Vanavazinyetu kwa rugene unene ure wokupitakana mvhura zimwe mokudika sitasi zoradio WBBR moAmerika. Pomuhowo awo kwa zeresere evango yipo va tunge po nzugo zonene zovarugani ntani nonzugo zokutura yiruganeso. Apa va mene kutunga nonzugo odo, yipo va tamekere kupangerera sitasi zoradio. Pwa kere hena maudigu gamwe aga va hepere kukohonona po.

Vanavazinyetu ava va tulire evera lyokuninkisa sitasi si kwateke, kwava digoperere kulitura. Evera olyo kwa sikire ponometa 91 monaure, alyo kwa litulire pokatji komapirangi gavali aga ga hulire ponometa 61. Pomuhowo kapi ya va tompokere. Mokumona asi vanavazinyetu kwa huguvarere mwaJehova, ayo kwaya va tompokere. Calvin Prosser ogu ga lihamekere mosirugana oso kwa tente asi: “Ngano ya tu tompokere sikando sokuhova apa twa tulire evera lina, ose ngano twa linenepekere.” Vanavazinyetu kwa geve mfumwa kwaJehova. Simpe pwa kere udigu umwe hena.

Sitasi soradiyo posiruwo sina kwa kere sininke sosipe eyi yiyo ya tu digoperere kuranda yiruganeso. Vanavazinyetu yipo va gwene ko yiruganeso yimwe eyi va ruganesa nare. Mevango lyokuruganesa embako lyokuuyungira awo kwa ruganesere embako lyokoterefona. Masiku gamwe mwaMurongankuru, vanavazinyetu yipo va tokwere kuheteka sitasi ozo soradiyo. Awo va hepere elikwamo, yipo vanavazinyetu va dimbire nonsumo doUhompa. Munazinyetu Ernest Lowe kwa simwitira eyi ya horokere ezuva olyo, age uyunga asi ngomu va  dimbire, munazinyetu Judge Rutherford, b ogu ga kere ure sinano sokusika ponokilometa 25 kwa va zuvhire koradiyo zendi, yipo ga va belele.

Munazinyetu Rutherford kwa va tantere asi: “Hagekeni kuzogerera, one kuna kuzuvhika ngwendi yimbisi.” Vanavazinyetu kwa lifire nomuga makura yipo va dimisire, nye awo va yi divire asi sitasi soradiyo kwa rugene ntani va liwapaikilire kusiruganesa.

Mo-24 Murongankuru 1924, Munazinyetu Rutherford kwa uyungire koradiyo asi sitasi ngava zi ruganesa mokusikisa mo sirugana esi ga va sigira Kristusa. Age kwa uyungire hena asi sitambo sositasi oso kuna kara sokuvatera vantu navenye va kwate egano Bibeli ntani eyi siruwo esi tuna kuparuka sina karere nomulyo.

Sitasi oso soradiyo kwa si ruganesere nomvhura dokusika po-33, omu mwa hamenene malikwamo aga ga tembe kovantu vaKarunga.

MwaPembankuru 1924, Valirongi woBibeli kwa kere nosigongi moColumbus, Ohio. Valirongi woBibeli kwa tundilire koyirongo yokulisiga-siga ntani awo kwa purakenene koyiuyungwa momaraka ngwendi Ruarabiya noRuingilisa noRufransa noRundovesi noRugereka noRuhungarian noRuitalian noRulithuanian noRupolish noRurusia nomaraka gamwe gomoScandinavia ntani Ruukraine. Vantu kwa purakenene koyiuyungwa yimwe eyi ya pitilire koradiyo ntani vanavazinyetu kwa pulire vatjangi wonosaitunga va tjange yirongwa eyi ya pitilire posigongi.

Moune 24 Pembankuru, vanavazinyetu wokupitakana po-5 000 kwa ka zuvhisilire mositata omu sa karerere sigongi. Awo kwa hanesere nobuke dokusika konyara 30 000 ntani nokutameka malirongo goBibeli gomanzi. Ruhungu kwa tente asi ezuva eli “kwa kere ezuva lyoruhafo unene.”

