1-2. Yisinke ya horokere apa varongwa vaJesus vavali va zire koEmausi?

 MOMAZUVA 16 Nisani mvhura 33, varongwa vaJesus kwa guvire ntani kwa kere nowoma. Varongwa vavali kwa tundire moJerusarema va ze koEmausi mukunda ogu gwa likara naJerusarema nokilometa dokusika poyiha 11. Vagara owo kwa guvire unene morwa Jesus mugara ogu ngava kwama kwa mu dipagere. Awo kwa zumbanesere ehuguvaro lyawo kuhamena eyi nga ya rugana Mesiyasa. Nye koyili yimwe eyi ya horokere.

² Mugara gumwe ogu va dilire kudiva kwa tamekere kugenda nawo. Varongwa owo kwa mu tanterere yininke yoyidona eyi ya horokerere Jesus. Makura mugara ogo yipo ga va tanterere eyi ngava dira kudivara. ‘Age kwa va fatwililire Matjangwa kutundilira kwaMosesa dogoro kovaporofete navenye, kuhamena konda zeyi Mesiyasa ga heperere nokufa.’ Apa va ka sikire moEmausi, makura yipo va dimbwilire asi mugara ogo, Jesus ogu va vhumbwire koufe. Gazara tupu omu va hefe unene varongwa apa va dimbwilire asi Mesiyasa muzuni.—Ruk. 24:13-35.

3-4. Yisinke ya horokerere varongwa vaJesus ntani yisinke natu ka lironga mosirongwa esi? (Yirugana 1:3)

³ Jesus kwa monekerere varongwa vendi yikando yoyinzi momazuva gendi 40 gokuhulilira pevhu. (Resa Yirugana 1:3.) Mosiruwo nasinye oso, Jesus kwa korangedere varongwa vendi  ava va guvire, yipo va hafe ntani va kare nouradi wokuzuvhisa nokuronga mbudi zongwa zoUhompa. a

⁴ Ose kugwanena mo mauwa pokulironga eyi ga rugene Jesus momazuva gendi gokuhulilira pevhu. Mosirongwa esi tatu ka zogera omu Jesus ga ruganesere siruwo sendi (1) a korangede varongwa vendi (2) a va vatere va kwate nawa egano Matjangwa ntani (3) a va deure yipo ngava gwane yitumbukira yoyinene komeho. Mwankenye sitwa, natu ka tara omu natu honena Jesus.

KORANGEDA VANAVAZINYETU

5. Morwasinke varongwa vaJesus va heperere ekorangedo?

⁵ Varongwa vaJesus kwa hepere ekorangedo. Morwasinke? Morwa vamwe kwa sigire mambo nomapata ntani nonongesefa yipo va kwame Jesus. (Mat. 19:27) Vamwe kapi ngava va tekura nawa morwa yeeyi va kere varongwa vaJesus. (Joh. 9:22) Awo kwa tulire po malizambero ogo morwa va yi pulire asi Jesus kwa kere Mesiyasa getumbwidiro. (Mat. 16:16) Apa Jesus va mu dipagere, awo kwa guvire morwa kapi va divire eyi nayi kwama ko.

6. Yisinke ga rugene Jesus konyima zapa va mu vhumbwire?

⁶ Jesus ga yi divire asi ayo kapi ya kere epuko kovarongwa vendi va guve apa ga fire. Age ga yi divire asi awo kapi va guvire morwa asi kapi va kere nepuro. Yipo nye tupu va mu vhumbwire age kwa tamekere kukorangeda. Pasihonena, age kwa monekerere Mariya Mangadarena ogu ga kere pontoko oku ta lili. (Joh. 20:11, 16) Jesus kwa monekerere hena varongwa vendi vavali ava vana tumbura ketamekero lyosirongwa esi. Age kwa monekerere hena mupositoli Peturusa. (Ruk. 24:34) Yisinke natu lirongera ko kosihonena saJesus? Tu zogereni eyi ya horokere apa Jesus ga monekerere Maria Mangadarena.

