SIRONGWA SELIRONGO 40
RUSUMO 30 Guhyetu naKarunga naKaume gwange
Jehova ‘kuverura ava ava dompo nomutjima’
“Age kuverura ava va gwa nomutjima, ta dingi yironda yawo.”—EPIS. 147:3.
OKU SINA DEMENENE SIRONGWA
Jehova kupakera sinka ava vana dompo nomutjima. Sirongwa esi tasi ka zogera omu Jehova a tu hengagwida nomu a tu vatere tu hengagwide wopeke.
1. Ngapi a lizuvhu Jehova kuhamena vakareli vendi?
JEHOVA kumona nayinye eyi ava ligwanekere nayo vakareli vendi. Age kutumona apa atu hafa napa atu guwu. (Epis. 37:18) Ayo kumuhafesa apa atu mu karere paapa twa hulira, nampili ngomu atu ligwanekere nomaukaro aga aga tu guvisa. Jehova kwa hara unene kutuvatera nokutuhengagwida.
2. Yisinke a ruganene Jehova owo vana dompo nomutjima ntani ngapi natu gwana epakerombili lyendi?
2 Episarome 147:3 kutanta asi: Jehova ‘kudinga yironda’ yava vana dompo nomutjima. Etjangwa eli kuna kugava efano momagazaro getu omu Jehova ana kudinga nonkenda sironda somuntu ogu ana remana. Yisinke natu rugana yipo Jehova a tu pakere mbili? Tu tareni sifanekeso. Ndokotora ogu ga diva nawa sirugana sendi, yinzi a rugana mokuvatera muntu ogu ana remana yipo sironda si pore. Muntu ogu vana kuhakura nage ga hepa kukwama eyi ana kumutantera ndokotora ntani ngasi pora nawa sironda. Mosirongwa esi, tatu konakona eyi ga tanta Jehova moNonkango dendi kuhamena vantu ava vana dompo ntani neyi nava rugana yipo Jehova ava pakera mbili.
JEHOVA KUTUDIWOROKESA ASI OSE MULYO
3. Morwasinke vamwe ava lizuvhire asi kwato mulyo?
3 Uzuni ou tuna kuparuka, sinzi sovantu kapi va lihara-hara ntani awo kutara vakwawo asi kwato mulyo. Munazinyetu gomukadi Helen a kwa tanta asi: “Ame kwa kulira mepata lyonyanya ntani otate ngava tu tara ngwendi ose yininke yomawoko-woko.” Nove nampo va ku rugana momudona ntani nokukutara asi sininke somawoko-woko ngwendi moomu ya horokerere Helen, kuvhura yi kuninkise o lizuvhe asi kwato gokuvhura kukuhara nawa-nawa.
4. Kuliza noMapisarome 34:18, yisinke ga ku tumbwidira Jehova?
4 Nampili vantu va ku rugane momudona, diworoka asi Jehova ga ku hara ntani ove muntu gomulyo unene kwendi. Age “kukara pepi nava vana dompo nomutjima.” (Resa Episarome 34:18.) Nsene ove gumwe ogu wa ‘dompa mutjima,’ diworoka asi Jehova ga mwene yoyiwa momutjima goge yiyo ga ku kokera kwendi. (Joh. 6:44) Age ga liwapaikira nkenye apa kukuvatera morwa ove mulyo unene kwendi.
5. Yisinke natu lirongera ko kwaJesus omu nga tekura vantu ava ngava sense?
5 Pokukonakona sihonena saJesus, ose kuvhura tu lirongere ko omu Jehova a lizuvhu. Apa Jesus ga kere pevhu, age kwa fililire nkenda vantu ava ngava tara asi kwato mulyo. (Mat. 9:9-12) Apa mukadi ogu ga kere nouvera wounene ga kere nehuguvaro asi na veruka nsene na kwata kosikoverero saJesus, age kwa mu hengagwidire nokumupandadeka kepuro eli ga kere nalyo. (Mar. 5:25-34) Jesus kuhonena nawa-nawa nkareso zoGuhwe. (Joh. 14:9) Diva asi Jehova ga ku hara, age hena kuhafera nkareso nepuro ntani neharo lyoge kwendi.