Moutano 25 Pembankuru, mosiuyungwa simwe samunazinyetu Rutherford age kwa resere nonkango edi da tulire poruzera yirugana yovampitisili womaukarelikarunga. Age kwa uyungire nouradi asi: “Vanapolitika nomaukarelikarunga ntani vanangesefa kunyokesa vantu va lironge usili kuhamena Uhompa waKarunga ou nga ruganesa Karunga mokutungika vantu.” Age kwa kwa twikilire kuresa nonkango hena dimwe edi da tente asi  vantu owo mepuko va kara morwa awo kukwatesa ko mbunga ezi ava tumbura asi League of Nations ndi elipakerero lyonomuhoko nokuuyunga asi azo kuna kara nkedi ezi ana kupangera Karunga vantu. Valirongi woBibeli va hepere uradi yipo va zuvhisire vantu mbudi ozo.

Ruhungu kwa tente kuhamena sigongi esi sa kere moColumbus asi: “Aso kwa nkondopekere epuro lyovanavazinyetu woupampi. Sigongi kwa nkondopekere vanavazinyetu va zuvhise nouradi nampili momarwaneso.” Leo Claus ogu ga kere posigongi oso kwa uyungire asi: “Konyima zosigongi, ose kwa hefe kutantera ko vantu womomukunda gwetu kuhamena mbudi ozo.”

MwaSikukutu, Valirongi woBibeli kwa tamekere kuhanesa mamiliyona goyitratate omu mwa hamenene mbudi ezi ga resere munazinyetu Rutherford zokutura poruzera vampitisili womaukarelikarunga. Mokadoropagona kaOklahoma moAmerika, Frank Johnson kwa hanesere yitratate ntani ga hepere kundindira nominute 20 yipo vanavazinyetu va ya mu piture. Age kapi ga vhulire kundindilira pevega eli va vhulire kumumona morwa koveli vagara ava sa handukisire sirugana sendi sokuzuvhisa ntani kwa mu paparere. Munazinyetu Johnson yipo ga tokwere kuvanda mongereka ezi za kere pepi. Mongereka kapi mwa kere vantu, makura yipo ga tulire sitratate moBibeli zapastore ntani poyipundi nayinye eyi ya kere mongereka. Age kwa yi rugene usimbu-simbu. Mokumona asi age kwa kere nosiruwo, age kwa zire hena monongereka mbali a ka sige yitratate.

Frank kwa zire pevango eli ga ka ndindilire vanavazinyetu. Age kwa vende konyima zositasi esi ava nwisire maholi yipo va dire kumumona vagara ava va mu paparere. Vagara owo kwa mu paparere nye kapi va mu gwene. Apa vagara owo va zire, vanavazinyetu ava va zuvhisilire momukunda ogo, yipo va ya mu pitwire nokusinga va ze.

Munazinyetu gumwe kwa uyungire asi: “Apa twa singire tu tunde modoropa ozo, ose kwa pitire pepi nonongereka odo ntatu.” Vantu wokusika konyara 50 kwa sikeme komeho zankenye ngereka. Vamwe kwa resere yitratate oyo ano vamwe kwa yi likidire pastore gwawo. Ose kwa tundire po usimbu yipo tu dire kukara moudigu. Ose kwa pandwire Jehova kweyi ga tu vaterere tu zuvhise mbudi, va hana kutukwata.

Valirongi woBibeli womoyirongo yapeke nawo kwa zuvhisire nouradi. Mosirongo saFransa munazinyetu Józef Krett kwa zuvhisilire vanamina ava va tundire koPoranda. Age kwa mu pulire a ka gave siuyungwa sosiparatjangwa “Vafe ntaantani ngava vhumbuke.” Apa vanavazinyetu va zigidire vantu kosiuyungwa oso, muruti gomodoropa ozo kwa tanterere vantu womongereka zendi va dire kuza ko. Nye nampili ngoso, vantu kwa zire ntani vantu wokupitakana po-5 000 kwa kere posiuyungwa oso kukwatera mo muruti. Munazinyetu Krett kwa pulire muruti a uyunge ko yuma kuhamena epuliro lyendi, nye age kwa nyokere. Konyima zosiuyungwa, munazinyetu Krett kwa geve yitratate nayinye kovantu morwa awo kwa here kudiva ko yoyinzi kuhamena Bibeli.—Amosa 8:11.

