvaro lyoge? (Tara hena efano.)

¹⁹ Ngapi omu nonkondopeka ehuguvaro lyoge? Pasihonena, nsene asi wa kara nehuguvaro lyokukaparukira narunye pevhu, resa eyi azi uyunga Bibeli kuhamena paradisa ntani nokuteda ko. (Jes. 25:8; 32:​16-18) Gazadara ko omu ngali ka fana eparu mouzuni woupe. Limona nyamoge mouzuni owo. Yinke ono kumona? Yinke ono kuzuvha? Ntani ngapi omu ono kulizuvha? Mokukuvatera o gazadare omu paradisa nga zi ka fana, tara mafano aga ga kara moyimbapiratjangwa yetu ndi tarera novidiyo domusika, pasihonena, Uzuni woupe ou ngau wiza, Just Around the Corner ndi Gazara apa. Nsene tu gazadara nkenye apa ehuguvaro lyetu lyomouzuni woupe, maudigu getu ngaga kara ‘gopokaruwogona ntani gomareru.’ (2 Kol. 4:17) Ehuguvaro eli ga tu pa Jehova kuvhura kutuvatera tulididimikire maudigu.

20. Ngapi omu natu gwana nonkondo nampili tudompe mutjima?

²⁰ Nampili tulizuvhe asi tuna dompo mutjima, “kukara naKarunga, tatu fundu.” (Epis. 108:13) Jehova ga ku pa nare yininke eyi wa hepa yipo o gwane nonkondo dokutundilira kwendi. Yipo nye, nsene ono hepa evatero yipo o sikise mo situmbukira soge nokulididimikira udigu ndi o twikire kuhafa, kanderera kwaJehova ntani rugana elirongo lyanyamoge lyoBibeli. Tambura ekorangedo lyokutundilira kovapuli vakweni. Litulira po nkenye pa siruwo sokugazadara ko kehuguvaro lyetu. Makura ngayi ‘kukondopeka unene yipo ngo vhure kulididimikira nawa-nawa noruhafo yeeyi Karunga kwa kara nononkondo dononene.’—Koros. 1:11.