6. Yisinke no rugana nsene ove kulizuvha asi kwato mulyo?
6 Yisinke no rugana nsene malizuvho gokulizuvha asi ove kwato mulyo ga twikira? Resa nokuteda novelise edi nadi kuvatera o mone asi ove mulyo kwaJehova. b (Epis. 94:19) Nyokera po kulipangura nsene kapi ono kuvhura kusikisa mo sitambo soge ndi kapi ono kurugana unene ngwendi vakweni. Jehova kapi a ndindire ko koge o rugane eyi no dira kuvhura. (Epis. 103:13, 14) Alyo kapisi epuko lyoge nsene vantu kwa kurugana yoyidona, Jehova nga pangura vantu ava ava hepeke vakwawo nye kapisi vava ava hepeke. (1 Pet. 3:12) Sandra ogu va hepekere pounona kwa tanta asi: “Nkenye apa ngani kanderere kwaJehova a vatere nge ni mone nkareso zongwa ezi a mono mwange.”
7. Ngapi yininke eyi ya tu horokera meparu nayi tu vatera mosirugana saJehova?
7 Jehova kuvhura a ku ruganese o vatere wopeke. Age kwa ku ninka o kare murugani nage mokuzuvhisa. (1 Kol. 3:9) Maudigu aga wa ligwanekera nago meparu nago ga kuninkisa o kwate nawa egano wopeke. Ove kuvhura o va vatere unene. Helen ogu twa tumbura keguru kwa mu vaterere, nage ngesi kuvatera wopeke. Age kwa tanta asi: “Ame ngani lizuvhu asi sininke somawokowoko, nye Jehova ga vatera nge ni lizuvhe asi ga hara nge ntani age kwa ruganesa nge yipo ni vatere wopeke.” Ngesi Helen muzuvhisi gokukarerera.
JEHOVA KUNA HARA TU YI PURE ASI GA TU GUSIRA PO
8. Yisinke ga tumbwidira Jehova mwaJesaya 1:18?
8 Vakareli vaJehova vamwe kulivera unene kononzo edi va tulire komeho ndi konyima zekuho. Tu diworokeni asi Jehova ga tu hara unene pokutupa sizoweseso. Yosili age ana hara tu tambure uhwi wendi. Jehova kwa tumbwidira asi ’nsene tu zogera nonkango nage,’ c eyi kutanta asi nonzo detu, age ngatu dongwenena po. (Resa Jesaya 1:18.) Tatu pandura sili unene Jehova kweyi ga divara nonzo detu danare ntani kweyi a dili kudivara yirugana yetu yoyiwa.—Epis. 103:9, 12; Heb. 6:10.
9. Morwasinke natu demenena kweyi tuna kurugana ngesi ntani yokomeho?
9 Nsene ove kulivera unene kononzo danare, kuna kukukorangeda o demenene kweyi ono kurugana ngesi ntani yokomeho. Tu tareni sihonena somupositoli Paurusa. Age kwa liverere kweyi nga hepeke Vakriste, nye ga yi divire asi Jehova ga mu gusilire po. (1 Tim. 1:12-15) Ngoso ga twikilire kugazara nonzo dendi danare? Age kwa nyokerere po magazaro ogo, moomu ga nyokerere po kugazara yininke eyi ga sikisire mo apa nga kwatesa ko ukareli woVajuda. (Fil. 3:4-8, 13-15) Paurusa kwa litulire mo unene mokuzuvhisa ntani kwa demenene yokomeho. Ngwendi Paurusa, kapi to tjindji yininke eyi ya horoka nare, nye kuvhura o hamberere Jehova ngesi nokugazadara ko meho zongwa ezi ga ku tumbwidira.
10. Yisinke natu rugana nsene twa koresere wopeke?
10 Kuvhura yi ku guvise nsene yininke eyi wa rugene nare ya koresere wopeke. Yisinke no rugana ko? Nsene kuvhura, va ruganena yoyiwa ntani va hundira egusiropo. (2 Kol. 7:11) Hundira Jehova a vatere ava wa koresa. Age nga ku vatera nava wa koresa, yipo mu twikire kumukarera ntani nokukara nombili.