Claude Brown kwa zire a ka zuvhisire moAfrika mosirongo saGhana. Yiuyungwa ntani noyimbapiratjangwa eyi ga geve kwa ninkisire usili u lihane usimbu mosirongo oso. John Blankson ogu ga lirongerere yonomutji, ezuva limwe nage kwa purakenene siuyungwa samunazinyetu Brown. Age kwa yi dimbwilire usimbu asi ana gwana usili. John  kwa tanta asi: “Ame kwa hefe morwa usili ou na gwene ntani ngani tantere ko vanasure vakwetu.”

John ga yi dimbwilire asi Bibeli kapi azi rongo asi karunga mutatu-gumwe. Ano ezuva limwe yipo ga tokwere kukadingura muruti yipo a ka mu pure kuhamena karunga mutatu-gumwe. Muruti yipo ga mu tjidire nokuzigira asi: “Ove kapisi o Mukriste, ove kwa hamena kwaSatana. Pwaga mo omu!”

Apa John ga ka sikire kembo, age kwa tjangerere muruti mbilive asi ngava ligwane va zogere kuhamena erongo lyakarunga mutatu-gumwe. Muruti yipo ga limbwilire John a ze momberewa zamitili, mitili yipo ga mu pulire nsene yige ana tjangere muruti mbilive.

John yipo ga limbwilire asi: “Nyame na zi tjanga.”

Mitili kwa pangerere John a tjangere muruti mbilive yipo a hundire egusiropo. John yipo ga tjenge asi:

“Mitili kuna tantere nge ni tjange mbilive zokuhundira egusiropo, nye nani yirugana tupu nsene no yi pura asi ove kuronga marongo goyipempa.”

Mitili yipo ga mu pulire asi: “Blankson, eyi yiyo ono hara kutjanga ndi?”

“Nhi, yiyo nani tjanga.”

“Ngesi tatu kutjida mo mosure. Ngapi no tjangera muruti gomongereka zepangero yininke yokufana ngoso ntani nokundindira asi epangero li ku pe yirugana?”

“Mitili, nani kapi atu mu pura mapuro apa atu dili kukwata egano yininke yimwe eyi omu tu rongo?”

“Yimo, one kupura mapuro.”

“Mitili, oyo yiyo ka yi horokere. Muruti ka tu rongere Bibeli yipo kani mu pulire epuro. Morwasinke nani mu tjangerera ni hundire egusiropo nsene kapi ana kuvhura kulimburura epuro?”

Blankson kapi ga hundilire egusiropo ntani kapi va mu tjidire mo mosure.

Ruhungu kwa uyungire kuhamena yirugana eyi va sikisire mo momvhura asi: “Ose kuvhura kukwatesa ko nonkango daNdafita edi ga uyungire asi: ‘Ove kwa pa nge nonkondo dokurwisa.’ (Episarome 18:39) Ose twa gwana ekorangedo momvhura ezi morwa twa limonena omu Jehova ga tu vatera . . . Vakareli vendi . . . kwa zuvhisa mbudi zongwa noruhafo.”

Kehagero lyomvhura, vanavazinyetu kwa tulire po mawapaiko yipo va tulise po sitasi simwe soradio. Sitasi simwe kwa si dikilire pepi naChicago moAmerika. Sitasi esi ngava si tumbura asi WORD. Vanavazinyetu kwa ruganesere evera lyononkondo eli lya vhulire kukwatekesa sitasi nampili koure yipo va zuvhise mbudi zoUhompa komavango gokoure dogoro mosirongo saCanada.

Mo-1925, Jehova kwa vaterere Valirongi woBibeli va kwate egano mauzera gemEhororo egaununo 12. Ekwatogano eli kwa pundukisire vamwe. Nye alyo kwa hafesere vamwe morwa va kwete egano eyi ya horokere meguru ntani nomu ya kundamene vakareli vaJehova vepevhu.