7. Kuliza naJohanesa 20:11-16, yisinke ga rugene Mariya pontoko ntani yisinke ga rugene ko Jesus? (Tara hena efano.)

⁷ Resa Johanesa 20:11-16. Mo-16 Nisani,  vakadi vamwe wovalimburukwi kwa zire ngurangura zonene kontoko ezi va tulire simpu saJesus. (Ruk. 24:1, 10) Tu zogereni sihorokwa saMariya Mangadarena. Apa Mariya ga ka sikire kontoko, simpu mwato, makura yipo ga dukire a ka tantere Peturusa naJohanesa. Tava kwama ngomu va dukire va ze kontoko. Apa vagara owo va mwene asi montoko mwato simpu, yipo va tengwire kembo. Nye Mariya kwa kere poopo makura ta lili. Age kapi ga yi divire asi Jesus pweli poopo. Jesus ga mwene omu Mariya ga mu lilire ta mu fire nkenda nokumuhengagwida. Makura ta monekere Mariya nokurugana yuma eyi ya mu hengagwidire unene. Jesus kwa mu uyungisire ntani kwa mu tanterere a ze kovarongwa vendi a ka va tantere asi age muzuni.—Joh. 20:17, 18.

8. Ngapi natu honena Jesus?

⁸ Ngapi natu honena Jesus? Kuvhura tu korangede vanavazinyetu va twikire kukarera Jehova ntani nsene tuna dimburura udigu ou vana kupita, twa hepa kuuyunga nawo nonkenda nokuvahengagwida. Tu tareni eyi ya horokerere munazinyetu gomukadi Jocelyn, apa ga fisire mumbyendi gomukadona mehudi lyenene. Age kwa tanta asi: “Ame kwa guvire unene makwedi gomanzi.” Munazinyetu gumwe namukadendi kwa mu zigidire kembo lyawo nokukamupurakena nawa ntani tava mu tantere asi age mulyo unene kwaJehova. Jocelyn kwa tanta asi: “Ame kwa lizuvhire ngwendi asi Jehova kwa ruganesere vanavazinyetu owo yipo va popere nge metondo lyefuta. Awo kwa vaterere nge ni twikire kukarera Jehova.” Nose kuvhura tu korangede wopeke pokuvapurakena nawa ngomu vana kututantera omu vana kulizuvha nokuvauyungisa monkedi zongwa ntani kuvakokorangeda va twikire kukarera Jehova.—Rom. 12:15.

VATERA VANTU VA KWATE NAWA MATJANGWA

9. Udigu musinke va kere nawo varongwa vaJesus ntani ngapi omu ga va vaterere?

⁹ Varongwa vaJesus va tambwire Nonkango daKarunga nokudisikisa mo. (Joh. 17:6) Awo kapi va kwete egano eyi Jesus ga fililire kositji ngwendi mukorokotji. Jesus ga yi divire asi awo kwa kere nomasinganyeko morwa kapi va kwete nawa egano Matjangwa, nye kapisi asi kapi va kere nepuro mwaJehova. (Ruk. 9:44, 45; Joh. 20:9) Yipo ga va vaterere va kwate nawa egano Matjangwa. Pasihonena, tu tareni omu ga va vaterere apa ga monekerere varongwa vavali monzira zawo zokuza komukunda gwaEmausi.

10. Ngapi omu Jesus ga vaterere varongwa vendi va kwate egano asi age kwa kere Mesiyasa? (Rukasa 24:18-27)

¹⁰ Resa Rukasa 24:18-27. Konekeni asi Jesus kapi ga hovere kutantera vagara vena asi yige yilye. Nye age kwa va pulire mapuro. Morwasinke? Nampo age kwa here va mu tantere omu va lizuvhire neyi va gazarere. Vagara owo va yi rugene. Awo kwa mu tanterere asi awo kwa ndindilire Jesus a zowore Vaisraeli mepangero lyoVaroma. Konyima zokumutantera yinka yawo, Jesus kwa ruganesere Matjangwa a vatere vagara owo yipo va kwate nawa egano mauporofete aga ga sikilire mo. b Ano mezuva lyoolyo kongurova, Jesus kwa monekerere hena varongwa vamwe nokuvafatwilira mauporofete ogo. (Ruk. 24:33-48) Yisinke natu lirongera ko kosihorokwa esi?

11-12. (a) Yisinke natu lirongera ko omu Jesus ga rongere mausili gomoBibeli? (Tara hena mafano.) (b) Ngapi omu Nortey ga mu vaterere murongi gwendi goBibeli?