11. Yisinke natu lirongera ko komuporofete Jona? (Tara hena efano .)
11 Lirongera ko komapuko goge, nye pwangesi pulisira Jehova a ku ruganese mwankenye eyi ana ku harere. Koneka sihonena somuporofete Jona. Jona kwa zire kwapeke mevango lyokuza koNinivhe oku ga mu tumine Jehova. Jehova kwa piswire Jona ntani ga lirongerere ko kepuko lyendi. (Jona 1:1-4, 15-17; 2:7-10) Jehova kapi ga hagekere kuruganesa Jona ngomuporofete. Jehova kwa tumine hena Jona koNinivhe, sikando esi Jona ga limburukwire. Maliverero komapuko gendi ganare kapi ga mu ninkisire a nyoke kutambura sirugana esi ga mu pere Jehova.—Jona 3:1-3.
Konyima zapa muporofete Jona ga parukire mezimo lyomfi, Jehova kwa mu tanterere hena a ze koNinivhe ntani noku ka divisa mbudi zendi. (Tara paragarafu 11)
JEHOVA KUTUHENGAGWIDA KUPITIRA MOMPEPO ZOKUPONGOKA
12. Ngapi omu Jehova a tu pe mbili apa atu ligwanekere nomaudigu gomanene?(Vafilipi 4:6, 7)
12 Jehova kuruganesa mpepo zendi zokupongoka yipo a tu hengagwide apa ayi tu horokere yininke yoyidona unene. Tu tareni eyi ya horokerere Ron naCarol. Munawo gomumati kwa lidipagere. Awo kwa uyunga asi: “Ou yiwo udigu wounene po twa ligwanekera nawo. Ngayi tu digopere kurara, poyiruwo oyo ngatu kanderere unene ntani twa kere nombili ezi va tumbura moVafilipi 4:6, 7.” (Resa.) Nsene kwa kuligwanekera noudigu, kuvhura o kanderere kwaJehova yikando yoyinzi ntani nkenye apa ono hara. (Epis. 86:3; 88:1) Hundira Jehova nkenye apa a ku pe mpepo zokupongoka. Age nga ku vatera nkenye apa.—Ruk. 11:9-13.
13. Ngapi mpepo zokupongoka azi tu vatere tu twikire kulimburukwa Jehova? (Vaefeso 3:16)
13 Wa ligwanekera noudigu ou wa ku gusire nonkondo? Mpepo zokupongoka ngazi ku pa nonkondo o twikire kulimburukwa Jehova. (Resa Vaefeso 3:16.) Tara sihonena saFlora. Mugara gwendi kwa honderere apa va kere vatumwa, makura yipo va lizumbire. Age kwa tanta asi: “Ame kwa guvire unene ntani yiyo yelike ngani gazara. Tani hundire Jehova mpepo zokupongoka yipo ni lididimikire. Jehova kwa pere nge nonkondo ni lididimikire udigu ou wounene.” Flora kulizuvha asi Karunga ga mu vatera yipo a huguvare unene mwendi ntani ga yi pura hena asi nga mu vatera komaudigu gendi nagenye. Age kwa uyunga hena asi: “Nonkango deMepisarome 119:32 kwa likida omu ga vatera nge Jehova. Ado kutanta asi: ‘Ame kuna hara ni duke monzira zoyipango yoge yeeyi ove ngo koreka mutjima gwange.’”
14. Yisinke natu rugana yipo tu gwane mpepo zokupongoka zonzi?
14 Yisinke no rugana konyima zokukanderera kwaJehova a ku pe mpepo zendi zokupongoka? Rugana eyi nayi kuvatera o gwane mpepo zokupongoka zonzi ngwendi kuza komapongo. Resa Bibeli nkenye ezuva, eyi ngayi kuvatera o kare nomagazaro gaJehova. (Fil. 4:8, 9) Pokuresa Bibeli, koneka yihonena yava va ligwanekerere nomaudigu ntani teda ko omu Jehova ga va vaterere va lididimikire. Sandra ogu tuna tumbura keguru kwa ligwanekerere nomaudigu gomanzi, age kwa uyunga asi: “Sihonena saJosefa kwa korangedere nge. Age kapi ga pulisilire maudigu noyininke yoyidona yi mu ninkise a dire kulimburukwa Jehova.”—Gen. 39:21-23.
JEHOVA KURUGANESA VANAVAZINYETU VA TU HENGAGWIDE
15. Wolye nava tu hengagwida ntani ngapi nava tu vatera? (Tara hena efano.)
15 Vanavazinyetu ‘kutuhengagwida’ momaudigu. (Koros. 4:11) Jehova kutulikida eharo kupitira movanavazinyetu. Awo kutuhengagwida pokutupurakena nawa ntani pokuyatudingura. Awo kuturesera novelise dokutukorangeda nokukanderera nose. d (Rom. 15:4) Parumwe, munazinyetu kututantera egano kuhamena Jehova eli nali tu vatera tu twikire kulididimikira. Vanavazinyetu kutuvatera mononkedi dimwe, pasihonena pokutupa nondya.
Vakaume wovawa kuvhura va tu hengagwide nokutuvatera (Tara paragarafu 15)
16. Yisinke twa hepa yipo wopeke va tu vatere?
16 Mokugwana evatero, twa hepa kupura. Vanavazinyetu kwa tu hara ntani vana hara kutuvatera. (Yis. 17:17) Nye awo pamwe kapi tava diva omu tuna kulizuvha ndi eyi tuna hepa. (Yis. 14:10) Nsene ono guwu, tantera ko vakaume woge ava va pama mepuro omu ono kulizuvha. Va tantera eyi ono hepa. Kuvhura o uyunge nomukuronambunga ndi vavali ava wa mangurukira. Vanavazinyetu vamwe wovakadi kuvarerupira kuuyunga namunazinyetu gomukadi ogu ga kara nelikwatakano lyewa naJehova.
17. Yisinke ayi tu ninkisa tu dire kuhara kugwana ekorangedo kovapuli vakwetu, nye yisinke natu rugana ko?
17 Nyokera po kukara nyovelike nkenye apa. Kukora oku ono kulizuvha kuvhura kukuninkisa o hare kulikarera. Pamwe vanavazinyetu kuvhura va dire kukwata egano omu ono kulizuvha ndi va uyunge yininke eyi nayi kukoresa. (Jak. 3:2) Nyokera po kuligusa kovanavanyoko morwa mapuko gawo. Mukuronambunga Gavin ogu ga kara nouvera wokuguva-guva kwa uyunga asi: “Yikando yoyinzi kapi ani hara kukara ndi kuzogera novakaume vange.” Gavin kukondja yipo a kare novanavazinyetu ntani age kugwanena mo uwa. Munazinyetu gomukadi Amy kwa uyunga asi: “Ayo kudigopera nge kuhuguvara vantu morwa eyi ya pita nge meparu. Nye ame kuna kukondja unene mokuhara vanavazinyetu nokuvahuguvara ngwendi moomu ayi rugana Jehova. Nayi diva asi ayo kuhafesa nge ntani naJehova.”
MATUMBWIDIRO GAJEHOVA KUTUHENGAGWIDA
18. Yisinke tuna kundindira ntani yisinke natu rugana ngesi?
18 Jehova ntaantani nga ka guse po yininke nayinye yoyidona ngwendi kukora koparutu nopamalizuvho. (Ehor. 21:3, 4) Posiruwo oso yininke nayinye eyi ya tu koresa “ngatu yi divara.” (Jes. 65:17) Moomu tuna lirongo Jehova ‘kudinga yironda yetu’ nampili mosiruwo setu. Ruganesa mawapaiko nagenye gaJehova yipo ga ku hengagwide nokukuvatera. Diworoka nkenye apa asi age ‘kukupakera mbili.’—1 Pet. 5:7.
RUSUMO 7 Jehova ove nonkondo detu
a Madina kwa ga tjindja.
b Tara kakende “ Jehova kukutara asi ove mulyo.”
c Konyima zokutantera Jehova nonzo detu, twa hepa kuyilikida asi twa litezurura nokumupura a tu gusire po ntani nokutjindja nkareso zetu. Nsene tuna tura nzo zonene, twa hepa kupura evatero kovakuronambunga.—Jak. 5:14, 15.
d Pasihonena, tara matjangwa aga ga kara konhi zosiparatjangwa “sinka” ntani “ehengagwido” mosimbapiratjangwa Matjangwa aga naga vatera Vakriste.