¹¹ Ngapi natu honena Jesus? Nsene kuna kuronga varongwa vetu woBibeli, twa hepa kuruganesa  mapuro gomawa yipo tu dive eyi vana kugazara. (Yis. 20:5) Nsene ono kwata egano omu vana kulizuvha, va likida omu nava gwana matjangwa aga naga va vatera moukaro wawo. Wa ha va tantera eyi nava rugana. Nye va vatera va dive nawa omu nava ruganesa Matjangwa ntani nomu nava ga sikisa mo. Tu tareni sihonena samunazinyetu gomugara Nortey ogu ga tunga moGhana.

¹² Nortey kwa tamekere kulironga Bibeli apa ga kere nonomvhura 16. Konyima tupu zosiruwo, vekoro lyendi kwa mu rwanesere. Yisinke ya mu vaterere a twikire kulironga Bibeli? Murongi gwendi goBibeli kwa ruganesere Mateusa egaununo 10 komeho a ya ligwanekere nomahepeko mokumufatwilira asi Vakriste wousili ngava va hepeka. Nortey kwa uyunga asi: “Apa mahepeko ga tamekere, na yi pulire nawa-nawa asi nina gwana usili.” Murongi gwendi goBibeli kwa mu tanterere hena a tede ko ketjangwa lyaMateusa 10:16, yipo a takamese mokupira kuretesa po nomutangu nye a kare nefumadeko nsene kuna kuzogera novanekoro kuhamena ukareli wendi. Konyima zapa Nortey ga gwene ekuho, age kwa here kukara muzuvhisi gokukarerera, nye oguhwe kwa ndindilire asi a ze kounivesiti. Mevango lyokutantera Nortey eyi na rugana, murongi gwendi goBibeli kwa ruganesere mapuro nonompango domoBibeli edi da mu vaterere a ture po etokoro lyouhunga. Makura Nortey yipo ga tamekere kurugana uzuvhisi wokukarerera. Oguhwe yipo va mu tjidire mo membo. Ngapi ga lizuvhire Nortey? Age kwa uyunga asi: “Ame nayi pura nawa-nawa asi na tulire po etokoro lyouhunga.” Apa atu vatere vakwetu va tede ko koMatjangwa, ose kuvavatera va nkondopeke epuro lyawo ntani va twikire kukarera Jehova.—Efe. 3:16-19.

DEURA VAGARA VA KARE “VAGARA NGOMAUHWI”

13. Yisinke ga rugene Jesus mokudivilisa asi sirugana soGuhwe si ze komeho? (Vaefeso 4:8)

¹³ Apa Jesus ga kere pevhu, age kwa sikisire mo nawa-nawa sirugana esi va mu pere oGuhwe. (Joh. 17:4) Nye Jesus kapi ga gazarere asi gelike tupu gokuvhura kusikisa mo eyi ga here Jehova. Nomvhura ntatu noharufa edi ga rugene sirugana sokuzuvhisa, age kwa dewire vakwawo yipo va sikise mo sirugana sokuzuvhisa. Komeho a tengure meguru, Jesus kwa pere varongwa vendi situmbukira sokupakera mbili nonzwi daJehova nokupitisira sirugana sokuzuvhisa  nokuronga. Vamwe vawo nampo kwa kere konhi zonomvhura 30. (Resa Vaefeso 4:8.) Ngapi omu Jesus ga ruganesere mazuva gendi gokuhulilira 40 pevhu, yipo a vatere vagara wovalimburukwi wokurugana unene yipo va wapere kukara ‘vagara ngomauhwi?’

14. Yisinke Jesus ga rongere varongwa vendi momazuva 40 gokuhulilira aga ga kere pevhu? (Tara hena efano.)

¹⁴ Jesus kwa pere varongwa vendi mapukururo aga va hepere monkedi zongwa. Pasihonena, age kwa pukwilire varongwa vendi vamwe apa ga dimbwilire asi vana kara nomasinganyeko. (Ruk. 24:25-27; Joh. 20:27) Age kwa va tanterere va demenene kukorangeda vantu vaJehova mevango lyokukondjera yimaliwa. (Joh. 21:15) Age kwa va diworokesere asi kapisi va hetakanese yitumbukira eyi va kara nayo mosirugana saJehova neyi va kara nayo vakwawo. (Joh. 21:20-22) Ntani age kwa va pukwilire kuhamena magano gepuko aga va kere nago kuhamena Uhompa ntani ga va vaterere va demenene kosirugana sokuzuvhisa mbudi zongwa. (Yirug. 1:6-8) Yisinke nava lirongera ko vakuronambunga kwaJesus?

15-16. (a) Ngapi omu vakuronambunga nava honena Jesus? Faturura. (b) Mauwa musinke ga gwanene mo Patrick mepukururo?

¹⁵ Ngapi omu vakuronambunga nava honena Jesus? Va hepa kudeura vanavazinyetu wovagara, kukwatera mo vadinkantu yipo va gwane yitumbukira mombungakriste. c Vakuronambunga va hepa kudiva asi vanavazinyetu ava vana kudeura kapi tava vhuru kusikisa mo nayinye. Va hepa kupukurura vanavazinyetu monkedi zongwa yipo va kare noudivi ntani va dive eyi ya karera nomulyo kulinunupika nokulimburukwa ntani nokuvatera vanavazinyetu.—1 Tim. 3:1; 2 Tim. 2:2; 1 Pet. 5:5.

¹⁶ Tu tareni uwa ou ga gwanene mo munazinyetu Patrick mepukururo. Apa ga kere mudinkantu, age nga uyunga nonkango donondona ntani kapi nga tekura nawa vakwawo kukwatera mo vanavazinyetu wovakadi. Mukuronambunga gumwe ga yi dimbwilire asi Patrick ga hepere kutura po malitjindjo, makura yiyo  ga mu pere mapukururo gokuvyukilira monkedi zongwa. Patrick kwa tanta asi: “Na hafa kweyi mukuronambunga gwina ga tanterere nge eyi nani wapukurura. Nare ngayi guvisa nge apa ngani mono vanavazinyetu vamwe wovagara kuna kugwana yitumbukira eyi na hara. Nye epukururo lyomukuronambunga kwa vaterere nge ni linunupike nokutwikira kuhara vanavazinyetu mevango lyokudemenena mokugwana yitumbukira.” Ngoyitundwamo, Patrick kwa ya kere mukuronambunga apa ga kere nonomvhura 23.—Yis. 27:9.

17. Ngapi omu Jesus ga yi likidire asi ga huguvarere varongwa vendi?

¹⁷ Jesus kwa pere varongwa vendi situmbukira sokuzuvhisa nokuronga. Varongwa nampo kwa gazarere asi kapi tava vhuru kusikisa mo sirugana oso. Nye nampili ngoso, Jesus ga kere nehuguvaro asi kuvhura va si sikise mo, eyi yiyo gava tanterere asi: “Moomu ga tuma nge Tate, name yimo nina kumutuma.”—Joh. 20:21.

18. Ngapi omu vakuronambunga nava honena Jesus?

¹⁸ Ngapi omu vakuronambunga nava honena Jesus? Vakuronambunga ava va kara nonondunge kudeura vanavazinyetu yipo va sikise mo yitumbukira yimwe. (Fil. 2:19-22) Pasihonena, vakuronambunga kuvhura va pure vanona nawo va vava tere kuzeresa Sinyanga soUhompa nokusipakera mbili. Vakuronambunga kuvhura va pe vanavazinyetu wovagara sirugana songandi nokuvadeura omu nava si rugana ntani nokuvasiga va si rugane pwavene. Mukuronambunga gomupe gedina Matthew kwa tanta asi age kupandura mukuronambunga gumwe ogu ga mu dewire omu na sikisa mo situmbukira songandi ntani kweyi ga mu huguvarere asi nga si sikisa mo. Age kwa tanta asi: “Ame kwa gwanena mo mauwa apa va vaterere nge ni lirongere ko komapuko gange ntani ni dive eyi ngani rugana.” d

19. Yisinke tuna tokomene kurugana?

¹⁹ Jesus kwa korangedere nokuronga ntani kudeura wopeka momazuva 40 gokuhulilira apa pevhu. Tu tokomeneni kukwama sihonena sendi. (1 Pet. 2:21) Age nga tu vatera tu yi sikise mo. Age kwa tumbwidira asi: “Ame none ngani kara dogoro pouhura wouzuni.”—Mat. 28:20.